Mautali Nakai a Koe ke Fakamatala he Magaaho Noa?
1. Ko e heigoa e fakataiaga ne fakakite kua maeke e fakamatala he magaaho noa ke lauia mitaki?
1 Maeke e fakamatala he magaaho noa ke lauia mitaki. Kua ha ha he Tohi Tapu e tau fakataiaga loga he fakamatala he magaaho noa ne fua mitaki. (Ioane 4:7-15) Ko e heigoa ka taute e tautolu ke mautauteute ma e vahega fakamatala nei?
2. Maeke fēfē he tau mena tui mo e tauteuteaga ha tautolu ke lagomatai a tautolu ke mautali ke fakamatala?
2 Tau Mena Tui mo e Tauteuteaga: He mailoga mitaki e tau mena tui mo e tauteuteaga ha tautolu he tau magaaho oti ka fakaatā a tautolu ke mukamuka ke talahau e tua ha tautolu ke he falu. (1 Timo. 2:9, 10) Ka fuafuakelea a tautolu ha ko e tauteuteaga, to liga fakaumiumi a tautolu ke fakamatala. Ka ko e ha tautolu a tauteuteaga maopoopo mo e meā ka fakalagalaga falu ke hūhū mai. Ma e fakatai, he o fenoga e hoa Fakamoli nukua tauteute mitaki, ne nonofo a laua he tapa he tagata Musilimi. He mailoga e tauteuteaga ha laua, ne hūhū e tagata taane ko e tau Kerisiano ka laua. Ne takitaki e mena nei ke he tolu e tulā he fakatutala Tohi Tapu.
3. He muitua ke he fifitakiaga a Iesu, fēfē e puhala ne kamata e koe e fakatutalaaga?
3 Kamata e Tau Fakatutalaaga: He magaaho ne feleveia a Iesu mo e fifine Samaria he vaipuna a Iakopo, ne kamata e ia e fakatutalaaga he ole ke he fifine ke age e vai ke inu a ia. Pihia foki, kua liga maeke ia tautolu ke kamata e fakatutalaaga he tala fakakū po ke talahau e hūhū mukamuka. Pete he fakauaua a tautolu he falu magaaho, he falanaki ke he lalagoaga a Iehova, kua maeke ia tautolu ke “fakamalolo” ke kamata e fakatutalaaga.—1 Tesa. 2:2.
4. Maeke fēfē a tautolu ke mautali ke fakamatala he magaaho noa?
4 Kumi e Tau Puhala: Tokologa e tagata fakailoa ne moua e tau puhala ke fakamatala he magaaho noa. Liu onoono ke he tau tuaga haau, ti manamanatu ke he tau tagata ka feleveia mo koe he tau aho takitaha. Uta fano mo koe e tau tohi kua lata mo e Tohi Tapu. Kia matakite, ti fakakite e fiafia ke he tau tagata ne takatakai ia koe. Ka manamanatu a koe ke he tau puhala ka fehagai a koe ki ai he aho, to liga mautali a koe ke fakamatala.—Filipi 1:12-14; 1 Pete. 3:15.
5. Ko e ha kua lata e fakamatala he magaaho noa ke fakatoka tuai?
5 Ha ha ia tautolu ua e kakano mitaki lahi ke moua e puhala ke fakamatala he magaaho noa—ko e fakaalofa ma e Atua mo e fakaalofa ma e katofia. (Mata. 22:37-39) He mailoga e mafiti he gahua fakamatala, kua lata ke fakatoka tuai ke fakamatala he magaaho noa. Kua lata ia tautolu ke mautali ke fakaaoga e tau magaaho oti kua latatonu ke folafola e tala mitaki he Kautu ke he falu he fai magaaho agaia.—Roma 10:13, 14; 2 Timo. 4:2.