Ko e Tau Fakamoli a Tautolu he Tau Magaaho Oti
1. Ko e heigoa ha tautolu ka ako mai he tala ki a Iesu ne fakamatala ke he fifine he vaikeli?
1 Ne kua leva tuai e fano hui ha Iesu. Kua lolelole mo e fia inu a ia. He ō atu e tau tutaki haana ke fakatau mena kai, ne nofo hifo a ia he vaikeli i tua he taha maaga i Samaria ke okioki. Nakai fina atu a Iesu ki Samaria ke fakamatala; ka ko e fina atu a ia ki Kalilaia ke matutaki e fekafekauaga haana i ai. Pete ia, ne fakaaoga e ia e magaaho ke fakamatala ke he fifine ne hau ke utu vai. (Ioane 4:5-14) Ko e ha? Ne nakai okioki a Iesu he eke mo tagata “talahau kua fakamoli mo e moli” a Iehova. (Fakakite. 3:14) Kua fifitaki e tautolu a Iesu he eke mo Tau Fakamoli a Iehova he tau magaaho oti.—1 Pete. 2:21.
2. Liga mautauteute fēfē a tautolu ke fakamatala he magaaho noa?
2 Kia Mautauteute: Maeke ia tautolu ke mautauteute ke fakamatala he magaaho noa he uta e tau tohi mo tautolu. Loga e tagata fakailoa ne uta e tau tuleke mo e foaki ai ke he tau tagata gahua he fale koloa, tau tagata gahua he fale penisini, mo e falu ka feleveia mo lautolu he aho. (Fakama. 11:6) Ko e matakainaga fifine ne lagaloga e fano fenoga, ne tuku tumau e ia e Tohi Tapu tote mo e tohi Fakaako he Tohi Tapu he pesi tau lima haana, ti lali a ia ke kamata e fakatutalaaga mo lautolu ne nonofo he tapa haana.
3. Liga kamata fēfē e tautolu e fakatutalaaga?
3 Kamata e Fakatutalaaga: Ka fakamatala he magaaho noa, nakai lata ia tautolu ke talahau e matakupu Tohi Tapu he kamataaga. Ne nakai hafagi e Iesu e fakatutalaaga haana mo e fifine he vaikeli he talahau ko ia ko e Mesia. Ne ole na ia ke he fifine ma e taha magavai ke inu, ti fakalagalaga e fifine ke fia iloa. (Ioane 4:7-9) Taha e matakainaga fifine ne pehē kua pihia foki e puhala ati maeke a ia ke kamata e fakatutalaaga he magaaho ne hūhū ki a ia ko e fiafia nakai a ia he fakamanatu he aho okioki. He nakai tali atu kua nakai fakalataha a ia ke he fakamanatuaga ha ko ia ko e taha he Tau Fakamoli a Iehova, ne pehē a ia, “Kua taute e au e fifiliaga fakatagata ke nakai fakamanatu ai.” Fa mahani e tagata hūhū ne fia iloa ke hūhū atu foki he pehē ko e ha, ati maeke ai e matakainaga fifine ke fakamatala.
4. Ko e ha e Mataio 28:18-20 kua omoomoi ki a koe?
4 Pete kua oti e fekafekauaga fakamakutu ha Iesu he lalolagi, kua matutaki atu a ia ke mataala lahi ke fakaholo e gahua fakamatala ke he puhala ne taute e ia. (Mata. 28:18-20) Ko e mena ia, ke tuga e Fakafifitaki ha tautolu ko Iesu, ko tautolu ko e Tau Fakamoli kua mautali ke talahau atu e tua ha tautolu he ha magaaho.—Hepe. 10:23.