Fakaheke a Iehova he Fakamatala Nakai Mautali
1 Kua kumi magaaho e tau fekafekau fakamoli a Iehova ke fakaheke a ia he tau aho takitaha. (Sala. 96:2, 3; Hepe. 13:15) Taha puhala kua maeke ia tautolu ke taute e mena ia ko e fakamatala nakai mautali. Tokologa e tau tagata tapuaki ha Iehova he vaha nei kua fakaaue ha kua fai tagata ne tala age ki a lautolu e fekau he Kautu he fakamatala nakai mautali.
2 He fakamatala nakai mautali ke he taha tagata kua fa hafagi e puhala ma e falu ke logona e fekau he Kautu. Ma e fakatai, ko e fakatutala ha Iesu mo e fifine Samaria he vaipuna a Iakopo ne takitaki e tokologa ke fanogonogo ke he tala mitaki. (Ioane 4:6-30, 39-42) He nonofo a Paulo mo Sila he fale puipui i Filipi, ne fakamatala a laua ke he leoleo he fale puipui, ti talia he tagata mo e magafaoa katoa hana e kupu moli.—Gahua 16:25-34.
3 Tau Magaaho: Ko e heigoa e tau magaaho kua ha ha ia koe ke fakamatala nakai mautali? Taute pihia he falu ka fakatau, heke he puhala o fenoga he tau tagata, po ke fakatali ke kitia e ekekafo. Kua maeke he falu ke fakamatala he tau magaaho okioki he gahua po ke aoga. He fakakitia ai e taha he tau tohi faka-Tohi Tapu ha tautolu kua mafiti e falu ke huhu hagaao ke he tau taofiaga ha tautolu.—1 Pete. 3:15.
4 Kamata Aki: Ne logona he tama fifine fitu tau ne ma he feleveiaaga e aoga he tau tagata oti ke fakamatala. Ti he fano ke fakatau mo e matua fifine hana, ne tuku e ia ua e porosua he kato hana. He lavelave e matua fifine hana he totogi he tau fakatau, ne foaki he tama fifine e porosua ke he fifine, ne talia fiafia ai. He huhu ko e moua i fe e ia e malolo ke tutala ke he fifine, ne tali e tama fifine ma nei: “Ne pehe ni au, Amanaki, Tu, Fano! Ti taute e au!”
5 Ke fakamatala nakai mautali, kua lata oti ia tautolu ke moua e aga tuga e tama fifine tote ia. Ko e heigoa kua maeke ke lagomatai aki a tautolu? Liogi ma e fakamalolo ke vagahau. (1 Tesa. 2:2) Mautali e huhu po ke he mataulu kua fiafia a koe ke fakaaoga ke kamata e fakatutalaaga. Ti falanaki to fakamonuina e Iehova hau a tau laliaga.—Luka 12:11, 12.
6 Ko e fakamatala nakai mautali ke he tau tagata kua feleveia mo tautolu he tau aho takitaha kua fakaheke atu ki a Iehova mo e foaki ki a tautolu e olioli. Kua maeke ke lagomatai e taha ke he puhala ke he moui tukulagi.