Kia Fakamakutu he “Talahau Fakatonu Atu”
1, 2. Ko e heigoa hau ne nava he onoonoaga ha Paulo ke he fakamatala he tala mitaki, mo e muitua fefe e tautolu e fifitakiaga hana he “talahau fakatonu atu”?
1 Ke tuga a Iesu mo e tokologa he falu fekafekau tua fakamoli he vaha fakamua, ko e aposetolo ko Paulo ko e tagata fakamatala fakamakamaka he tala mitaki ke he ha tutuaga ni, he “talahau fakatonu atu.” Pete he puipui i loto he fale, “kua talia e ia a lautolu oti kana ne huhu mai kia ia; Ha ne fakamatala e kautu he Atua, mo e fakaako atu e tau mena he Iki ko Iesu Keriso, mo e fakamalolo ni.”—Gahua 28:16-31.
2 Lata foki ia tautolu ke fakamakutu he “talahau fakatonu atu” he tau magaaho oti. Putoia foki e fakamatala ke he tau tagata ka feleveia mo tautolu he tau fenoga ha tautolu he o atu mo e o mai he Fonoaga he Fahimotu “Kia Fakaheke Atu ke he Atua” mo e he nonofo ke he taone ne fakahoko ai e fonoaga.—Gahua 28:23; Sala. 145:10-13.
3. Kalo kehe fefe a tautolu he taute e fakamatala he magaaho noa mo laliaga tupu fakalutukia?
3 Ko e Heigoa e Fakamatala he Magaaho Noa? Ko e fakamatala he magaaho noa ko e mena nakai tupu fakalutukia po ke tupu nakai fai amaamanakiaga, ke tuga kua nakai mautali tuai po ke kua aoga tote. Nakai pihia e kakano he fekafekauaga ha tautolu. Ha kua moli hagaao ki a Paulo, ko e foaki he lilifu ke he Atua he gahua fakamatala ha tautolu kua aoga ki a tautolu, ti kua lata ke eke mo foliaga ha tautolu ke fakamatala he magaaho noa he tau o fenoga ha tautolu he tau magahala okioki. Pete ia, ko e puhala ha tautolu ka tutala ke he falu kua tonu ai ke fakamaama ko e fakamatala he magaaho noa—kua kakano ai ke fakatotoka, fakakapitiga, mo e nakai kotofa pauaki tuai pihia. Maeke he puhala nei ke moua e tau fua mitaki.
4. Ko e heigoa ne fakamalolo a Paulo ke fakamatala he fale ne puipui ai a ia?
4 Tauteute ke Foaki e Fakamatala: Ne kumi magaaho a Paulo ke fakamatala he mogo ne puipui a ia ki loto he fale i Roma. Mai he fale ne puipui ai, ne fakamakaukau a ia ke uiina e tau takitaki Iutaia he matakavi ia ke he kaina hana. (Gahua 28:17) Pete he fai fakapotopotoaga Kerisiano i Roma, ne iloa e Paulo ko e tau Iutaia he taone ia ne iloa tote hagaao ke he tua Kerisiano. (Gahua 28:22; Roma 1:7) Ne nakai fakaumiumi a ia he “talahau fakatonu atu” hagaao ki a Iesu Keriso mo e Kautu he Atua.
5, 6. Ko e tau magaaho fe ha tautolu ka liga maeke ke fakamatala he magaaho noa, mo e heigoa ka mau tauteute a tautolu ke taute ke maeke ke lauia mitaki ai?
5 Manamanatu la ke he tau tagata ka feleveia mo koe he tau fano fenoga hau ne iloa tote e Tau Fakamoli a Iehova. Liga nakai iloa e lautolu na foaki e tautolu e tau fakaakoaga Tohi Tapu nakai fai totogi he kaina. Kia mataala ke he tau magaaho ke fakamatala ki a lautolu ne feleveia e tautolu he fenoga ha tautolu, aafe ke okioki fakaku, tutu ke utu, fakatau, nonofo he tau hotela, kai he tau fale kai, heke he tau puhala o fenoga he papiliki, mo e loga atu. Fifili tuai e puhala ke fakalaga aki e fakatutalaaga mo e ke taute e fakamatala fakaku. Ato hoko e mogo ia maeke ia koe ke fakamahani he fakamatala he magaaho noa ke he tau katofia, tau magafaoa, tau kapitiga gahua, mo e falu tagata ne mahani mo koe.
6 To lata ia koe ke loga e tohi mo fakaaoga ka taute e fakamatala he magaaho noa. Tau tohi fe? Liga fakaaoga e koe e tuleke Manako Nakai a Koe ke Iloa Lahi e Tohi Tapu? Tutala ke he tau paratafa lima fakamua, ne tohi ai e tau kakano kehekehe he totou e Tohi Tapu. Fakakite e kupono i tua ke ole ma e fakaakoaga Tohi Tapu nakai fai totogi he kaina. Ka moua e koe e tagata fiafia, foaki e porosua Manako. He mau amaamanaki ke feleveia mo e tau tagata ne vagahau e vagahau kehe, uta e tohi tote Good News for All Nations. Fakamaama he lau 2 e puhala ke fakaaoga ai ke taute e fakamatala. Ka o atu he motoka, maeke ia koe ke uta e falu tohi gahoa ma lautolu ne fakakite e fiafia moli ke he fekau he Kautu.
7, 8. Ko e heigoa e hatakiaga hagaao ke he tauteuteaga mo e mahani fakatagata ka o fenoga mo e he tau magaaho noa nukua lata ke omaoma e tautolu?
7 Manamanatu ke he Tauteuteaga mo e Mahani Hau: Kua latatonu ia tautolu ke mailoga e tau mahani pihia foki mo e tau mena tui mo e puhala tauteute ha tautolu ke nakai fakakite hehe po ke fakatupu a lautolu ke ‘talahau kelea’ mai ke he fakatokatokaaga ha Iehova. (Gahua 28:22) Nakai hagaao hokoia ni e mena nei ka o atu ke he fonoaga ka e pihia foki ka o fenoga mo e he tau magaaho noa. Ko e Kolo Toko ia Aokuso 1, 2002, lau 31 paratafa 14, ne hataki: “Kua nakai lata e tau tauteuteaga ha tautolu ke fia kitia, fakalialia, fakaohooho, fakatata, po ke putoia lahi ke he fasone. Lafi ki ai, kua lata ia tautolu ke tauteute ke he puhala ne fakatata e ‘talahaua kua mahani Atua.’ Nakai kia foaki he mena nei taha mena ke manamanatu ki ai? Kua nakai pehe ke gali ni e tapulu ka o atu ke he feleveiaaga Kerisiano, [po ke he tau fonoaga] ti ka oti ti tapulu fakahanoa he tau magaaho ne toe. Ko e tauteuteaga fakatagata kua lata ke fakakite e aga mahani Atua mo e fakalilifu ha ko e tau Kerisiano a tautolu mo e tau fekafekau ke he 24 e matahola he aho.”—1 Timo. 2:9, 10.
8 Kua lata ia tautolu ke tauteute ke he puhala gali mo e lilifu. Ka fakaata tumau he tau tauteuteaga mo e mahani ha tautolu e taofiaga ha tautolu ke he Atua, to nakai logona e tautolu e fakaumiumi ke fakamatala he magaaho noa ha kua nakai fakafuafuakelea e tau tauteuteaga ha tautolu.—1 Pete. 3:15.
9. Ko e heigoa e kautuaga he fakamatala ha Paulo i Roma?
9 Fua Mitaki e Fakamatala he Magaaho Noa: Ke he ua e tau ne puipui a Paulo ki loto he fale i Roma, ne kitia e ia e tau fua mitaki mai he hana a tau laliaga ke fakamatala. Ne talahau e Luka “kua talia fakatonu foki he falu e tau kupu ne tala age.” (Gahua 28:24) Ne filifilia e Paulo e lauia mitaki he “talahau fakatonu atu” he magaaho ne tohi e ia: “Ko e tau mena ne hohoko kia au, kua tupu lahi ai e vagahau mitaki. Ko e mena ia kua fakakite ai ia Keriso haku a tau liliaga ke he fale oti he kau leoleo, katoa foki mo e tau faoa oti; Ko e tokologa foki e tau matakainaga ha ha he Iki, kua fakamanavalahi a lautolu ha ko e tau liliaga haku, kua au atu ai he fakamalolo ke talahau atu e kupu mo e nakai matakutaku.”—Filipi 1:12-14.
10. Ko e heigoa e kautuaga he fakamatala ne moua he hoa mau he tau kua mole?
10 He tau kua mole, he hili e fonoaga he fahimotu he taha aho, ne moua he hoa mau e fua mitaki he fakamatala he magaaho noa ke he fifine tufa kai he fale kai ne huhu ke he tau pine fakamailoga ha laua he fonoaga. Ne tala age e laua ki a ia hagaao ke he fonoaga mo e pihia foki ke he amaamanakiaga he Tohi Tapu ne fakatoka ma e tau tagata anoiha. Ne age e laua ki a ia e tuleke Manako Nakai a Koe ke Iloa Lahi e Tohi Tapu? mo e fakamaama e fakaholoaga he fakaakoaga Tohi Tapu nakai fai totogi he kaina. Ne pehe e fifine ne manako a ia ke fai tagata ke aahi atu ki a ia, ne fakapuke e higoa mo e kaina hana i tua he tuleke, ti ole ke he hoa ke taute taha fakatokaaga. Ko e heigoa la e kautuaga ka liga olioli e koe he tau nei he fakamakutu ke “talahau fakatonu atu”?
11. Ko e heigoa e tau fua kua lata ia tautolu ke feaki ke fakalaulahi atu e tala mitaki he tau nei he “talahau fakatonu atu”?
11 Fakamatutu e Fakalaulahi he Tala Mitaki: Manamanatu la ke he fiafia ha Paulo he iloa kua hane fifitaki he tau Kerisiano e fakamakutu hana! Kia taute e tautolu e tau mena kua fahia a tautolu ki ai ke fakalaulahi e tala mitaki he fakamatala he magaaho noa e tau taofiaga ha tautolu ne fakave ke he Tohi Tapu mo e he moua foki e tautolu e aoga mai he fonoaga he fahimotu he tau nei.
[Puha he lau 4]
Tau Tohi kua Lata ma e Fakamatala he Magaaho Noa
■ Manako Nakai a Koe ke Iloa Lahi e Tohi Tapu? (tuleke)
■ Ko e Heigoa e Manako he Atua ma Tautolu? (porosua)
■ Good News for All Nations (tohi tote)
■ Falu matapatu tohi
[Puha he lau 5]
Kia Nakai Nimo a Lautolu!
Nimo a hai? A lautolu oti ne fiafia ne fakalataha ke he Fakamanatuaga he mate he Keriso po ke lauga pauaki. Kua uiina nakai e tautolu a lautolu ke o mai ke he fonoaga he fahimotu he tau nei? Liga tokologa ia lautolu, kaeke totonu e fakamaloloaga, ka fakalataha mai. He olioli e lautolu e lafiaga atihake he fonoaga mo e polokalama fakamalolo fakaagaga, to futia fakatata lahi a lautolu ki a Iehova mo e hana fakatokatokaaga. He ha he uiina atu a lautolu mo e to kitia ai e mena ka tupu? Age ki a lautolu e tau fakamaamaaga oti ne lata ia lautolu ke iloa, putoia e tau aho he fonoaga, tau fakamaamaaga he hala ke hoko ke he matakavi fonoaga, tau tula ka kamata mo e oti e tau fakaholoaga, mo e polokalama ne tu he kili i tua he Awake!, fufuta ia Iuni 8, 2003.