“Talahau Fakatonu Atu”
1. Ko e heigoa e fakafifitakiaga mitaki ne fakatoka he aposetolo ko Paulo he fekafekauaga?
1 “Kia fakakatoatoa ni hāu a feua.” (2 Timo. 4:5) Ne ha ha mooli he aposetolo ko Paulo e tonuhia ke tuku age e tomatomaaga nei ki a Timoteo. Ko e mooli, he vahaloto he tau 47 ke he 56 V.N., ne tolu e fenoga misionare ha Paulo ne oti he taute. Ne fatiaki lagaloga mai ia Gahua hagaao ki a Paulo ne makai ke “talahau fakatonu atu.” (Gahua 23:11; 28:23) Maeke fēfē ke taute pihia e tautolu he magahala nei?
2. Fakamakai fēfē a tautolu ke fakamatala fakatonu atu mai he taha fale ke he taha fale?
2 Mai he Taha Fale ke he Taha Fale: He lali ke tutala ke he tau tagata he tau kaina ne nakaila logona e tala mitaki, liga lata ia tautolu ke ahiahi atu he taha magaaho kehe he aho. Ko e tagata taane he kaina liga haia i kaina he tau tulā afiafi po ke matahiku he faahi tapu. Kia eketaha a tautolu ke tutala mo e taha tagata he tau kaina takitaha, ti ahiahi atu tumau ke he tau kaina ne nakai moua ha tagata. Ka e kua ka lali fakamakamaka a tautolu ka e nakai moua ha tagata? Liga ko e tohitohi po ke hea telefoni ka fai fua mitaki.
3. Ko e heigoa e tau tutūaga kua moua e koe ke fakamatala ke he tau toloaga po ke magaaho noa?
3 He Toloaga mo e Magaaho Noa: Kua fakapuloa atu he tau fekafekau ha Iehova he vahā nei e “iloilo” mooli ke he tau tagata oti kua fanogonogo. He falu magaaho kua taute e mena nei “i fafo” po ke he “tau malē.” (Fakatai 1:20, 21) Ka taute e tau gahua fa mahani ha tautolu he tau aho takitaha, kua manamanatu nakai a tautolu ke fakamatala? Maeke nakai ke pehē ko tautolu kua fakamakutu lahi ‘tuai ke he loto he talahau atu’ e kupu. (Gahua 18:5) Ka pihia, kua fakamooli e tautolu e kotofaaga ha tautolu ke “fakamatala atu.”—Gahua 10:42; 17:17; 20:20, 21, 24.
4. Puhala fe he liogi mo e manamanatu fakahokulo ne kua lafi ke he ha tautolu a makai ke talahau fakatonu atu?
4 He falu magaaho, ha ko e loto lolelole po ke mahani mā pauaki, ati liga mataofi a tautolu ke fakamatala. Ko e mooli na iloa e Iehova ha tautolu a tau kaupaaga. (Sala. 103:14) Pete ia, ka hoko ke he tau magaaho pihia, maeke ia tautolu ke liogi ki a ia ma e fakamalolōaga ke vagahau. (Gahua 4:29, 31) Pihia foki, ka fakaako fakatagata mo e manamanatu fakahokulo ke he Kupu he Atua, maeke ia tautolu ke hagaaki ke fakahokulo e loto fakaaue ha tautolu ma e uho he tala mitaki. (Filipi 3:8) To omoomoi he mena nei a tautolu ke fakapuloa e tala mitaki mo e fakamakai!
5. Maeke fēfē a tautolu ke fakalataha ke he fakamooliaga he perofetaaga ha Ioelu?
5 Ne talahau tuai he perofetaaga ha Ioelu to hoko mai e aho lahi mo e matakutakuina ha Iehova, ko e tau tagata he Atua to fakatumau ke “o a lautolu” mo e nakai fakaatā ha mena ke taofi a lautolu he fakamatala. (Ioelu 2:2, 7-9) Kia eketaha fakalahi a tautolu ke fakalataha atu ke he gahua fakamatala nei ka nakai liu ke fatiaki!