Okioki Mai he Gahua—Ko e Gutuhala ke Fakalahi Atu e Fekafekau?
1 Tokologa e tau tagata gahua malolo kua manako ke he magaaho ka okioki mai he tau gahua ke fakaata a lautolu mai he fakatupa mo e pehia he gahua tupe. Ke he tau magaaho, ne ta mai he okioki mai he gahua e fakateaga, fiu, mo e fuakau tuai. Ko e nakai fai gahua aoga ne taute ka fakaata e manamanatuaga ke tupetupe ki a ia ni. Ko e nusipepa Parasili ne tohia ko e tau tagata gahua tupe ne okioki mai he tau gahua ne hohoha he tau mena vihi mai he ‘nakai fiafia, hogohogo manava, nakai haohao mitaki, ke he galo e amaamanakiaga he fakaatukehe mo e logonaaga kua nakai fai kakano e tau momoui ha lautolu.’
2 Kehekehe ai, tokologa e tau Kerisiano ne kitia ko e veveheaga fou a ia he tau momoui ha lautolu ko e gutuhala ke fakalahi atu e tau gahua fakaagaga. Taha e matakainaga tane ne kamata ke paionia he ua e fahi tapu he mole e tu e 65 e tau he moui ne pehe: “Ne nakai la feleveia ia e moui haku mo e ha magaaho kua lahi e mautu he tau monuina ke tuga e hogofulu tau kua mole he paionia.” Ne tohi he hoa mau: “Ko e tau tau momoho moli he vaha momotua ha maua ne kamata he magaaho ne paionia ai.” E, ma e tokologa, ko e okioki mai he gahua ne foaki e magaaho momoho ke fakalahi atu e fekafekauaga ha lautolu mo e helehele e tau fua monuina mai ia Iehova.
3 Tumau ke Lavelave mo e Fua Loga: Tokologa ne kua okioki mai he tau gahua mogonei ne tutupu hake he tau vaha momoui matematekelea he fakatatai ke he vaha nei ti fakaako a lautolu ke gahua fakamalolo he vaha ikiiki. Pete kua nakai ha ha ia lautolu e malolo he fuata, kua fua mitaki agaia ha lautolu a tau gahua. Ke he taha la matakavi, 22 e pasene he tau paionia—kavi ke he 20,000 he tau matakainaga tane mo e fifine—kua liga 60 e tau tau moui. Ko lautolu nei ne momotua kua lagomatai lahi ke he gahua fakamatala. Ko e tau iloaaga mo e tau mahani Atua ha lautolu kua fakamonuina ke he tau fakapotopotoaga kua fekafekau ai a lautolu.—Iako. 3:17, 18.
4 Ko e lavelave tumau ke he fekafekauaga Kerisiano kua lafi atu ke he mitaki he malolo tino mo e tupu ki mua e mitaki he tuaga he moui. Ko e matakainaga fifine ne 84 e tau tau he moui ne kamata paionia a ia he magaaho ne okioki mai he gahua ne pehe: “Ko e loga he tau fakaakoaga Tohi Tapu ne taute mo e tau tagata loto fiafia ne lagomatai ai au ke hakahakau e manamanatuaga. Nakai fai motoka au, ti lahi e fano hui haku. Ko e mena ia ati tino malolo ai au.” Ko e hoa paionia momotua ne talahau: “Kua fakatumau he fekafekauaga a maua ke hakahakau e tau manamanatuaga mo e tau tino. Ne tumau tokoua a maua. Ne lahi e feki ha maua mo e olioli e moui.”
5 Fekafekau he Matakavi kua Lahi e Manako: Falu Kerisiano ne okioki mai he gahua mo e kua hagahaga mitaki fakatupe ne hiki atu ke fekafekau ke he tau matakavi ne lahi e manako ma e tau tagata fakamatala he Kautu. Ko e falu kua fakalaulahi atu e fekafekauaga ha lautolu ke gahua he fonua ne vagahau kehe. Ke tuga e aposetolo ko Paulo, ko e tau tagata fakailoa fakamakamaka nei ‘kua eke foki e mena nai ha ko e vagahau mitaki kia igatia fakalataha ai a tautolu.’—1 Kori. 9:23.
6 Taha e hoa mau ne kamata paionia he mole e feaki he tau fanau tane tokoua ha laua. Mole e loga e tau tau he paionia, ne ako e laua e vagahau Saina. He mogonei ko laua he tau atu tau 70, ne nakai la leva ia e olioli a laua he kitia e matakau vagahau Saina ne gahua mo laua kua eke mo fakapotopotoaga. Ko e fakamonuina ha ia he tau hoa pehenei!
7 Nakai Okioki Mai he Gahua he Fekafekauaga: Ko e laulahi he tau tagata to hiku ke okioki mai he tau gahua tupe ha lautolu, kua nakai okioki mai he gahua e ha Kerisiano ne gahua ma e Atua. Ko tautolu oti kua lata ke tumau e tua fakamoli “ato hoko ke he fakaotiaga.” (Mata. 24:13, 14) Moli, ha kua momotua, kua nakai maeke he falu ke lahi e mena ka taute he gahua ha Iehova ke tuga ne fa mahani a lautolu ki ai. Ka e ko e fakamalolo ha ia he kitia a lautolu hane taute e mena kua fahia ki ai mo e loto katoa! Kua fakamafana he Kupu he Atua a lautolu to nakai nimo e Iehova e gahua ha lautolu mo e fakaalofa ne fakakite e lautolu ma e hana higoa.—Luka 21:1-4; Hepe. 6:10.
8 Ka gutu atu a koe ke he tau tau ke okioki mai he gahua, ko e ha he liogi mo e manamanatu ke he puhala ka fakaaoga fakamitaki e koe e tau tutuaga ia hau ka hiki? Mo e lagomatai faka-Atua, to liga moua e koe he okioki mai he gahua kua hafagi ki a koe e gutuhala ke fakalahi atu e gahua hau ke tamai e fakahekeaga ki a Iehova mo e tau monuina loga.—Sala. 148:12, 13.