Kakano Kua Aoga ki a Koe a Etena
TAHA he tau totokoaga ofo lahi ne fakatupu ai he falu tagata pulotu e tala hagaao ki a Etena kua nakai lalago he vala ne toe he Tohi Tapu. Ma e fakatai, ko e Porofesa he Tau Fakaakoaga Fakalotu ko Paul Morris ne tohi: “Nakai fai fakamauaga faka-Tohi Tapu he magaaho fakamui ne hagaaki ke he tala i Etena.” Ko e kumikumiaga haana kua liga gakigaki e “tau pulotu” kehekehe he talia, ka e nakai fetataiaki ai mo e tau fakamooliaga.
Kua taute he Tohi Tapu falu fakamooliaga loga ke he kaina ko Etena, Atamu, Eva, mo e gata.a Ka ko e hehē he tau pulotu gahoa ne pulefu he fakatatai ke he fakamooliaga lahi mahaki. He nakai talia e tala ia Kenese ke he kaina ko Etena, ko e tau takitaki lotu mo e tau tagata tuhituhi he Tohi Tapu kua lali ke fakatoka mai e tau ekefakakelea ke he Tohi Tapu. Pihia fēfē?
He maama e mena ne tupu i Etena kua aoga lahi ke maama e vala ne toe he Tohi Tapu. Ma e fakatai, ko e Kupu he Atua kua talaga ke lagomatai a tautolu ke moua e tau tali ke he tau hūhū aoga lahi ne fehagai mo e tau tagata. Ko e tau tali tumau he Tohi Tapu ke he tau hūhū ia ne hagaao ke he tau mena ne tutupu he kaina ko Etena. Fakatutala ke he falu fakataiaga.
● Ko e ha kua fuakau mo e mamate a tautolu? Na momoui tukulagi a Atamu mo Eva ka fakatumau a laua ke omaoma ki a Iehova. To mamate ni a laua ka totoko. Ti mamate fakahaga a laua he aho ne totoko ai. (Kenese 2:16, 17; 3:19) Ne galo e laua e mitaki katoatoa ti ko e agahala mo e nakai mitaki katoatoa hokoia ne fakaholo atu ke he tau fanau ha laua. Ti fakamaama he Tohi Tapu: “He hoko mai ai e hala ke he lalolagi ke he tagata tokotaha, ko e mate foki ha ko e hala, ti kua hoko mai ai e mate ke he tau tagata oti kana, ha kua hala e tau tagata oti kana.”—Roma 5:12.
● Ko e ha ne fakaatā he Atua e mahani kelea? He kaina ko Etena, ne fakahigoa e Satani e Atua ko e pikopiko ne taofi e mena mitaki mai he tau mena momoui haana. (Kenese 3:3-5) Ti tuahā a ia ke he tutonuhia he puhala ne pule a Iehova. Ne fifili a Atamu mo Eva ke mumui ki a Satani; mo e tiaki pihia foki e laua e pule katoatoa a Iehova ati fakailoa ai na maeke he tagata ke fifili ma haana ni e mena kua mitaki mo e mena kua kelea. He fakafili tonu mo e pulotu mitaki katoatoa ha Iehova, ne iloa e ia mena taha ni e puhala ke tali fakamitaki e paleko—he fakaatā e magaaho ke pule a laua tuga he fifili e laua. Ko e fua he mahani kelea kua tupu he fai vala a Satani ke fakaohooho tumau ti fakahiku ai ke fakakite e tala mooli lahi: Nakai maeke he tagata ke takitaki e ia a ia ka e nakai fai Atua.—Ieremia 10:23.
● Ko e heigoa e finagalo he Atua ma e lalolagi? He kaina ko Etena, ne fakatoka e Iehova e tuaga fulufuluola ma e lalolagi. Ne poaki a ia ki a Atamu mo Eva ke fakapuke e lalolagi aki ha laua a tau hologa mo e “kautu ki ai,” ke maeke ke tamai e tuaga taha he fulufuluola mo e lagotatai ke he lalolagi katoa. (Kenese 1:28) Ti ko e finagalo he Atua ma e lalolagi ke fakapuke e parataiso aki e magafaoa mitaki katoatoa ne kaufakalataha he tau hologa ha Atamu mo Eva. Lahi he Tohi Tapu kua hagaao ke he puhala ne fakamooli he Atua e finagalo fakamua ia haana.
● Ko e ha ne hau a Iesu Keriso ke he lalolagi? Ko e totokoaga he kaina ko Etena ne tamai e fakahala mate ki a Atamu mo Eva mo e tau hologa oti ha laua, ka e foaki fakaalofa he Atua e amaamanakiaga. Ne fakafano mai e ia e haana Tama ke he lalolagi ke foaki e mena ne ui he Tohi Tapu ko e lukutoto. (Mataio 20:28) Ko e heigoa e kakano he mena ia? Ko Iesu “ko e Atamu fakamui”; ne kautū a ia ke he mena ne kaumahala a Atamu. Ne fakatumau e Iesu e moui mitaki katoatoa haana he omaoma tumau ki a Iehova. Ti foaki noa e ia e moui haana mo poa, po ke lukutoto, he fakatoka e tau puhala ma e tau tagata fakamooli oti ke moua e fakamagalo ma e tau agahala ha lautolu mo e fakahiku ke moua e vahega moui ne olioli e Atamu mo Eva i Etena ato agahala a laua. (1 Korinito 15:22, 45; Ioane 3:16) Ti fakamau e Iesu ko e finagalo a Iehova to fakahiku e lalolagi nei ke eke mooli mo parataiso tuga a Etena.b
Nakai uka e finagalo he Atua, po ke fai fakataitaiaga fakalotu foki. Kua mooli ai. Tuga ni ko e matakavi mooli e kaina ko Etena he lalolagi nei mo e tau manu mooli mo e tau tagata mooli, ti pihia foki e maveheaga he Atua ma e vahā anoiha kua moolioli, ko e mena mooli ka nakai leva ti hoko mai. To eke nakai e vahā anoiha ia ma haau mo mena mooli ki a koe? Lahi he mena ia kua falanaki ni ki a koe. Manako e Atua ke he vahā anoiha ia ke moua he tau tagata tokologa, pihia ki a lautolu kua hehē e tau momoui.—1 Timoteo 2:3, 4.
Hane mate a Iesu, ne tutala a ia ke he tagata ne agahala e moui. Ko e tagata kolokolovao; ti iloa e ia kua lata a ia ke tamate. Ka e fuluhi a ia ki a Iesu ma e fakamafanaaga, ma e amaamanakiaga. Ko e tali ha Iesu? “[To] fakalataha ai a taua mo koe i parataiso.” (Luka 23:43) Ka manako a Iesu ke kitia e tagata kolokolovao fakamua ia i ai—he liu fakatū mai mo e fakamonuina aki e magaaho ke moui tukulagi ke he parataiso tuga a Etena—nakai kia manako a ia ke he monuina taha ia ma haau? Manako a ia! Manako e Matua haana! Ka manako a koe ke he vahā anoiha ma haau, taute e tau mena oti kua maeke ia koe ke fakaako hagaao ke he Atua ne taute e kaina ko Etena.
[Tau Matahui Tala]
a Ma e fakatai, kikite Kenese 13:10; Teutaronome 32:8; 2 Samuela 7:14; 1 Nofoaga he Tau Patuiki 1:1; Isaia 51:3; Esekielu 28:13; 31:8, 9; Luka 3:38; Roma 5:12-14; 1 Korinito 15:22, 45; 2 Korinito 11:3; 1 Timoteo 2:13, 14; Iuta 14; mo e Fakakiteaga 12:9.
b Ke iloa atu foki e poa lukutoto he Keriso, kikite e veveheaga 5 he tohi Ko e Heigoa ne Fakaako Moli he Tohi Tapu? ne taute fakailoa he Tau Fakamoli a Iehova.
[Puha/Tau Fakatino he lau 10]
KO E PEROFETAAGA NE PIPI FAKALATAHA E TOHI TAPU
“To fakatupu e au e faitaua kia mua mo e fifine, ko e hau a fanau foki mo e hana fanau; to tatuki e ia hau a ulu, ka e tatuki ni e koe hana muihui.”—Kenese 3:15.
Ko e perofetaaga fakamua a ia he Tohi Tapu, ne talahau he Atua i Etena. Ko hai e tau tagata tokofā: ko e fifine, haana fanau, ko e gata, mo e haana a fanau? Fēfē e puhala ne gahuahua e “faitaua” ne talahau tuai?
KO E GATA
Satani ko e Tiapolo.—Fakakiteaga 12:9.
KO E FIFINE
Fakatokatokaaga a Iehova he tau mena momoui he lagi. (Kalatia 4:26, 27) Ne tutala a Isaia hagaao ke he “fifine,” he talahau tuai to fanau e ia e motu fakaagaaga anoiha.—Isaia 54:1; 66:8.
KO E TEGA HE GATA
Lautolu kua fifili ke taute e finagalo a Satani.—Ioane 8:44.
KO E TEGA HE FIFINE
Matapatu ki a Iesu Keriso, ne hau he vala he fakatokatokaaga a Iehova he lagi. Putoia foki he fanau po ke, tega e tau matakainaga fakaagaaga he Keriso kua pule mo ia he lagi. Ko lautolu e tau Kerisiano fakauku ne moua mai e motu fakaagaaga, ko “Isaraela he Atua.”—Kalatia 3:16, 29; 6:16; Kenese 22:18.
TATUKI E MUIHUI
Ko e matematekelea lahi ne hoko ke he Mesia ka e nakai tumau ai. Ne kautū a Satani he lali ke tamate a Iesu he lalolagi. Kua fakaliu tū mai a Iesu.
TATUKI E ULU
Ko e matematekelea lahi ki a Satani. To utakehe tukulagi e Iesu a Satani. Ato hoko e mena ia, to utakehe e Iesu e kelea lahi ne kamata e Satani i Etena.—1 Ioane 3:8; Fakakiteaga 20:10.
Ma e fakakatoatoaaga fakakū ke he matakupu pauaki he Tohi Tapu, kikite e porosua The Bible—What Is Its Message? ne taute fakailoa he Tau Fakamoli a Iehova.
[Fakatino he lau 11]
Matematekelea a Atamu mo Eva he tau fua mamahi he hala