Iloa Nakai he Atua To Agahala a Atamu mo Eva?

LOGA e tagata ne manako lahi ke moua e tali ke he hūhū nei. He lagā mai e matakupu he fakaatā he Atua e mahani kelea, ko e agahala he hoa tagata fakamua he kaina ko Etena ne mafiti he eke mo fakatutalaaga. Ko e manatu ‘kua fioia he Atua e tau mena oti’ ka mukamuka ke takitaki falu ke he fakahikuaga na liga iloa tuai he Atua to nakai omaoma a Atamu mo Eva ki a ia.

Ane iloa mooli he Atua to agahala e hoa mau mitaki katoatoa nei, to hagaao ke he heigoa e mena nei? Ko e manatu ia to fakakite e loga he tau aga kelea ke he Atua. To tuga ke nakai fakaalofa, nakai fakafili tonu, mo e nakai fakamooli a ia. Liga fakamailoga ai he falu ko e favale ke fakakite ke he tau tagata fakamua e mena ne iloa tuai to fakahiku kelea. Kua liga fai fakalagoaga e Atua ki ai—po ke fai vala i ai—he tau kelea mo e tau matematekelea oti kana ne tupu he fakamauaga tala tuai. Ke he falu, to tuga na goagoa e Tufuga ha tautolu.

Ko Iehova ko e Atua kia ne fakakite he tau Tohiaga Tapu kua tatai mo e tau talahauaga kelea pihia? Ke tali ai, kia kumikumi a tautolu ke he mena ne talahau he Tohi Tapu hagaao ke he tau gahua tufuga mo e aga a Iehova.

“Kua Mitaki Lahi Ni”

Hagaao ke he tufugatia he Atua, putoia e tau tagata fakamua he lalolagi, ko e tala ia Kenese ne pehē: “Ti kitekite e Atua ke he tau mena oti ne eke e ia, kitiala, kua mitaki lahi ni.” (Kenese 1:31) Ko Atamu mo Eva ne mitaki katoatoa e tufugaaga, ti latatonu mooli ke he takatakaiaga ha laua he lalolagi. Nakai fai mena kelea e tufugaaga ha laua. He “mitaki lahi ni” e tufugaaga, kua maeke mooli a laua ke fakakite e mahani mitaki kua lata ia laua. Ne tufuga a laua ke he “fakatai he Atua.” (Kenese 1:27) Ti ha ha ia laua e malolō ke maeke ke fakatātā e tau mahani Atua he pulotu, fakaalofa fakamooli, fakafili tonu, mo e mitaki. He fakaata e tau mahani pihia ka lagomatai a laua ke taute e tau fifiliaga ka aoga ki a laua mo e fakafiafia ha laua a Matua he lagi.

Ne tuku age e Iehova ke he tau mena momoui mitaki katoatoa nei ne iloilo e atāina ke fifili. Ti nakai kakano kua fakatokatoka tuai a laua ke fakafiafia e Atua—ke tuga e ropoto. Manamanatu ki ai. Ko e heigoa kua kakano lahi ki a koe—ko e mena fakaalofa ne atu teao noa po ke mena fakaalofa ne hau he loto? Maaliali e tali. Pihia foki, ane atāina a Atamu mo Eva ke fifili ke omaoma ke he Atua, to kakano lahi e omaoma ha laua ki a ia. Ko e lotomatala ke fifili kua fakamalolō e hoa tagata fakamua ke omaoma ki a Iehova ha ko e fakaalofa.—Teutaronome 30:19, 20.

Tututonu, Fakafili Tonu, mo e Mitaki

Kua fakakite he Tohi Tapu e tau mahani a Iehova ki a tautolu. Ko e tau mahani nei ati nakai maeke a ia ke fai mena taha ke he agahala. Ko Iehova kua “fiafia . . . ke he tututonu mo e fakafiliaga tonu,” he talahau he Salamo 33:5. Ti pehē e Iakopo 1:13: “Ko e mena nakai kamatamata ai e Atua ke he mena kelea, nakai kamatamata foki e ia ke he taha.” Mai he mahani hakohako mo e manamanatu, ne hataki he Atua a Atamu: “Ko e tau akau oti kana ha he kaina ke kai ai ni e koe. Ka ko e akau ke iloa ai e mitaki mo e kelea, aua neke kai ai e koe; ha ko e aho ka kai ai e koe to mate ai ni a koe.” (Kenese 2:16, 17) Ne age ke he hoa fakamua e fifiliaga he moui tukulagi mo e mate. To fakatupua kia e Atua ke hataki a laua ke he agahala pauaki ka e fitā he iloa e fua kelea? Ha ko e “fiafia . . . ke he tututonu mo e fakafiliaga tonu,” to nakai foaki e Iehova e fifiliaga kua nakai mooli.

Kua lahi mahaki e totonu po ke, mitaki a Iehova. (Salamo 31:19) He fakamaama e mitaki he Atua ne pehē a Iesu: “Ko hai kia e tagata ia mutolu ka ole mai hana tama e areto, to age kia e ia e maka kia ia? Ka ole mai foki e ika, ke age kia kia ia e gata? Hanei, ko mutolu kua mahani kelea, kaeke kua iloa e mutolu ke age e tau mena mitaki mo e fanau ha mutolu, ka e nakai kia au atu he foaki mai he Matua ha mutolu ha ha he lagi e tau mena mitaki kia lautolu kua ole atu kia ia?” (Mataio 7:9-11) Ne foaki he Atua e “tau mena mitaki” ke he tau mena momoui haana. Ko e puhala ne tufuga e tau tagata mo e kaina Parataiso ne tauteute ma laua nukua fakakite e mitaki he Atua. To favale lahi kia e Pule Katoatoa mitaki ia he foaki e kaina fulufuluola ne iloa e ia to utakehe ai? Nakai. Ko e ha tautolu a Tufuga tututonu mo e mitaki to nakai tukupau aki e totokoaga he tagata.

“Iloilo ne Tokotaha”

Fakakite foki he tau Tohiaga Tapu ko Iehova ni e “iloilo ne tokotaha.” (Roma 16:27) Ne kitia he tau agelu he Atua he lagi e tau fakakiteaga loga he pulotu lahi mahaki nei. Ati kamata a lautolu ke “kalaga fiafia” he mogo ne taute e Iehova e tau tufugatiaaga haana he lalolagi. (Iopu 38:4-7) Ko e tau mena momoui fakaagaaga lotomatala nei ne mailoga e tau mena ne tutupu he kaina ko Etena mo e fiafia lahi. Fai kakano nakai mogoia ma e Atua iloilo, he mole e tufuga e lagi mo e lalolagi katoatoa ofoofogia mo e loga he tau gahua homo ue atu he lalolagi, ke kitia he tau tama taane fakaagelu haana ua e mena momoui mua ue atu ne iloa e ia to kaumahala a laua? Maaliali ai, ke pulega e matematekelea ia to nakai tonu.

Liga totoko agaia he taha, ‘Ka e maeke fēfē e Atua iloilo katoatoa ke nakai iloa?’ Mooli, ko e vala he iloilo lahi a Iehova ko e maeke haana ke iloa “mai he kamataaga e tau mena fakamui.” (Isaia 46:9, 10) Ka e, nakai fakaaoga e ia e malolō nei, tuga ni he nakai fakaaoga katoatoa tumau e ia e malolō lahi mahaki haana. Ne fifili fakailoilo a Iehova ke fakaaoga e lotomatala fioia tuai haana. Kua fakaaoga ai e ia he magaaho ka fai kakano ke taute pihia mo e felauaki mo e tau tuaga.

Ko e lotomatala ke fakamamao mai he fakaaoga e fioia tuai ka fakatai aki e vala he matini foou. Taha e tagata hane kitekite e feua sipote ne tapaki tuai, ne maeke ke fifili ke kitekite mua e vala fakahiku ke iloa e fakaotiaga. Ka e nakai lata a ia ke kamata pihia. Ko hai ka tuhituhi a ia ka fifili a ia ke kitekite e sipote katoa mai he kamataaga? Pihia foki, ne nakai fifili mooli e Tufuga ke kitia e puhala ka fakahiku ai e tau mena. Ka e, fifili a ia ke fakatali he fakatokatoka mai e tau mena tutupu mo e kitia e puhala ka mahani e tau tama haana he lalolagi.

He fitā e talahau fakamua, ne nakai tufuga e Iehova ke he iloilo haana e tau tagata fakamua ko e tau ropoto ne fakatoka ma e puhala gahua pauaki. Ka e, foaki fakaalofa e ia ki a laua e atāina ke fifili. He fifili e puhala hako, maeke ia laua ke fakakite ha laua a fakaalofa, fakaaue, mo e omaoma, ti tamai ai e fiafia foki ki a laua mo e ki a Iehova ko e ha laua a Matua he lagi.—Tau Fakatai 27:11; Isaia 48:18.

Kua fakakite he tau Tohiaga Tapu he tau magaaho loga ne nakai fakaaoga he Atua e lotomatala haana ke fioia tuai. Ma e fakatai, he hoko a Aperahamo ne tua fakamooli ke lali ke poa e tama haana, maeke ia Iehova ke pehē: “Kua iloa tuai e au kua matakutaku a koe ke he Atua, ha kua nakai lamakai a koe he tama hau, ko e hau a tama tokotaha, ka e tuku mai ni e koe a ia kia au.” (Kenese 22:12) He taha faahi, ha ha i ai falu magaaho foki ne fakatupu he mahani kelea he falu tagata e Atua ke “fakahukia.” To logona hifo nakai e ia e mamahi pihia ka leva e iloa e ia e mena ka taute e lautolu?—Salamo 78:40, 41; 1 Tau Patuiki 11:9, 10.

Ti, kua tonu ni ke fakaoti aki kua nakai fakagahua he Atua iloilo e lotomatala haana he fioia tuai ke fitā he iloa to agahala e tau matua fakamua ha tautolu. Kua nakai goagoa lahi a ia ke taute e taha mena fakaliga kehe he fakaaoga e lotomatala haana ke fioia tuai e mena ka tupu mo e fakahoko e mena ne fitā e iloa e ia.

“Ko e Atua ko e Fakaalofa”

Ko Satani ko e fī he Atua ne tamata e totokoaga i Etena ne fua mai e tau mena kelea, putoia e agahala mo e mate. Ti ko Satani ko e “keli tagata.” Ne eke foki a ia mo “pikopiko . . . mo e matua he pikopiko.” (Ioane 8:44) He takitaki he tau logonaaga kelea haana, ne eketaha a ia ke tuku e tau logonaaga kelea ke he Tufuga fakaalofa ha tautolu. Kua felauaki mitaki mo ia ke tukupau a Iehova aki e agahala he tagata.

Ko e mahani he fakaalofa ko e kakano malolō lahi mahaki ne fifili e Iehova ke nakai iloa tuai to agahala a Atamu mo Eva. Ko e fakaalofa ko e matapatu mahani he Atua. “Ko e Atua ko e fakaalofa,” he talahau he 1 Ioane 4:8. Ko e fakaalofa kua atihake, nakai moumou. Kua kumi e mitaki he falu. E, he fakalagalaga he fakaalofa, ne manako a Iehova ko e Atua ke he mitaki lahi mahaki ma e hoa tagata fakamua.

Pete ne ha ha he tau fanau he Atua he lalolagi e fifiliaga he taute e mena nakai pulotu, ne nakai hihiga ha tautolu a Atua fakaalofa ke manatu kelea po ke tuahā ke he tau mena momoui mitaki katoatoa haana. Ne lahi e mena ne foaki e ia ma lautolu mo e lahi foki e lagomatai ki a lautolu. Latatonu ni mogoia he Atua ke amanaki ke he omaoma fakaalofa ki a ia ka e nakai ko e totoko. Ne iloa e ia na ha ha ia Atamu mo Eva e lotomatala ke mahani fakamooli, ne kitia he magaaho fakamui he tau tagata nakai mitaki katoatoa tuga a Aperahamo, Iopu, Tanielu, mo e tokologa atu foki.

“Maeke e tau mena oti ke he Atua,” he talahau e Iesu. (Mataio 19:26) Ko e manatu mafanatia a ia. Ko e fakaalofa ha Iehova, pihia mo e falu mahani mua ue atu haana he fakafili tonu, pulotu, mo e malolō, kua fakamooli he magaaho kotofa kua maeke mo e to utakehe e ia e tau lauiaaga oti he agahala mo e mate.—Fakakiteaga 21:3-5.

Maaliali ai, ne nakai iloa tuai e Iehova to agahala e hoa fakamua. He hukia lahi a ia he nakai omaoma he tagata mo e fua mai e matematekelea, ne iloa he Atua ko e tuaga kū nei to nakai taofi e fakamooliaga he finagalo tukulagi haana ma e lalolagi mo e tau tagata i ai. Ko e ha he kumikumi fakalahi hagaao ke he finagalo ia mo e fēfē e aoga ka moua e koe mai he fakamooliaga homo ue atu?a

[Matahui Tala]

[Blurb he lau 14]

Nakai tufuga e Iehova e tau tagata fakamua ko e tau ropoto ne fakatoka ma e puhala gahua pauaki

[Blurb he lau 15]

Ne iloa he Atua na ha ha ia Atamu mo Eva e lotomatala ke mahani fakamooli