“Olelalo Atu Ai a Ia kia Iehova”

“KUA logona hifo e au e nakai aoga,” he talahau he tagata taane ne tafea kehe mai he feakiaga faka-Atua haana. He magaaho ne kamata a ia ke taute e tau lakaaga ke hiki e moui haana, ne hopoate a ia to nakai fakamagalo he Atua a ia. Ka e moua he tagata nei ne fakatokihala e amaamanakiaga mai he tala he Tohi Tapu hagaao ki a Manase, ne tohi he 2 Nofoaga he Tau Patuiki 33:1-17. Kaeke kua logona hifo e koe e nakai aoga ha ko e tau agahala kua mole, liga moua foki e koe e mafanatia he fakafifitakiaga ha Manase.

Na feaki a Manase he kaina mahani Atua. Ko e haana matua taane ko Hesekia, ko e taha he tau patuiki talahaua lahi he tau patuiki i Iuta. Ne fanau a Manase he kavi ke he tolu e tau he mole e fakaloa atu fakalahi he Atua e moui he matua taane haana. (2 Tau Patuiki 20:1-11) Ne mailoga mooli e Hesekia ko e tama taane nei ko e mena fakaalofa ne fua mai he fakaalofa noa he Atua mo e lali ke fakatupu ia ia e fakaalofa ma e tapuakiaga meā. Ka ko e tau tama he tau matua mahani Atua kua nakai muitua tumau ke he tau tuagahui he tau matua ha lautolu. Pihia e mena ne tupu ki a Manase.

Kua nakaila 12 e tau he moui a Manase he mogo ne mate e matua taane haana. Momoko ai, “ne mahani kelea a ia [Manase] ki mua a Iehova.” (Kupu 1, 2) Kua fakaohooho kia he tau tagata fakatonutonu ne nakai fai manamanatu ke he tapuakiaga mooli e patuiki fuata? Nakai talahau he Tohi Tapu. Ka e talahau ki a tautolu na taute e Manase e tapuakiaga tupua kelea muitui mo e favale. Ne ati e ia e tau fatapoa ke he tau atua fakavai, poa e tau tama taane ni haana, taute e tau mena fakataulātua, ti tuku e tupua talaga he faituga ha Iehova i Ierusalema. Ne fakaheu e Manase ne loto maō ke omaoma e tau hatakiaga lagaloga mai ia Iehova, ko e Atua ne ha ha ai e mana ati maeke a ia ke fanau mai.—Kupu 3-10.

Fakahiku, ne fakaatā e Iehova ke līlī a Manase ke he tau apa kula ti uta ki Papelonia. He nofo paea i ai, ne fai magaaho a Manase ke manamanatu ke he puhala haana. Kitia nakai e ia mogonei kua mahala haana a tau atua tā ne nakai fai malolō mo e nakai fai moui ke puipui a ia? Liu nakai a ia manamanatu ke he tau mena ne fakaako he matua taane mahani Atua haana he vahā tama ki a ia? Ha ko e mena ne tupu, ne hiki e loto ha Manase. Ne pehē e tala: “Ti olelalo atu ai a ia kia Iehova hana Atua, mo e fakatokolalo lahi ni a ia . . . ne liogi foki a ia kia ia.” (Kupu 12, 13) Ka kua maeke kia e tagata ne taute e tau agahala kelea muikau pihia ke fakamagalo mooli he Atua?

Kua mafanatia a Iehova ha ko e tokihala mooli ha Manase. Ne logona he Atua e olelalo haana ma e fakaalofa noa “mo e liuaki mai e ia a ia ki Ierusalema ke he hana kautu.” (Kupu 13) He kitia e tokihala haana, ne taute e Manase e tau mena oti ke fakahako e tau hehē haana, he utakehe e tapuaki tupua mai he kautu haana mo e ole ke he haana tau tagata ‘kia fekafekau kia Iehova.’—Kupu 15-17.

Ka logona hifo e koe e nakai aoga ke moua e fakamagaloaga he Atua ha ko e tau agahala kua mole, kia tokaloto e fakafifitakiaga ha Manase. Ko e tala nei ko e vala he Kupu omoomoi he Atua. (Roma 15:4) Maaliali ai, kua manako a Iehova ki a tautolu ke iloa na ‘mautali a ia ke fakamagalo e tau hala.’ (Salamo 86:5) Nakai ko e agahala ka ko e tuaga he loto he tagata agahala ne aoga lahi ki a Iehova. Ko e tagata agahala ne liogi mo e loto tokihala, ne tiaki e puhala hehē haana, ti lali eketaha ke taute e tau mena kua hako ka ‘olelalo atu ai ki a Iehova’ tuga ne taute e Manase.—Isaia 1:18; 55:6, 7.