Moua e Taliaaga he Atua kua Takitaki ke he Moui Tukulagi

“Ko koe, Iehova na e, kua fakamonuina a ia kua tututonu; to puipui e koe a ia ke he [“taliaaga,” NW], tuga ne akau punuti.”—SALA. 5:12.

1, 2. Ko e heigoa e ole ne tala age e Elia ke he fifine takape i Sarefata, ti ko e heigoa e fakamafanaaga ne foaki e Elia ki a ia?

KO E matua fifine mo e tama taane haana ne hoge, ti pihia foki e perofeta he Atua. He amanaki e fifine takape i Sarefata ke tafu e afi kaitunu, ne ole e perofeta ko Elia ki a ia ma e maga vai mo e areto. Ne makai a ia ke age ki a Elia e mena ke inu, ka ko e mena kai ni haana ne toe “ko e puke aloalolima he falaoa ke he paelo, mo e maga puke lolo tote ke he lupo.” Ne logona hifo e ia kua temotemoai e mena kai haana ke kai auloa mo e perofeta, ti tala age ai e ia.—1 Patu. 17:8-12.

² “Ka e taute ai fakamua e koe taha areto pukupuku tote maku,” he fakamakamaka e Elia, “mo e ta mai ai e koe kia au; ka mole ia ti taute ai e koe ma mua mo e hau a tama tane. Ha kua talahau mai pehe a Iehova ko e Atua a Isaraela, Nakai oti e paelo falaoa, to nakai fakatote ai e puke lolo ke he lupo.”—1 Patu. 17:13, 14.

3. Ko e heigoa e fifiliaga aoga lahi kua ha ha ia tautolu oti?

³ Ha ha he takape e fifiliaga aoga lahi ke taute he nakai ni fifili e mena kua lata ke taute aki e mena kai haana ne toe. To falanaki nakai a ia ki a Iehova ke laveaki a ia mo e tama taane haana, po ke to tuku fakamua e ia e tau manako fakatino haana ke he mouaaga he fakaalofa, po ke taliaaga, mo e fakakapitiga he Atua? Pihia foki e hūhū ki a tautolu oti. To fakakite nakai e tautolu kua manamanatu lahi ke moua e taliaaga a Iehova ka e nakai ko e tutuli he haohao mitaki ke he tau koloa tino? Ha ha ia tautolu e tau kakano oti ke falanaki mo e fekafekau ke he Atua. Ti fai lakaaga ka taute e tautolu ke kumi mo e moua e taliaaga haana.

‘Kua Lata a Koe ke Tuku Atu e Tapuakiaga’

4. Ko e ha kua lata a Iehova ke moua e tapuakiaga ha tautolu?

⁴ Ha ha ia Iehova e tutonuhia ke amanaki ke he tau tagata ke fekafekau fakamitaki ki a ia. Ko e matakau he tau fekafekau haana he lagi ne talia e manatu taha ia: “[Iehova] na e, kua lata ni a koe ke tuku atu ki ai e fakahekeaga, mo e lilifu, mo e malolo; ha kua eke e koe e tau mena oti, ha ko e hau a finagalo foki ne ha ha i ai a lautolu, mo e eke ai a lautolu.” (Fakakite. 4:11) Ha ko Iehova e Tufuga, kua lata a ia mo e tapuakiaga ha tautolu.

5. Ko e ha e fakaalofa he Atua kua lata ke fakalagalaga a tautolu ke fekafekau ki a ia?

⁵ Ko e taha kakano ke fekafekau a tautolu ki a Iehova ko e fakaalofa mua ue atu haana ma tautolu. “Ti eke ai he Atua e tagata ke he hana fakatai,” he talahau he Tohi Tapu, “ko e fakatai he Atua ne eke ai e ia; ne eke e ia a laua ko e tane mo e fifine.” (Kene. 1:27) Ha ha he tagata e atāina ke fifili ne tuku age he Atua ke manamanatu mo e ke taute e tau fifiliaga. He foaki ki a tautolu e moui, ne eke a Iehova mo Matua ke he tau tagata. (Luka 3:38) Tuga ni ha matua taane mitaki, ne taute e ia e tau mena oti kana ke foaki ke he tau tama taane mo e tau tama fifine haana e mena kua lata ke olioli e moui. “Kua fakahake ne ia hana la” mo e “fakato hifo foki e ia e uha,” ti maeke he Lalolagi palaneta ke tupu mai e tau mena kai loga ma tautolu he tau takatakaiaga fulufuluola.—Mata. 5:45.

6, 7. (a) Ko e heigoa e hagahaga kelea ne tamai e Atamu ke he tau hologa oti haana? (e) Ko e heigoa he poa he Keriso ka taute ma lautolu kua kumi e taliaaga he Atua?

⁶ Ne laveaki foki e Iehova a tautolu mai he tau fua mamahi he agahala. He agahala, ne eke a Atamu ke tuga e tagata pelē tupe ne kaihā mai he magafaoa haana ke taute e tau pelē tupe haana. He totoko ki a Iehova, ne kaihā e Atamu mai he tau tama haana e ha lautolu a monuina—ko e fiafia tukulagi. Ne fakatomo hifo he lotokai haana e tau tagata ke fakatupa i lalo he iki favale ko e nakai mitaki katoatoa. Ati gagao e tau tagata oti kana, lauia he momoko, ti fakahiku mamate. He fakatoka mai e fekafekau kua lata mo e totogi, ti kua taute e Iehova e totogiaga ka fakahao a tautolu mai he tau fua mamahi lahi ia. (Totou Roma 5:21.) He fakalautatai mo e finagalo he haana Matua, ne foaki e Iesu Keriso e “hana moui mo lukutoto ke hukui aki e tau tagata tokologa.” (Mata. 20:28) Nakai leva ko e tau fua mitaki katoatoa he totogi he lukutoto ia to tanaki e lautolu kua moua e taliaaga he Atua.

⁷ Ko e ha tautolu a Tufuga ko Iehova, ne lahi ue atu e mena ne taute e ia ke he ha tagata ke foaki ki a tautolu e moui fiafia mo e fai kakano. He moua e taliaaga haana, to maeke ia tautolu ke kitia e puhala kua gahua a ia ke utakehe e tau matematekelea oti kana ne taute ke he lanu tagata. He puhala ni haana, to matutaki a Iehova ke fakakite ki a tautolu e puhala kua maeke a ia ke “taui mai a lautolu kua kumi fakamakutu kia ia.”—Hepe. 11:6.

“To Eke Poa mo Loto Hāu a Tau Tagata”

8. Ko e heigoa he mena ne tupu ki a Isaia kua fakaako ki a tautolu hagaao ke he fekafekau ke he Atua?

⁸ Ko e moua e taliaaga he Atua kua lauia e fakagahua fakamitaki he atāina ha tautolu ke fifili. Kakano he mena nei kua nakai omoi e Iehova ha tagata ke fekafekau ki a ia. He vahā a Isaia, ne hūhū a Ia: “Ko hai ke fakafano atu e au? ko hai foki ke fano ma mautolu?” He mailoga e tonuhia he perofeta ke fifili, ne fakalilifu e Iehova a ia. Manamanatu la ke he fiafia a Isaia he tali atu: “Ko au hanai, kia fakafano atu e koe au.”—Isaia 6:8.

9, 10. (a) Ko e heigoa e aga kua lata ia tautolu ke fekafekau ke he Atua? (e) Ko e ha kua latatonu ia tautolu ke fekafekau katoatoa ki a Iehova?

⁹ Kua atāina e tau tagata ke fekafekau po ke nakai fekafekau ke he Atua. Manako a Iehova ki a tautolu ke fekafekau loto fakamakai ki a ia. (Totou Iosua 24:15.) Ko lautolu ne tapuaki fakateaga ke he Atua to nakai fakafiafia a Ia; po ke nakai talia foki e Ia e fakamakai ha lautolu ne loto mooli ke fakafiafia ni e falu tagata. (Kolo. 3:22) Ka taute e tautolu e fekafekauaga tapu mo e “fakamule” he fakaatā e tau mena fakalalolagi ke fakatauhele e tapuakiaga ha tautolu, to nakai moua e tautolu e taliaaga he Atua. (Esoto 22:29) Na iloa e Iehova ko e fekafekau loto katoa ki a ia kua mitaki ma tautolu. Ne tomatoma a Mose ke he tau Isaraela ke fifili e moui he ‘fakaalofa atu kia Iehova ha lautolu a Atua, fanogonogo ke he hana leo mo e pipiki atu ki a ia.’—Teu. 30:19, 20.

¹⁰ Ko e Patuiki ko Tavita i Isaraela i tuai ne lologo ki a Iehova: “To eke poa mo loto hāu a tau tagata ke he aho he hāu a malolo mo e tau mena fulufuluola tapu mai he manava he matafatafa ata he aho; ha i ai ia koe e hahau he hāu a fuata.” (Sala. 110:3) Tokologa e tagata he vahā nei ne momoui ma e haohao mitaki fakatupe mo e fakafiafiaaga. Ma lautolu mogoia kua fakaalofa ki a Iehova, kua tuku fakamua e lautolu e fekafekauaga tapu he tau mena oti. Ko e fakamakutu ha lautolu he fakamatala e tala mitaki kua fakakite e mena ne mua e aoga ki a lautolu. Ha ha ia lautolu e mauokafua katoatoa he lotomatala a Iehova ke foaki ma e tau manako ha lautolu he tau aho takitaha.—Mata. 6:33, 34.

Tau Poa ne Felauaki mo e Taliaaga he Atua

11. Ko e heigoa e mena aoga ne amanaki e tau Isaraela ke moua he foaki e tau poa ki a Iehova?

¹¹ I lalo he maveheaga he Fakatufono, ne foaki he tau tagata he Atua e tau poa mitaki ke moua e taliaaga haana. “Kaeke foki ke eke e mutolu e poa fakaaue kia Iehova,” he talahau he Levitika 19:5, “kia eke poa a mutolu kia ofania [po ke, talia] ai a mutolu.” He tohi taha ia he Tohi Tapu, totou e tautolu: “Kaeke foki ke eke e mutolu e poa fakaaue kia Iehova, ti eke ni mo e [“talia,” NW].” (Levi. 22:29) He magaaho ne foaki he tau Isaraela e tau poa manu mitaki ke he fatapoa a Iehova, ko e ahua ne hake kua tuga e “mena manogi mitaki” ke he Atua mooli. (Levi. 1:9, 13) Ne logona e ia e totokaaga mo e fakahahau he tau fakakiteaga fakaalofa ia mai he tau tagata haana. (Kene. 8:21) He tau vala nei he Fakatufono, kua moua e tautolu e matapatu fakaakoaga kua aoga ke he vahā nei. Ko lautolu ne foaki e tau poa mitaki ki a Iehova kua moua e taliaaga haana. Ko e heigoa e tau poa ne talia e ia? Manamanatu ke he ua e faahi he moui: ha tautolu a mahani mo e ha tautolu a puhala vagahau.

12. Ko e heigoa e tau gahua ka ‘tuku atu e tautolu ha tautolu a tau tino mo poa’ kua kelea ke he Atua?

¹² He tohi haana ke he tau Roma, ne tohia he aposetolo ko Paulo: “Kia tuku atu e mutolu ha mutolu a tau tino ke he Atua, ko e poa moui, mo e tapu, ke talia mo e fiafia, ko e fekafekauaga haia kua lata kia mutolu ke eke.” (Roma 12:1) Ke moua e taliaaga he Atua kua lata he tagata ke fakatumau e tino haana ke talia ke he Atua. Ka fakakelea e ia e tino haana aki e tapaka, tau fua pitolo, tau tulaki kona, po ke fakaaoga fakahehē e kava, to nakai aoga e poa ia. (2 Kori. 7:1) Lafi ki ai, ko ia “kua feuaki, kua hala tuai a ia ke he hana tino ni,” ko e ha mahani kelea kua fakakite kua nakai mitaki e poa haana ki a Iehova. (1 Kori. 6:18) Ke fakafiafia e Atua, kua lata he tagata ke ‘tapu ke he tau mahani oti haana.’—1 Pete. 1:14-16.

13. Ko e ha kua latatonu ke fakaheke e tautolu a Iehova?

¹³ Ko e taha poa kua fiafia a Iehova ki ai kua hagaao ke he malolō he puhala vagahau ha tautolu. Ko lautolu ne fakaalofa ki a Iehova ne tutala fakamitaki tumau hagaao ki a Ia he toloaga tagata mo e he tau loto kaina ni ha lautolu. (Totou Salamo 34:1-3.) Totou Salamo 148-150, ti mailoga ko e lagafiha e fakamafana he tau salamo tolu nei a tautolu ke fakaheke a Iehova. Mooli, “kua gali kia lautolu kua mahani hako ke fakaheke atu.” (Sala. 33:1) Ti peehi he ha tautolu a Fakafifitaki ko Iesu Keriso e aoga he fakaheke e Atua he fakamatala e tala mitaki.—Luka 4:18, 43, 44.

14, 15. Tomatoma e Hosea e tau Isaraela ke foaki e tau poa fe, ti tali atu fēfē a Iehova?

¹⁴ He fakamatala fakamakutu, kua fakakite e tautolu e fakaalofa ha tautolu ma Iehova mo e manako ha tautolu ma e taliaaga haana. Ma e fakatai, manamanatu ke he puhala ne tomatoma he perofeta ko Hosea e tau Isaraela ne taute e tapuakiaga fakavai mo e galo e fiafia he Atua. (Hosea 13:1-3) Ne tala age a Hosea ki a lautolu ke olelalo: “Kia uta kehe e koe [Iehova] e tau mahani kelea oti, mo e talia e koe e mena ne mitaki ti ta atu ai e mautolu kia koe e tau poa [po ke, tau punua povi] he tau laugutu ha mautolu.”—Hosea 14:1, 2.

¹⁵ Ko e poa po ke, povi ko e manu tauuka lahi mahaki ka foaki he tagata Isaraela ki a Iehova. Ti ko e ‘tau punua povi he tau laugutu ha tautolu’ kua hagaao ke he tau kupu mooli ne aoga ne vagahau ke fakaheke e Atua mooli. Tali atu fēfē a Iehova ki a lautolu ne taute e tau poa pihia? Pehē a ia: “To fakaalofa noa atu au kia lautolu.” (Hosea 14:4) Ki a lautolu ne foaki e tau poa pihia he fakahekeaga, ne fakamagalo, talia, mo e kapitiga a Iehova ki a lautolu.

16, 17. Ka fakalagalaga he tua ke he Atua e tagata ke fakamatala e tala mitaki, to fēfē a Iehova ka moua e fakahekeaga he tagata ia?

¹⁶ He fakaheke a Iehova ki mua he tau tagata ko e vala aoga tumau ke he tapuakiaga mooli. Ko e fakaheke e Atua mooli kua kakano lahi ke he salamo ati olelalo atu a ia ke he Atua: “Iehova na e, kia talia e koe e tau poa kua eke mo e loto kua tala atu ai haku gutu.” (Sala. 119:108) Ka e kua e vahā nei? He tutala hagaao ke he moto tagata he magahala ha tautolu, ne perofeta mai a Isaia: “To talahau ai e lautolu e tala fiafia ke he fakahekeaga a Iehova . . . ti talia ai a lautolu [tau mena fakaalofa ha lautolu] ke he haku [Atua] a fatapoa.” (Isaia 60:6, 7) He fakamooliaga, totou miliona hane foaki e “poa fakaheke ke he Atua kia ia ni, ko e fua haia he tau laugutu ha lautolu, kua fakaaue atu ke he hana higoa.”—Hepe. 13:15.

¹⁷ Ka e kua a koe? Kua foaki nakai e koe ke he Atua e tau poa kua talia? Ka nakai, to taute nakai e koe e tau hikiaga kua lata mo e kamata ke fakaheke a Iehova ki mua he tau tagata? He fakalagalaga he tua a koe ke kamata ke fakamatala e tala mitaki, ko e tau foakiaga haau “to mua e mitaki ia kia Iehova ke he povi.” (Totou Salamo 69:30, 31.) Kia mafanatia ko e “mena manogi mitaki” he poa fakaheke haau to hokotia ki a Iehova mo e to foaki e ia ki a koe e taliaaga haana. (Eseki. 20:41) Ko e olioli ka logona e koe mogoia kua mua ue atu.

‘Ko Iehova ka Fakamonuina a Ia kua Tututonu’

18, 19. (a) Ko e heigoa e onoonoaga he fekafekauaga ke he Atua kua taofi he tau tagata tokologa he vahā nei? (e) Ko e galo e taliaaga he Atua kua takitaki atu ke he heigoa?

¹⁸ He vahā nei, tokologa e tagata ne talahau pihia tuga e falu he magahala a Malaki: “Nakai aoga ke fekafekau ke he Atua, ko e heigoa foki e mena kua moua e tautolu he omaoma ke he hana fekau.” (Mala. 3:14) He takitaki he tau velevelekoloa, ne onoono a lautolu ke he finagalo he Atua kua nakai maeke ke moua ti nakai aoga foki e fakatufono haana. Ki a lautolu, ko e gahua fakamatala ko e mena moumou magaaho mo e punaaga fakahogohogo manava.

¹⁹ Ko e malolō omoomoi i tua he tau manatu ia kua liu ki tua ke he kaina ko Etena. Ko Satani ne fakalagalaga a Eva ke tiaki e aoga mooli he moui homo atu ne age e Iehova ki a ia mo e ke tiaki e taliaaga Haana. He vahā nei, ne peehi e Satani e tau tagata ke talia kua nakai fai mena ka moua he taute e finagalo he Atua. Ka e mailoga e Eva mo e taane haana ko e galo e taliaaga he Atua kua kakano kua galo e tau momoui ha laua. Ko lautolu mogonei ne muitua ke he fakafifitakiaga kelea ha laua to nakai leva ti mailoga foki e mena mamahi ia.—Kene. 3:1-7, 17-19.

20, 21. (a) Ko e heigoa ne taute he fifine takape i Sarefata, ti fēfē e fakahikuaga haana? (e) Fēfē mo e ko e ha kua lata ia tautolu ke fifitaki e fifine takape i Sarefata?

²⁰ Fakatatai e fakahikuaga momoko ha Atamu mo Eva mo e fua he tau mena ne tutupu ne talahau fakamua hagaao ki a Elia mo e fifine takape i Sarefata. He mole e logona e tau kupu atihake a Elia, ne kamata e fifine ke tao mo e tuku age fakamua ke he perofeta taha falaoa. Ti fakamooli e Iehova e maveheaga ne taute e ia puhala ia Elia. Pehē e tala: “Kua kai ai e lautolu, ko ia, mo Elia, mo e hana magafaoa, ke he tau aho loga. Nakai oti e falaoa ke he paelo, ti nakai fakatote ai e puke lolo ke he lupo, ke lata mo e kupu a Iehova ne talahau mai ai e Elia.”—1 Patu. 17:15, 16.

²¹ Ne taute he fifine takape i Sarefata e mena ne tokogahoa e tagata he tau piliona ne momoui mogonei kua makai ke taute. Ne falanaki katoatoa a ia ke he Atua he fakamouiaga, ti nakai tiaki noa e Ia e fifine. Kua fakamau he tala nei mo e falu tala foki he Tohi Tapu e latatonu ha Iehova mo e falanakiaga ha tautolu. (Totou Iosua 21:43-45; 23:14.) Ko e tau momoui he Tau Fakamoli ha Iehova he vahā nei kua foaki foki e fakamooliaga to nakai tiaki e ia a lautolu kua talia e ia.—Sala. 34:6, 7, 17-19.a

22. Ko e mafiti he ha ke kumi e tautolu e taliaaga he Atua mo e nakai fakamule?

²² Ko e aho he fakafiliaga he Atua ka hoko “kia lautolu oti kana kua nonofo ke he lalolagi oti” kua tata lahi mai. (Luka 21:34, 35) Nakai hao ai. Nakai fai monuina po ke koloa hagahaga mitaki ka teitei tatai ke he aoga he logona e Fakafili ne kotofa he Atua ka pehē: “O mai a, ko mutolu kua fakamonuina he haku a Matua, kia eke ma mutolu, e kautu kua taute ma mutolu.” (Mata. 25:34) E, “ha ko koe, Iehova na e, kua fakamonuina a ia kua tututonu; to puipui e koe a ia ke he [“taliaaga,” NW], tuga ne akau punuti.” (Sala. 5:12) Lata kia ia tautolu ke kumi e taliaaga he Atua?

[Matahui Tala]

Manatu Nakai e Koe?

• Ko e ha kua latatonu a Iehova mo e tapuakiaga mooli ha tautolu?

• Ko e heigoa e tau poa ne talia e Iehova he vahā nei?

• Ko e talahauaga ‘tau punua povi he tau laugutu ha tautolu’ kua hagaao ke he heigoa, ti ko e ha kua lata ke foaki ai e tautolu ki a Iehova?

• Ko e ha kua lata ia tautolu ke kumi e taliaaga he Atua?

[Fakatino he lau 13]

Ko e heigoa e manatu aoga ne tuku he perofeta he Atua ki mua he matua fifine nofogati?

[Fakatino he lau 15]

Ko e heigoa e aoga kua moua e tautolu he foaki e poa fakaheke ki a Iehova?

[Fakatino he lau 17]

Ko e falanaki mooli haau ki a Iehova to nakai fakahogohogo manava