Tau Manatu ma e Tapuakiaga Magafaoa mo e Fakaako Fakatagata
KE HE mataulu he 2009, ne hikihiki he tau fakapotopotoaga he Tau Fakamoli a Iehova he lalolagi katoa ha lautolu a fakaholoaga feleveiaaga. Kua tuku fakalataha e tau feleveiaaga ne ua he vahā tapu, ti fakamalolō ke he tau tagata oti ke fakaaoga e afiafi atā ma e tapuakiaga magafaoa po ke fakaako fakatagata. Fakaaoga nakai e koe e fakaholoaga foou? Aoga katoatoa nakai a koe mai i ai?
Falu ne manamanatu ko e heigoa e tohi kua lata ia lautolu ke fifili ke fakatutala he tapuakiaga magafaoa. Nakai ko e foliaga he Kau Fakatufono ke fakatū taha e puhala ma e tau magafaoa oti. He kehekehe e tau tuaga, kua lata he tau ulu magafaoa takitaha po ke tau tagata takitokotaha ke filifilia e puhala ka fakaaoga fakamitaki e magaaho nei he vahā tapu.
Falu ne tauteute ma e tau feleveiaaga he fakapotopotoaga, ka e nakai lata ke fakakaupā e tapuakiaga magafaoa ke he mena ia. Falu ne totou, fakatutala, mo e fakataitai e tau tala he Tohi Tapu, mua atu ma e aoga he fanau ikiiki. Kua liga nakai lata po ke mitaki tumau foki ke fakaaoga e puhala hūhū mo e tali, tuga ne taute he tau feleveiaaga he fakapotopotoaga. Ko e takatakaiaga totoka mitaki kua fa lagomatai lahi ke fakaohooho e fakatutalaaga mo e feutaaki he tau manatu. Kua fakatupu he takatakaiaga pihia e manamanatu fakalaulahi, ka taute e magaaho ia ke tokaloto mo e fiafia e tau tagata oti.
Taha e matua taane he fanau tokotolu ne tohi: “Ko e mena ha mautolu ne fa e taute kua lahi ke fakavē ke he totouaga he Tohi Tapu. Igatia a mautolu mo e totou tuai e tau veveheaga, fifili he fanau falu vala ke kumikumi, ti talahau mogoia e lautolu e tau mouaaga ha lautolu. Fa tā e Michael [fitu tau] e fakatino po ke tohi taha e paratafa. Maeke ia David mo Kaitlyn [13 mo e 15 tau] ke tohi hagaao ke he tala he Tohi Tapu mai he onoonoaga he tagata kitekite. Ma e fakatai, he totou a mautolu hagaao ke he fakamatalaaga ha Iosefa he tau miti ke he tagata taute mena kai ha Farao mo e tagata taute uaina haana, ne tohi e Kaitlyn e fakamauaga mai he onoonoaga he pagotā hane kitekite e mena ne tupu.”—Kene., ve. 40.
Kua kehekehe pauaki e tau tuaga. Ko e mena kua aoga ke he taha tagata po ke magafaoa kua liga nakai aoga ke he falu. Kua fakakite he puha he vala nei e falu manatu ka liga fakaaoga e koe he tapuakiaga magafaoa po ke fakaako fakatagata. Liga maeke ia koe ke manamanatu ke he loga atu foki e puhala.
[Puha/Fakatino he lau 6, 7]
Ma e tau magafaoa ne fai fuata mui:
• Totou mo e fakatutala e tohi Questions Young People Ask—Answers That Work.
• Manatu la kua moui a koe he vahā Tohi Tapu. (Kikite Ko e Kolo Toko ia Iuni 1, 1996, lau 12, paratafa 17-18.)
• Tutala ke he tau foliaga loloa mo e kūkū.
• Ke he tau magaaho, kitekite mo e fakatutala ke he vitiō ne fakavē ke he Tohi Tapu.
• Tutala ke he vala he Kolo Toko “Ma e Tau Fuata Ikiiki.”
Ma e tau hoa ne nakai fai tama:
• Fakatutala ke he tohi Ko e Mena Galo he Fiafia he Magafaoa he tau veveheaga 1, 3, 11-16.
• Fetutalaaki ke he tau kumikumiaga he tau manatu mai he totou Tohi Tapu.
• Tauteute ma e Fakaakoaga Tohi Tapu he Fakapotopotoaga po ke Fakaakoaga Kolo Toko.
• Fakatutala e tau puhala ke fakalaulahi e fekafekauaga ha mua ko e hoa.
Ma e tau matakainaga taane mo e tau matakainaga fifine nonofo takitokotaha po ko lautolu he tau magafaoa ne mavehevehe fakalotu:
• Fakaako e tau tohi foou ne moua he tau fonoaga he faahimotu.
• Totou e tau Yearbook foou mo e tau Yearbook tuai.
• Taute e tau kumikumiaga ke he tau hūhū ne mahani ke he matakavi haau.
• Tauteute e tau fakatātāaga ma e gahua he fonua.
Ma e tau magafaoa ne fai tama ikiiki:
• Fakataitai e tau tala ke he Tohi Tapu.
• Taute e tau pelē fakamanamanatu, tuga e tau tala he Awake!, lau 30 mo e 31.
• Taute e tau mena kua fakaaoga e manamanatuaga he falu magaaho. (Kikite mataulu “Fakaako e Tohi Tapu—I Loto he Pā Manu!” he Awake! ia Mati 8, 1996, lau 16-19.)
• Tutala ke he vala he Kolo Toko “Fakaako e Tau Tama ha Mutolu.”