Manatu Nakai e Koe?

Kua totou fakamitaki nakai e koe e tau fufuta foou he Ko e Kolo Toko? Lali la mogoia ke kitia ko e maeke nakai a koe ke tali e tau hūhū i lalo:

• Ko e heigoa e tau kei ne tolu ka lagomatai a tautolu ke totoko ha hihiga ke nakai fakamooli?

Ko e: (1) Fakatupu e matakutaku mitaki ke he Atua. (1 Pete. 3:12) (2) Feaki e loto manamanatu ne fakamahani he Tohi Tapu. (3) Gahua fakamalolō ke fakatupu ki mua e logonaaga fakalatalata.​—4/15, lau 6-7.

• Iloa fēfē e tautolu ko e fekafekau ke he Atua mo e nakai fakateaga kua nakai kakano tumau ko e aga vale po ke kalo mai he okiokiaga?

Maeke ia tautolu ke manamanatu ke he fifitakiaga a Iesu. Ne olioli e ia e tau taumafa fiafia mo e falu. Iloa e tautolu kua nakai molea e kikili lahi po ke aga vale haana. Ko e falu tagata, pihia mo e tau tama, ne o atu mo e mafanatia ki a ia.​—4/15, lau 10.

• Ko e heigoa ne fakatai he akau ko e olive ia Roma veveheaga 11?

Ko e akau ko e olive ne hagaao ke he vala ke uaaki he tega ha Aperahamo, ko e Isaraela fakaagaaga. Ko Iehova kua tuga e vaka mo Iesu kua tuga e matapatu he akau ko e olive fakatai. Ko e laulahi he tau Iutaia he tino ne tiaki a Iesu, ne tua e tau tagata Motu Kehe ti matai ai ki ai, mo e moua ai e numera katoa he vala he tega ke uaaki ha Aperahamo.​—5/15, lau 22-25.

• To eke kia e hologa he tagata mitaki katoatoa ko Iesu ke eke mo vala he lukutoto?

Nakai. Pete kua liga maeke a Iesu ke eke mo punaaga he tau hologa mitaki katoatoa ne tokologa, ko e tau hologa ia ne nakai ko e vala he lukutoto. Ko e moui mitaki katoatoa ha Iesu hokoia ne tatai ke he ha Atamu. (1 Timo. 2:6)​—6/15, lau 13.

• Ko e heigoa he hoa ka taute he tuga kua lolelole e fakafetuiaga ha laua he mole e fanafanau?

Kua lata ia laua ke fakamau e fefakaalofaaki ha laua. Kua lata e taane ke eketaha ke fakatotoka e tau logonaaga tuahā he hoana haana. Ti lata tokoua ke gahua ke moua e matutakiaga mitaki hagaao ke he tau logonaaga mo e tau manako fakatino ha laua.​—7/1, lau 12-13.

• O oti kia e tau Kerisiano fakamooli ke he lagi?

Nakai. Ko e liu tu mai ke he lagi kua matutaki lahi ke he matagahua ne age ni ke he falu. Ko e matagahua ha lautolu ke pule mo Iesu ke he lagi ti “nonofo foki ke he tau nofoaiki, mo e fakafili.” (Luka 22:28-30) Ke he tau fakatufono oti, gahoa ni e numera ka pule. Ti pihia foki, ko e 144,000 ni “ne fakafua mai he tau tagata” ke pule mo Iesu ke he Kautu haana he lagi. (Fakakite. 14:1, 4, 5)​—7/1, lau 22.

• Iloa fēfē e tautolu na fai fakatokatokaaga e Atua he lalolagi he vahā nei?

Ko e fakamooliaga he Tohi Tapu kua fakakite kua fakaaoga tumau he Atua e fakatokatokaaga haana ke taute e finagalo haana. Ne fakatokatoka e ia e tau tagata tapuaki i Isaraela i tuai, ti fakatokatoka e ia e tau Kerisiano fakamua ke he tapuakiaga ha lautolu. Kua latatonu mogoia ke fakahikuaki ko Iehova ko e Atua hane takitaki agaia haana tau tagata he vahā nei, tuga ni he taute e ia i tuai. Ko e fakatokatoka mo e fakalataha e tau tagata tapuaki haana ko e fakakiteaga he levekiaga fakaalofa haana ma lautolu.​—7/1, lau 24.

• Maeke fēfē he tau Kerisiano ke fakakite kua tokaloto e lautolu e hatakiaga hagaao ke he tau akoako fakavai ne fakamau ia Gahua 20:29, 30?

Kua nakai lata ia lautolu ke fakaatā e tau tagata nei ke he tau kaina ha lautolu po ke fakafeleveia e tau faiaoga fakavai. (Roma 16:17; 2 Ioa. 9-11) Kalo kehe e tau Kerisiano he tau tohi he tau tagata tiaki taofiaga, tau fakaholoaga televisoni hagaao ki a lautolu, mo e tau faahi Web ne toka ai e tau fakaakoaga ha lautolu.​—7/15, lau 15-16.