Ko e Iki Fakagalogalo he Lalolagi ne Kitia

“TO VEGA ainei e iki he lalolagi nai,” he talahau e Iesu ke he tau tagata he taha magaaho. Fakamui, ne lafi e ia ko e ‘iki he lalolagi ne nakai moua e taha mena kia ia’ ati “kua fakafili e iki he lalolagi nei.” (Ioane 12:31; 14:30; 16:11) Ko hai ne hagaao ki ai a Iesu?

He manamanatu ke he mena ne talahau e Iesu hagaao ke he “iki he lalolagi nai,” maaliali ai kua nakai hagaao a ia ke he haana a Matua ko Iehova, ko e Atua. Ti ko hai mogoia e “iki he lalolagi nai”? To “vega” fēfē a ia, ti kua “fakafili” fēfē a ia?

Fakakite he “Iki he Lalolagi Nai” a Ia

Tuga ni e takitaki kolokolovao ne fa matalahi he palau hagaao ke he pule haana, ti pihia foki e Tiapolo he mogo ne kamatamata a Iesu, ko e Tama he Atua. He mole e fakakite ki a Iesu e “tau kautu oti” he lalolagi, ne tuku age e Satani e foakiaga nei: “To ta atu oti e au kia koe e pule nai, mo e lilifu ha lautolu; ha kua tuku mai ia kia au, to ta atu foki e au kia ia na loto au ki ai; hanai, kaeke ke hufeilo mai a koe kia au, to eke e tau mena oti na māu.”​—Luka 4:5-7.

Kaeke ko e Tiapolo ko e fakatai noa ni he kelea muitui, tuga ne talahau he falu, ti fakamaama fēfē mogoia e kamatamata ia? Na kamatamata kia a Iesu he falu manatu kelea muitui po ke falu fakagoagoa he loto he liga mole e papatisoaga haana? Ka pihia, to maeke fēfē ai ke pehē kua “nakai fai hala foki a ia”? (1 Ioane 3:5) Mamao mai he fakatikai e pule he Tiapolo ki luga he tau tagata, ne talahau mooli ai e Iesu he pehē hagaao ki a ia ko e “iki he lalolagi,” he fakamaama ai “ko e keli tagata a ia” mo e “ko e pikopiko a ia.”​—Ioane 14:30; 8:44.

Kavi ke he 60 e tau he mole e fehagai he Keriso mo e Tiapolo, ne fakamanatu age he aposetolo ko Ioane ke he tau Kerisiano e malolō fakaohooho he Tiapolo, he pehē “ko e lalolagi oti ha he pule hana kua mahani kelea.” Ko ia nā, he ui foki e Ioane, “kua fakahehe e lalolagi oti.” (1 Ioane 5:19; Fakakiteaga 12:9) Maaliali ai, kua vagahau e Tohi Tapu hagaao ke he agaaga nakai kitia ko e “iki he lalolagi nai.” Ka ko e heigoa e lahi he fakaohoohoaga haana ki luga he tau tagata?

Kua Age he Iki he Lalolagi e Pule ke he Tau Matakau

He tohi hagaao ke he tauaga he tua he tau Kerisiano, kua fakakite fakamaaliali he aposetolo ko Paulo e tau fī kelea ue atu ha lautolu. Ha kua “tau a tautolu,” he talahau fakamaali e ia, nakai ke he “tau tagata, ka ko e tau iki lalahi, mo e tau pule, mo e tau iki he pouli ha he lalolagi nai, katoa mo e tau agaga kelea ke he tau mena ha he lagi.” (Efeso 6:12) Ti ko e tauaga nei kua molea atu ke he takaiaga he tagata, ha kua fakahoko ai, ‘nakai ke he tau tagata,’ ka ke he “tau agaga kelea.”

Ko e talahauaga “tau agaga kelea” nei, kua nakai hagaao ke he mena fakatai he kelea muitui, ka ke he tau mena momoui fakaagaaga kelea lahi. Ti kua fakagahua he Tiapolo e pule haana puhala he tau agelu totoko ne tiaki e “mena [tonu] ne nonofo ai a lautolu” he lagi.​—Iuta 6.

Ko e tohi fakaperofeta ha Tanielu he Tohi Tapu ne fakakite e puhala he ‘tau iki he lalolagi nai’ ne fakaohooho e pule ke he lalolagi tali mai i tuai. He tupetupe lahi hagaao ke he tau matakainaga Iutaia he 537 F.V.N. ne liliu ki Ierusalema mai he fakapaea i Papelonia, ne tolu e vahā tapu ne liogi e perofeta ko Tanielu ma lautolu. Ne fakafano he Atua e agelu ke fakamafana e perofeta, he tala age ki a ia e kakano ne kua mule e hoko atu haana. Pehē a ia: “Ko e iki he kautu a Peresia ne totoko mai a ia kia au ke he tau po ne uafulu ma taha.”​—Tanielu 10:2, 13.

Ko hai a ia ko e ‘iki a Peresia’? Ko e agelu ne nakai hagaao mooli ke he patuiki Peresia ko Kuresa, ne onoono fiafia he magahala ia ki a Tanielu mo e haana tau tagata. Lafi ki ai, maeke fēfē e patuiki noa ia ke totoko e mena moui fakaagaaga ke tolu e vahā tapu ka e taha ni e pō ne kelipopo he taha e agelu e 185,000 he tau kautau malolō? (Isaia 37:36) Ko e iki favale nei a Peresia kua eke ni mo hukui he Tiapolo, ko e temoni haia ne pule ke he motu he Kautu Peresia. Fakahiku he tala, ne pehē e agelu he Atua to liu foki a ia ke tau ke he ‘iki a Peresia’ pihia foki ke he iki temoni, ko e “iki a Iavana.”​—Tanielu 10:20.

Ko e heigoa ka fakahiku e tautolu mai he mena nei? Kua ha ha i ai mooli e tau ‘iki he lalolagi’ ne nakai kitia, ko e tau iki temoni hane fakalataha ke he pule he lalolagi i lalo he takitaki ha lautolu ko Satani ko e Tiapolo. Ka ko e heigoa e foliaga ha lautolu ke hoko mai mogonei?

Fakakite he Iki he Lalolagi e Aga Mooli Haana

Ko e tohi fakahiku he Tohi Tapu ia Fakakiteaga, ne talahau he aposetolo ko Ioane e puhala ha Iesu, ko Mekaeli ko e agelu ne mua kua fakakaumahala e Tiapolo mo e tau temoni haana ti talahau e fakahikuaga kelea makimaki ne fua mai he tolo hifo a lautolu mai he lagi. Totou e tautolu: “Oi fakaalofa kia mutolu kua nonofo ke he fonua . . . ha kua hifo kia mutolu e tiapolo kua ita lahi, ha kua iloa e ia kua tote hana vaha.”​—Fakakiteaga 12:9, 12.

Fakakite fēfē he Tiapolo e ita lahi? Tuga ne tokologa e tau tagata kolokolovao manako lahi kua mumui ke he poakiaga he ‘pule po ke fakaotioti,’ kua fakamakamaka e Tiapolo mo e haana tau temoni ke tamai e lalolagi mo e tau tagata i ai ke mamate fakalataha mo lautolu. He iloa kua tote lahi e magaaho haana, hane fakaaoga he Tiapolo e taha he tau matapatu fakatokaaga he kaufakalataha he tagata i lalo he haana pule​—ko e pisinisi lahi—​ke fakaohooho e aga lotokai he tau tuaga fakatupe, ne takitaki ke he kū hifo he tau tufugatiaaga pauaki mo e moumou he takatakaiaga he lalolagi katoa, ti fakamatakutaku e fakahaoaga he tagata.​—Fakakiteaga 11:18; 18:11-17.

Tali mai he kamataaga he fakamauaga tala he tagata, ko e hoge he Tiapolo ma e pule kua fakakite foki ke he tau mena politika mo e lotu. Ko e tohi he Fakakiteaga kua fakatino e tau pule fakapolitika ke eke mo tau manu favale ne tuku age he Tiapolo e “pule lahi.” Kua fakamaama foki e kaufakalataha fakalialia he tau politika mo e lotu kua tuga e faivao fakaagaaga. (Fakakiteaga 13:2; 17:1, 2) Manamanatu ke he favaleaga, tupaaga, tau felakutaki, mo e tau latau fakamatakau ke he tau senetenari kua mole ne tokologa ne mamate. Maeke nakai he ha tagata ke talahau mooli ko e tau mena tutupu matakutakuina mo e teteki ne kua fakakelea e tohiaga he fakamauaga tala ko e tau matagahua aga mau he tau tagata? Po ke tau fua kia a ia he fakavaia he tau kau fakaagaaga kelea muitui ne nakai kitia?

Kua fakakite mo e fakatapakupaku fakamaali he Tohi Tapu a ia hane fakavaia e tau takitaki he tagata mo e tau pule he lalolagi. He mailoga po ke nakai, kua fakakite he kaufakalataha he tagata e aga he pule ia mo e haana a fakatokaaga ‘pule po ke fakaotioti.’ Ka e to leva fēfē e matematekelea he tau tagata i lalo he pule he Tiapolo?

Fakapuhaki Fakahiku he Tiapolo

Ko e matagahua he Keriso he ha ha i ai he lalolagi he senetenari fakamua ne taogo atu e mate ke lata mo e Tiapolo mo e haana tau temoni. He mogo ne talahau he tau tutaki a Iesu e puhala ne vega e lautolu e tau temoni ne nakai kitia, ne pehē a ia ki a lautolu: “Ne [kamata] kitia e au a Satani kua to mai he lagi tuga ne uhila.” (Luka 10:18) Ke he tau kupu ia, ne fiafia a Iesu ke he haana a kautūaga anoiha ke pule he lalolagi, ka fakahoko he liu atu a Iesu ke he lagi ko Mekaeli ko e agelu ne mua. (Fakakiteaga 12:7-9) Ko e fakaako fakamatafeiga he tau perofetaaga he Tohi Tapu kua fakakite ko e kautūaga nei ne hoko ke he lagi po ke nakai leva he mole e 1914.a

Tali mai he aho ia, kua iloa he Tiapolo kua kū e magaaho ne toe ato moumou a ia. Pete “ko e lalolagi oti ha he pule hana,” totou miliona e tagata he vahā nei ne nakai fakahēhē he tau laliaga manako lahi haana ke pule ki a lautolu. Kua hafagi he Tohi Tapu e tau mata ha lautolu ke he kitiaaga mooli haana mo e tau lagatau haana. (2 Korinito 2:11) Moua e lautolu e amaamanakiaga mai he tau kupu a Paulo ke he tau matakainaga Kerisiano: “Ko e Atua hana e monuina, to taholi vave e ia a Satani ki lalo he tau hui ha mutolu.”b​—Roma 16:20.

To nakai leva ti fakapuhaki fakahiku e Tiapolo! I lalo he pule fakaalofa he Keriso to liliu he tau tagata tututonu e fakatuaga vē fakatai he Atua ko e lalolagi ke he parataiso. To galo tukulagi e favale, vihiatia, mo e lotokai. “Nakai tuai manatu ke he tau mena fakamua,” he talahau he Tohi Tapu. (Isaia 65:17) Ko e totokaaga mooli ma e tau tagata oti kua vevete kehe mai he iki fakagalogalo he lalolagi nai mo e haana a pule!

[Tau Matahui Tala]

[Blurb he lau 9]

I lalo he pule fakaalofa he Keriso, to liliu he tau tagata tututonu e lalolagi ke he parataiso