Magaaho kua Lata ia Tautolu ke Mataala Tumau

LIGA talia e koe kua uho lahi ke mataala tumau a koe ka haia he aoga. Tokologa ne fia momohe he tau mogo ka haia a lautolu he tau vahega, ka ke fakaako, kua lata ia koe ke mataala tumau. Liga fano foki a koe ke he tau feleveiaaga ko e matakavi ke fakaako e koe e Tohi Tapu.

Ko e heigoa he manatu e koe ka lagomatai a koe ke mataala tumau?—a Taha e manatu ke fano tuai ke mohe he pō. Liga ko e mohe fakakū he mogo afiafi ka lagomatai foki. O mai la ke kitekite ke he mena ka ako e tautolu mai he mena ne tupu ke he tama fuata ne pulumohea he mule he taha pō he lauga e aposetolo ko Paulo. Kitekite e Tohi Tapu ke he Gahua veveheaga 20, kupu 7 ke he 12, ti kitia e mena ne tupu.

Ne ahiahi atu a Paulo ke he fakapotopotoaga ne tū he maaga he uaafo i Tiroa. Pehē e Tohi Tapu ko e “fano ne fai a [Paulo] a pogipogi” he foulua. Ti “kua fakaleva foki e ia hana tau kupu kua hoko ke he tuloto po.” Totou e tautolu: “Kua nofo foki e taha fuata, ko Eutuko e higoa, ke he fakamaama, kua moua he pulumohea; kua leva foki e vagavagahau a Paulo, kua hoko ni kia ia e mohe.” Ko e heigoa la ka tupu?—

Ne tō hifo a Eutuko he pu fakamaama “mai luga he tolu e fata he fale.” Ko Paulo mo e falu ne tafepoi hifo katoa a lautolu he tau sitepe ki lalo. Ko Eutuko he kelekele kua mate tuai! Maeke nakai a koe ke manamanatu ke he momoko ne logona hifo oti e lautolu?— Pehē e Tohi Tapu kua lagaki e Paulo a Eutuko ke he haana tau lima ti peka ki a ia. Nakai leva ti tagi fiafia a Paulo: ‘Ua tupetupe, mitaki a ia!’ Ne liuaki mai he Atua a Eutuko ke he moui!

Ko e heigoa ne fakaako e tautolu hagaao ke he Atua mai he mena ne tupu ki a Eutuko?— Taha e mena ko Iehova ko e ha tautolu a Matua he lagi, kua maeke ke liuaki mai a lautolu ne mamate ke he moui, putoia ai a lautolu ne ikiiki. Maama e Iehova mo e ofania e ia a koe, ē, mua atu foki ke he tau matua haau. He haia a Iesu he lalolagi, ne fakakite e ia e mahani he Matua haana he uta a lautolu ne ikiiki ke he tau lima haana ti fakamonuina a lautolu. Ne fakaliu tū mai foki e ia a lautolu ne ikiiki, putoia e tama fifine ne 12 e tau he moui.

Fēfē e logonaaga haau he iloa kua ofania he haau a Matua he lagi a koe?— E, kua taute a tautolu ke fakaalofa age foki ki a Iehova mo e manako ke omaoma ke he tau mena ne talahau e Ia. Iloa nakai e koe e puhala ke fakakite e tautolu kua fakaalofa a tautolu ki a Ia?— Taha puhala he talahau kua fakaalofa a tautolu ki a Ia. Ne pehē a Iesu: “Kua fakaalofa au ke he Matua.” Ka e fai mena foki ne taute e Iesu he nakai ni talahau kua fakaalofa a ia ke he Atua. Ne fakakite e ia ke he mena ne taute e ia.

Ne omaoma a Iesu ke he Atua. Ne “eke mau e au e tau mena kua mitaki kia ia,” he ui e Iesu. Ka taute pihia e tautolu, ti ko e fakafiafia a Iehova mo e haana a Tama ko Iesu, to lali katoatoa a tautolu ke mataala tumau he magaaho kua lata ia tautolu.