Lagomatai e Tau Tagata Taane ke Tupu Fakaagaaga

“Kamata he vaha nai ke moua ai e koe e tau tagata.”—LUKA 5:10.

1, 2. (a) Tali atu fēfē e tau tagata taane ke he fakamatala ha Iesu? (e) Ko e heigoa ka fakatutala ki ai he vala tala nei?

KE HE fenoga fakamatala i Kalilaia katoa, ne o atu a Iesu mo e tau tutaki haana he foulua ke he matakavi ogoogonoa. Ka e mumui atu e moto tagata. Ko lautolu ne o atu he aho ia kua katoa ai e “lima e afe he tau tane, ka e nakai totou e tau fifine mo e tau tama ikiiki.” (Mata. 14:21) He taha magaaho foki, ne o atu e moto tagata ki a Iesu, he manako ke fakamaulu mo e ke logona a ia he tutala. Fakalataha ai e “fa e afe he tau tane, ka e nakai totou e tau fifine mo e tau tama ikiiki.” (Mata. 15:38) Maaliali ai, tokologa e tagata taane ne fakalataha mo e tau tagata ne o mai ki a Iesu ti fakakite e fiafia ke he haana a fakaako atu. Ti amanaki a ia ke tokologa atu foki ka talia, ha ko e mole e mouaaga fakamana he tau ika, ne tala age a Iesu ke he tutaki haana ko Simona: “Ke kamata he vaha nai ke moua ai e koe e tau tagata.” (Luka 5:10) Ko e tau tutaki haana ne tolo hifo e tau kupega ha lautolu ki tahi he tau tagata ti amanaki ke he ha lautolu a “moua” ke putoia e tau tagata taane tokologa.

² He vahā nei, ko e tau tagata taane foki kua fakakite e fiafia ke he fekau he Tohi Tapu kua fakamatala e tautolu mo e talia ai. (Luka 11:28) Pete ia, tokologa e tagata taane ne tukumuli ti kaumahala ke holo fakaagaaga ki mua. Maeke fēfē a tautolu ke lagomatai a lautolu? Pete ne nakai fakatū e Iesu e fekafekauaga pauaki ke kumi e tau tagata taane, ne hagaaki mooli a ia ke he tau matakupu ne fakatupetupe aki e tau tagata taane he vahā haana. He fakaaoga e fakataiaga haana, kia kumikumi la tautolu ke he puhala ka lagomatai e tautolu e tau tagata taane ke he tolu e tupetupe aga mau he vahā nei: (1) leveki e magafaoa, (2) matakutaku he tau manatu talahaua, mo e (3) tau logonaaga fakateaga.

Leveki e Magafaoa

3, 4. (a) Ko e heigoa e tupetupe lahi mahaki ma e tau tagata taane tokologa? (e) Ko e ha e falu tagata taane ne tuku fakamua e levekiaga he magafaoa ke he tau mouaaga fakaagaaga?

³ “Ko e akoako na e,” he tala age he tohikupu ki a Iesu, “to mui atu au kia koe ke he tau mena oti ke haele a koe ki ai.” Ka e tala age a Iesu ki a ia “ko e Tama he tagata, nakai fai mena a ia ke mohe ai,” ne liu e tohikupu fai manamanatu foki. Ko e nakai iloa mitaki ko e mena fe ke moua ai e ia e mena kai po ke mena ke nofo ai ne nakai nofo mitaki mo e tohikupu, ha kua nakai fai fakakiteaga kua eke a ia mo tutaki he Keriso.—Mata. 8:19, 20.

⁴ Fa mahani e tau tagata taane ke tuku fakamua e tau haohao mitaki he tau koloa tino ke he tau mouaaga fakaagaaga. Ko e moua e fakaakoaga tokoluga atu mo e moua e gahua totogi lahi ko e tau mena ne mua ke he tokologa ia lautolu. Hagaao ke he puhala manamanatu ha lautolu, ko e palepale he gahua ke moua e tupe kua mua atu e mafiti mo e aoga ke he tau lagomataiaga ne liga moua he fakaako e tau Tohiaga Tapu mo e tutuli e fakafetuiaga tata mo e Atua. Ko e mena kua fakaako he Tohi Tapu ne liga lauia ki a lautolu, ka “ko e fakaatukehe ke he tau mena he lalolagi nai, mo e fakavai he koloa,” kua fakaapitia e fiafia ia ne liga ha ha ia lautolu. (Mare. 4:18, 19) Manamanatu ke he puhala ne lagomatai e Iesu haana tau tutaki ke hikihiki e tau mena ne mua e aoga ki a lautolu.

5, 6. Ko e heigoa ne lagomatai a Aneterea, Peteru, Iakopo, mo Ioane ke hiki e tau mena kua mua atu ki a lautolu hagaao ke he fakalataha ke he gahua fakamatala mo e leveki e tau momoui?

⁵ Ko Aneterea mo e haana a matakainaga ko Simona Peteru ne gahua tokoua he matagahua takafaga ika. Ti pihia foki a Ioane, ko e matakainaga haana ko Iakopo, mo e matua taane ha laua ko Sepetaio. Ko e gahua takafaga kua mitaki lahi ke lata ke lagomatai ke fakagahua e falu tagata. (Mare. 1:16-20) He mogo ne iloa fakamua e Aneterea mo Ioane hagaao ki a Iesu mai ia Ioane ko e Papatiso, ne mauokafua a laua kua moua e laua e Mesia. Ti tala age e Aneterea e tala ke he matakainaga haana ko Simona Peteru, ti liga tala age foki e Ioane ke he haana matakainaga ko Iakopo. (Ioane 1:29, 35-41) He tau mahina fakamui, ne fakalataha auloa a lautolu tokofā mo Iesu he fakamatala a ia i Kalilaia, Iutaia, mo Samaria. Ti liliu e tau tutaki tokofā ke he matagahua takafaga ika. Ne ha ha ia lautolu e fiafia ke he tau mena fakaagaaga, ka ko e gahua fakamatala ne nakai ko e tupetupe fakamua ha lautolu.

⁶ Fai magaaho he mole, ne uiina e Iesu a Peteru mo Aneterea ke mumui age ki a ia ti eke mo “takafaga ke he tau tagata.” Tali atu fēfē e tau tagata tokoua ia? “Ati toka ai agataha e laua ha laua a tau kupega, ka e mumui atu kia ia.” Ti pihia foki a Iakopo mo Ioane. “Ati toka ai agataha e laua e foulua mo e matua ha laua, ka e mumui atu kia ia.” (Mata. 4:18-22) Ko e heigoa ne lagomatai e tau tagata taane nei ke taute e gahua fakamatala tumau? Ko e fifiliaga taute mogoia la ia kia? Nakai pihia! He tau mahina gahoa kua mole, ne fanogonogo e tau tagata taane nei ki a Iesu, kitia a ia ne taute e tau mana, mailoga e makai haana ma e tututonu, ti kitia mata e tali ofoofogia ke he fakamatala atu haana. Ti ko e fua, ko e tua ha lautolu ki a Iehova mo e falanaki ha lautolu ki a Ia ne malolō lahi!

7. Maeke fēfē a tautolu ke lagomatai e tau tagata fakaako Tohi Tapu ke atihake e falanaki ke he lotomatala a Iehova ke foaki ma e tau tagata haana?

⁷ Maeke fēfē a tautolu ke fifitaki a Iesu he lagomatai e tau tagata fakaako Tohi Tapu ha tautolu ke ati hake e falanaki ha lautolu ki a Iehova? (Fakatai 3:5, 6) Ko e puhala fakaako ha tautolu kua lahi e lagomatai ke he mena nei. He fakaako atu, maeke ia tautolu ke fakamaama e maveheaga he Atua ka fakamonuina fakalahi a tautolu kaeke ke tuku fakamua e tautolu e tau mena he Kautu. (Totou Malaki 3:10; Mataio 6:33.) Pete he maeke ia tautolu ke fakaaoga e tau kupu tohi kehekehe ke fakamaama e puhala kua foaki e Iehova ma e tau tagata haana, nakai nimo e lauiaaga he fifitakiaga ha tautolu ne fakatoka. Ko e talahau e tau mena tutupu he tau momoui ha tautolu ka foaki fakalahi e lagomatai ke he tau tagata fakaako ha tautolu ke feaki e falanaki ki a Iehova. Maeke foki ia tautolu ke talahau e tau mena tutupu atihake kua totou e tautolu he tau tohi ha tautolu.a

8. (a) Ko e ha kua aoga ma e tagata fakaako Tohi Tapu ke ‘kamata mo e kitekite, kua mitaki a Iehova’? (e) Maeke fēfē a tautolu ke lagomatai e tagata fakaako ha tautolu ke moua e ia e mitaki a Iehova?

⁸ He feaki e tua malolō kua lahi atu e mena kua lata he totou mo e logona hokoia hagaao ke he puhala ne moua he falu e monuina a Iehova. Ko e tagata fakaako Tohi Tapu kua lata foki ke moua e ia e mitaki ha Iehova. Ne lologo e salamo: “Kia kamata e mutolu mo e kitekite, kua mitaki a Iehova; uhoaki e tagata kua tua kia ia.” (Sala. 34:8) Maeke fēfē a tautolu ke lagomatai e tagata fakaako ke kitia kua mitaki a Iehova? Fakalata ko e tagata fakaako ne fakaatukehe he tau mena fakatupe kua lali foki ke kautū mai he taha aga kelea, tuga e ula, pelē tupe, po ke inu lahi. (Fakatai 23:20, 21; 2 Kori. 7:1; 1 Timo. 6:10) Nakai kia ko e fakaako atu he tagata fakaako ke liogi ma e lagomatai he Atua ke kautū he aga kelea kua lagomatai a ia ke logona e mitaki a Iehova? Manamanatu foki ke he mena ka tupu ka fakamalolō e tautolu e tagata fakaako ke tuku fakamua e tau mena fakaagaaga he fai magaaho fakaako Tohi Tapu he faahi tapu mo e mautauteute ai mo e fina atu he tau feleveiaaga Kerisiano. He logona fakatagata e ia e fakamonuina a Iehova ke he tau laliaga haana, to tupu malolō ai e tua haana!

Matakutaku he Tau Manatu Talahaua

9, 10. (a) Ko e ha a Nikotemo mo Iosefa ko e Aramataia ne nakai fakakitia tumau e fiafia ha laua ki a Iesu? (e) Ko e ha e falu tagata taane he vahā nei kua fakauaua ke mumui ke he Keriso?

⁹ Ha ko e peehiaga malolō, ne liga fakauaua e falu tagata taane ke mui katoatoa ke he Keriso. Ko Nikotemo mo Iosefa ko e Aramataia ne nakai fakakitia tumau e fiafia ki a Iesu ha kua matakutaku a lautolu ke he mena ka talahau po ke taute he falu Iutaia ti moua a lautolu. (Ioane 3:1, 2; 19:38) Nakai ko e miti e matakutaku nei. Ko e vihiatia he tau takitaki lotu a Iesu kua fakahiku ke lahi mahaki ti ka fai tagata ne fakakite e tua ki a ia kua vega kehe mai he sunako.—Ioane 9:22.

¹⁰ He falu matakavi he vahā nei, ka fiafia lahi mahaki e tagata taane ke he tau mena he Atua, Tohi Tapu, po ke lotu, to liga kunuene he haana tau kapitiga gahua, tau kapitiga, po ke tau magafaoa. He falu matakavi, liga kua hagahaga kelea foki ke tutala hagaao ke he hiki e lotu he tagata. Ko e peehiaga malolō kua eke mo mena uka pauaki ka gahua malolō e tagata taane he kautau, he tau mena politika, po ke tau mena he maaga. Ma e fakatai, ko e tagata taane i Sihamani ne talahau: “Ko e mena ha mutolu e Tau Fakamoli ne fakamatala hagaao ke he Tohi Tapu kua mooli. Ka eke au mo Fakamoli he aho nei, a pogipogi ni to iloa he tau tagata oti e mena ia. Ko e heigoa e mena ka manatu a lautolu he gahuaaga, he tuutakaina, mo e kalapu ne fakalataha e magafaoa haaku mo au ki ai? Ai maeke au ke fakauka ke he mena ia.”

11. Lagomatai fēfē e Iesu e tau tutaki haana ke fahia ke he matakutaku tagata?

¹¹ Ka e nakai ko e tau tagata lolelole e tau aposetolo a Iesu, ne taufetului oti a lautolu ke he matakutaku tagata. (Mare. 14:50, 66-72) Lagomatai fēfē e Iesu a lautolu ke tupu ki mua pete ne peehiaga malolō mai he tau tagata ha lautolu? Taute e Iesu e tau lakaaga ke mautauteute e tau tutaki haana ma e totokoaga ka fehagai mo lautolu fakamui. “Uhoaki a mutolu ka fakavihia a mutolu he tau tagata, ka vevehe kehe a mutolu, mo e eke fakakelea ai e lautolu, mo e tiaki ai ha mutolu a tau higoa, tuga ne mena kelea, ha ko e Tama he tagata,” he ui e ia. (Luka 6:22) Ne hataki e Iesu e tau tutaki haana kua lata ia lautolu ke amanaki ke he ekefakakelea. Ko e ha ekefakakelea kua eke “ha ko e Tama he tagata.” Ne fakamafana foki e Iesu a lautolu to lalago he Atua a lautolu ka falanaki tumau a lautolu ki a Ia ma e lagomatai mo e malolō. (Luka 12:4-12) Lafi ki ai, ne uiina e Iesu a lautolu ne foou ke fakalataha fiafia mo e tau tutaki haana mo e kapitiga mo lautolu.—Mare. 10:29, 30.

12. He tau puhala fe ke lagomatai e tautolu a lautolu ne foou ke kautū he matakutaku tagata?

¹² Lata foki ia tautolu ke lagomatai e tau tagata fakaako Tohi Tapu ke kautū he matakutaku tagata. Ko e paleko kua fa mukamuka lahi ke fehagai ka amanaki ki ai. (Ioane 15:19) Tuga anei, ko e ha he nakai lagomatai e tagata fakaako ke tauteute e tau tali mukamuka ne latatonu kua fakavē ke he Tohi Tapu ke lata mo e tau hūhū mo e tau totokoaga ne liga fakalagā he tau tagata gahua haana mo e falu? He lafi ke he kapitiga fakatagata ha tautolu ki a ia, maeke ia tautolu ke fakafeleveia a ia ke he falu tagata he fakapotopotoaga, mua atu ki a lautolu ne liga fai mena ne fetataiaki mo ia. Mua atu ai, kua lata ia tautolu ke fakaako a ia ke liogi tumau ti mai he loto. Maeke he mena nei ke lagomatai a ia ke fakatata ke he Atua mo e taute a Iehova ko e haana a Malu mo e Maka Tumau.—Totou Salamo 94:21-23; Iakopo 4:8.

Tau Logonaaga Fakateaga

13. Maeke fēfē e tau logonaaga fakateaga ke tautaofi e falu mai he putoia ke he tau mena fakaagaaga?

¹³ Ha ha i ai falu tagata taane ne tautaofi he putoia ke he tau mena fakaagaaga ha kua nakai iloa a lautolu ke totou fakamitaki po ke nakai mahifi a lautolu he vagahau po ke mā ai a lautolu. Falu tagata taane ne fuafuakelea he fakakite e tau manatu po ke tau logonaaga ha lautolu he toloaga tagata. Ko e manatu ke fakaako, fai tali he tau feleveiaaga Kerisiano, po ke tala age e tua ha lautolu ke he falu ne liga fakaatukehe lahi ki a lautolu. “He mogo ne tote au,” he ui he matakainaga taane Kerisiano, “ne fina atu fakamafiti au ke he gutuhala, ti fakatupua ke fakatagi e logo, ti fano kehe fakaeneene he amanaki to nakai fai tagata ke logona po ke kitia au. . . . Ko e manatu he fano he taha gutuhala ke he taha gutuhala kua taute au ke gagao e tino.”

14. Ko e ha ne nakai maeke he tau tutaki a Iesu ke fakamaulu e tama taane ne hu temoni?

¹⁴ Manamanatu ke he nakai mauokafua he tau tutaki a Iesu he mogo ne nakai maeke a lautolu ke fakamaulu e tama taane ne hu temoni. Ko e matua taane he tama taane ne hau ki a Iesu ti pehē: “Kia fakaalofa mai a koe ke he haku a tama tane, kua vikoia, kua mamahi lahi ni; ko e mena fa to a ia ke he afi, ti pihia mau foki ke he vai. Ne ta mai e au a ia ke he hau a tau tutaki, ka e nakai maeke kia lautolu ke fakamalolo a ia.” Ne vega e Iesu e temoni ti fakamalolō e tama taane. Ne o atu e tau tutaki he mogo fakamui ki a Iesu ti hūhū: “Ko e heigoa e mena nakai maeke ai kia mautolu ke vega a ia ki fafo?” Ne tali a Iesu: “Ha ko e ha mutolu a nakai tua; ha ko e moli, ke tala atu e au kia mutolu, kaeke ke lata ha mutolu a tua mo e fua sinapi, ka tala age a mutolu ke he mouga nai, Fano a a koe ke he mena ko; ti fano ai; nakai fai mena foki ke nakai maeke ia mutolu.” (Mata. 17:14-20) Kua lata e tua ki a Iehova ke kautū mai he tau fakalavelave tuga e mouga. Ko e heigoa e mena ka tupu ka galo he tagata e mena nei ti kamata ke hagaaki ke he lotomatala ni haana? Ko e kaumahala ke kautū to fua mai e nakai mauokafua.

15, 16. Liga maeke fēfē ia tautolu ke lagomatai e tagata fakaako Tohi Tapu ke kautū he tau logonaaga fakateaga?

¹⁵ Ko e puhala mitaki ke lagomatai e taha tagata kua taufetului mo e tau logonaaga fakateaga ke fakamalolō a ia ke hagaaki ki a Iehova ka e nakai ki a ia ni. Ne tohi e Peteru: “Kia fakatokolalo ai a mutolu ki lalo he lima malolo he Atua, kia fakamatalahi ai e ia a mutolu ke he vaha ke lata ai. Kia tuku atu kia ia e tau mena oti kua fakaatukehe ai a mutolu.” (1 Pete. 5:6, 7) Kua lata e mena nei ke lagomatai e tautolu e tagata fakaako Tohi Tapu ha tautolu ke feaki e tuaga fakaagaaga. Ko e tagata ne manamanatu fakaagaaga kua tokiofa fakalahi e tau mena fakaagaaga. Kua ofania e ia e Kupu he Atua ti fakakite e ‘fua he agaga’ he moui haana. (Kala. 5:22, 23) Ko e tagata taane liogi a ia. (Filipi 4:6, 7) Lafi ki ai, kua ono atu a ia ke he Atua ma e loto toa mo e fakamalolō kua lata ke fehagai ke he ha tuaga po ke fakamooli e tau matagahua mo e kautū.—Totou 2 Timoteo 1:7, 8.

¹⁶ Falu tagata fakaako ne liga lata foki mo e lagomatai kua aoga ke he ha lautolu a totou, fetutalaaki, po ke tau lotomatala he vagahau. Falu ne liga logona hifo e fakateaga he fekafekau ke he Atua ha ko e tau gahua kelea ne taute e lautolu ato iloa a Iehova. He ha tuaga ni, ko e lalagoaga fakaalofa mo e fakamanavalahi ha tautolu ka liga ko e mena ia ne manako ki ai a lautolu. “Nakai aoga e ekekafo ke he tau tagata malolo, ka ko e tau tagata gagao hokoia,” he ui e Iesu.—Mata. 9:12.

“Moua” Loga e Tau Tagata Taane

17, 18. (a) Liga hokotia atu fēfē a tautolu ke he tau tagata taane tokologa he gahua he fonua ha tautolu? (e) Ko e heigoa ha tautolu ka fakaako he vala ka mui mai?

¹⁷ Ko e manako ha tautolu ke tokologa atu foki e tagata taane ke talia e fekau fiafia lahi mahaki ne moua ni i loto he Tohi Tapu. (2 Timo. 3:16, 17) Ti maeke fēfē a tautolu ke hoko atu ke he tokologa he tau tagata taane he ha tautolu a gahua he fonua? He fakaaoga lahi e magaaho ke fakamatala he tau mogo afiafi, he tau mogo afiafi he matahiku vahā tapu, po ke tau aho okioki ka tokologa e tagata taane i kaina. Maeke ia tautolu ke ole ke tutala ke he tagata taane he fale ka lata. Kia fakamatala magaaho noa a tautolu ke he tau kapitiga gahua taane ka latatonu ti foli atu ke he tau taane ne nakai tua i loto he fakapotopotoaga.

¹⁸ He fakamatala a tautolu ke he tau tagata oti kua feleveia mo tautolu, maeke ia tautolu ke mauokafua ko lautolu ne ha ha i ai e tau loto fakaaue to talia fiafia. Kia fakamanavalahi a tautolu he lagomatai a lautolu oti kua fakakite e fiafia mai he loto ke he kupu mooli. Maeke fēfē a tautolu ke lagomatai e tau tagata taane papatiso he fakapotopotoaga ke foli atu ti lotomatala ke he matagahua he fakatokatokaaga he Atua? Ko e vala tala ne mui mai to fakatutala ke he hūhū nei.

[Matahui Tala]

To Tali Fēfē e Koe?

• Maeke fēfē e tau tagata taane ke lagomatai ke tuku fakamua e tau mouaaga fakaagaaga?

• Maeke fēfē a tautolu ke lagomatai a lautolu ne foou ke fahia ke he peehiaga malolō?

• Ko e heigoa ka lagomatai e falu ke kautū ke he tau logonaaga fakateaga?

[Fakatino he lau 25]

Fakaaoga nakai e koe e tau magaaho ke hoko e tala mitaki ke he tau tagata taane?

[Fakatino he lau 26]

Maeke fēfē a koe ke tauteute e tagata fakaako Tohi Tapu haau ke fehagai mo e tau kamatamata?