Puipui e Aga Mitaki he Fakapotopotoaga
‘Kia ha ha ia mutolu oti kana e fakaalofa noa he Iki ko Iesu Keriso ke he aga ne fakakite e mutolu.’—FILIPI 4:23.
MAEKE FĒFĒ A TAUTOLU KE FAKATUPU KI MUA E AGA MITAKI HE FAKAPOTOPOTOAGA . . .
he feoaki mo e tau matakainaga ha tautolu?
he fakamakutu ha tautolu ke he gahua he fonua?
he fakailoa e mahani hepehepe kelea lahi?
1. Ko e heigoa ati nava ke he tau fakapotopotoaga i Filipi mo Tuataira?
KO E tau Kerisiano i Filipi he senetenari fakamua ne mativa fakatino. Ka e fakamokoi a lautolu ti fakakite e fakaalofa mooli ma e tau matakainaga fakahele ha lautolu. (Filipi 1:3-5, 9; 4:15, 16) He fakaoti aki e tohi omoomoi haana ki a lautolu, kua maeke he aposetolo ko Paulo ke tohia: “Kia ha ha ia mutolu oti kana e fakaalofa noa he Iki ha tautolu ko Iesu Keriso [“ke he aga ne fakakite e mutolu,” NW].” (Filipi 4:23) Ha ko e aga taha ia ne fakakite he tau Kerisiano i Tuataira, ko Iesu Keriso ne lilifu ne tala age ki a lautolu: “Kua iloa e au hau a tau gahua, mo e hau a fakaalofa, mo e hau a fekafekau mai, mo e hau a tua, mo e hau a fakauka, mo e hau a tau gahua, kua mua foki e tau mena fakamui ke he tau mena fakamua.”—Fakakite. 2:19.
2. Ko e heigoa e vala ka taute e tautolu he feaki e aga kua fakakite he fakapotopotoaga ha tautolu?
2 Igatia e fakapotopotoaga he Tau Fakamoli a Iehova he vahā nei mo e fakakite e aga pauaki po ke aga pule lahi. Falu fakapotopotoaga kua talahaua he fakakite e aga mafanatia mo e fakaalofa. Falu kua mua atu e lalago fakamakutu ha lautolu ke he gahua fakamatala he Kautu mo e fakakite e lilifu lahi he fekafekauaga tumau. Ka igatia a tautolu mo e feaki e aga mitaki, kua lafi e tautolu ke he kaufakalataha he fakapotopotoaga mo e fakalaulahi e tupu ki mua fakaagaaga. (1 Kori. 1:10) He taha faahi, ko e aga kelea he vala ha tautolu, ka lafi ke he fia mohe fakaagaaga, ko e aga mafanafana, mo e tokanoa e mahani kelea he fakapotopotoaga. (1 Kori. 5:1; Fakakite. 3:15, 16) Ko e heigoa e aga he fakapotopotoaga ha mutolu? Maeke fēfē a koe ke lagomatai ke fakaholo ki mua e aga mitaki he fakapotopotoaga?
FAKALAGALAGA E AGA MITAKI
3, 4. Maeke fēfē a tautolu ke “fakaheke atu . . . kia [Iehova] ke he fakapotopotoaga lahi”?
3 Ne lologo he salamo: “To fakaheke atu au kia [Iehova] ke he fakapotopotoaga lahi, mo e lologo atu kia koe ki mua he motu ne tokologa.” (Sala. 35:18) Ne nakai fakaumiumi e salamo he fakaheke a Iehova he ha ha i ai mo e falu fekafekau he Atua. Ko e tau feleveiaaga fakapotopotoaga he faahi tapu, putoia e Fakaakoaga Kolo Toko, ne foaki mai e tau magaaho mitaki ma tautolu ke fakakite e aga fakamakutu he mogo ka tali mo e talahau e tau manatu he tua. Igatia a tautolu oti mo e hūhū hifo: ‘Fakaaoga katoatoa nakai e au e magaaho nei ke fai vala he tau feleveiaaga? Mautauteute mitaki nakai au ma e tau feleveiaaga ia mo e tali fai kakano? Ko e ulu he magafaoa, lagomatai nakai e au e tau tama haaku ke tauteute tuai e tau tali mo e fakaako a lautolu ke tali ke he tau kupu ni ha lautolu?’
4 Ko e salamo ko Tavita ne fakamatutaki e mau he tau loto ha tautolu mo e lologo ha tautolu. “Ko e Atua na e,” he ui e ia, “kua mau hoku loto, kua mau hoku loto; to lologo atu au, mo e uhu lologo au.” (Sala. 57:7) Ko e tau lologo ne fakaaoga he tau feleveiaaga Kerisiano kua foaki ki a tautolu e tau magaaho mitaki ke “lologo atu . . . mo e uhu lologo” ki a Iehova mo e loto kua mau. Ka nakai mahani a tautolu mo e falu lologo, he ha he fakamahani ke uhu ai he afiafi Tapuakiaga he Magafaoa? Kia eketaha a tautolu ke ‘lologo atu kia Iehova ke he ha tautolu a mouiaga nai mo e uhu lologo ki a ia ka kua moui a tautolu.’—Sala. 104:33.
5, 6. Maeke fēfē ia tautolu ke aga fakamokoi ke he falu, ti ko e heigoa ka fakatupu i loto he fakapotopotoaga he taute pihia?
5 He fakakite e aga fakamokoi ke he tau matakainaga ha tautolu ko e taha puhala ke fakatupu e aga fakaalofa i loto he fakapotopotoaga. He veveheaga fakahiku he tohi haana ke he tau Heperu, ne putoia e Paulo e tomatomaaga nei: “Kia tumau e feofanaki he tau matakainaga, Aua neke nimo ia mutolu ke fakaalofa age [mahani fakamokoi] ke he tau tagata kehe.” (Hepe. 13:1, 2) He taute e mena kai ma e tau leveki faifano mo e tau hoana ha lautolu po ke tau fekafekau gahua mau he fakapotopotoaga ko e puhala mitaki lahi mahaki ke fakakite e aga fakamokoi. Manamanatu foki ke he tau takape, tau magafaoa matua tokotaha, po ke falu kua liga aoga mai he fakalataha mo tautolu ke he tau magaaho ma e kaiaga po ke tapuakiaga magafaoa ha tautolu.
6 Ne hataki a Paulo ki a Timoteo ke tomatoma e falu ke ‘mahani mitaki atu, kia maukoloa ke he tau gahua mitaki, kia fakamokoi, mo e ta atu noa e lautolu ha lautolu a tau mena, Kia tauteute e lautolu e koloa ma lautolu ni ko e fakaveaga mitaki mo e tau aho ne tatali, kia toto atu e lautolu ke he moui tukulagi.’ (1 Timo. 6:17-19) Ne fakamalolō a Paulo ke he tau tagata tapuaki haana ke feaki e aga fakamokoi. He tau magahala uka fakatupe foki, maeke ia tautolu ke fakaholo ki mua e aga fakamokoi. Ko e puhala mitaki ke taute e mena nei ko e foaki e puhala ke ō ai ke he gahua fakamatala mo e o atu mo e liliu mai he tau feleveiaaga ma lautolu kua manako lagomatai. Ka e kua a lautolu kua aoga mai he tau mahani pihia he fakaalofa totonu? To fakamalolō e lautolu e aga mitaki i loto he fakapotopotoaga ka fakakite e lautolu e loto fakaaue, liga he foaki e lagomatai ke fakatote hifo e tauuka he penisini. Mua atu, nakai kia ko e fakatoka ke fakaaoga fakalahi e magaaho mo e tau matakainaga ha tautolu kua omoomoi ki a lautolu ke logona hifo kua manako mo e ofania a lautolu? Ka puke a tautolu he tau gahua mitaki “ke he faoa ne tua” ti mautali ke fakaaoga e magaaho mo e tau koloa ha tautolu mo lautolu, kua nakai ni fakahokulo e fakaalofa ha tautolu ki a lautolu ka e lagomatai foki ke atihake e aga mafanatia mo e mitaki he fakapotopotoaga.—Kala. 6:10.
7. Lagomatai fēfē he nakai tala fakahanoa e tau manatu fakatagata he falu ke puipui e aga mitaki he fakapotopotoaga?
7 Manamanatu ke he falu puhala foki kua fakamalolō e pipiaga he fakaalofa mo e tau matakainaga talitonu ha tautolu: ko e tuaga kapitiga mo e nakai tala fakahanoa. (Totou Tau Fakatai 18:24.) Ko e tau kapitiga mooli kua nakai tala fakahanoa e tau mena fakatagata. He talahau he tau matakainaga e tau fatuakiloto mo e tau logonaaga galo ha lautolu ki a tautolu mo e mauokafua to nakai iloa fakahanoa he tau tagata e tau mena nei, ko e pipiaga he fakaalofa kua liga fitā he tupu to malolō lahi. Kia fakaholo ki mua e tautolu e aga fakaalofa tuga e magafaoa he fakapotopotoaga he eke mo kapitiga tua fakamooli ka taofi mau e tau mena galo ke nakai tala fakahanoa.—Fakatai 20:19.
KIA FAKAMAKUTU KE HE GAHUA HE FONUA
8. Ko e heigoa e fakatonuaga kua moua he tau tagata Laotikaia, ti ko e ha?
8 He tutala ke he fakapotopotoaga i Laotikaia, ne pehē a Iesu: “Kua iloa e au hau a tau gahua, kua nakai momoko a koe, ti nakai vevela foki; na loto au kia momoko a koe po ke vevela; hanai, kua mafana a koe, ka e nakai momoko, ti nakai vevela foki, ko e mena ia kua teitei fakalua atu ai e au a koe mai he gutu haku.” (Fakakite. 3:15, 16) Ne tote e fakamakutu he tau tagata Laotikaia ma e fekafekauaga faka-Kerisiano. Ko e aga pihia kua liga lauia foki e tau fakafetuiaga fakatagata ha lautolu. Ti fakatonu fakaalofa e Iesu a lautolu: “Kua akonaki atu mo e fahi e au a lautolu oti kua fakaalofa au ki ai; hanai, kia eke taha a koe, mo e tokihala.”—Fakakite. 3:19.
9. Lauia fēfē e aga he fakapotopotoaga ha ko e aga ha tautolu ke he gahua he fonua?
9 Ke fakaholo ki mua e aga mitaki lahi he fakapotopotoaga, kua lata ia tautolu ke hagaaki ke he fakamakutu ha tautolu ke he gahua he fonua. Kua fakatokatoka e fakapotopotoaga ma e kakano ke kumi a lautolu ne tuga e tau mamoe he fonua mo e atihake fakaagaaga a lautolu. Ti kua lata ia tautolu ke fakalataha fakamakai ke he gahua taute tutaki, tuga ne taute e Iesu. (Mata. 28:19, 20; Luka 4:43) Ko e lahi atu he fakamakutu ha tautolu ke he gahua he fonua, to au atu e kaufakalataha ha tautolu ko e ‘tau ekegahua he Atua.’ (1 Kori. 3:9) He mailoga e tautolu e falu he gahua he fonua hane lalago e tua ha lautolu mo e fakakite e loto fakaaue ke he tau mena fakaagaaga, kua omoomoi a tautolu ke fakaalofa mo e fakalilifu fakalahi a lautolu. Ko e gahua “loto fakalataha” foki he fekafekauaga kua fakatupu e aga kauauloa he fakapotopotoaga.—Totou Sefanaia 3:9.
10. Ko e heigoa e lauiaaga he fakaholo ki mua e tuaga he gahua he fonua ha tautolu ke he aga he falu he fakapotopotoaga?
10 Ko e tau laliaga ha tautolu ke fakaholo ki mua e tuaga he gahua he fonua ha tautolu kua lauia mitaki foki e falu. He fakakite e tautolu e manamanatu lahi atu ma e tau tagata ne feleveia e tautolu, ti lali foki a tautolu ke fakaholo ki mua e lauia mitaki he hokotia ke he tau loto he tau tagata fanogonogo ha tautolu, ko e fakamakai ha tautolu ma e gahua he fonua kua tupu ki mua. (Mata. 9:36, 37) Fa mahani e fakamakai ke lauia e tau hoa ha tautolu. Ne fakafano e Iesu e tau tutaki haana ke fakamatala takitokoua ka e nakai tokotaha. (Luka 10:1) Nakai ni foaki he mena nei e fakamalolōaga mo e fakamahaniaga ka e fakatupu foki e fakamakutu ha lautolu ma e gahua he fonua. Nakai kia loto fakaaue a tautolu he gahua mo e tau tagata fakailoa fakamakutu he Kautu? Ko e aga fakamakai ha lautolu kua fakamalolō a tautolu ke fakaholo ki mua e gahua fakamatala.—Roma 1:12.
PUIPUI MAI HE LOMA MO E MAHANI KELEA
11. Ko e heigoa e aga ne tupu ke he falu Isaraela he vahā a Mose, ti ko e heigoa e lauiaaga ne ha ha ai ia lautolu?
11 Fai faahi tapu he mole he eke a lautolu mo motu foou, ne fakatupu he tau Isaraela e aga nakai fiafia mo e loma. Takitaki e mena nei ke he totokoaga ki a Iehova mo e haana tau hukui. (Esoto 16:1, 2) Ko e numera tote ni he tau Isaraela ne toka a Aikupito ne momoui ke kitia e Motu he Maveheaga. Ne nakai fakaatā foki a Mose ke hū atu ke he motu ia ha ko e tali atu haana ke he aga kelea he fakapotopotoaga ha Isaraela! (Teu. 32:48-52) Ko e heigoa ha tautolu ka taute he mogonei ke puipui neke mokulu ke he aga kelea?
12. Maeke fēfē a tautolu ke puipui mai he feaki e aga gūgū?
12 Kua lata ia tautolu ke puipui mai he fakatupu e aga he mahani loma. He feaki e mahani fakatokolalo mo e fakalilifu ma e pule to lagomatai a tautolu, kua lata ia tautolu ke manamanatu hagaao ki a lautolu kua feoaki mo tautolu. Ko e fifiliaga kelea he fakafiafiaaga po ke fakaaoga fakalahi e magaaho mo e tau kapitiga gahua po ke tau kapitiga aoga ne nakai fai fakalilifuaga ke he tau matapatu fakaakoaga tututonu kua hagahaga kelea. Kua pulotu a tautolu ke fakakaupā e feoakiaga ha tautolu mo e tau tagata kua kelea po ko lautolu kua fakatupu ki mua e aga tu tokotaha.—Fakatai 13:20.
13. Ko e fakaohoohoaga matahavala he loma ka takitaki ke he heigoa foki he tau fakaholoaga moumou fakaagaga i loto he fakapotopotoaga?
13 Ko e fakaohoohoaga matahavala he mahani loma kua moumou e tau fakaholoaga fakaagaaga. Ma e fakatai, maeke he loma ke tauhele e mafola mo e kaufakalataha he fakapotopotoaga. Lafi ki ai, ko e talahau e tau gugū totoko hagaao ke he tau matakainaga kua nakai ni fakatupu ai ki a lautolu e mamahi ka e fakatokatoka atu foki ke he tau agahala he pikopiko mo e vagahau kelea. (Levi. 19:16; 1 Kori. 5:11) Ko e falu tagata loma he fakapotopotoaga he senetenari fakamua ne kua “fakalialia foki ke he tau iki, mo e vagahau kelea kia lautolu ne lilifu.” (Iuta 8, 16) Ko e loma pihia ke he tau tagata fai tuaga he fakapotopotoaga kua nakai moua e taliaaga he Atua.
14, 15. (a) Ka tokanoa e mahani hepehepe nakai fakahako to lauia fēfē ai e fakapotopotoaga katoa? (e) Ko e heigoa kua lata ke taute e tautolu ka mailoga e tautolu e taha kua putoia ke he agahala fufū?
14 Ka e kua ka iloa e tautolu taha kua putoia ke he agahala fufū, liga he fakaaoga hehē e kava, onoono ke he tau ata telefua, po ke moui mahani feuaki? (Efeso 5:11, 12) Ko e ha tautolu a fakapouli e mata ke he mahani kelea muitui ka taofi e holo mitaki he agaaga tapu a Iehova mo e fakatauhele e mafola he fakapotopotoaga katoa. (Kala. 5:19-23) Tuga ni e tau Kerisiano fakamua atu i Korinito ne lata ke utakehe e tau mahani kelea oti, ti ko e vahā nei foki kua lata ke fakamamao tumau e fakaohoohoaga moumou he fakapotopotoaga ke maeke ke fakatumau e aga mitaki lahi. Ko e heigoa haau ka taute ke lafi ke he mafola he fakapotopotoaga?
15 He fitā e talahau, kua aoga ke fakatumau e nakai tala fakahanoa e falu mena, mua atu ka talahau he falu e tau fatuakiloto mo e tau logonaaga ha lautolu ki a tautolu. Ko e hehē mo e mamahi mooli ke folafola e tau vala tala nakai tala fakahanoa hagaao ke he taha tagata! Ka e, ka taute e agahala kelea lahi, ko lautolu kua kotofa he Tohi Tapu ke fakatonutonu e mena ne tupu—ko e tau motua he fakapotopotoaga—kua lata ke fakailoa ki ai. (Totou Levitika 5:1.) Ti ka iloa e tautolu e matakainaga taane po ke fifine kua taute e mahani hepehepe pihia, kua lata ia tautolu ke fakamalolō a ia ke fina atu ke he tau motua mo e kumi e lagomatai ha lautolu. (Iako. 5:13-15) Kaeke ke nakai taute e ia he magaaho kua fakatoka ki ai, kua lata ia tautolu ke fakailoa e mena hepehepe.
16. Lagomatai fēfē he fakailoa e tautolu e mahani hepehepe kelea lahi ke puipui e aga he fakapotopotoaga?
16 Ko e fakapotopotoaga Kerisiano ko e huaga fakaagaaga, ti kua lata ia tautolu ke lagomatai ke puipui ai he fakailoa e tau mahani hepehepe kelea lahi. Ka fakatonu he tau motua e tagata ne hehē ti fakatokihala a ia he talia e akonakiaga mo e fakatonuaga, to nakai liu fakahagahaga kelea e ia e aga he fakapotopotoaga. Ka e kua ka nakai fakatokihala e tagata agahala kelea muitui ti nakai talia e ia e fakatonuaga fakaalofa he tau motua? Ko e tuku ki tua haana mai he fakapotopotoaga kua fua ai ke he “malaia,” po ke tuku kehe he mahani matahavala mai ia tautolu, ati puipui ai e aga he fakapotopotoaga. (Totou 1 Korinito 5:5.) E, ko e puipui e aga he fakapotopotoaga kua latatonu ia tautolu takitokotaha ke taute e mena kua tonu, kaufakalataha mo e kau he tau motua, ti puipui e tuaga he tau matakainaga talitonu.
FAKALAGALAGA E “LOTO FAKALATAHA HA HE AGAGA”
17, 18. Ko e heigoa ka lagomatai a tautolu ke “loto fakalataha ha he agaga”?
17 He “tumau a lautolu ke he tau kupu [fakaakoaga] he tau aposetolo,” ne lagomatai e tau tutaki fakamua atu a Iesu ke feaki e aga kaufakalataha i loto he fakapotopotoaga. (Gahua 2:42) Ne uho lahi ki a lautolu e fakatonuaga mo e takitakiaga faka-Tohi Tapu mai he tau patu. Ha kua kaufakalataha e tau motua he vahā nei mo e vahega fekafekau fakamoli mo e loto matala, ko lautolu oti he fakapotopotoaga kua fakamalolō mo e lagomatai ke fakatumau e kaufakalataha. (1 Kori. 1:10) He mumuitua a tautolu ke he takitakiaga ne fakavē ke he Tohi Tapu mai he fakatokatokaaga a Iehova mo e muitua ke he tau fakatonuaga he tau motua, to fakamooli e tautolu kua “lalilali atu a [ta]utolu ke toto mau e loto fakalataha ha he [a]gaga ke he pipiaga he mafola.”—Efeso 4:3.
18 Ke he tau mena oti mogoia, kia gahua auloa a tautolu ke puipui e aga mitaki lahi he fakapotopotoaga. Ka taute pihia e tautolu, to maeke mooli ke ‘ha ha ia tautolu oti kana e fakaalofa noa he Iki ko Iesu Keriso ke he aga ne fakakite e tautolu.’—Filipi 4:23.
[Fakatino he lau 19]
Lafi nakai e koe ke he aga mitaki he tauteute e tau tali fai kakano?
[Fakatino he lau 20]
Lafi ke he aga mitaki he fakamahani ke he tau lologo ha tautolu