“Fakamolemole Fakaatā a Mautolu ke O Mai ki Kaina”

Kua fekafekau nakai a koe ki a Iehova he taha magaaho? Kua manatu nakai a koe ke liu fekafekau ki a ia ka e manamanatu foki to liga liu nakai a ia ke talia mai a koe? Fakamolemole totou fakamitaki e vala tala nei mo e vala tala ne mui mai. Kua tauteute pauaki ai he manatu ki a koe.

“LIOGI au ki a Iehova ke fakamolemole fakaatā au ke hau ki kaina mo e ke fakamagalo au he fakamamahi a ia.” Pihia he talahau he taha fifine ne tafea kehe mai he feakiaga Kerisiano haana. Fakaalofa hofihofi nakai a koe ki a ia? Manamanatu nakai a koe: ‘Fēfē e logonaaga he Atua ki a lautolu ia ne fekafekau ki a Ia he taha magaaho? Manatu nakai e ia a lautolu? Manako nakai a ia ki a lautolu ke “o mai ki kaina”?’ Ke tali e tau hūhū ia, o mai la tautolu ke kumikumi ke he tau kupu ne fakamau e Ieremia. Nakai noa to mafanatia e loto haau ke he tau tali.—Totou Ieremia 31:18-20.

Manamanatu ke he fakavēaga he tau kupu ha Ieremia. He 740 F.V.N., totou hogofulu tau ato hoko e vahā ha Ieremia, ne fakaatā e Iehova e kautu he magafaoa hogofulu ha Isaraela ke uta fakapaea he tau Asuria.a Ne fakaatā he Atua e matematekelea nei mo akonakiaga ha kua agahala kelea lahi e tau puhala he tau tagata haana, he fakaheu e tau hatakiaga loga he tau perofeta haana. (2 Tau Patuiki 17:5-18) Hiki nakai e tau tagata ha ko e tau mena uka ne tupu ki a lautolu he fakapaea, magaaho ne vevehe kehe mai he Atua ha lautolu ti kua mamao ligo mai he motu mooli ha lautolu? Nimo katoatoa kia he Atua a lautolu? To fakaatā nakai e ia a lautolu ke liliu mai ki kaina?

“Ti Tokihala Au”

Ne matala e tau loto he tau tagata he fakapaeaaga ti omoomoi a lautolu ke fakatokihala. Ne nakai galo ia Iehova e momoko mooli ha lautolu. Fanogonogo la he fakamaama e Iehova e aga mo e tau logonaaga he tau Isaraela ne fakapaea, hagaao ki a Efaraimo katoa.

“Kua logona e au a Efaraimo kua tagi a ia,” he talahau e Iehova. (Kupu 18) Ne logona e ia e tau Isaraela he tagi aue ha kua lauia a lautolu he tau puhala agahala ha lautolu. Ko e talahauaga “kua tagi a ia” ka kakano “ko e vivivivi po ke tutututu,” he talahau he taha pulotu. Kua tatai a lautolu mo e tama liuliu ne luelue e ulu he tokihala he manamanatu a ia ke he fakamamahi ne tamai e ia ki a ia mo e manako ke he moui haana he magaaho fakamua i kaina. (Luka 15:11-17) Ko e heigoa ne talahau he tau tagata?

“Kua akonaki mai e koe au . . . tuga ne povi kua nakai fakaako.” (Kupu 18) Ne talia he tau tagata kua latatonu a lautolu ma e akonakiaga. Ha ko lautolu kua tuga ni e punua povi nakai fakaako. Ko e fakatataiaga nei kua liga kakano kua tatai a lautolu mo e punua povi taane ne liga nakai lata ke “logona e huki ane mai nakai totoko e ia e akau hahamo he magaaho fakamua,” he talahau he taha tohi.

“Kia fakamafoki mai e koe au ti mafoki ai ni au; ha ko koe Iehova na e, ko e haku a Atua a koe.” (Kupu 18) Ne fakatokolalo e tau loto ha lautolu, ne ui atu e tau tagata ke he Atua. Ne galo a lautolu he puhala agahala, ka kua ole a lautolu mogonei ma e lagomatai ke kumi e puhala ha lautolu ke liliu mai ke moua e taliaaga haana. Taha e fakaliliuaga ne pehē: “Ko koe ko e ha mautolu a Atua—fakamolemole fakaatā a mautolu ke o mai ki kaina.”—Contemporary English Version.

“Ti tokihala au; . . . ne mā au, mo e fakahahaku au.” (Kupu 19) Ne tokihala e tau tagata ha kua agahala a lautolu. Ne talia e lautolu e fakahala ti talahau kua hala a lautolu. Ke tuga kua pokipoki e tau fatafata ha lautolu, ti logona foki e lautolu e mā mo e nakai mata fiafia.—Luka 15:18, 19, 21.

Ne fakatokihala e tau Isaraela. Ne pukeina a lautolu he momoko, talahau e tau agahala ha lautolu ke he Atua, ti mafoki mai he tau puhala kelea ha lautolu. To molū nakai e loto he Atua ha kua fakatokihala a lautolu? To fakaatā nakai e ia a lautolu ke o mai ki kaina?

“Kua Hofihofi Noa Haku a Fakaalofa kia Ia”

Ne fai matutakiaga pauaki a Iehova mo e tau Isaraela. Pehē a ia: “Ha ko au ko e matua a Isaraela, ko Efaraimo foki ko e haku a tama uluaki a ia.” (Ieremia 31:9) Maeke fēfē e matua taane fakaalofa ke nakai fakafeleveia mai e tama taane ne kua fakatokihala mooli e loto? Mailoga e puhala ne fakakite e Iehova e tau logonaaga faka-Matua Taane haana ma e tau tagata haana.

“Ko e haku a tama fakahele kia a Efaraimo? ko e tama kia a ia ke fiafia ki ai? ha ko e mena ka vagahau e au kia ia, kua manatu lahi agaia ni e au a ia.” (Kupu 20) Kua fakaalofa hofihofi mooli e tau kupu ia! Ke tuga e matua ne peehi malolō ka e fakaalofa, ne manako e Atua ke vagahau ‘atu a ia’ ke he tau tama haana, he hataki lagaloga a lautolu ke he tau puhala agahala ha lautolu. Magaaho ne ulumaō a lautolu ke nakai fanogonogo, ne fakaatā e ia a lautolu ke fakapaea—kakano kua toka a lautolu ke o kehe mai he kaina. Ka e pete he fakahala e ia a lautolu, ne nakai nimo e ia a lautolu. Nakai fakaai a ia ke taute pihia. Kua nakai nimo he matua taane loto fakaalofa e fanau haana. Ka e fēfē e logonaaga ha Iehova he mogo ne kitia e ia kua fakatokihala mooli e fanau haana?

“Kua tagi haku loto kia ia; kua hofihofi noa haku a fakaalofa kia ia.” (Kupu 20) Ne malolō e manako ha Iehova ma e fanau haana. Kua lauia e loto haana ha ko e fakatokihala mooli ha lautolu, ti ha ha ia ia e manako lahi ke liliu mai a lautolu ki a ia. Tuga e matua taane he fakatai ha Iesu ke he tama moumou koloa, “ati hofihofi ai hana fakaalofa” mo e makai ke fakafeleveia haana tama he liu mai ki kaina.—Luka 15:20.

“Fakaatā Au ma Iehova ke Hau ki Kaina!”

Ko e tau kupu ia Ieremia 31:18-20 ne fakamaama mai ki a tautolu e fakaalofa hofihofi mo e fakaalofa noa ha Iehova. Nakai nimo he Atua a lautolu ne fekafekau ki a ia he taha magaaho. Ka e kua ka manako a lautolu ia ke liliu mai ki a Ia? Ko e Atua kua ‘mautali ke fakamagalo.’ (Salamo 86:5) To nakai fuluhi kehe a Ia ki a lautolu kua o mai ki a ia mo e tau loto tokihala. (Salamo 51:17) He taha faahi, kua fiafia a ia ke fakafeleveia mai a lautolu ki kaina.—Luka 15:22-24.

Ko e fifine ne totoku he kamataaga ne taute e lakaaga ke liu mai ki a Iehova ti fina atu ke he fakapotopotoaga he Tau Fakamoli a Iehova he matakavi. Fakamua, ne fakamakamaka a ia ke utakehe e tau manatu kelea ni haana. “Ne logona hifo e au e fakateaga lahi,” he manatu e ia. Ka e fakamafana ai he tau motua he fakapotopotoaga mo e lagomatai a ia ke liu moua e malolō fakaagaaga. Ke he loto kua pukeina he fakaaue, ne pehē a ia, “Ko e homo ha ia he fakaatā e Iehova au ke hau ki kaina!”

Ka fekafekau a koe ki a Iehova he taha magaaho ti manatu ke liu fekafekau foki ki a ia, kua uiina e mautolu a koe ke ahiahi atu ke he fakapotopotoaga he Tau Fakamoli a Iehova he matakavi. Manatu na tali fakaalofa hofihofi mo e fakaalofa noa a Iehova ka ui atu a lautolu kua fakatokihala ki a ia, “Fakamolemole fakaatā a mautolu ke o mai ki kaina.”

[Matahui Tala]