Leoleo e Iehova a Tautolu ma e Fakamouiaga
“Ko [m]utolu kua leoleo he mana he Atua ke he tua, ke hoko ke he fakamouiaga kua taute ke fakakite mai ke he tau aho ke fakahiku ai.”—1 PETE. 1:4, 5.
TO TALI FĒFĒ E KOE?
Futiaki fēfē e Iehova a tautolu ke he tapuakiaga mooli?
Fakaatā fēfē e tautolu a Iehova ke takitaki a tautolu ke he fakatonuaga haana?
Foaki mai fēfē e Iehova ki a tautolu e tau fakamalolōaga?
1, 2. (a) Ko e heigoa e fakamafanaaga kua moua e tautolu to lagomatai he Atua a tautolu ke fakatumau e mahani fakamooli ha tautolu? (e) Iloa mitaki fēfē e Iehova a tautolu takitokotaha?
“KO IA ke tumau ato hoko ke he fakaotiaga, to fakamoui na ia.” (Mata. 24:13) He tau kupu ia, ne talahau fakamaaliali e Iesu ke maeke ia tautolu ke momoui ka fakafili he Atua e lalolagi ha Satani, kua lata ia tautolu ke fakatumau e mahani fakamooli ke hoko ke he fakaotiaga. Ka kua nakai kakano e mena nei kua amanaki a Iehova ki a tautolu ke fakauka ke he pulotu mo e malolō ha tautolu ni. Kua fakamafana mai he Tohi Tapu ki a tautolu: “Kua fakamoli e Atua, he nakai tuku atu e ia a mutolu ke he kamatamata kua mua ke he mena kua fahia ai a mutolu, ka e taute foki e ia fakalataha mo e kamatamata e mena ke hao ai, kia fahia a mutolu ke fakauka ai.” (1 Kori. 10:13) Ko e heigoa e kakano he tau kupu ia?
2 Ke maeke ia Iehova ke iloa tonuhia kua nakai kamatamata a tautolu ke molea ke he mena kua fahia a tautolu ki ai, kua lata a ia ke iloa e tau mena oti hagaao ki a tautolu, putoia e tau paleko kua fehagai mo tautolu, ko e tuaga ha tautolu takitokotaha, mo e lahi he mena kua maeke ia tautolu ke fahia ki ai. Iloa mitaki pihia nakai he Atua a tautolu? E. Kua fakakite mai he Tau Tohiaga Tapu na iloa mitaki e Iehova a tautolu takitokotaha. Iloa e ia e tau gahua fa mahani ha tautolu he tau aho takitaha mo e tau aga ha tautolu. Maeke foki a ia ke mailoga e tau manamanatuaga mo e tau fatuakiloto ha tautolu.—Totou Salamo 139:1-6.
3, 4. (a) Puhala fe kua fakakite mai he mena ne logona e Tavita kua fioia e Iehova e tau tagata takitokotaha? (e) Ko e heigoa e gahua mitaki lahi hane taute e Iehova he vahā nei?
3 Tuga kia kua mamao ligo e fiafia he Atua ke he tau tagata tokolalo? Ne manamanatu e salamo ko Tavita ke he hūhū nei, he pehē ki a Iehova: “Ka kitekite atu au ke he lagi hāu, ko e gahua he hāu a tau mata lima, ko e mahina katoa mo e tau fetu ne eke e koe; ko e heigoa kia e tagata kia manatu mai ai a koe kia ia?” (Sala. 8:3, 4) Liga lagā mai e hūhū nei ha Tavita he tau mena ne tutupu ki a ia. Ko ia, ko e tama fakamui ha Iese, kua moua tuai e Iehova e “tagata māna ke lata mo e hana finagalo” ti kua tamai a ia he ‘mui atu ke he tau mamoe, kia eke mo takitaki’ ki Isaraela. (1 Samu. 13:14; 2 Samu. 7:8) Manamanatu la ke he logonaaga ha Tavita he mailoga ko e Tufuga he lagi mo e lalolagi katoatoa kua fioia e tau manamanatu hokulo haana ko e tama taane leveki mamoe!
4 Kua tatai foki ni e manamanatu ke he fiafia lahi haana ko Iehova kua fakakite ki a tautolu he vahā nei. Kua fakapotopoto auloa e ia ke he tapuakiaga mooli e “tau mena kua manako ki ai e tau motu oti,” ti kua lagomatai e ia e tau fekafekau haana ke fakatumau e mahani fakamooli ha lautolu. (Hakai 2:7) Ke maama mitaki e puhala kua lagomatai e Iehova a tautolu ke fakatumau e mahani fakamooli ha tautolu, o mai la ke manamanatu ke he puhala ne futiaki fakatata e Ia e tau tagata ke he tapuakiaga mooli he magaaho fakamua.
FUTIAKI MAI HE ATUA
5. Futiaki fēfē e Iehova e tau tagata ke he Tama haana? Fakatai.
5 Ne pehē a Iesu: “Nakai maeke ia taha ke hau kia au, ka nakai futia mai he Matua ne fakafano mai au.” (Ioane 6:44) Kua kakano e tau kupu ia ke eke mo tutaki he Keriso, kua lata ia tautolu ke moua e lagomatai he Atua. Futiaki mai fēfē e Iehova a lautolu ne loto tuga e tau mamoe ke he Tama haana? Puhala he fakamatala e tala mitaki mo e gahuahuaaga he agaaga tapu. Ma e fakatai, ko Paulo mo e tau hoa misionare haana i Filipi, ne feleveia a lautolu mo e fifine ne higoa ko Litia ti kamata ke tala age e tala mitaki ki a ia. Ne talahau he fakamauaga omoomoi: “Kua vevete he Iki [Iehova] hana loto kia hagao mai ke he tau kupu ne vagahau atu e Paulo.” E, ne foaki e Iehova e agaaga haana ke lagomatai a ia ke iloa e kakano he fekau, ti ko e fua ne papatiso a ia mo e magafaoa haana.—Gahua 16:13-15.
6. Futiaki fēfē he Atua a tautolu oti ke he tapuakiaga mooli?
6 Kehe kia e mena ne tupu ki a Litia? Nakai. Kaeke ko e Kerisiano kua tukulele a koe, kua futiaki foki he Atua a koe ke he tapuakiaga mooli. Tuga ni he kitia he ha tautolu a Matua he lagi kua fai mena uho he loto ha Litia, kua fai mena mitaki foki kua kitia e Ia mai ia koe. Magaaho ne kamata a koe ke fanogonogo ke he tala mitaki, ne lagomatai e Iehova a koe ke maama ai he foaki atu e agaaga tapu. (1 Kori. 2:11, 12) Ka eketaha a koe ke fakagahua e tau mena kua iloa e koe, to fakamonuina e ia e tau laliaga haau ke taute e haana finagalo. Ka tukulele e koe e moui haau ki a ia, to olioli e loto Haana. Mooli, tali mai he kamata a koe he puhala ke he moui, kua ha ha i ai tumau a Iehova mo koe he tau magaaho oti ia.
7. Iloa fēfē e tautolu to lagomatai he Atua a tautolu ke fakatumau e fakamooli?
7 He mole e lagomatai a tautolu ke kamata ke o fano mo ia, ne nakai toka e Iehova a tautolu ke ō ni he tau manako ha tautolu ke fakatumau e fakamooli. Iloa e Ia ha kua tuga ni ko e mena nakai o mai ni e tautolu a tautolu ke he kupu mooli, to nakai nonofo foki a tautolu ha ko tautolu ni he kupu mooli. He tohi ke he tau Kerisiano fakauku, ne pehē e aposetolo ko Peteru: “Ko [m]utolu kua leoleo he mana he Atua ke he tua, ke hoko ke he fakamouiaga kua taute ke fakakite mai ke he tau aho ke fakahiku ai.” (1 Pete. 1:4, 5) Kua hagaao e matapatu fakaakoaga ia ke he tau Kerisiano oti ti kua lata ia tautolu takitokotaha ke mataala ki ai he vahā nei. Ko e ha? Ha kua lata a tautolu oti ke moua e lagomatai he Atua ke fakatumau e fakamooli ki a ia.
TAOFI MAI HE TAUTE E LAKAAGA HEPE
8. Ko e ha kua lata ia tautolu ke mataala neke taute e lakaaga hepe?
8 Kua maeke e tau pehiaaga he moui mo e tau nakai mitaki katoatoa ni ha tautolu ke fakaohooho a tautolu ke galo e hagaaki fakaagaaga ha tautolu ti fakahagahaga kelea ke taute e tau lakaaga hepe ka e nakai iloa ai e tautolu. (Totou Kalatia 6:1.) Fakatātā he mena nei e mena ne tupu he moui ha Tavita.
9, 10. Taofi fēfē e Iehova a Tavita he taute e lakaaga hepe, ti ko e heigoa Haana kua taute ma tautolu he vahā nei?
9 He magaaho ne tatao he Patuiki ko Saulo, ne fakakite e Tavita e taofiaga kua mua atu he nakai taui e patuiki mahekeheke ia. (1 Samu. 24:2-7) Ka e nakai leva e mole he mena ia, ti kaumahala a Tavita he tau logonaaga nakai mitaki katoatoa haana. Ne manako a ia ke he taha mena kai ma e tau tagata haana ti ole fakamitaki a ia ke he lagomatai he matakainaga Isaraela ne higoa ko Napalu. He tali atu a Napalu mo e tau ekefakakelea, ne ita lahi a Tavita ti fina atu ke taui atu ke he tau tagata taane oti he magafaoa katoa ha Napalu, nukua kaumahala ai ke mailoga ko e tamate he tau tagata nakai fai hala to eke a ia mo tagata lima toto ki mua he Atua. Ko e taofi atu he hoana ha Napalu ko Apikaila he magaaho tonu ati hao a Tavita he taute e hehē matematekelea lahi. He mailoga e lima ha Iehova he mena nei, ne pehē a Tavita ki a Apikaila: “Kia fakaaue atu kia Iehova ko e Atua a Isaraela, ne fakafano mai ai a koe ke he aho nai ke fonofono au; Kia fakaaue atu foki ke he hau a pulotu, mo e fakaaue atu kia koe ha kua taofi e koe au he aho nai, neke fina atu au ke fakamaligi e toto, mo e taui ai e kelea ke he haku lima.”—1 Samu. 25:9-13, 21, 22, 32, 33.
10 Ko e heigoa e fakaakoaga ka ako e tautolu mai he tala nei? Ne fakaaoga e Iehova a Apikaila ke puipui a Tavita mai he taute e lakaaga hepe. Kua taute pihia foki e ia ma tautolu he vahā nei. Mooli, kua nakai lata ia tautolu ke amanaki ke fakafano mai he Atua taha tagata ke taofi a tautolu he tau magaaho ka teitei a tautolu ke taute e mena hepe; po ke maeke ia tautolu ke fuafua manatu ke iloa mooli e puhala ka gahuahua ai e Atua he ha tuaga po ke tau mena ka fakaatā e ia ke lata mo e fakamooliaga he finagalo haana. (Fakama. 11:5) Pete ia, kua maeke ia tautolu ke mauokafua to mataala tumau a Iehova ke he tau tuaga ha tautolu mo e to lagomatai e ia a tautolu ke fakatumau ke fakamooli ki a ia. Kua fakamalolō e ia a tautolu: “To fakaako e au a koe, mo e fakakite kia koe e puhala ke fano ai a koe; to fakatonu e au kia koe, mo e kitekite au kia koe.” (Sala. 32:8) Puhala fe ne foaki e Iehova e fakatonuaga ki a tautolu? Maeke fēfē a tautolu ke aoga mai i ai? Ti ko e ha kua maeke ia tautolu ke mauokafua kua takitaki e Iehova haana tau tagata he vahā nei? Mailoga la e puhala kua tali ai e tau hūhū ia he tohi a Fakakiteaga.
PUIPUI HE FAKATONUAGA
11. Laulahi fēfē e iloaaga ha Iehova ke he tau mena tutupu he tau fakapotopotoaga he tau tagata haana?
11 He fakakiteaga ne fakamau he Fakakiteaga veveheaga 2 mo e 3, kua tivi e Iesu Keriso ne lilifu e tau fakapotopotoaga ne fitu i Asia Tote. Kua fakamaama he fakakiteaga nukua kitia he Keriso e tau puhala fakalaulahi pihia mo e tau tuaga takitaha foki. He falu tuaga, ne totoku foki e ia e tau tagata takitaha, ti he tau tuaga takitaha ia, ne foaki e ia e navaaga po ke fakatonuaga kua latatonu. Ko e heigoa kua fakakite he mena nei? He fakamooli e fakakiteaga, ne hukui he tau fakapotopotoaga ne fitu e tau Kerisiano fakauku he mole e 1914, ti ko e fakatonuaga ne age ke he tau fakapotopotoaga ne fitu kua hagaao e tau matapatu fakaakoaga ke he tau fakapotopotoaga oti he tau tagata he Atua he vahā nei he lalolagi katoa. Ati maeke ai ke fakakatoatoa kua takitaki fakamalolō e Iehova he puhala he Tama haana e tau tagata haana. Aoga fēfē a tautolu mai he takitakiaga ia?
12. Fakaatā fēfē e tautolu a Iehova ke takitaki e tau lakaaga ha tautolu?
12 Taha puhala ke aoga mai a tautolu he takitakiaga fakaalofa ha Iehova ko e fakaako fakatagata. Puhala mai he tau tohi he vahega fekafekau fakamoli mo e loto matala, kua foaki mai e Iehova e tau fakatonuaga loga faka-Tohi Tapu. (Mata. 24:45) Ka ke aoga mai i ai, kua lata ia tautolu ke fakaaoga taha magaaho ke fakaako ai mo e fakagahua e tau mena kua iloa e tautolu. Ko e fakaako fakatagata e taha puhala kua maeke a Iehova ke “leveki a [ta]utolu neke veveli.” (Iuta 24) Kua fakaako nakai e koe taha mena he tau tohi ha tautolu ne tuga kua tohi pauaki ni ma haau? Talia e tau fakatonuaga kua puna mai ia Iehova. Tuga ni e kapitiga ka liga pokipoki atu e tukeua haau ke fakalaga a koe ke he taha mena, na maeke a Iehova ke fakaaoga e agaaga haana ke fakakite atu ki a koe e mahani haau po ke aga haau—mo e nakai noa kua tokologa atu foki tuga a koe—ne lata ke holo ki mua. He matakite ke he tau takitakiaga he agaaga, kua fakaatā e tautolu a Iehova ke takitaki e tau lakaaga ha tautolu. (Totou Salamo 139:23, 24.) Hagaao ke he mena nei, kua mitaki ma tautolu ke kumikumi hifo e tau puhala fakaako ha tautolu.
13. Ko e ha kua pulotu ma tautolu ke kumikumi hifo ni ke he tau puhala fakaako ha tautolu?
13 Ko e lahi e magaaho ma e fakafiafiaaga ka fofō e magaaho ha tautolu kua lata ma e fakaakoaga fakatagata. Taha e matakainaga taane ne mailoga: “Na mukamuka lahi ke tonoa e fakaako fakatagata. Loga lahi e tau fakafiafiaaga kua moua he mogonei, ti tau mukamuka foki, nakai pihia fakamua. Moua ai he televisoni, he komopiuta, mo e he telefoni. Kua takai viko ia tautolu.” Ka nakai fakaeneene a tautolu, ko e magaaho ha tautolu ne kua lata ma e fakaakoaga hokulo fakatagata to tote fakahaga ai ato galo. (Efeso 5:15-17) Igatia a tautolu oti mo e hūhū hifo: ‘Lagafiha e fai magaaho au ne fakaaoga ke kumikumi fakahokulo ke he fakaako haaku he Kupu he Atua? Taute ni kia e au ka fai lauga po ke tauteute he vala ma e feleveiaaga?’ Ka pihia, liga fakaaoga fakamitaki e tautolu e afiafi kua fakatoka ma e tapuakiaga magafaoa po ke fakaako fakatagata ke tokiofa e pulotu fakaagaaga kua foaki mai e Iehova ke leoleo aki a tautolu ma e fakamouiaga.—Fakatai 2:1-5.
FAKATUMAU HE FAKAMALOLŌAGA
14. Fakakite fēfē he tau Tohiaga Tapu kua mataala a Iehova ke he tau logonaaga ha tautolu?
14 Ne loga e tau tuaga fakaatukehe ne feleveia mo Tavita he moui haana. (1 Samu. 30:3-6) Kua fakakite he tau kupu omoomoi haana kua iloa e Iehova e tau logonaaga haana. (Totou Salamo 34:18; 56:8.) Iloa foki he Atua e tau logonaaga ha tautolu. Ka “loto malipilipi” a tautolu po ke “loto pehia,” kua fakatata mai a ia ki a tautolu. Liga foaki mai he mena nei e logonaaga mafanatia, tuga ne logona e Tavita, ne lologo: “To fiafia au mo e olioli ke he hāu a fakaalofa mai; ha ko koe kua kitekite mai ke he haku a mamahi; kua fioia e koe au ka kua matematekelea au.” (Sala. 31:7) Ka kua lahi atu e mena kua taute e Iehova he mailoga noa ni e tau matematekelea ha tautolu. Fakatumau e ia a tautolu he foaki mai e fakamafanaaga mo e fakamalolōaga. Taha puhala ne taute e ia e mena nei ko e tau feleveiaaga Kerisiano.
15. Ko e heigoa e fakatonuaga ka ako mai e tautolu he mena ne tupu ki a Asafo?
15 Taha e aoga he fakalataha ke he tau feleveiaaga kua fakakite mai he mena ne tupu ke he salamo ko Asafo. Ko e takele he tau nakai fakafili tonu ne fakatupu a Asafo ke tuahā ke he aoga he fekafekau ke he Atua. Ne fakalolelole a Asafo. Fakamaama e ia e tau logonaaga haana ke he puhala nei: “Ha ko e mena ne fakamamahi hoku loto, ne tuina foki au ke he haku manatu.” Ko e fua, ne fetamakina a ia kua fakaoti e fekafekau ki a Iehova. Ko e heigoa ne lagomatai a Asafo ke liu moua e lagotatai haana? “Ne fina atu ai au ke he faituga he Atua,” he ui e ia. He haia mo e tau matakainaga tapuaki ha Iehova, ne liu a ia moua e onoonoaga hako. Ne kitia e ia ko e kautūaga he tau tagata mahani kelea kua kū ni, to fakahako mooli e Iehova e tau lekua. (Sala. 73:2, 13-22) Kua pihia foki a tautolu. Ko e fakaatukehe he fehagai mo e tau nakai fakafili tonu he lalolagi ha Satani ka fakapehia a tautolu. Ko e feleveia mo e tau matakainaga ha tautolu ka fakahauhau mo e lagomatai a tautolu ke fakatumau e fiafia ha tautolu he fekafekau ki a Iehova.
16. Aoga fēfē a tautolu mai he fifitakiaga a Hana?
16 Ka e kua ka fai tuaga i loto he fakapotopotoaga ati uka ai a koe ke fano he tau feleveiaaga? Liga kua utakehe ia koe e kotofaaga fekafekau ti kua mā, po kua fekehekeheaki e manatu haau mo e matakainaga taane po ke matakainaga fifine. Ka pihia, to liga lagomatai ki a koe e fifitakiaga a Hana. (Totou 1 Samuela 1:4-8.) Manatu na hogohogomanava lahi a ia ha ko e tuaga he magafaoa ne putoia e hoana ne fetoko ki a ia, ko Penina. Ne mua atu e mamahi lahi he tuaga he tau tau takitaha ka o atu e magafaoa ke huhunu e tau poa ki a Iehova i Sailo. Ne fakamamahi lahi ki a Hana ati “tagi ai a ia, mo e nakai kai a ia.” Ka e nakai fakaatā e ia e mena nei ke nofo kehe a ia mai he tau magaaho tapuaki ki a Iehova. Ne mailoga he Atua e mahani fakamooli haana ti fakamonuina a ia.—1 Samu. 1:11, 20.
17, 18. (a) Ko e tau puhala fe kua moua e tautolu e fakamalolōaga he tau feleveiaaga he fakapotopotoaga? (e) Fēfē e logonaaga haau ke he levekiaga fakaalofa hofihofi ne foaki e Iehova ke lagomatai a tautolu ke moua e fakamouiaga?
17 Kua fai kakano aoga ma tautolu he vahā nei ke muitua e fifitakiaga a Hana. Kua lata ia tautolu ke fakamooli ke o atu ke he tau feleveiaaga. Tuga ni kua logona hifo e tautolu oti, kua foaki he tau feleveiaaga e fakamalolōaga aoga lahi. (Hepe. 10:24, 25) Kua atihake a tautolu he mafanatia he feoakiaga faka-Kerisiano. Ko e talahauaga mukamuka he lauga po ke tali ka lauia e tau loto ha tautolu. He tau fakatutalaaga ato kamata po ke ka hili e feleveiaaga, liga fanogonogo mai e matakainaga talitonu ki a tautolu po ke talahau e tau kupu fakamafana. (Fakatai 15:23; 17:17) He uhu fakaleo lahi e tautolu e lologo ki a Iehova, kua malagaki e tau loto ha tautolu. Mua atu ka lauia a tautolu he ‘tau manamanatu loga he loto’ kua lata ia tautolu ke moua e fakamalolōaga ne moua mai e tautolu he tau feleveiaaga, kua fakamalolō e Iehova a tautolu aki e ‘haana fakamafanaaga’ ti lalago a tautolu he eketaha ke fakatumau e mahani fakamooli.—Sala. 94:18, 19.
18 He logona e haohao mitaki he levekiaga fakaalofa hofihofi he ha tautolu a Atua, tuga ne logona hifo e Asafo ne lologo ki a Iehova: “Ne toto e koe haku lima matau. To takitaki e koe au he hāu a pule.” (Sala. 73:23, 24) Loto fakaaue mooli a tautolu kua leoleo e Iehova a tautolu ma e fakamouiaga!
[Fakatino he lau 28]
Futiaki foki e Iehova a koe
[Tau Fakatino he lau 30]
Leoleo a tautolu he fakagahua e fakatonuaga he Atua
[Fakatino he lau 31]
Ne fakatumau a tautolu he tau fakamalolōaga kua moua e tautolu