Fakaaue Mooli Nakai a Koe ke he Mena Fakaalofa he Atua he Fakamauaga?
“Kia foaki mai e Iehova kia mua ke moua e mua takitokotaha e okiokihaga ke he kaina he hana tane.”—RUTA 1:9.
KUMI MA E TAU TALI:
Ko e ha ka talahau e tautolu kua loto fakaaue he tau fekafekau he Atua he vahā kua mole e haana mena fakaalofa ko e fakamauaga?
Maeke fēfē a tautolu ke iloa kua fioia e Iehova e fifiliaga ha tautolu he hoa he fakamauaga?
Ko e heigoa e fakatonuaga he Tohi Tapu ke he fakamauaga kua amanaki a koe ke fakaaoga he moui haau?
1. Fakamaama e tali ha Atamu he mogo ne moua e hoana.
“KO E hui ni hanai he haku hui, mo e kakano he haku kakano; to ui a ia ko e fifine, ha ko e mena uta a ia mai he tane.” (Kene. 2:23) Ko e fiafia mooli ma e tagata taane fakamua ko Atamu ke moua e hoana! Ati talahau fakapoeme ai e ia! He mole e fakatupu e Iehova a Atamu ke pulumohea, ne tufuga e Ia e fifine fulufuluola nei mai he taha he tau kahokaho he tagata taane. Fakamui ne fakahigoa e Atamu a ia ko Eva. Ne fakalataha he Atua a laua ke he fakamauaga fiafia. Ha kua fakaaoga e Iehova e kahokaho ni a Atamu ko e fakavēaga ma e tufugatiaaga he fifine, ne fetataaki lahi a Atamu mo Eva nakai tuga e taane mo e hoana he vahā nei.
2. Ko e ha e tau tagata taane mo e tau fifine ne futiaki e taha ke he taha?
2 He pulotu ue atu ha Iehova, ne tuku e ia he tau tagata e logonaaga he fakaalofa loto fakavihi—ko e mahani ka futiaki fakatata e tau tagata taane mo e tau fifine. Talahau he The World Book Encyclopedia: “Ko e tagata taane mo e fifine kua mau ne amanaki ke fakalataha ke he fakafetuiaga mahani fakataane mo e fifine mo e tumau tukulagi e loto fakavihi.” Kua leva e tupu he mena ia ke he tau tagata a Iehova.
LOTO FAKAAUE A LAUTOLU KE HE MENA FAKAALOFA HE FAKAMAUAGA
3. Moua fēfē e Isaako e hoana?
3 Ko Aperahamo ne tua fakamooli ne fakalilifu lahi e fakamauaga. Ko e mena ia, ne fakafano e ia e fekafekau motua haana ki Mesopotamia ke moua e hoana ma Isaako. Ko e liogi he fekafekau ia ne moua e tau fua mitaki. Ko Repeka ne matakutaku Atua ne eke mo hoana mitaki ha Isaako ti fakamooli e vala he fakatokaaga a Iehova ke matutaki e tega a Aperahamo. (Kene. 22:18; 24:12-14, 67) Kua nakai lata ia tautolu ke fakaoti mai he mena nei ko e tagata liga manamanatu mitaki a ia ne kua eke mo tagata ne lali ke fakatū e loto fakavihi. He kau fakalatahaaga he magahala nei, tokologa ne taute e fifiliaga ni ha lautolu ke he hoa mau. Mooli, kua nakai taute e tau fakamauaga he lagi, ka e takitaki he Atua e tau Kerisiano he mena nei mo e falu vala foki he moui ka liogi a lautolu ma e takitakiaga mo e takitaki he agaaga haana.—Kala. 5:18, 25.
4, 5. Ko e heigoa ne fakalagalaga a koe kua fai logonaaga uho e Sulamita mo e leveki mamoe ko e taha ke he taha?
4 Ko e tama fifine fulufuluola Sulamita i Isaraela i tuai ne nakai manako ke he tau kapitiga haana ke peehi a ia ke eke mo taha he tau hoana tokologa he Patuiki ko Solomona. Ne pehē a ia: “Ko e tau tama fifine a Ierusalema na e kua pehe atu au kia omonuo mai a mutolu, ke aua neke fakalagalaga e mutolu, po ke fafagu e mutolu haku a fakahele ato loto a ia ki ai.” (Lo. a Solo. 8:4) Ko e Sulamita mo e leveki mamoe ne fai logonaaga uho ke he taha ke he taha. He fakatokolalo ai, ne pehē a ia: “Ko au ko e fiti lakau i Sarona; ko e susana he pahua.” Ae, ka e tali he leveki mamoe: “Tuga ne susana ke he vaha he tau akau talatala kua pihia haku a kapitiga ke he vaha loto he tau tama fifine”! (Lo. a Solo. 2:1, 2) Ne fefakaalofaaki mooli a laua ko e taha ke he taha.
5 Ha ko e Sulamita mo e leveki mamoe ne fakaalofa lahi mahaki ke he Atua, ko e pipiaga he fakamauaga ha laua to malolō mooli. Ne tala age e Sulamita ke he leveki mamoe fakahele haana: “Kia tuku e koe au po ke fakamau fakamailoga ke he hāu a loto, ke tuga ne fakamau fakamailoga ke he hāu a lima; ha ko e mena malolo e fakaalofa tuga ne mate; kua favale e ita-tafuā tuga ne tukuaga; ko e hana puho ko e puho he afi haia kua puho lahi mahaki ni. Nakai maeke ke he tau vai loga ke tamate e fakaalofa, nakai maeke ke tafia ai he tau vailele. Ane mai kua ta age he tagata e tau koloa oti he hana fale kia ofania a ia po kua vihiatia ni.” (Lo. a Solo. 8:6, 7) He manamanatu ke he fakamauaga, kua lata he ha e fekafekau ha Iehova ke nakai uta noa ni ha mena?
KO E FIFILIAGA KUA AOGA KE HE ATUA
6, 7. Iloa fēfē e tautolu kua fai logonaaga e Atua ke he fifiliaga ha tautolu ke he hoa mau?
6 Ne fai logonaaga a Iehova ke he haau a fifiliaga he hoa mau. Ke lata mo e tau tagata Kanana, ne poaki ke he tau Isaraela: “Aua neke fakafetauaki a mutolu mo lautolu, aua neke ta age hau a tama fifine ma e hana tama tane, aua foki neke ta mai hana tama fifine mo e hau a tama tane; Ha ko e mena uhu kehe ai e ia hau a tama tane ke ua mui mai a ia kia au, ka e fekafekau ai ke he tau atua kehe; ti tupu ai e ita a Iehova kia mutolu, ti fakaotioti vave ai a koe.” (Teu. 7:3, 4) Fai senetenari he mole, ne fakapuloa he ekepoa ko Esera: “Ko mutolu kua hala a mutolu, mo e fai hoana a mutolu ke he tau fifine he tau motu kehe ke lafi ai ke he hala a Isaraela.” (Esera 10:10) Ti tala age he aposetolo ko Paulo ke he tau matakainaga Kerisiano: “Kua lili e fifine ke he fakatufono he moui hana tane; kaeke kua mate hana tane, ti toka noa ai a ia ke fakalataha mo e tane kua loto ki ai, ka kia lata mo e Iki.”—1 Kori. 7:39.
7 Ka mau he fekafekau tukulele ha Iehova e tagata nakai tua, to eke e mena nei mo nakai omaoma ke he Atua. Ko e tau Isaraela he vahā a Esera ne nakai mahani fakamooli he ‘fai hoana ke he tau fifine he tau motu kehe,’ ti kua hehē ke lali ke tanumia e tau talahauaga maaliali he tau Tohiaga Tapu. (Esera 10:10; 2 Kori. 6:14, 15) Ko e Kerisiano ne mau ke he tagata nakai tua kua nakai fakafifitaki mitaki ti nakai loto fakaaue mooli ke he mena fakaalofa he Atua he fakamauaga. He fakalataha he mole e papatiso ka lauia e falu matagahua haana he haia mo e tau tagata he Atua. Ti nakai tonu ke amanaki ke he tau monuina ka e ole he liogi, ‘Iehova, kua liuliu pauaki au ki a koe ka e fakamolemole fakamonuina mai au.’
ILOA LAHI MAHAKI E MATUA HA TAUTOLU HE LAGI
8. Fakamaama e kakano kua lata ia tautolu ke muitua ke he takitakiaga he Atua ke he fakamauaga.
8 Ko ia ne taute e matini kua iloa tonu e puhala kua gahuahua ai. Ka lata e matini ke fakatūtū, maeke a ia ke foaki e tau vala tala kua latatonu hagaao ki ai. Ka e kua ka fakaheu e tautolu e tau fakaakoaga mo e fakatūtū ni e tautolu e tau valavala ke he puhala ni ha tautolu? Ko e tau fua kua tuga ke kelea lahi mahaki—kaeke ke gahua e matini. Ka fakamooli e tautolu e manako ma e fakamauaga fiafia, kua latatonu ia tautolu ke muitua ke he tau fakaakoaga ne foaki e Iehova, ko e Fakatokaaga he fakamauaga.
9. Ko e ha ka pehē a tautolu kua maama e Iehova e tau logonaaga matimati ti pihia mo e fiafia he fakamauaga?
9 Kua iloa e Iehova e tau mena oti ke maeke ia tautolu ke iloa hagaao ke he tau tagata mo e fakamauaga. Ne tuku e Ia e manako mahani fakataane mo e fifine he tau tagata ke maeke ia lautolu ke ‘fanau mo e fakatokologa.’ (Kene. 1:28) Kua maama he Atua e tau logonaaga matimati, ato tufuga e ia e fifine fakamua, pehē a ia: “Kua nakai mitaki ke tokotaha e tagata; to eke e au māna e lagomatai ke lata mo ia.” (Kene. 2:18) Kua mailoga katoatoa e Iehova e olioli he pipiaga he fakamauaga.—Totou Tau Fakatai 5:15-18.
10. Ko e heigoa e tau puhala kua lata ke puipui e tau fakafetuiaga tata lahi he tau hoa mau Kerisiano?
10 Ha ko e agahala mo e nakai mitaki katoatoa ne fakaholo age ke he tau lanu tagata ha kua agahala a Atamu, nakai fai fakamauaga he vahā nei ne mitaki katoatoa. Ka ke he tau fekafekau a Iehova, ko e fakamauaga ka fua mai e fiafia mooli kaeke ke muitua ke he Kupu he Atua. Tuga anei, manamanatu ke he fakatonuaga mahino ha Paulo ke he tau fakafetuiaga tata he fakamauaga. (Totou 1 Korinito 7:1-5.) Nakai mai he Tohi Tapu ke lata e tau hoa mau ke fakakaupā ni e tau fakafetuiaga mahani fakataane mo e fifine ke lali ke fanafanau. Ko e fakafetuiaga pihia ka tonuhia ke fakapuke e tau manako he logonaaga mo e he tino. Ka ko e tau mahani fakalialia kua nakai fakafiafia mooli e Atua. Ko e tau taane mo e tau hoana Kerisiano to manako mooli ke taute e vala aoga nei he tau momoui ha laua mo e logonaaga fakaalofa, he fakaatā a laua ke fakakite e fakaalofa hofihofi noa ki a laua ni. Ti mooli, kua lata a laua ke kalo he tau gahua ka nakai fakafiafia a Iehova.
11. Fakamonuina fēfē a Ruta he taute e tau mena he puhala a Iehova?
11 Kua lata e fakamauaga ke puke he olioli, nakai he momoko mo e fakaatukehe. Mua atu kua lata he kaina Kerisiano ke eke mo matakavi okioki mitaki mo e mafola. Manamanatu la ke he mena ne tupu he 3,000 tau kua mole he ha ha i ai e takape fuakau ko Naumi mo e haana a tau figona takape ko Orepa mo Ruta, ne o atu he puhala tū mai Moapi ki Iuta. Ne tomatoma e Naumi e tau fifine fuata ke liliu ke he tau tagata ha laua. Ko e fifine Moapi ko Ruta ne pipiki mau ki a Naumi, ne tua ke he Atua mooli, ti fakamafana ki ai e ‘palepale lahi mai ia Iehova kua hau ai a ia ke malu ai ki lalo hana tau tapakau.’ (Ruta 1:9; 2:12) Mo e loto fakaaue lahi ma e mena fakaalofa he Atua he fakamauaga, ne eke a Ruta mo hoana he motua ko Poasa, ko e tagata tapuaki mooli ha Iehova. He fakaliu tu mai ke he lalolagi he lalolagi foou he Atua, to fiafia a ia ke iloa ko ia e tupuna fifine ha Iesu Keriso. (Mata. 1:1, 5, 6; Luka 3:23, 32) Ko e tau monuina mooli ne moua e ia he taute e tau mena he puhala a Iehova!
FAKATONUAGA AOGA KE KAUTŪ E FAKAMAUAGA
12. Moua he tagata i fe e fakatonuaga mooli ke he fakamauaga?
12 Kua talahau he Fakatokaaga he fakamauaga ki a tautolu e mena kua lata ia tautolu ke iloa hagaao ke he fakamauaga kua kautū. Nakai fai tagata kua iloa lahi. Hako tumau e Tohi Tapu, ti ko e puhala ni ma e ha tagata ke hagaaki ke he fakatonuaga aoga he fakamauaga ka pipiki ke he tau poakiaga ne fakatoka he Tau Tohiaga Tapu. Tuga anei, ko e aposetolo ko Paulo ne tohi i lalo he agaaga: “Kia takitokotaha a mutolu gotoa mo e fakaalofa atu ke he hana hoana, tuga e fakaalofa a ia kia ia ni; ka ko e fifine kia fakalilifu a ia ke he hana tane.” (Efeso 5:33) Nakai fai mena hagaao ke he fakatonuaga faka-Tohi Tapu kua nakai maama he tau Kerisiano fakaagaaga. Ko e hūhū, To fakagahua nakai e lautolu e Kupu ha Iehova? To maeke a lautolu ka loto fakaaue mooli e lautolu e mena fakaalofa ko e fakamauaga.a
13. Ko e heigoa ne liga fua mai he kaumahala ke muitua e fakatonuaga ne moua ia 1 Peteru 3:7?
13 Ko e taane Kerisiano kua lata ke fehagai fakaalofa mo e hoana haana. Ko e aposetolo ko Peteru ne tohi: “Kia pihia foki a mutolu ko e tau tane, kia nonofo fakalataha mo lautolu mo e iloilo, kia fakalilifu ke he hoana, ha ko e kapiniu a ia kua mua he lolelole kia koe, ha kua eke foki mo tau hakeaga fakalataha ke he moui kua foaki noa mai, neke fakalavelave ha mutolu a tau liogi.” (1 Pete. 3:7) Ko e tau liogi he taane ka fakatauhele kaeke kua nakai fakagahua e ia e fakatonuaga a Iehova. Ko e tuaga fakaagaaga he tau hoa tokoua kua liga lauia kelea lahi, ti liga takitaki ke he fakaatukehe lahi, taufetoko, mo e tau mahani vale.
14. Ko e heigoa e fakaohoohoaga he hoana fakaalofa ke he moui magafaoa haana?
14 Ko e hoana kua takitaki he Kupu ha Iehova mo e agaaga tapu haana ka lahi mahaki e mena ke taute e kaina haana ke milino mo e fiafia. Ko e aga pauaki ma e taane matakutaku Atua ke ofania e hoana haana mo e puipui a ia fakatino mo e fakaagaaga. Kua manako lahi a ia ke he fakaalofa he taane haana ti lata a ia ke fakaalofa age ki ai. ‘Ko e fifine iloilo ne takitaha mo e ati hake hana fale,’ he ui he Tau Fakatai 14:1, “ka ko e fifine goagoa kua ulu moumou ai ke he hana tau lima.” Ko e hoana pulotu mo e fakaalofa kua lafi lahi ke he kautū mo e fiafia he magafaoa haana. Kua fakakite foki e ia kua loto fakaaue a ia ke he mena fakaalofa he Atua he fakamauaga.
15. Ko e heigoa e fakatonuaga ia Efeso 5:22-25?
15 Ko e tau taane mo e tau hoana kua fakavē e fakalatahaaga ha lautolu ke he fifitakiaga ha Iesu he fehagai mo e fakapotopotoaga kua fakakite e fakaaue ke he mena fakaalofa he Atua he fakamauaga. (Totou Efeso 5:22-25.) Ko e heigoa e tau monuina kua olioli he tau hoa ka fefakaalofaaki a laua ki a laua ti nakai fakaatā e fakatokoluga, mahani tama tote he fakanonoiki, po ke falu he tau aga nakai faka-Kerisiano ke fakakelea aki e fakamauaga ha laua!
AUA NEKE VEVEHE HE TAHA TAGATA A LAUA
16. Ko e ha e falu he tau Kerisiano ne fakatumau ke nofo tokotaha?
16 Pete ne laulahi he tau tagata ne pulega ke mau he taha magaaho he moui, falu he tau fekafekau ha Iehova kua fakatumau ke nonofo takitokotaha ha kua nakai moua e hoa kua fiafia a lautolu ki ai mo e ki a Iehova. Falu ne moua e mena fakaalofa he nofo tokotaha ne foaki he Atua, he fakaatā a lautolu ke foaki e lautolu a lautolu ke he fekafekauaga ha Iehova mo e nakai fakatauhele he fakamauaga. Mooli, ko e nofo tokotaha kua lata ke fiafia ke he fakakaupāaga ne fakatoka e Iehova.—Mata. 19:10-12; 1 Kori. 7:1, 6, 7, 17.
17. (a) Ko e heigoa e tau kupu ha Iesu hagaao ke he fakamauaga kua lata ia tautolu ke tokaloto? (e) Ko e ha Kerisiano kua kamata foki ke manako ke he hoa mau he taha tagata, ko e heigoa haana kua lata ke taute fakamafiti?
17 He nofo tokotaha po ke mau, igatia a tautolu mo e lata ke tokaloto e tau kupu a Iesu: “Nakai kia totou e mutolu, ko ia [Atua] ne eke e tagata ke he kamataaga, ne eke e ia a laua ko e tane mo e fifine, Mo e pehe mai a ia, Ko e mena ia ke toka ai he tane hana matua tane mo e hana matua fifine, ka e fakalataha mo e hana hoana; ati eke ai a laua mo tino taha? Haia kua nakai tuai tokoua, ka kua tino taha na laua; hanai, ko ia kua fakalataha he Atua, aua neke vevehe he taha tagata.” (Mata. 19:4-6) Ko e manako ke he hoa mau he taha tagata ko e agahala. (Teu. 5:21) Ka fai Kerisiano kua kamata ke manamanatu ke he manako lotokai pihia, kua lata a ia ke utakehe mafiti e manako nakai meā ia, pete ni ka mamahi lahi e logonaaga he fakaatā e tau manako lotokai ke tupu. (Mata. 5:27-30) Lata ke fakahako ai e manatu ia ti tiaki e manako agahala he loto fakavai.—Iere. 17:9.
18. Fēfē e logonaaga haau kua lata ia tautolu ke onoono ke he mena fakaalofa he Atua he fakamauaga?
18 Pete he tokologa a lautolu kua iloa tote po ke nakai iloa hagaao ki a Iehova ko e Atua mo e mena fakaalofa homo ue atu he fakamauaga ne fai fakaaue he fakakite e pipiaga he fakamauaga. Lahi fēfē e mena kua lata ia tautolu ne tukulele ke he ‘Atua fiafia,’ ko Iehova, ke fiafia ke he tau foakiaga oti haana ti fakakite e loto fakaaue mooli ha tautolu ke he mena fakaalofa he Atua he fakamauaga!—1 Timo. 1:11.
[Matahui Tala]
a Ma e tau fakatutalaaga fakamatafeiga he fakamauaga, kikite e tohi “Keep Yourselves in God’s Love” he veveheaga 10 mo e 11.
[Blurb he lau 6]
Ko e fakamauaga mitaki kua fakalilifu a Iehova mo e tamai e fiafia lahi ke he tau tagata oti he magafaoa
[Fakatino he lau 5]
Fakakite e Ruta e loto fakaaue ma e mena fakaalofa he Atua he fakamauaga
[Fakatino he lau 7]
Fakakite nakai e koe e loto fakaaue mooli ke he mena fakaalofa he Atua he fakamauaga?