Ko e Ha kua Lata ke Tuku Fakamua e Fekafekauaga ha Iehova?

“To tokutoku atu haku a gutu e tututonu hāu, ko e fakamouiaga mai ia koe ke he aho oti.”—SALA. 71:15.

TO TALI FĒFĒ E KOE?

Ko e heigoa e tau puhala ne fifili aki e puhala moui ha Noa, Mose, Ieremia, mo Paulo?

Ko e heigoa e kumikumiaga he vala haau ka fifili e puhala kua fakaaoga e koe e moui haau?

Ko e ha ne fifili a koe ke tuku fakamua e fekafekauaga ha Iehova?

1, 2. (a) Ko e heigoa ne fakakite he fakatapuaga he tagata ki a Iehova? (e) Maeke fēfē a tautolu ke aoga mai he manamanatu ke he tau fifiliaga ne taute e Noa, Mose, Ieremia, mo Paulo?

KAEKE ko koe ko e tutaki kua fakatapu mo e papatiso ha Iesu, kua taute e koe e lakaaga uho lahi mahaki. Ko e haau a fakatapuaga ke he Atua ko e fifiliaga uho lahi mahaki kua maeke fakatagata ia koe ke taute. Kua tuga na pehē a koe: ‘Iehova, manako au ki a koe ke eke mo Iki haaku he tau puhala oti he moui haaku. Ko au ko e fekafekau haau. Manako au ki a koe ke fifili e puhala kua lata ia au ke fakaaoga e magaaho haaku, tau mena kua lata ke tuku fakamua e au, mo e puhala kua lata ia au ke fakaaoga e tau koloa mo e tau iloilo haaku.’

² Kaeke ko koe e Kerisiano fakatapu, ko e mena anei kua mavehe e koe ki a Iehova. Kua nava atu ki a koe ke he fifiliaga haau; ko e mena hako mo e pulotu ke taute. Ka e kua he mailoga e koe ko Iehova e Iki haau kua hagaao ke he puhala kua fakaaoga e koe e magaaho haau? Ko e fakafifitakiaga ha Noa, Mose, Ieremia, mo e aposetolo ko Paulo ka lagomatai a tautolu ke kumikumi e hūhū ia. Ko lautolu takitaha ia ko e tau fekafekau loto katoa ha Iehova. Ko e tuaga ha tautolu kua tuga ha lautolu. Ko e tau fifiliaga ha lautolu ne taute hagaao ke he tau tutuliaga kua mua e aoga ka fakamalolō a tautolu ke kumikumi e puhala kua fakaaoga ha tautolu a tau magaaho.—Mata. 28:19, 20; 2 Timo. 3:1.

ATO HOKO E FAKAPUKEAGA

3. Maeke fēfē e tau aho ha tautolu ke tuga ha Noa?

³ Ne fakatatai e Iesu e vahā ha Noa mo e ha tautolu. “Tuga e vaha kia Noa, to eke pihia foki ka hau e Tama he tagata,” he ui e ia. “Ne kai a lautolu mo e inu, ti fai hoana a lautolu mo e fakafaitane, kua hoko ni ke he aho ne hu atu ai a Noa ke he vaka, Ti nakai [fakateliga a] lautolu ato hoko mai e fakapuke, mo e uta kehe a lautolu oti.” (Mata. 24:37-39) Laulahi he tau tagata he vahā nei ne momoui ni ma lautolu ka e nakai mailoga e mafiti he vahā ha tautolu. Ne nakai fakateliga a lautolu ke he tau hatakiaga ne fakailoa he tau fekafekau he Atua. Tokologa ne vaiga foki ke he manatu to fakalago mai e Atua ke he tau mena he tagata—tuga ni e tau tagata he vahā a Noa. (2 Pete. 3:3-7) Ka e he takatakaiaga vale ia, fakaaoga fēfē e Noa e magaaho haana?

4. Fakaaoga fēfē e Noa e magaaho haana he mole e moua e ia e poakiaga mai ia Iehova, ti ko e ha?

⁴ He mole e tala age e tau amaamanakiaga he Atua mo e moua e poakiaga haana, ne tā e Noa e vaka ke fakahao aki e tau tagata mo e tau manu. (Kene. 6:13, 14, 22) Ne fakailoa foki e Noa e fakafiliaga ha Iehova ne tata mai. Ne fakahigoa he aposetolo ko Peteru a ia “ko e ogo he tututonu,” he fakakite kua eketaha a Noa ke lagomatai e tau katofia haana ke loto fakaaue ke he hokulo he tuaga ha lautolu. (Totou 2 Peteru 2:5.) Manatu nakai a koe to lotomatala a Noa mo e magafaoa haana ke hagaaki ke he tau laliaga ha lautolu ke fakatū gahua, mahomo hake ke he falu ne ha ha mo lautolu, po ke moua e puhala moui hagahaga mitaki? Nakai pihia! He iloa tuai e mena ne fakatoka i mua, ne kalo kehe a lautolu he tau fakatauhele pihia.

KO E TAU FIFILIAGA HE TAMA TAANE PATUIKI AIKUPITO

5, 6. (a) Ko e fakaakoaga ne moua e Mose kua liga kakano ke tauteute a ia ma e heigoa? (e) Ko e ha ne fakaheu e Mose e tau foakiaga ki a ia i Aikupito?

⁵ Matutaki atu, kia kitekite a tautolu ke he fifitakiaga ha Mose. Ne feaki hake a ia he fale patuiki Aikupito ko e tama hiki he tama fifine ha Farao. Ha ko e tama taane patuiki, ne fakaako a ia ke he “iloilo oti ni he tau tagata Aikupito.” (Gahua 7:22; Esoto 2:9, 10) Ko e fakaakoaga nei ne tuga kua fakatoka ke tauteute a ia ma e matagahua he fale ha Farao. Na kua talahaua a ia he fakatufono malolō lahi he magahala ia, he moua e tau monuina, tau kotofaaga, mo e tau fiafia ne maeke a ia ke moua he tuaga pihia. Ka ko e fiafia kia ke he tau mena nei e foliaga ha Mose?

⁶ Ha ko e fakamahani kua moua e ia mai he tau matua mooli haana he tote a ia, kua liga iloa e Mose e mena ne mavehe e Iehova ke he haana tau tupuna ko Aperahamo, Isaako, mo Iakopo. Ne fakagahua e Mose e tua ke he tau maveheaga ia. Kua liga manamanatu fakamitaki a ia ke he haana vahā anoiha mo e haana mahani fakamooli ki a Iehova. Ti ko e magaaho ke fifili ke eke mo tama taane patuiki a Aikupito po ke fekafekau Isaraela, ko e heigoa ne fifili e ia? Ne fifili a Mose ke “matematekelea fakalataha mo e tau tagata he Atua, ka e nakai ko e fiafia ke he hala kua mole vave.” (Totou Heperu 11:24-26.) Fakahiku, ne muitua a ia ke he takitakiaga ha Iehova ke he puhala kua lata a ia ke fakaaoga e moui haana. (Esoto 3:2, 6-10) Ko e ha ne taute e Mose e mena ia? Ha kua talitonu a ia ke he tau maveheaga he Atua. Ne fakahiku e ia kua nakai fai amaamanakiaga ma haana i Aikupito. Mooli, ko e motu ia ne nakai leva he mogo fakamui ti pehia he tau malaia hogofulu mai he Atua. Kitia nakai e koe e fakaakoaga he mena nei ma lautolu kua fakatapu ki a Iehova he vahā nei? He nakai hagaaki ke he gahua po ke tau fakafiafiaaga he fakatokaaga nei, ko e hagaaki ha tautolu kua lata ki a Iehova mo e haana fekafekauaga.

ILOA E IEREMIA E MENA KA HOKO MAI

7. Maeke fēfē e tuaga ha Ieremia ke tuga ha tautolu?

⁷ Ko e taha tagata foki ne tuku fakamua e fekafekauaga ha Iehova ko e perofeta ko Ieremia. Ne poaki a Iehova ki a Ieremia ko e haana perofeta ke fakamatala e fekau he fakafiliaga ki a Ierusalema mo Iuta ne tiaki taofiaga. He puhala, ne moui a Ieremia “ke he tau aho a mui.” (Iere. 23:19, 20) Ne iloa mitaki e ia ko e fakatokaaga ne moui a ia to nakai tumau ai.

8, 9. (a) Ko e ha kua lata e manamanatuaga ha Paruka ke fakahako? (e) Ko e heigoa kua lata ke manatu e tautolu ka taute e tau pulega?

⁸ Ko e heigoa e fakahikuaga hako he tau fifiliaga ha Ieremia? Ne nakai lali a ia ke atihake e vahā anoiha haana ke he fakatokaaga malaia na. Ke he puhala fe ka taute pihia ai? Pete ia, fai magaaho e tohikupu ha Ieremia ko Paruka ne nakai kitia maaliali ke he tau mena. Ti fakalagalaga he Atua a Ieremia ke tala age ke he tohikupu haana: “Kitiala, ko e mena ne ati hake e au, to ulu e au ki lalo, ko e mena foki ne to e au, to taaki ai e au; ko e motu oti nai haia. Ko koe foki, kua kumi kia e koe e tau mena lalahi māu? Aua neke kumi; ha ko e mena kitiala, to fakahoko e au e malaia ki luga he tau tagata oti, . . . ka to ta atu e au hau a moui kia koe, ke eke mo mena ne moua he tau ke he tau mena oti ke fano a koe ki ai.”—Iere. 45:4, 5.

⁹ Nakai maeke a tautolu ke iloa e “tau mena lalahi” ne foli a Paruka ki ai.a Ka e iloa e tautolu, ko e tau mena ne nakai fai amaamanakiaga i ai, ko e tau mena ka moumou he mogo ka kautū a Papelonia ki a Ierusalema he 607 F.V.N. Kitia nakai e koe he mena ia e fakaakoaga ma tautolu? He moua e moui hagahaga mitaki kua lata ke taute e tautolu e falu fakatokaaga ma e vahā anoiha. (Fakatai 6:6-11) Ka e pulotu fēfē ke foaki fakalahi e magaaho mo e malolō ke he tau tutuliaga kua nakai fai aoga tukulagi? Mooli, kua matutaki e fakatokatokaaga a Iehova ke pulega ke lata ma e tau Fale he Kautu foou, tau fale he la, mo e falu matagahua fakateokarasi. Ka ko e tau laliaga nei kua ha ha i ai e vahā anoiha ha ko e foliaga ha lautolu ko e fakaholo ki mua e tau mena he Kautu. To latatonu ai ma e tau tagata fakatapu oti ha Iehova ke fakatoka e tau mena pihia kua mua e aoga ka taute e lautolu e tau pulega ha lautolu. Kua talitonu mooli nakai a koe ke he loto haau ko koe hane “kumikumi fakamua . . . ke he kautu mo e hana [Iehova] tututonu”?—Mata. 6:33.

“KUA MANATU FOKI AU KO E OTAOTA IA”

10, 11. (a) Ke he heigoa ne matapatu e tau laliaga ha Paulo ki ai fakamua to eke mo Kerisiano? (e) Ko e ha e foliaga ha Paulo ne hiki katoatoa ai?

¹⁰ Fakahiku ai, kia fakatutala a tautolu ke he fifitakiaga ha Paulo. Ato eke a ia mo Kerisiano, ne tuga kua haia ia ia e vahā mauokafua anoiha. Ne fakaako a ia ke he fakatufono Iutaia mo e taha he tau faiaoga talahaua lahi he vahā haana. Ne moua e ia e pule mai he ekepoa ne mua ha Iutaia. Ti kua lahi e holo ki mua haana faka-Iutaia ke he tokologa he tau hukui haana. (Gahua 9:1, 2; 22:3; 26:10; Kala. 1:13, 14) Ka kua hiki e tau mena oti ia he mogo ne mailoga e Paulo kua nakai liu a Iehova ke fakamonuina e motu ko Iuta.

¹¹ Ne mailoga e Paulo ko e matagahua haana he fakatokaaga Iutaia ne nakai fai aoga mai he tuaga ha Iehova; kua nakai fai vahā anoiha. (Mata. 24:2) Ko e Farasaio he mogo fakamua nei ne hokotia ke talahau kua fakatatai mo e haana maamaaga foou, he tau finagalo he Atua mo e lilifu he fekafekauaga Kerisiano, ko e mena ne manamanatu a ia he taha magahala kua aoga ne onoono a ia ki ai mogonei ko e “otaota.” Ne tiaki e Paulo e tau tutuliaga haana faka-Iutaia ti foaki e vala ne toe he tau aho haana he lalolagi ke fakamatala e tala mitaki.—Totou Filipi 3:4-8, 15; Gahua 9:15.

KUMIKUMI KE HE TAU MENA HAAU KUA MUA E AOGA

12. Ko e heigoa ne hagaaki a Iesu ki ai he mole e papatisoaga haana?

¹² Ko Noa, Mose, Ieremia, Paulo, mo e tokologa foki ne tuga a lautolu ne fakaaoga e laulahi he tau magaaho mo e tau malolō ha lautolu ke he tau tutuliaga fakateokarasi. Ko e tau fifitakiaga mitaki a lautolu ma tautolu. Mooli, ko ia ne mitaki lahi mahaki he tau fekafekau fakatapu ha Iehova ko Iesu. (1 Pete. 2:21) He mole e papatiso, ne foaki katoatoa e Iesu e vala ne toe he moui haana ke he lalolagi ke fakamatala e tala mitaki mo e fakalilifu a Iehova. Ko e fakahikuaga maaliali ma e Kerisiano kua mailoga a Iehova ko e Iki haana ko e fekafekau ki a Ia kua lata ke mua e aoga he moui haana. Ko e haau nakai? Ti maeke fēfē e tutuliaga he tau foliaga fakateokarasi ke fakatatai mo e tau matagahua he lalolagi kua lata?—Totou Salamo 71:15; 145:2.

13, 14. (a) Kua fakamalolō ke he tau Kerisiano fakatapu oti ke manamanatu ke he heigoa? (e) Ko e heigoa e makona ka fiafia he tau tagata he Atua?

¹³ He tau tau kua mole, ne fakatumau e fakatokatokaaga a Iehova ke fakamalolō e tau Kerisiano ke manamanatu he puhala liogi ko e maeke nakai a lautolu ke paionia. Ke he tau kakano loga, ko e tau tuaga he falu fekafekau tua fakamooli ha Iehova kua nakai fakaatā a lautolu ke foaki katoatoa ke he gahua fakamatala ne evalesi ke 70 e tulā he mahina. Nakai lata a lautolu ke fuafuakelea hagaao ke he mena nei. (1 Timo. 5:8) Ka e kua a koe? Uka lahi kia a koe ke paionia?

¹⁴ Liu manamanatu ke he fiafia ne moua he tau tagata tokologa he Atua he magahala he Fakamanatuaga ke he tau nei. Ia Mati, ko e foakiaga pauaki ne fakaatā e tau paionia fakakū ke fifili ke taute e lautolu 30 po ke 50 e tulā ke he gahua he fonua. (Sala. 110:3) Totou miliona ne fakalataha ke he gahua paionia fakakū, ti tuga na hakahakau e fakapotopotoaga he fiafia mo e olioli lahi mahaki. Maeke nakai a koe ke fakatokatoka e tau pulega haau ke maeke ke moua foki e fiafia taha ia? He matahiku he tau aho takitaha, kua foaki ke he Kerisiano fakatapu e makona lahi mahaki ke maeke ke talahau, “Iehova, kua taute e au e tau mena oti kua maeke ia au he fekafekauaga haau.”

15. Ko e heigoa e foliaga he Kerisiano fuata hagaao ke he fakaakoaga he lalolagi?

¹⁵ Ka teitei hoko atu a koe ke he fakaotiaga he aoga haau ne kua lata mo koe, ti liga tino malolō mo e nakai loga e tau matagahua haau. Kua manamanatu fakahokulo nakai a koe ke hū atu ke he gahua paionia tumau? Nakai fakauaua ai, ko e tau tagata fakatonutonu ne talitonu mooli kua mitaki lahi mahaki a koe ke foli atu ke he fakaakoaga tokoluga mo e ke fakatokatoka ma e gahua he lalolagi. Ka ko e mauokafua ha lautolu kua fakavē ke he fakatokaaga fakalalolagi mo e fakatupe ne nakai tumau e amaamanakiaga. He taha faahi, he tutuli e matagahua fakateokarasi, to foli mooli a koe ke he tau foliaga uho lahi mo e tukulagi. To muitua e koe e fifitakiaga mitaki lahi mahaki ha Iesu. Ko e fifiliaga pulotu pihia to fakafiafia a koe. To puipui ai a koe. Mo e to fakakite ai kua eketaha a koe ke moui fakatatau ke he fakatapuaga haau ki a Iehova.—Mata. 6:19-21; 1 Timo. 6:9-12.

16, 17. Ko e heigoa e tau hūhū kua lagā mai hagaao ke he gahua he lalolagi mo e falu tutuliaga foki?

¹⁶ Tokologa he tau fekafekau he Atua he vahā nei kua gahua loa ke leveki aki e tau momoui he tau magafaoa ha lautolu. Ka e gahua loloa e falu ke he mena kua nakai lata. (1 Timo. 6:8) Ko e lalolagi maukoloa kua lahi e mena ne taute ke fakalagalaga a tautolu kua lata ke moua tumau e tautolu e tau koloa loga mo e tau koloa foou oti he makete. Ka ko e tau Kerisiano mooli kua nakai manako ke he lalolagi ha Satani ke fifili e tau mena ne aoga lahi ki a lautolu. (1 Ioa. 2:15-17) Ma lautolu kua litaea mai he tau gahua tupe, ko e heigoa e puhala mitaki ke fakaaoga e tau magaaho ha lautolu ka ke he gahua paionia, he tuku fakamua e fekafekauaga ha Iehova?

¹⁷ Ko e tau fekafekau fakatapu oti ha Iehova ka hūhū hifo: Ko e heigoa e matapatu foliaga haaku he moui? Kua tuku fakamua nakai e au e tau mena he Kautu? Kua fifitaki nakai e au e aga foaki noa ha Iesu? Kua fiafia nakai au ke he fakatonuaga ha Iesu ke muitua tumau ki a ia? Maeke nakai au ke hiki e fakaholoaga haaku ke maeke ke foaki fakalahi e magaaho ke he gahua fakamatala he Kautu po ke falu tutuliaga fakateokarasi foki? Pete ne nakai maeke he tau tuaga haaku mogonei ke fakaatā au ke fakalaulahi e fekafekauaga haaku, kua matutaki nakai au ke feaki e aga foaki noa?

‘KE FINAGALO MO E GAHUA’

18, 19. Hagaao ke he heigoa e mena ka liogi a koe, ti ko e ha kua lata e ole pihia ke fakafiafia a Iehova?

¹⁸ Ko e fakamakutu he tau tagata he Atua ko e fiafia ke moua. Ka e, falu ne liga nakai manako pauaki ke paionia po ke latatonu ke taute—pete foki kua fakaatā ai he tau tuaga ha lautolu. (Esoto 4:10; Iere. 1:6) Ko e heigoa mogoia? Liga nakai kia ko e matakupu kua latatonu anei ma e liogi? Mooli. Ne tala age a Paulo ke he tau matakainaga talitonu ko Iehova ne “gahua ki loto ia mutolu ke tupu ai e loto ke he hana finagalo fakaalofa, kia gahua foki ki ai.” (Filipi 2:13) Ka nakai logona hifo e koe e hakahakau ke fakalaulahi e fekafekauaga haau, ole ki a Iehova ke foaki atu ki a koe e manako mo e lotomatala ke taute pihia.—2 Pete. 3:9, 11.

¹⁹ Ko Noa, Mose, Ieremia, Paulo, mo Iesu ko e tau tagata taane fakamooli oti. Ne fakaaoga e lautolu e tau magaaho mo e tau malolō ha lautolu ke fakailoa e fekau hataki ha Iehova. Ne nakai fakaatā e lautolu a lautolu ke fakatauhele. Ko e fakaotiaga he fakatokaaga nei kua tata lahi; ti ko tautolu oti kua fakatapu e tau momoui ha tautolu ke he Atua kua lata ke iloa tonu kua matutaki a tautolu ke taute e tau mena oti kua maeke ia tautolu ke mumuitua ke he tau fifitakiaga mitaki lahi he Tohi Tapu. (Mata. 24:42; 2 Timo. 2:15) He taute pihia, maeke a tautolu ke fakafiafia a Iehova mo e helehele e tau monuina loga haana.—Totou Malaki 3:10.

[Matahui Tala]

[Fakatino he lau 21]

Ne nakai fakateliga e tau tagata ke he hatakiaga ha Noa

[Fakatino he lau 24]

Kua manamanatu fakahokulo nakai a koe ke hū atu ke he gahua paionia tumau?