Totoko Malolō mo e Kalo Mai he Tau Matahele ha Satani!
“Totoko atu ke he tau lagatau he tiapolo.”—EFESO 6:11.
TO TALI FĒFĒ E KOE?
Maeke fēfē he fekafekau ha Iehova ke kalo kehe neke koto he matahele he velevelekoloa?
Ko e heigoa ka lagomatai e Kerisiano kua mau neke tō ke he luo he mahani faivao?
Ko e ha kua talitonu a koe kua aoga ke totoko atu ke he velevelekoloa mo e mahani feuaki?
1, 2. (a) Ko e ha ne nakai fai fakaalofa hofihofi noa a Satani ki a lautolu ne fakauku mo e ‘tau mamoe kehe’? (e) Ko e heigoa e tau matahele ha Satani ka fakatutala a tautolu ki ai he vala tala nei?
KO SATANI KO E TIAPOLO ne nakai fai fakaalofa hofihofi noa ke he tau tagata, mua atu ki a lautolu ne fekafekau ki a Iehova. Ne tau atu a Satani ki a lautolu ne fakauku kua toe. (Fakakite. 12:17) Ko e tau Kerisiano hakahakau ia ne fakamatapatu e gahua fakamatala he Kautu he vahā nei ti fakatapakupaku a Satani ko e pule he lalolagi nei. Nakai fai fakaalofa foki e Tiapolo ma e ‘tau mamoe kehe,’ ne lalago a lautolu ne fakauku ti fakatalitali ma e moui tukulagi—ko e amaamanakiaga ne nakai moua e Satani. (Ioane 10:16) Ati ita lahi mooli a ia! He ha ha ia tautolu e amaamanakiaga he lagi po ke amaamanakiaga he lalolagi, kua nakai fiafia mooli a Satani ke he tau momoui ha tautolu. Ko e foliaga haana ke taute a tautolu mo tau matafī haana.—1 Pete. 5:8.
2 Ke fakamooli e foliaga ha Satani, ne fakatoka e ia e tau matahele kehekehe. Ha kua maeke a ia ke ‘fakapouli e tau manatu’ he tau tagata nakai tua, ne nakai talia e lautolu e tala mitaki ti nakai kitia e tau matahele nei. Ka e hele foki he Tiapolo e falu ne talia e ogo he Kautu. (2 Kori. 4:3, 4) Ko e vala tala fakamua ne fakakite e puhala ka kalo kehe a tautolu he tolu e matahele a Satani: (1) tau vagahau nakai tautaofi, (2) matakutaku mo e peehiaga, mo e (3) molea e logonaaga agahala. Fakatutala la tautolu mogonei ke he puhala ka tumauokafua a tautolu ke he ua foki e matahele fakasatani—velevelekoloa mo e kamatamata ke mahani faivao.
VELEVELEKOLOA—MATAHELE NE FAKAAPITIA
3, 4. Liga maeke fēfē e tau fakaatukehe he lalolagi nei ke takitaki ke he velevelekoloa?
3 He taha he tau fakataiaga ha Iesu, ne talahau e ia e tega ne gana ke he tau vao mahukihuki. Ne fakakite e ia ko e tagata ne liga logona e kupu, “ka ko e fakaatukehe ke he tau mena he lalolagi nai, mo e fakavai he koloa, kua apitia ai e kupu, ti nakai fua mai ai.” (Mata. 13:22) E, ko e velevelekoloa ko e taha matahele ne fakaaoga he ha tautolu a fī ko Satani.
4 He tuku fakalataha, ne apitia e kupu ke he ua e puhala. Taha puhala ko e “fakaatukehe ke he tau mena he lalolagi nai.” He “tau aho uka” nei, to lahi e mena ka fakaatukehe aki a koe. (2 Timo. 3:1) He tauuka e tau koloa mo e holo ki mua e nakai fai gahua, to liga uka ia koe ke leveki e moui. Liga tupetupe foki a koe hagaao ke he vahā anoiha mo e manamanatu, ‘To lahi nakai e totogi haaku ka mole e okioki gahua haaku?’ Ha ko e fakaatukehe pihia, falu ne takitaki ke tutuli e tau monuina, he manamanatu ko e tupe ke moua e haohao mitaki.
5. He puhala fe ka fakavaia e “tau koloa”?
5 Ne tutala a Iesu ke he taha puhala foki—ko e “fakavai he koloa.” Ko e vala ia ne fakalataha mo e fakaatukehe ka fakaapitia e kupu. Fakakite he Tohi Tapu ko e “tau tupe mo mena ke malu ai.” (Fakama. 7:12) Ka ko e tutuli he tau koloa kua nakai pulotu. Tokologa ne taufetului a lautolu ke moua e tau koloa, kua hele he velevelekoloa lahi a lautolu. Falu ne fakatupa foki ke he tau koloa.—Mata. 6:24.
6, 7. (a) Maeke fēfē he velevelekoloa ke hagahaga kelea he mena ne gahua e tagata? (e) Ko e heigoa e tau tupetupe kua lata he Kerisiano ke manamanatu ka ha ha i ai e gahua loa ne foaki age ki a ia?
6 Ko e manako ke he tau koloa ka liga kamata mitaki. Ma e fakatai, manamanatu ke he tuaga nei. Fina atu e takitaki gahua haau ki a koe ti pehē: “Fai tala mitaki au! Kua moua he kamupanī e konotuleke makimaki. Kakano e mena nei ke gahua loa ke he laulahi he tau magaaho he tau mahina gahoa i mua. Ka e fakamafana e au a koe to lahi e totogi haau ka moua.” To fēfē e tali haau ke he foakiaga ia? Mooli, ko e manako ke leveki fakatino e magafaoa haau ko e matagahua uho lahi, ka e nakai ko e matagahua naia haau. (1 Timo. 5:8) Ha ha i ai foki e falu tupetupe haau ka manamanatu ki ai. Lahi fēfē e gahua loa ka putoia? To fakatauhele kia he gahua tupe haau e tau matagahua fakaagaaga haau, putoia e tau feleveiaaga he fakapotopotoaga mo e haau a Tapuakiaga Magafaoa he afiafi?
7 He fuafua e fifiliaga haau, ko e heigoa kua manamanatu a koe kua aoga lahi—lauia fēfē e pege haau ha ko e gahua loa po ke liga lauia fēfē e tuaga fakaagaaga haau? To fakatupu kia he makai ke loga e tupe a koe ke oti e tuku fakamua e tau mena he Kautu he moui? Maeke nakai a koe ke kitia e velevelekoloa ka lauia a koe kaeke ke fakaheu e koe e tuaga he malolō fakaagaaga haau mo e magafaoa haau? Ka tupu e mena ia ki a koe he magaaho tonu nei, maeke fēfē a koe ke mauokafua mo e kalo kehe he apitia he velevelekoloa?—Totou 1 Timoteo 6:9, 10.
8. He manamanatu ke he tau fakataiaga fe he Tohi Tapu ka lagomatai a tautolu ke liu kitekite ke he tau puhala moui ha tautolu?
8 Ke kalo kehe mai he kototia he velevelekoloa, liu kitekite ke he puhala moui haau. To nakai manako a koe ke tuga a Esau, ne fakakite e tau gahua haana kua vihiatia e ia e tau mena fakaagaaga! (Kene. 25:34; Hepe. 12:16) Mooli kua nakai lata a koe ke tuga e tagata maukoloa ne uiina ke fakafua e tau koloa haana, age ke he tau tagata nonofogati, mo e mui atu ki a Iesu. He nakai taute pihia, ne “fano kehe ai [e tagata] mo e momoko, ha ko e tagata muhukoloa a ia.” (Mata. 19:21, 22) He hele he maukoloa, ne galo he tagata e lilifu lahi—ke mui ke he tagata ne mua ue atu ne moui! Kia fakaeneene ke nakai galo e lilifu he eke mo tutaki ha Iesu Keriso.
9, 10. Ko e heigoa haau ka talahau ko e onoonoaga he Tohi Tapu ke he tau koloa fakatino?
9 Ke fehagai mo e tau tupetupe nakai aoga hagaao ke he tau koloa he tino, kia muitua e tomatomaaga ha Iesu: “Aua neke fakaatukehe a mutolu, mo e pehe age, To kai e tautolu ha ha, po ke inu e tautolu ha ha, po ke tapulu a tautolu ha ha? Ha ko e tau mena oti ia kua kumi he tau motu kehe. Ha ko e mena fioia he Matua ha mutolu ha ha he lagi kua aoga e tau mena oti ia kia mutolu.”—Mata. 6:31, 32; Luka 21:34, 35.
10 He nakai mokulu ke he fakavaia he tau koloa, eketaha ke moua e manatu he tagata tohia Tohi Tapu ko Akuru, ne pehē: “Aua neke foaki mai e koe kia au e nofogati po ke muhu mena; kia fagai e koe au ke he tau mena kai kua lata mo au.” (Fakatai 30:8) Maaliali ai, ne maama e Akuru e puipuiaga uho he tupe ti pihia mo e fakavai he koloa. He mailoga e tau fakaatukehe he lalolagi nei mo e fakavai he koloa ka fua mai e moumouaga fakaagaaga. Ko e tupetupe ke he tau koloa fakatino ka fofō e magaaho haau, utakehe e malolō haau, ti foaki ki a koe tote po ke nakai fai fakaohoohoaga ke foli ke he tau mena he Kautu. Ko e mena ia, kia eketaha a koe ke nakai koto he matahele a Satani he velevelekoloa!—Totou Heperu 13:5.
FAIVAO—KO E LUO FUFŪ FAKAILOILO
11, 12. Maeke fēfē e Kerisiano ke lauia he mahani faivao ke he gahuaaga haana?
11 Ko e tau tagata takafaga ne manako ke moua e manu malolō ne liga aku hake e luo he puhala ne fa fano ai e matafī. Ko e luo ne fa uufi aki e tau kākau ikiiki mo e kelekele. Taha he tau kamatamata kautū lahi ha Satani ne tuga e vahega matahele ia. Ko e agahala he mahani faivao. (Fakatai 22:14; 23:27) Tokologa e Kerisiano ne mokulu ke he luo ia he fakaatā e lautolu a lautolu ke he tau tuaga ne kua mukamuka lahi ke fakahui. Falu Kerisiano ne mau kua mokulu ke he mahani faivao he mole e fakatū e fakafetuiaga lotofakavihi nakai tonu.
12 Ko e fakafetuiaga lotofakavihi nakai tonu ka tupu he matakavi ne gahua a koe. Fakakite he kumikumiaga gahua kua molea e hafa he tau fifine ne faivao mo e teitei 3 mai he 4 e tagata taane ne faivao ne fai fakafetuiaga faivao mo e kapitiga gahua. Ko e gahua tupe haau kia kua lata ke fakalataha mo e tau tagata ne nakai ko e hoa mau haau? Ka pihia, ko e heigoa e tuaga he fakafetuiaga haau mo lautolu? Fai fakakaupāaga nakai a koe he matakavi kua fakatoka pauaki ke he gahua mo e nakai fakaatā ai ke fai mena foki? Ma e fakatai, he mole e tau fakatutala noa tumau mo e tagata taane gahua, ko e matakainaga fifine Kerisiano kua liga tutala ki a ia, ti tala age foki ki a ia e tau lekua he fakamauaga haana. He taha tuaga foki, he mole e fakakapitiga mo e fifine ne gahua, kua liga fakakakano he tagata taane Kerisiano: “Kua aoga e manatu haaku ki a ia mo e fanogonogo mooli a ia he tutala au ki a ia. Ti loto fakaaue e ia au. Manako au ke taute pihia foki au i kaina!” Maeke nakai a koe ke kitia e tau Kerisiano he tau tuaga pihia ka mukamuka ke taute e mahani faivao?
13. Maeke fēfē ke tupu e fakafetuiaga lotofakavihi nakai tonu i loto he fakapotopotoaga?
13 Ko e fakafetuiaga lotofakavihi nakai tonu kua maeke ke tupu i loto he fakapotopotoaga. Manamanatu ke he fakataiaga mooli nei. Ko Daniel mo e haana hoana ko Sarah,a ko e tau paionia tumau. Ko Daniel foki “ko e motua ne talia tumau,” he ui ai e ia. Ne talia fiafia e ia e tau matagahua oti ne age ki a ia. Ko e vala he fekafekauaga haana, ne taute e Daniel lima e fakaako Tohi Tapu mo e tau tagata taane fuata—tokotolu ia lautolu ne papatiso. Ko e tau matakainaga taane foou nei ne lata ke lahi e lagomatai. He lavelave a Daniel he tau matagahua fakateokarasi kehekehe haana, ne fa foaki e Sarah e lagomatai ia. Nakai leva ti gahua e puhala nei: ko e tau tagata fakaako Tohi Tapu fakamua ha Daniel ne lata mo e lalagoaga ke he tau logonaaga, ti moua e lautolu mai ia Sarah. Ne lata foki a Sarah ke leveki e tau logonaaga, ti moua ai e ia mai he tau tagata fakaako Tohi Tapu ha Daniel. Ko e matahele mate ne kua fakatū. “Totou mahina e lolelole fakaagaaga mo e logonaaga he hoana haaku,” talahau e Daniel. “Ko e mena nei, fakalataha mo e nakai mataala au ki a ia, ne takitaki ke he fua hagahaga kelea lahi. Ne faivao e hoana haaku mo e taha he haaku a tau tagata fakaako fakamua. Ne lolelole fakaagaaga a ia i lalo he mataihu haaku, ka e lavelave lahi au ke he tau matagahua oti haaku ke mailoga ai foki e mena hane tupu.” Maeke fēfē a koe ke kalo kehe mai he matematekelea pihia?
14, 15. Ko e heigoa e tau puhala ka lagomatai e tau Kerisiano kua mau ke kalo kehe he luo he mahani faivao?
14 Ke kalo kehe he luo he mahani faivao, manamanatu ke he kakano he maveheaga he fakamauaga. Pehē a Iesu: “Ko ia kua fakalataha he Atua, aua neke vevehe he taha tagata.” (Mata. 19:6) Ua manamanatu ko e tau kotofaaga fakateokarasi haau kua mua e aoga ke he hoa mau haau. Lafi ki ai, kia mataala ko e nofo kehe tumau mai he hoa haau ma e tau matagahua nakai aoga kua liga fakakite e lolelole he fakamauaga haau ti maeke ke takitaki ke he kamatamata ti liga ke he agahala hagahaga kelea.
15 Kaeke ko e motua a koe, ka e kua e fuifui mamoe? Ko e aposetolo ko Peteru ne tohi: “Kia leveki e mutolu e fuifui mamoe he Atua ha ia mutolu, kia leoleo ki ai mo e fakamakai, ka e nakai he ole fakamakamaka ai; aua foki neke eke mo e fia eke koloa, ka ko e loto fiafia.” (1 Pete. 5:2) Ko e tau tagata he fakapotopotoaga i lalo he levekiaga haau kua nakai lata ke fakaheu. Ka e lata ia koe ke fakamooli e tau matagahua haau ko e leveki mamoe ti nakai fakaheu e matagahua haau ko e taane. Kua nakai fai aoga—ti hagahaga kelea foki—ke hagaaki e tau onoonoaga oti haau ke he fagaiaga he fakapotopotoaga ka e “hoge” e hoa haau i kaina. Pehē a Daniel, “Lahi atu e mena ke he moui he taufetului ke leveki e tau matagahua ke he hagahaga kelea he magafaoa ni haau.”
16, 17. (a) Ko e heigoa e tau fuafuaaga aoga ka taute he tau Kerisiano kua mau he gahuaaga ke fakakite e fakamailoga maaliali kua nakai maeke a lautolu ke fai lotofakavihi? (e) Foaki e fakataiaga he vala tala kua lomi ka lagomatai e tau Kerisiano ke kalo kehe he mahani faivao.
16 Lahi e fakatonuaga mitaki ne haia he tau lau he Ko e Kolo Toko mo e Awake! ke lagomatai e tau Kerisiano ke totoko neke kototia he matahele he mahani faivao. Tuga anei, Ko e Kolo Toko ia Oketopa 1, 2006, ne foaki e fakatonu nei: “He tau gahuaaga mo e he falu matakavi foki, kia mataala ke he tau tutuaga ka fakatupu e fakafetuiaga tata lahi. Ke fakatai ki ai, he lahi e magaaho ne gahua tokoua e tagata taane mo e fifine ka fakatupu e kamatamata. Ko e taane po ke hoana, kua lata ia koe ke fakamahino ke he puhala vagahau mo e ke he foliga haau kua fai hoa mau a koe. Ti ko e tagata ne tutuli e mahani Atua fakamooli, kua nakai lata ke kalahī he tui e tau mena tui nakai gali mo e he puhala tauteute haau. . . . He toka e tau ata he hoa mau mo e he fanau haau i loto he gahuaaga ka fakamanatu ki a koe mo e falu ke he tau mena ne mua ki a koe. Kia fakamalolō ke nakai fakaohooho—po ke mahala—e mahani kalahī mai he taha tagata.”
17 Ko e vala tala ne mataulu “Fakamooli i Loto he Fakamauaga—Ko e Heigoa e Kakano Mooli he Mena Ia?” he Awake! ia Aperila 2009 ne hataki ke he miti ke he mahani feuaki ne putoia e taha tagata ne nakai ko e hoa mau haau. Ko e vala tala ne fakakite ko e taute e mahani feuaki to fakalahi e manako haau ke mahani faivao. (Iako. 1:14, 15) Ka mau a koe, kua pulotu ki a koe mo e hoa haau ke liu fakatutala tokoua e vala tala pihia he taha magaaho mo e taha magaaho. Ko e fakamauaga ko e fakaholoaga ne fakatū e Iehova, ti kua tapu ai. Ko e fakaatā e magaaho ke tutala ke he hoa haau hagaao ke he fakamauaga ha mua ko e puhala mitaki ke fakakite kua uho e tau mena tapu ki a koe.—Kene. 2:21-24.
18, 19. (a) Ko e heigoa e fakahikuaga he mahani faivao? (e) Ko e mahani fakamooli he fakamauaga kua fua mai e tau mahani fe?
18 Ka mailoga e koe a koe kua kamatamata ke fakatū e fakafetuiaga lotofakavihi nakai tonu, kia manamanatu fakahokulo ke he tau fua hagahaga kelea he mahani feuaki mo e faivao. (Fakatai 7:22, 23; Kala. 6:7) Ko lautolu kua mahani feuaki kua nakai fakafiafia a Iehova mo e fakamamahi e hoa ha lautolu mo lautolu foki. (Totou Malaki 2:13, 14.) Kehe mamao ai, manamanatu ke he tau fua mitaki ka moua e lautolu he fakatumau e mahani mitaki. Nakai ni moua e lautolu e amaamanakiaga he moui tukulagi ka e moua foki e lautolu e moui mitaki mogonei, putoia e loto manamanatu meā.—Totou Tau Fakatai 3:1, 2.
19 Ne lologo he salamo: “Kua lahi e mafola ha lautolu kua manako lahi ke he hāu [Atua] a fakatufono; ti nakai fai mena ke tupetupe ai a lautolu.” (Sala. 119:165) Ti fiafia ke he kupu mooli, mo e “kia o fakalaulau a mutoIu; nakai tuga ne tau tagata goagoa ka kia tuga e tau tagata iloilo” he tau magaaho uka nei. (Efeso 5:15, 16) Ko e tau puhala kua muitua e tautolu kua puke he tau matahele ne fakatoka e Satani ke hele aki e tau tagata tapuaki mooli. Ka e loga e tau mena ke puipui aki a tautolu. Kua foaki mai e Iehova ki a tautolu e tau mena kua lata ia tautolu ke “totoko atu” mo e “tamate e tau fana kaka oti hana kua kelea”!—Efeso 6:11, 16.
[Matahui Tala]
a Hiki e tau higoa.
[Fakatino he lau 26]
Fakaapitia he velevelekoloa e tuaga fakaagaaga he tagata. Ua fakaatā e mena ia ke tupu ki a koe
[Fakatino he lau 29]
Kalahī—po ke talia ki ai—ka takitaki e tagata ke mahani faivao