Ko e Fufuta Mukamuka he Watchtower—Ko e Ha ne Taute Ai?
KE HE tau hogofulu tau, ko e tau taane mo e tau fifine he lalolagi katoa kua loto fakaaue mo e aoga mai he tau vala tala faka-Tohi Tapu ne taute fakailoa i loto he The Watchtower. Ia Iulai 2011, ko e fufuta fakamua he fufuta fakaako fakamukamuka he mekasini nei ne taute fakailoa ai ke he vagahau Peritania. Ne fakamaama he fufuta ia: “Ko e fufuta foou nei to fakataitai ke he taha e tau, ti kaeke kua aoga, to matutaki ai ke lolomi.”
He mogonei, kua fiafia lahi ke fakailoa atu kua fifili e mautolu ke matutaki ke taute fakailoa ai. Lafi ki ai, to hoko e magaaho ti moua e fufuta mukamuka ke he vagahau Falani, Potukala, mo e Sepania.
KAKANO NE LOTO FAKAAUE AI
He mole e moua e fufuta mukamuka, tokologa he Pasifika Toga ne talahau: “He mogonei kua maeke mooli e tau matakainaga ke maama katoa e The Watchtower.” Pehē foki e taha tohi: “Ko e magaaho ne fakaaoga he mogo fakamua ke kumi e tau kupu mo e tau fakamaamaaga, kua fakaaoga ai mogonei ke moua e maamaaga he tau kupu tohi ne tū ai mo e puhala kua matutaki ai ke he fakaakoaga.”
Ko e tama ne kautū mai he aoga tokoluga he Tau Faahi Kaufakalataha ne pehē: “Ne 18 e tau ne tutala mo e tohitohi au he vagahau pulotu he fakaakoaga tokoluga. Ti kua feaki e au e puhala tutala mo e manamanatu ne mua atu e uka. Ne mailoga e au kua lata ia au ke taute e tau hikiaga lalahi ke he puhala haaku ne manamanatu mo e tutala.” Ko ia mogonei ko e tagata fakamatala lauia mitaki, ne tohi e ia: “Ko e fufuta mukamuka he Watchtower kua lagomatai lahi mooli. Ko e vagahau ne fakaaoga kua foaki mai ki a au e fakafifitakiaga mitaki lahi ke tuku aki fakamukamuka.”
Ko e matakainaga fifine i Igilani ne papatiso he 1972 ne tohi hagaao ke he fufuta mukamuka he Watchtower: “He mogo ne totou e au e fufuta fakamua, ne logona hifo e au kua tuga na nofo a Iehova he tapa haaku ti fakamalaga e lima haana ke he tau tukeua haaku mo e totou tokoua a maua. Kua tuga e matua taane hane totou e tala ke he tama haana to mohe.”
Ko e matakainaga fifine he Peteli he Tau Faahi Kaufakalataha ne molea e 40 e tau he papatiso ne talahau ko e fufuta mukamuka kua foaki ki a ia he falu magaaho e tau maamaaga foou. Ma e fakatai, ko e puha “Fakamaama he Falu Talahauaga” he fufuta ia Sepetema 15, 2011, ne fakamaama e “fakapotopotoaga ha lautolu kua kitekite mai” ia Heperu 12:1 ke he tau kupu nei: “Kua tokologa lahi a lautolu ti nakai maeke ke totou.” Pehē a ia: “Kua fakamaama he mena nei e iloaaga haaku ke he kupu ia.” Hagaao ke he feleveiaaga he faahi tapu, ne lafi e ia: “Pete ka tali fakahako mai e tama tote i loto he fufuta mukamuka, kua nakai tatai e tau kupu mo e fufuta pauaki he Ko e Kolo Toko ne haia i mua he laulahi. Ti kua fuluola e tau tali he tama tote ke he tau tagata he toloaga.”
Taha foki e matakainaga fifine he Peteli ne tohi: “Ne amaamanaki lahi au ke logona e tau tali he tau tama ikiiki i loto he fakapotopotoaga. Kua lagomatai he fufuta mukamuka he Watchtower a lautolu ke fakakite e manatu ha lautolu mo e mauokafua. Ko e tau mena ne fakakite e lautolu kua eke mo fakamalolōaga ki a au.”
Ko e matakainaga fifine ne papatiso he 1984 ne loto fakaaue lahi ke he fufuta mukamuka: “Logona hifo e au tuga na tohi pauaki ni ma haaku. Kua fakamukamuka lahi ke maama ai e tau mena haaku ne totou. Ti mauokafua au mogonei ke tali he Fakaakoaga Kolo Toko.”
KO E KOLOA NE TOKIOFA HE TAU MAMATUA
Ko e matua fifine he tama taane ne fitu e tau he moui ne pehē: “Ke fakamaama e tau vala tala loga ki a ia he tauteute a mautolu ma e Fakaakoaga Kolo Toko ne fa loa mo e lolelole.” Lagomatai fēfē he fufuta mukamuka? Ne tohi e ia: “Kua ofo lahi au ha kua maeke a ia ke totou e tau paratafa mo e maama mitaki e kakano. Ha kua nakai uka e tau kupu mo e kūkū e tau vala tala, kua nakai mā a ia. Kua kamata a ia ke tauteute ni e ia e tau tali haana ma e tau feleveiaaga ka e nakai lagomatai e au, ti hagaaki a ia ke he mekasini he fakaakoaga katoa.”
Ko e matua fifine he tama fifine ne hiva e tau he moui ne tohi: “Mogo fakamua ne lagomatai e maua a ia ke he tau tali haana. Mogonei kua taute ni e ia. Kua fa lavea a maua ke fakamaama po ke fakakūkū hifo e tau vala tala. Ha kua mukamuka ia ia ke maama, kua logona hifo e ia mogonei kua eke a ia mo vala mooli he Fakaakoaga Kolo Toko.”
FĒFĒ E LOGONAAGA HE TAU FANAU?
Tokologa e tau fanau ne logona hifo kua taute pauaki ni ma lautolu e fufuta mukamuka he Watchtower. Ko Rebecca ne hogofulumaua e tau he moui ne ole: “Fakamolemole ti taute tumau e fufuta foou ia!” Lafi atu e ia: “Ne fiafia lahi au ke he vala ‘Fakamaama he Falu Talahauaga.’ Kua mukamuka lahi ma e tau tama.”
Ko Nicolette ne fitu e tau he moui ne logona pihia foki: “Ne fa uka e Ko e Kolo Toko ke maama e au. Kua maeke au mogonei ke loga e tali haaku ni.” Ko Emma ne hiva e tau he moui ne tohi: “Kua lagomatai lahi ki a au mo e tugaane haaku, ne ono e tau he moui. Kua maeke a maua ke lahi e mena kua maama! Fakaaue lahi!”
Maaliali ai, tokologa ne aoga mai he fufuta he The Watchtower ne fakaaoga e tau kupu mukamuka ke maama i loto he tau vala tala. Kua gahuahua mitaki ai ti to matutaki ke lolomi fakalataha mo e fufuta tumau ko e foakiaga aoga lahi tali mai he 1879.