Ko e Fufuta ma e Fakaakoaga Foou he Ko e Kolo Toko

KO E mekasini hane totou a koe ki ai ko e fufuta fakamua ma e fakaakoaga he Ko e Kolo Toko. Kua manako a mautolu ke fakamaama e falu vala he puhala foou he mekasini nei.

Ko e fufuta ma e fakaakoaga ne taute fakailoa ma e Tau Fakamoli a Iehova mo e tau tagata fakaako Tohi Tapu kua holo ki mua. To taute lagataha he mahina mo e to ha ha i ai fā po ke lima e vala tala fakaako. Ko e fakaholoaga he tau vala tala fakaako nei ka tutala ki ai to lolomi he kili i mua he mekasini. To nakai tatai mo e Ko e Kolo Toko he fufuta ma e fonua, ko e fufuta ma e fakaakoaga to nakai hiki e fakatino he kili i mua he tau fufuta oti, ha ko e mena to nakai foaki ke he fekafekauaga he fonua.

He lau 2 he mekasini, to aoga lahi ki a koe e tau fakamaamaaga kūkū ke he kakano he tau vala tala takitaha po ke tau fufuta vala tala, pihia mo e falu vala tala foki. To aoga ai ki a lautolu ka takitaki e Fakaakoaga he Kolo Toko e vala ia he tauteute a lautolu ma e fakatutalaaga kakano lahi ke he tau vala tala he feleveiaaga he fakapotopotoaga.

To mailoga e koe kua fakakū hifo e tau vala tala fakaako he fakatatai ke he magaaho fakamua. Ko e mena ia, to lahi e magaaho ma e fakatutalaaga ke he tau matapatu kupu tohi he Fakaakoaga he Kolo Toko. Kua fakamalolō mafanatia e mautolu a koe ke kumi e tau kupu tohi ne tūtū i ai he tau faahi tapu takitaha. Ko e falu kupu tohi ne tūtū i ai ne fakamailoga “totou” ti kua lata ke totou mo e tutala ki ai he Fakaakoaga he Kolo Toko. Kua maeke foki e falu kupu tohi ke totou ka fai magaaho. He falu vala tala, kua ha ha ai e tau kupu tohi ne fakamailoga “fakatatai.” Ha kua nakai lalago fakatonu he tau kupu tohi ia e matapatu manatu he paratafa, to liga nakai totou ai he feleveiaaga he fakapotopotoaga. Pete ia, kua ha ha ke he tau kupu tohi “fakatatai” e tau vala lagomatai mitaki, po ke maeke ke lalago e tau manatu ka fakatutala ki ai. Kua fakamalolō e mautolu a koe ke totou ki ai ka tauteute ma e Fakaakoaga he Kolo Toko. Liga maeke ia koe ke fakaaoga ke he tau tali haau.

To nakai liu e hokotaki lagataha he tau ke tū he Ko e Kolo Toko. Kamata he 2008, to tū ai he uho he Ha Tautolu a Fekafekauaga he Kautu pihia foki i loto he Yearbook. Pete ia, tuga he fakakite i luga, kua ha ha he fufuta ma e fakaakoaga e falu vala tala foki. Pete to nakai fakatutala ke he tau vala tala loga nei he feleveiaaga he fakapotopotoaga, kua fakamalolō ki a koe ke totou fakamitaki ki ai. Kua ha ha i ai foki e tau mena kai fakaagaaga mai he “fekafekau fakamoli mo e loto matala.”—Mata. 24:45-47.

Fakahiku aki, ko e fufuta ma e fakaakoaga mo e fufuta ma e fonua he Ko e Kolo Toko kua nakai ko e tau mekasini kehekehe. Ko e tau mekasini ua ia he Ko e Kolo Toko Fakapuloaaga he Kautu a Iehova. Ha ha he lau 2 he tau mekasini ia e tau paratafa ne tatai e fakamaama ke he foliaga he Ko e Kolo Toko. To tuku ua ai ke he pega volume ne lagataha he tau. Mo e tau vala tala mai he tau mekasini ia ka moua mai e vala “Manatu Nakai e Koe?” ka lolomi i loto he fufuta ma e fakaakoaga.

Tali mai he 1879 he tau vahā felakutaki, uka fakatupe, mo e favaleaga, nukua fakapuloa fakamooli he Ko e Kolo Toko e tau kupu mooli hagaao ke he Kautu he Atua. Kua liogi a mautolu ma e fakamonuina ha Iehova ke matutaki pihia ke he puhala foou nei. Ti liogi a mautolu to fakamonuina e Iehova a koe, ko e tagata totou, he fakaaoga fakamitaki e koe e fufuta ma e fakaakoaga foou he Ko e Kolo Toko.