E, Ko e Fufuta Fakaako Anei!
Kua liu taute e mautolu e fufuta fakaako nei ke mua atu e mitaki mo e aoga ki a koe he haau a fakaakoaga ke he Kupu uho he kupu mooli ha Iehova.—Sala. 1:2; 119:97.
He fā e tau kua mole, ne kamata ai a mautolu ke lolomi ua e fufuta he Ko e Kolo Toko, taha ma e tau tagata he fonua mo e taha ma tautolu oti—ko e Tau Fakamoli a Iehova mo e ha tautolu a tau fakaako Tohi Tapu holo ki mua.
Hagaao ke he fufuta fakaako, ne tohi he taha ne kua leva e fekafekau ki a Iehova: “Ofoofogia mo e hokulo—ko e manatu haaku a ia ke he fufuta fakaako fakamua he Ko e Kolo Toko. Ko e vagahau hokulo fakaagaaga nei mo e tau fakamauaga kua tutala fakahako ke he haaku loto. Fakaaue lahi mahaki ke he tau foakiaga fulufuluola foou nei.” Ne tohi he taha matakainaga taane foki: “Amaamanaki lahi au ke foaki e tau tulā loga ke lata mo e fufuta fakaako, fakalataha mo e haaku Reference Bible.” Amanaki foki a mautolu kua pihia e logonaaga haau.
Tuga he iloa e koe, Ko e Kolo Toko kua lolomi tali mai he 1879, ko e matagahua kua maeke ni ha ko e agaaga mo e fakamonuina ha Iehova. (Saka. 4:6) Tali mai he 133 e tau tau, kua ha i ai falu hikihikiaga ke he kili he mekasini. Ma e 2012, ko e tau fufuta fakaako takitaha to fakakite mai he kili i mua e fakatino mo e tau lanu fulufuluola ne tā he tagata tā fakatino, kua fakamanatu mai ki a tautolu e poakiaga he Atua ke fakamatala fakatonu atu hagaao ke he Kautu ha Iehova. (Gahua 28:23) I loto he kili he lau 2, to kitia e koe e ata ne fakavē ki ai e fakatino, mo e fakamaamaaga kū ke he mena ne tupu mo e matakavi ne hoko ai. Magahala he tau, to fakamanatu mai he mena nei ki a tautolu oti ko e tau tagata ha Iehova hane fakamatala e vagahau mitaki “ke he tau atu motu oti.”—Mata. 24:14.
Ko e heigoa falu hikihikiaga kua taute ke he mekasini? Ko e puha fakamanatu kua hiki ke he kamataaga he tau vala tala fakaako takitaha. To fakamaama he mena nei ki a koe e tau matapatu manatu kua lata ia koe ke kumi ki ai he magaaho ka totou mo e fakaako e koe e vala tala fakaako. Mooli, to manako a lautolu ne takitaki e Fakaakoaga Kolo Toko ke fakatumau ke fakaaoga e tau hūhū nei ke fakamanatu aki e tau vala tala he matahiku he fakaakoaga. To mailoga e koe kua fakalaulahi fakatote e tau faahi he lautohi ti ko e tau lau mo e tau numera he tau paratafa kua kitia maali.
Tuga ne fakamaama he fufuta he mahina nei, ko e vala foou, “Mai he Tau Tokaaga Tuai,” kua lalafi ke kitia aki e tau hikihikiaga aoga he fakamauaga tuai he vahā foou nei he Tau Fakamoli a Iehova. Pihia foki, ko e tau tala mooli he moui to moua he falu magaaho i lalo he mataulu “Kua Foaki Fakamakai e Lautolu a Lautolu.” To fakamaama fakatonu he tau mena nei e olioli, makona mo e fiafia ne kua fakafitā ki ai e tau matakainaga taane mo e fifine ha kua fekafekau ke he ha mena ni kua latatonu ke gahua ki ai e tau tagata fakapuloa he Kautu.
Amanaki ke lahi e fiafia ke he tau magaaho kua foaki e koe ke fakaako e Kupu he Atua mo e lagomatai mai he mekasini nei.
Tau Fakailoa
[Fakatino he lau 3]
1879
[Fakatino he lau 3]
1895
[Fakatino he lau 3]
1931
[Fakatino he lau 3]
1950
[Fakatino he lau 3]
1974
[Fakatino he lau 3]
2008