Tau Hikiaga Fiafia ma e Ko e Kolo Toko!
1 He mataulu he tau nei, ne moua he tau fakapotopotoaga e fakailoaaga fiafia: “Kamata ia Ianuari 2008, to ua e fufuta kehekehe he Ko e Kolo Toko, taha ma e fonua mo e taha ma e tau matakainaga Kerisiano ha tautolu! Liga kua manamanatu a koe: ‘To kehekehe fēfē e tau mekasini ua nei? Ko e heigoa e tau aoga he ua e fufuta? Ha ha i ai nakai ha vala foou ke amaamanaki ki ai?’
2 Ko e Kehekeheaga: Ko e lagaki he kuata he tau mekasini to iloa ai ko e Fufuta ma e Fonua. Ko e tau vala tala oti he lagaki nei to tauteute pauaki ma e tau tagata he fonua. Ko e fufuta 15 aki he mahina to iloa ai ko e Fufuta ma e Fakaakoaga mo e to nakai foaki ai ka gahua he fonua. To ha ha i loto e tau vala tala fakaako oti ke lata mo e taha e mahina ti pihia mo e tau vala tala ne lafi ki ai nukua aoga pauaki ke he tau Kerisiano tukulele. To nakai ni aoga e Fufuta ma e Fonua ke he Tau Fakamoli ka e mua atu foki e aoga ki a lautolu ne nakai ko e Tau Fakamoli ne liga talia e Tohi Tapu. Ka ko e Awake!, to hagaao ke he tau tagata fakalaulahi, putoia a lautolu ne fakauaua mo lautolu ne totoku ko e lotu nakai Kerisiano.
3 Ko e Tau Aoga: He Fufuta ma e Fakaakoaga, to nakai lata e tau kupu tuga e “paionia” ke fakamaama ke he puhala ke maama e lautolu ne nakai ko e Tau Fakamoli. Kua maeke foki ke ha ha he fufuta nei e vala tala aoga ne tauteute pauaki ma e Tau Fakamoli a Iehova mo e tau tagata fakaako Tohi Tapu hane holo ki mua fakaagaaga. Ka e kua e Fufuta ma e Fonua? Ha ko e tau matakupu mo e puhala ne tohi aki to hagaao pauaki ke he tau tagata oti, kua lata ke fiafia a ia ne nakai ko e Fakamoli ka totou e mekasini katoa. Mooli, ko e Tau Fakamoli oti ha Iehova to aoga he totou e tau fufuta takitaha. Ha ko e mena to foaki e tautolu taha e Kolo Toko mo e Awake! he fonua he tau mahina takitaha, to ha ha ia tautolu e mahina katoa ke fakalaulahi e tau fakataitaiaga lauia mitaki.
4 Tau Vala Foou: Ko e tau vala fiafia foou kua fakatokatoka he Ko e Kolo Toko he Fufuta ma e Fonua. Ko e taha vala to fakatutala e tau fakaakoaga faka-Tohi Tapu kua aoga he puhala mukamuka. To fakakite he taha puhala foki e aoga he Tohi Tapu ka lagomatai e tau magafaoa. Ko e tau fakatokaaga he Tohi Tapu to taute ma e tau tagata fuata. To fakamaama he tau fufuta takitaha e tau vala pauaki he Tohi Tapu ka fakaako a tautolu hagaao ki a Iehova ko e peresona.
5 Liogi a mautolu to fakamonuina e Iehova e fakatokaaga foou nei ma e Ko e Kolo Toko. Kia eke e senolo ia, fakalataha mo e Awake!, ke hokotia e tala mitaki ke he tokologa ha lautolu kua lata ki ai.—Mata. 10:11.