Ke he Tau Tagata Totou ha Tautolu

KUA fiafia lahi a mautolu ke fakailoa atu ki a koe kua kamata he fufuta nei e falu hikiaga ke he fakatokaaga he Ko e Kolo Toko. Ato fakamaama e mautolu e tau mena ka hiki, to tala atu e mautolu e tau mena ka mau agaia.

Ko e higoa he mekasini nei, Ko e Kolo Toko Fakapuloaaga he Kautu ha Iehova, ne nakai hiki. Ko e mena ia, Ko e Kolo Toko to matutaki ke fakalilifu a Iehova ko e Atua mooli mo e fakamafana e tau tagata ne totou ki ai he tala mitaki he Kautu haana. Ko e tau vala tala he lau 5 ke he 9 he fufuta nei kua fakatutala ke he Kautu ia mo e magaaho ka hoko mai ai. Ke lafi, to matutaki he Ko e Kolo Toko ke fakalahi e tua ki a Iesu Keriso, lalago e kupu mooli he Tohi Tapu, mo e fakamaama e kakano he tau mena tutupu he lalolagi he fakakite e tau perofetaaga he Tohi Tapu, tuga ne taute ke he loga e tau hogofulu tau kua mole.

Ko e heigoa mogoia ka hiki? To fakamaama atu e mautolu e falu vala mahuiga ka tū he fufuta lagafā he tau.a

To loga e vala fakaohooho manatu ka ha ha he fufuta nei. Ko e vala tala “Iloa Nakai e Koe?” ka foaki mai e tau tala aoga ne fakamaama e kakano he tau tala Tohi Tapu ka fifili. Ko e vala tala “Fakatata ke he Atua” ka fakamaama e tau mena ka ako e tautolu hagaao ki a Iehova mai he tau faahi kupu he Tohi Tapu. Ko e vala “Hūhū he Tau Tagata Totou ha Tautolu” ka fakatutala e tau tali ke he tau hūhū aga mau ke he Tohi Tapu. Ma e fakatai, kua tokologa e tagata ne manamanatu, “Kua Ha Ha Kia e Kautu he Atua he Loto Haau?” To moua e koe e tali he lau 13.

To loga e vala ka taute tumau ke aoga e tau magafaoa. Ko e vala “Tau Kei ke Fiafia e Magafaoa,” ka talahau e tau tutūaga lekua mooli he moui magafaoa ti fakakite e puhala ka lagomatai he tau matapatu fakaakoaga he Tohi Tapu e tau lekua. Ko e vala tala “Fakaako e Tau Tama ha Mutolu” kua lata ma e tau matua ke totou mo e tau tama ha lautolu. Ko e vala tala “Ma e Tau Fuata ha Tautolu” ka fakamaama e tau matagahua fakaako Tohi Tapu ka taute ke lata mo e tau fuata.

To fai vala atu foki ka ha ha he fufuta lagafā nei he tau. Ko e vala “Fifitaki e Tua ha Lautolu” ka fakamalolō a tautolu ke mumuitua ke he fakafifitakiaga he tagata he Tohi Tapu. Tuga anei, he lau 18 ke he 21 he fufuta nei, to totou e koe e tala aamotia ke he perofeta ko Elia ti ako e puhala ka maeke ia tautolu ke fifitaki e tua haana. Ko e vala “Ko e Tohi Mai . . . ” to fakakite e hokotaki ka tohi he tau misionare mo e falu foki he tau faahi kehekehe he lalolagi. He “Ko e Mena ne Ako e Tautolu Mai ia Iesu” to fakakite e tau matapatu fakaakoaga he Tohi Tapu ke he fakatokaaga mukamuka.

Kua mauokafua a mautolu Ko e Kolo Toko to matutaki ke futiaki e tau tagata ne totou ki ai ne kua fakalilifu e Tohi Tapu mo e manako ke iloa e tau mena ne fakaako mooli i loto he tohi nei. Kua amaamanaki a mautolu to lagomatai he senolo nei ke fakamakona e manako haau ke he kupu mooli he Tohi Tapu.

KO E TAU TAUTE FAKAILOA

[Matahui Tala]