Kua Fakaaoga Katoatoa Nakai e Koe?
1 “Amaamanaki lahi au ke fakaaoga ai ke he fonua!” Pihia he tohi he taha matakainaga fifine he mole e totou he The Watchtower ia Ianuari 1, 2008. Kua manamanatu nakai a koe ke he falu vala ne tohi tumau he fufuta ma e fonua, ti kua moua nakai e koe e tau puhala ke fakaaoga fakamitaki ai ke he gahua haau he fonua?
2 “Ko e Mena ne Ako e Tautolu Mai ia Iesu”: Liga kua lagomatai lahi ki a koe e vala nei ke kamata e tau fakaakoaga Tohi Tapu. Ka nakaila taute pihia e koe, lali ke totou e mataulu he vala tala ke he tagata he fale ti fakakite age mogoia e talahauaga ha Iesu hagaao ke he matakupu ia, tuga ne talahau he paratafa fakamua. Ka fakakite e fiafia fakamua, eketaha ke matutaki e fakatutalaaga he fakaaoga e tau vala mataulu ne eke mo tau hūhū ke fakalagalaga e manatu. Uiina e tagata ke talahau e manatu ke he hūhū. Fakamaama fakakū ha fakatino ne hagaao ki ai, ti holo atu ke he taha paratafa. Liga maeke ia koe ke fakatutala ke he hafa fakamua he vala tala he aahi atu fakamua ti fakatutala mogoia e hafa ke uaaki ka liu atu. Kia mautauteute ke matutaki e fakaakoaga ke he tohi Fakaako he Tohi Tapu.
3 “Tau Kei ke Fiafia e Magafaoa”: Ko e tau fufuta nei, kua taute ke lagomatai e tau taane, tau hoana, mo e tau matua ke kitia mo e fakagahua e tau matapatu fakaakoaga he Tohi Tapu ka fehagai mo e tau lekua ka fakahagahaga kelea e mafola he magafaoa. Maeke foki ia koe ke fakaaoga e tau vala tala nei ke lagomatai a lautolu ne nakai ko e Tau Fakamoli ke kitia e pulotu i loto he Tohi Tapu.—2 Timo. 3:16, 17.
4 Tau Vala ma Lautolu ne Ikiiki: Ko e tau fufuta “Ma e Tau Fuata ha Tautolu” ne fakatoka ke maeke ke fakaaoga ke kumi aki e tau tala pauaki he Tohi Tapu. Maeke ia koe ke fakaaoga e tau vala tala nei ke lagomatai e tau fuata kua feleveia mo koe ke he fekafekauaga haau ke kitia ai e aoga lahi he fakaako e Kupu he Atua. (Sala. 119:9, 105) Ka tutala ke he tau matua, liga fakamaama e koe e tau fufuta he “Fakaako e Tau Tama ha Mutolu.” Maeke he tau vala tala nei ke lagomatai e tau fanau ikiiki ke ako e tau fakaakoaga aoga mai he tau tagata he Tohi Tapu. Kua fai magaaho nakai a koe ke totou e tau vala tala nei mo e tau tama haau?
5 Falu Vala: Ko e vala “Hūhū he Tau Tagata Totou ha Tautolu” ne fakatutala ke he hūhū ne liga hūhū e lautolu ne nakai ko e Tau Fakamoli. Liga fakakite e koe e vala tala nei he foaki e tau mekasini he taha fale ke he taha fale. Ko e vala “Ko e Tohi Mai . . . ” ko e hokotaki omoomoi he tagata fakamua ne fakakite e tau paleko ne fehagai mo e tau misionare mo e falu he taute e fekafekauaga ha lautolu. Maeke e tau vala tala nei ke lagomatai a lautolu ne fiafia ke kitia e tala mitaki hane fakamatala ke he lalolagi katoa, he fakamooli e fakamailoga he haele mai po ke, ha ha hinei he Keriso.—Mata. 24:3, 14.
6 Ko e vala “Fakatata Atu ke he Atua,” ne fakavē ke he totouaga he Tohi Tapu ma e Aoga Fekafekau Fakateokarasi ka liga fakalagalaga a lautolu ne manako mooli ke fakaako hagaao ki a Iehova. Ko e tau fufuta “Fifitaki e Tua ha Lautolu,” ne taute ke lagomatai e tau tagata ke manamanatu ke he tau tala he Tohi Tapu, he fakataitai e tau tagata he Tohi Tapu—ke he tau fifiliaga, tau paleko, mo e tua ha lautolu—ke gahuahua mooli ke he tau tagata totou he vahā nei.
7 Kua fiafia ha ia ha tautolu ke moua kuata e tau fufuta he mekasini he Ko e Kolo Toko ne taute pauaki ke fakaaoga he fonua! Kia fakamahani a tautolu ke iloa mitaki e tau tala i loto mo e fakaaoga katoatoa he fekafekauaga ha tautolu.