Ko e Fufuta Vala Tala ke Lagomatai he Fekafekauaga ha Tautolu
1. Ko e heigoa e ua e foliaga he tau vala tala “Ko e Tutala mo e Katofia”?
1 He falu magaaho, ko e fufuta ma e fonua he Ko e Kolo Toko kua fakakite e tau vala tala “Ko e Tutala mo e Katofia.” Ko e tau tala nei kua ua e foliaga—ke fakakite e fakaakoaga he Tohi Tapu ke he puhala omoomoi mo e ke fakakite mai ki a tautolu e puhala ka maeke ia tautolu ke fakamaama fakailoilo e falu matakupu. (1 Pete. 3:15) Fakaaoga fakamitaki fēfē e tautolu e tau vala tala nei?
2. Fakaaoga fēfē e tautolu e tau vala tala nei he fekafekauaga ha tautolu?
2 Fakaaoga Ai he Fekafekauaga: Liga toka e koe falu lagaki he Ko e Kolo Toko ne tu ai e vala tala pehēnei. Ka hūhū e tagata he kaina, tagata ne fiafia, po ke tagata fakaako Tohi Tapu e hūhū po ke nakai talia ke he taha matakupu ia ne kua fitā e fakamaama he taha he tau vala tala nei, age e lagaki he vala tala ia ti tala age kua manako a koe ke fakatutala ki ai. Ka nakai fai mekasini a koe ne ha ha e vala tala ia, liga moua mai ai e koe he jw.org.
3. Liga fakatutala fēfē a tautolu hagaao ke he taha he vala tala ke he tagata he kaina?
3 Liga fakatutala fēfē a koe hagaao ke he taha he tau vala tala nei mo e taha tagata? Falu ne uiina e tagata ke totou mai e tau kupu he katofia, ka e totou e lautolu e tau kupu he Fakamoli. Maeke e puhala nei ke lauia mitaki ha kua fakaatā e tagata he kaina ke kumikumi ke he tau taofiaga ha tautolu ke he puhala ne kua mitaki haana logonaaga.—Teu. 32:2.
4. Fakaaoga fēfē e tautolu e tau vala tala nei ke fakaako aki a tautolu?
4 Fakaako e Koe a Koe mo e Falu: He totou e koe e tau vala tala nei, lali ke manatu e tau kupu tohi, tau fakatai, mo e tau fakamaamaaga. Mailoga e lauiaaga he vala tala. Ti lali ke fakaaoga e puhala pihia foki he fekafekauaga haau. (Fakatai 1:5; 9:9) Ne mailoga ai he taha matakainaga fifine, “Ko e totou e tau vala tala nei kua tuga e fakaako mai he hoa paionia ‘mitaki katoatoa’—ne iloa tumau e ia e mena hako ke talahau!”
5. Lagomatai fēfē e tautolu e tau tagata fakaako Tohi Tapu ha tautolu ke mautali ma e fekafekauaga?
5 Maeke foki ia koe ke fakaaoga e tau fakataiaga ne tohi i loto ke lagomatai e tau tagata fakaako Tohi Tapu haau ke mautali ma e fekafekauaga. Totou tokoua e vala tala, he age ke he tagata fakaako ke totou e vala he tagata fakailoa. He puhala nei, kua maeke e tau tagata fakaako Tohi Tapu ke fakamahani ke talahau e tau taofiaga ha lautolu ke he puhala fakailoilo. (Kolo. 4:6) Mooli ai, ko e tau vala tala nei ko e taha ni a ia he tau puhala loga kua lagomatai e Iehova a tautolu ke “fakakatoatoa” e fekafekauaga ha tautolu.—2 Timo. 4:5.