Ko e Fakaholoaga Foou ke Kamata Aki e Tau Fakaako Tohi Tapu
1. Ko e heigoa e fakaholoaga foou ka kitia i loto he fufuta ma e fonua he Ko e Kolo Toko, mo e kua tauteute fēfē?
1 Kamata he mahina ka hau ko e fakaholoaga foou to kitia ai he fufuta ma e fonua, he Ko e Kolo Toko ke lagomatai a tautolu ke kamata aki e tau fakaako Tohi Tapu. Kua fakamataulu “Fakaako Mai he Kupu he Atua.” Pete ni kua fiafia mooli falu he fonua ka totou e tau vala tala takitaha he fufuta tohi nei, ko e tau vala tala kua taute pauaki ke fakatutala ki ai.
2. Ko e heigoa falu vala he tau vala tala nei?
2 Tau Vala Tala: Kua tohia e tau mataulu mo e tau vala mataulu ko e tau hūhū ke hūhū ke he tagata he kaina ka fakatutala ki ai. Ko e tau alito kupu tohi kua fakakite ni, ka e nakai tohia, ti maeke he tagata he kaina ke fiafia ke fakaako fakahako mai he Kupu he Atua. Kūkū e tau paratafa ti maeke ke fakatutala ki ai he gutuhala. Ko e tau vala tala takitaha kua hagaao ke he tohi Fakaako he Tohi Tapu ke lagomatai a koe ke hiki atu e fakaakoaga ke he tohi ia he magaaho kua lata.
3. Ka fano ke he taha fale mo e taha fale, fakaaoga fēfē e tautolu e fakaholoaga nei ke kamata aki e fakaako Tohi Tapu he gutuhala?
3 Fakaaoga Fēfē: Ka foaki e tau mekasini maeke ia koe ke hūhū taha hūhū ke fakalagalaga e fiafia ke he kakano he vala tala. Fakatai ki ai, ko e fufuta ia Ianuari 1 kua fakatutala ke he aoga he Tohi Tapu. Liga hūhū a koe: “Onoono nakai a koe ke he Tohi Tapu ko e Kupu he Atua po ke taha tohi mitaki noa ni? [Fakaatā ma e tali.] Fai manatu fiafia au ke he matakupu nei.” Tuhi ke he hūhū fakamua, totou e paratafa fakamua, ti kumikumi ke he kupu tohi kua fakakite. Liu totou e hūhū ti hūhū ke he tagata he kaina ke talahau haana tau manatu. Kitekite fakalahi ke he tau vala tala kaeke kua lata, fakaaoga e tau hūhū kua fakanumera ke fakatutala ki ai. Ato fano kehe, takitaki atu ke he hūhū ka mui mai ti taute e tau fakatokatokaaga pauaki ke liu mai mo e fakatutala ki ai. Liu ke fakatutala fakalaulahi ke he vala tala he tau faahi tapu takitaha ato maeke a koe ke tamai taha fufuta foki. Taha puhala foki ke tala age fakahako ti foaki e fakaako Tohi Tapu ke he tagata he kaina. Ti fakaaoga e vala tala he mekasini ke fakatātā aki e fakaako.
4. Fakaaoga fēfē e tautolu e tau vala tala nei ka taute e tau liu aahi atu?
4 Maeke foki ia koe ke fakaaoga fakamitaki e fakaholoaga foou nei ke he hala mekasini haau mo e tau liu aahi atu. Maeke ia koe ke pehē: “Fai vala foou i loto he Ko e Kolo Toko. To fakakite atu e au e puhala ke fakaaoga ai.” Ko e ha mautolu a liogi, ko e fakaholoaga foou nei to fakaatā e tokologa ke ‘hokotia e maama ke he kupu moli.’—1 Timo. 2:4.