“To Tali Fēfē e Koe?”
1. Ko e heigoa e tau paleko ne fehagai mo e tokologa ia tautolu?
1 Kua fiafia nakai a koe ke he Kupu he Atua ka e uka ke manatu e tau tala matafeiga he Tohi Tapu po ke tokaaga he tau kupu ne lauia tonu ne fakamau he tau Tohiaga Tapu? Manako nakai a koe ke he tau fanau haau ke hokulo e maama ke he tau matapatu mo e tau fakaakoaga mooli he Tohi Tapu? Ko e vala tala “How Would You Answer?” [“To Tali Fēfē e Koe?”] ne taute fakailoa he tau mahina takitaha he lau 31 he Awake! kua maeke ke lagomatai a lautolu ne ikiiki mo e momotua ke iloa mitaki e Kupu he Atua.—Gahua 17:11.
2. Fakaaoga fēfē e tau vala kehekehe he vala tala “To Tali Fēfē e Koe?”
2 Maeke fēfē ia koe ke fakaaoga fakamitaki e vala nei? Ko e fufuta he Awake! ia Ianuari 2006 ne talahau pehē: “Kia fai magaaho ke kitekite ke he lau 31 . . . Ko e falu vala he lau ia to fiafia e tau fanau ikiiki ki ai; ko e falu vala to taute e tau tagata fakaako ne iloa lahi ke he Tohi Tapu ke manamanatu fakalahi. Ko e vala ‘When in History?’ [‘Magaaho Fe he Fakamauaga Tuai?’] ka lagomatai a koe ke tuku fakapapahi e tau mena tutupu he tau vahā he fakakite e magaaho ne momoui ai e tau tagata he Tohi Tapu mo e magaaho ne tutupu e tau mena lalahi. Ko e tau tali he vala ‘From This Issue’ [‘Mai he Fufuta Nei’] to moua i loto he mekasini katoa, ko e tau tali ke he laulahi he tau hūhū to kitia ke he lau kua kotofa i loto he fufuta ia, ne lolomi fakahala ulu. Ko e ha he nakai taute falu kumikumiaga ato totou e tau tali ia ti tutala ke he falu hagaao ke he tau mena ne ako e koe? Liga fakaaoga foki e koe e vala foou nei, ‘To Tali Fēfē e Koe?’ mo matapatu he fakatutalaaga Tohi Tapu he magafaoa po ke matakau.”
3. Kua aoga fēfē e falu magafaoa mai he vala nei, mo e tau vala fe haau ne fiafia lahi ki ai?
3 Mooli, loga e magafaoa ne fiafia lahi he fakaaoga e vala nei mo matapatu he fakaakoaga magafaoa. Taha e matua fifine ne tohi: “Ne manatu au mo e taane haaku kua liga mitaki ke lafi e ‘Children’s Picture Search’ [‘Kumi Fakatino he Tau Fanau’] ke he fakaakoaga magafaoa ha mautolu ke fakaohooho mo e fakafiafia e tama fifine tolu tau ha maua. Ko e fuluola ha ia ke kitekite a ia he totō mo e fiafia e lagaki haana he Awake! mo e veu ato moua e vala haana ne kumi.” Ko e matua taane i Parasili ne pehē: “Ne fiafia lahi au mo e tama taane haaku ne fitu e tau ke he vala nei he Awake! Kua lagomatai a Moises ke mataala lahi, ke kumi e tau kupu Tohi Tapu, ke maama e tau fakatino, mo e ke iloa e tau vahā. Ko Ashley ne valu e tau, ne tohi: “Fakaaue lahi ke he ‘To Tali Fēfē e Koe?’ i tua he Awake! Ne loga e mena haaku ne ako hagaao ke he Tohi Tapu mai i ai.”
4. To maeke fēfē e magafaoa ke fakaaoga e vala nei mo taha vala he fakaakoaga magafaoa ha lautolu?
4 Ko e ha nakai fakaaoga ai e “To Tali Fēfē e Koe?” he falu magaaho mo taha vala he fakaakoaga magafaoa haau? Maeke foki a koe ke fakaaoga e Index po ke Watchtower Library he CD-ROM ke kumi e tau tali ke he tau hūhū ne uka lahi. He taute pihia, to fakaako e koe ke he tau fanau haau e puhala ke taute e kumikumiaga. Ka fai fanau lalahi hake a koe, ko e ha he nakai age e tau kumikumiaga uka ki a lautolu ke kumikumi e tau tali ke he “Who Am I?” [“Ko Hai Au?”] po ke “Magaaho Fe he Fakamauaga Tuai?” ato hoko e fakaakoaga magafaoa? Ti maeke mogoia ia lautolu ke talahau e tau manatu he kumikumiaga ia he magaaho ka fakaako e magafaoa. Ko e fakaaoga lauia mitaki he lau nei e taha puhala kua maeke he tau matua ke fakaako e Kupu he Atua ke he tau fanau ha lautolu, he lagomatai a lautolu ke iloa e “tau Tohi Tapu” mai he vahā ikiiki.—2 Timo. 3:15; Teu. 6:7.