Peehi e Aoga he Tohi Tapu!
1. He kamataaga, ne taute fakailoa ma hai e Ko e Kolo Toko, mo e ma hai e The Golden Age?
1 Ia Oketopa 1, 1919, ne taute fakailoa e fufuta fakamua he mekasini The Golden Age. Ne fakamoli ai mo kanavaakau aoga lahi ke he gahua fakamatala. Ko e ha? Ha kua talaga pauaki ma e tau tagata oti. Nakai pihia e Ko e Kolo Toko, ne kua loga e tau tau ne onoono ki ai ko e mekasini pauaki ma e “fuifui mamoe gahoa.” (Luka 12:32) Ne tali fiafia lahi e tau tagata fakailoa he Kautu ke he tau tohi fou ne kua leva lahi e tufatufa he The Golden Age nukua loga atu ke he Ko e Kolo Toko.
2. Ko e heigoa e higoa he The Golden Age he vaha nei, ti ko e heigoa hana kakano ke he kamataaga?
2 Ko e mekasini The Golden Age ne taute fakailoa ke fakakite ke he tau tagata e tuluiaga moli ke he tau lekua ha lautolu ko e Pule Meleniamu he Keriso, ka takitaki moli e tau tagata ke he tau vaha fiafia ia. He tau hogofulu tau fakamui ne loga e tau hikihikiaga ke he The Golden Age ke felauaki mo e tau hikihiki kua lata ke he tau vaha. He 1937 ne hiki e higoa ke he Consolation. He 1946 ne eke mo Awake!, ko e higoa haia ne iloa e tautolu he vaha nei.
3. Ko e heigoa e perofetaaga ne fakamoli kua eke e Awake! mo kanavaakau malolo lahi?
3 Mai he kamataaga, ne lafi fakalahi e mekasini nei ke he fakamatala lahi ne taute tali mai he 1919. (Mata. 24:14) Pete ia, he kitia e mafiti he vaha ha tautolu, kua liga pulotu ke taute foki falu hikihikiaga ke he Awake!
4. (a) Ko e heigoa kua lata he tagata ke taute ke hao a ia ke he “aho he ita a Iehova”? (e) Hagaao ke he Fakakiteaga 14:6, 7, ko e heigoa he “agelu kua lele ke he pulagi,” ne ogo ke he tau tagata oti ke taute?
4 Toko miliona e tagata ne fiafia he totou e Awake! ha kua putoia e loga he tau mataulu tala nakai mai he Tohi Tapu ke he puhala futiaki. Nakai fakauaua ko e laulahi ia lautolu ne o atu ke he Fakamanatuaga he tau tau takitaha ko e tau tagata totou he Awake! Ka fai tagata agaia ne amanaki ke hao he “aho he ita a Iehova,” to lata ke lagomatai ki a ia ke lahi atu e mena ke taute he nakai ni ko e tagata totou tumau he tau tohi ha tautolu.—Sefa. 2:3; Fakakite. 14:6, 7.
5. (a) Kamata he Awake! ia Ianuari 2006, ko e heigoa ka fakakite fakamalolo ki ai? (e) Ko e heigoa ka fakalagalaga e tokologa ke taute, mo e ko e heigoa e perofetaaga ka fakamoli?
5 Ti, mai he Awake!, Ianuari 2006, to peehi fakalahi ai ke he Kautu he Atua. To fakamalolo fakalahi ke he tau tagata totou ke onoono ke he Tohi Tapu ma e tau tuluiaga ke he tau lekua ha lautolu mo e to fakakite fakamalolo e fakamaamaaga he Tohi Tapu ke he tau mena tutupu fou. He puhala nei, to maama mitaki he tau tagata totou e tau mena tutupu mo e liga ke fakalagalaga he mena ne totou e lautolu ke ako fakalahi hagaao ki a Iehova.—Saka. 8:23.
6, 7. (a) To talaga fefe e Awake! ke lagomatai e tokologa ke fakagahua e 1 Tesalonia 2:13? (e) To lagafiha e taute fakailoa he Awake!, ti fiha e vagahau ka lauia he hikiaga nei?
6 To matutaki e Awake! ke fakakite e tau vala tala kua fiafia ke he tau tagata. Ka e, to fakave e peehiaga ke he Tohi Tapu. (1 Tesa. 2:13) Ha kua ha ha he Ko e Kolo Toko e vala tala hokulo faka-Tohi Tapu, kua tuga ke nakai lata ke fakatumau e taute fakailoa e Awake! lagaua he mahina. Ko e mena ia, kamata he fufuta ia Ianuari 2006, to taute fakailoa e Awake! ko e mekasini lagataha he mahina. To tupu e mena nei ha ko e fakamukamuka lahi he tauteute, fakaliliu, mo e fakahu he tau tohi ha tautolu.
7 To lauia e hikiaga nei kavi ke he 40 e pasene he tau vagahau ne taute fakailoa e Awake! Laulahi he tau vagahau, kua fita e Awake! he lagataha po ke kuata he mahina. To nakai fai hiki ke he The Watchtower.
8. To fakaaoga fefe he tau tagata fakailoa e Awake! fakalataha mo e Ko e Kolo Toko?
8 To foaki he tau tagata fakailoa he tau mahina takitaha e Awake! mo e ha fufuta he Ko e Kolo Toko ma e mahina ia. Ko lautolu ka fakakite e Awake! ka maeke ke fakaaoga e fufuta taha ia he mahina katoa he nakai hiki e fakataitaiaga ha lautolu he lotouho he mahina, tuga mogonei.
9. Ko e heigoa e gahua ka fakatumau e Awake! ke taute?
9 Tali mai he fufuta fakamua he 1919, ne iloa lahi ko e mekasini The Golden Age, Consolation, mo e mogonei Awake! ne aoga lahi ke he gahua fakamatala. Liogi a tautolu ki a Iehova ke fakatumau ke fakamonuina e tufatufaaga he mekasini he puhala ne liu fakatokatoka mo e to lagomatai ai e tokologa atu foki he tau tagata he “tau motu oti, mo e tau faoa, mo e tau tagata kehekehe, mo e tau vagahau kehekehe” ke haga atu ke he Kautu he Atua ko e ha lautolu a amaamanakiaga hokoia.—Fakakite. 7:9.