“Nakai Fai Mena ke Tupetupe Ai” a Lautolu kua Fakaalofa ki a Iehova

1. Fakakite fēfē he taha tagata poitufi to nakai fakalolelole a ia he tau poitufi?

KO MARY DECKER ko e fuata mui he mogo ne kamata a ia ke talahaua he poi he tau poitufi. He 1984, ne eke a ia mo tagata poi mitaki ti tokologa ne manatu to moua e ia e pine auro he Olimipiki. Ka e fai mena kelea lahi ne tupu. He poitufi ne 3,000 e mita, ne hakina e hui haana he taha tagata poi ti veli. Ne nakai maeke a ia ke fakaoti ai e poitufi, ka e nakai fakalolelole a ia ke he tau poitufi. Nakaila taha e tau he mole, ne poi e ia e poitufi ne taha e maila kua mua e mafiti he ha fifine ne poi ai he mogo fakamua.

2. Ko e vahega poitufi fe kua tafepoi e tau Kerisiano? Kua lata ke tafepoi fēfē a tautolu?

² He moui ko e Kerisiano kua tuga e poitufi. Ko e poitufi ke he moui tukulagi. Nakai lata ia tautolu ke fakaatā ha mena ke taofi a tautolu mai he poitufi nei. Nakai ko e poitufi kū a ia ke poi mafiti e tagata ke mua. Kua nakai tuga foki e poipoi noa, he poi fakatekiteki e tagata ti falu mogo ne oti noa ni. Ka e tuga e poi manavaloa. Ko e tagata poi manavaloa ne lata ke fakauka ke poi tumau ke hoko ke he fakaotiaga. Ne tohi he aposetolo ko Paulo ke he tau Kerisiano i Korinito: “Nakai kia iloa e mutolu ko lautolu kua poitufi ke he male, kua poitufi oti ni, ka e tokotaha ni kua moua e palepale? Kia pihia ha mutolu a tafepoi, kia moua e mutolu.”​​—1 Kori. 9:24.

3. Ko hai ka kautū he poitufi ke he moui tukulagi?

³ Talahau he Tohi Tapu ki a tautolu ke tafepoi he poitufi nei. (Totou 1 Korinito 9:25-27.) Ko e palepale ko e moui tukulagi. Nakai tuga e laulahi he tau poitufi, he poitufi nei ko e tau tagata oti ne tafepoi to moua e palepale kaeke fakauka a lautolu ke hoko ke he fakaotiaga. (Mata. 24:13) To mui e tagata he poitufi ka nakai muitua a ia ke he tau matafakatufono po ke oti tuai ato hoko ke he fakaotiaga. Ko e poitufi ni anei ne ha ha i ai e palepale he moui tukulagi.

4. Ko e ha kua nakai mukamuka ai ke poi he poitufi ke he moui tukulagi?

⁴ Nakai mukamuka ai ke poi he poitufi ke moua e moui tukulagi. Ne poi a Iesu Keriso ka e nakai hehē po ke tupetupe ai, ka e nakai fai a tautolu kua pihia. Pehē a Iakopo “ko e tau mena loga kua hehe ai a tautolu oti.” (Iako. 3:2) Ko e tau kūkū ha tautolu po ke tau kūkū he falu kua maeke ke omoi a tautolu ke fakalolelole he poitufi po ke fakamanou. Ka tupu e mena nei, kua liga lata ke moua e tautolu e lagomatai ke liu atu ke he poitufi. Nakai lata ia tautolu ke ofo kaeke ke tupetupe a tautolu he falu magaaho.​​—1 Patu. 8:46.

KA TUPETUPE A KOE, FAKATUMAU KE HE POITUFI

5, 6. (a) Ko e ha ne “nakai fai mena ke tupetupe ai” e Kerisiano? Ko e heigoa ka lagomatai e Kerisiano ke “liu tu” hake ka tupetupe a ia? (e) Ko e ha e falu ne nakai “liu tu” hake he mole e tupetupe ha lautolu?

⁵ Ko e mena ka taute e tautolu he mogo ka tupetupe po ke veli kua fakakite ko e vahega tagata fēfē a tautolu. Falu ne tupetupe po ke veveli ne liu tutū hake mo e fakatumau ke fekafekau ke he Atua. Ko e falu ne fifili ke nakai tokihala. Pehē e Tau Fakatai 24:16: “Ha ko e lagafitu he veli e tagata tututonu, ka e liu tu a ia; ka ko e tau tagata mahani kelea kua liti hifo a lautolu ke he malaia.”

⁶ Pete ka tupetupe po ke veveli a tautolu, maeke ia tautolu ke liu mamatike. He falanaki a tautolu ki a Iehova, kua makai a ia ke lagomatai a tautolu ka fai lekua po ke taute e tau hepehepe. To lagomatai e ia a tautolu ke “liu tu” hake, ha kua iloa e ia kua fakaalofa a tautolu ki a ia. Ka ko e tau tagata kelea kua nakai manako ke liu tu hake. Kua fakaheu e lautolu e lagomatai he agaaga tapu he Atua mo e tau tagata haana. Ne talahau he Tohi Tapu kua “nakai fai mena ke tupetupe ai” a lautolu kua fiafia ke he fakatufono ha Iehova. Kakano e mena nei kua maeke ia tautolu ke liu atu ke he poitufi ke he moui tukulagi.​​—Totou Salamo 119:165.

7, 8. Maeke fēfē e taha ke “veli” mo e moua agaia e taliaaga he Atua?

⁷ Falu magaaho kua agahala e tagata ha ko e haana a lolelole. Liga to liu a ia ke taute lagaloga e mena hepe ia. Ka e to onoono agaia a Iehova ki a ia kua tututonu kaeke ke liu tu hake a ia ke he tau magaaho takitaha, he tokihala fakamooli mo e eketaha ke taute e mena kua hako. Ne onoono e Atua ke he tau Isaraela kua tututonu kaeke fakatokihala a lautolu mai he tau hepehepe ha lautolu. (Isaia 41:9, 10) Nakai peehi he Tau Fakatai 24:16 e tau mahani kelea kua taute e tautolu ka kua fakakite to lagomatai e Iehova a tautolu ke “liu tu” hake. (Totou Isaia 55:7.) Kua mauokafua a Iehova ko e Atua mo Iesu Keriso to taute e tautolu e tau mena oti kua maeke ia tautolu, ti fakamalolō e laua a tautolu ke “liu tu” hake.​​—Sala. 86:5; Ioane 5:19.

⁸ Pete foki ka tupetupe po ke veli e tagata poitufi he poi manavaloa, liga fai magaaho a ia ke liu tu hake mo e matutaki ke poi ka matike mafiti a ia. Nakai iloa e tautolu e “aho ia mo e magaaho ia” ka hoko ke he fakaotiaga he poitufi ke he moui tukulagi. (Mata. 24:36) Ka eketaha a tautolu ke nakai tupetupe, to fakamukamuka ai ke matutaki ke poi he poitufi mo e fakaoti ai. Ti maeke fēfē a tautolu ke kalo he tupetupe?

TAU MENA NE FAKATUPU A TAUTOLU KE TUPETUPE

9. Ko e heigoa e tau mena ne lima ka fakatutala a tautolu ki ai?

⁹ To fakatutala a tautolu ke he tau mena ne lima ka omoomoi a tautolu ke tupetupe: ha tautolu a tau lolelole, tau manako he tino, nakai fakafili tonu he fakapotopotoaga, matematekelea po ke favaleaga, mo e tau kūkū he falu. Ka taha he tau mena nei kua fakatupetupe a koe, manatu kua fakamanavalahi a Iehova mo e to nakai mafiti ke tiaki a koe.

10, 11. Ko e heigoa e lolelole ha Tavita?

¹⁰ Ko e ha tautolu a tau lolelole kua tuga e tau valavala maka he puhalatū. Ko e tau momoui he Patuiki ko Tavita mo e aposetolo ko Peteru ka fakaako a tautolu hagaao ke he ua e lolelole. Ne nakai mahani fakalatalata tumau a Tavita, ti matakutaku a Peteru he falu magaaho ha ko e tau manatu he falu tagata hagaao ki a ia.

¹¹ Ko e Patuiki ko Tavita ne nakai tautaofi tumau e tau logonaaga haana. Ha ko e lolelole nei, ne agahala a ia mo Patesepa. Fakamui, ne teitei kelipopo e ia a Napalu, ne vagahau kelea ki a ia. Pete ne taute e Tavita e tau mena mo e nakai manamanatu ki ai he falu mogo, ne nakai oti e lali haana ke fakafiafia a Iehova. Mo e lagomatai he falu, ne maeke a ia ke “liu tu” hake he mole e tau hepehepe haana.​​—1 Samu. 25:5-13, 32, 33; 2 Samu. 12:1-13.

12. Pete ne taute e ia e tau hepehepe, fakatumau fēfē a Peteru ke he poitufi?

¹² Ne matakutaku a Peteru ke he manatu he falu tagata hagaao ki a ia. Ne fakatumau a ia ke mahani fakamooli ki a Iesu mo Iehova, ka e falu mogo ne fakatupu he matakutaku a ia ke taute e tau hepehepe. Ma e fakatai, lagatolu e fakatikai na iloa e ia a Iesu. (Luka 22:54-62) Taha magaaho foki, ne taute e ia e falu Kerisiano ke tuga kua mua atu a lautolu ke he falu Kerisiano foki. Kua hepe e aga ha Peteru, ti maeke e falu he fakapotopotoaga ke fifitaki a ia. Ati age e Paulo ki a Peteru e fakatonuaga malolō. (Kala. 2:11-14) Ita nakai a Peteru ke he fakatonuaga nei mo e oti e poi he poitufi ke he moui? Nakai. Ne manamanatu fakalahi a ia ke he mena ne talahau e Paulo, hiki e aga haana, ti fakatumau ke he poitufi.

13. Ko e ha e tau lekua malolō tino kua fakatupu a tautolu ke tupetupe?

¹³ Ko e tau lekua malolō tino ka taute e tau momoui ha tautolu ke uka lahi. Ti ko e fua, falu ne mahala he poitufi. Ma e fakatai, ko e matakainaga fifine i Sapanī ne gagao lahi ke 17 e tau he mole e papatiso haana. Ne fakaatā e ia e tau lekua malolō tino haana ke fakatupu a ia ke lolelole fakahaga he kupu mooli, ati lolelole fakaagaaga a ia. Ti tokoua e motua ne ahiahi atu ki a ia mo e atihake a ia. He mogo ne liu mai a ia ke he tau feleveiaaga, ne fakafeleveia totonu he tau matakainaga a ia ti kamata a ia ke tagi. Kua liu tuai e matakainaga fifine ha tautolu ke he poitufi.

14, 15. Ko e heigoa kua lata ke taute e tautolu ka moua e tautolu e tau manako hehē? Talahau e fakatai.

¹⁴ Tokologa ne tupetupe ha ko e tau manako he tino. Ka kamatamata mai e tau manako ha tautolu, kua lata ia tautolu ke taute e tau mena oti ke fakatumau e tau manamanatuaga mo e tau mahani ha tautolu ke meā he fakatatau ke he tau tuaga he Atua. Pehē a Iesu ka fakatupetupe he tau mata po ke tau lima ha tautolu a tautolu, kua lata ia tautolu ke “tiaki” ai. Kua lata ia tautolu ke tiaki e tau manatu mo e tau gahua feuaki ne taute a tautolu ke oti e poi he poitufi.​​—Totou Mataio 5:29, 30.

¹⁵ Pehē taha matakainaga taane ne feaki hake he kupu mooli na leva lahi he manatu e ia, ha ha ia ia e tau manako fakasotoma. Ne pehē a ia kua kehe tumau e logonaaga haana ti fuafuakelea a ia ka haia mo e falu tagata. He 20 e tau haana, ne eke a ia mo paionia tumau mo e fekafekau lagomatai he fakapotopotoaga. Ti taute e ia e hepe lahi mahaki ati akonaki atu ai, mo e lagomatai he tau motua a ia. Ne liogi a ia, fakaako e Tohi Tapu, ti eketaha ke lagomatai e falu tagata. Kua lagomatai he mena nei a ia ke fakatumau e poi he poitufi. Leva tuai e tupu he mena nei, ka e pehē a ia: “He falu mogo ne logona pihia agaia au, ka e nakai fakaatā e au e tau mena ia ke mahala au. Ne iloa e au to nakai fakaatā e Iehova a koe ke kamatamata ke he mena ne nakai fahia a koe. Ti talitonu au kua manatu e Atua na maeke ia au ke taute.” Nakai manako e matakainaga taane nei ke fakaatā ha mena ke utakehe a ia mai he poitufi. Iloa e ia ko e moui he lalolagi foou kua uho ke he ha mena kua fakauka a ia ki ai mogonei. Pehē a ia: “Ato hoko ke he mogoia, to fakatumau au ke tau atu.”

16, 17. (a) Ko e heigoa ne lagomatai e taha matakainaga taane ke manatu kua ekefakakelea ki a ia? (e) Ko e heigoa kua lata ke manatu e tautolu hagaao ke he fakapotopotoaga ke nakai tupetupe a tautolu?

¹⁶ Liga maeke ia tautolu ke fakaatā a tautolu ke tupetupe he nakai fakafili tonu he falu he fakapotopotoaga. I Falani, ko e matakainaga taane ne eke mo motua ne manatu kua taute fakakelea atu ki a ia. Ne ita lahi mahaki a ia ti oti e fano he tau feleveiaaga mo e gahua he fonua. Tokoua e motua ne ahiahi atu ki a ia mo e fanogonogo fakamitaki he fakamaama e ia e mena ne talitonu kua tupu. Fakamafana e laua a ia ke falanaki ki a Iehova ti fakamanatu ki a ia e mena ne mua e aoga ko e fakafiafia e Atua. Fanogonogo a ia ke he fakatonuaga ha laua mo e nakai leva ti liu ke he poitufi.

¹⁷ Kua lata oti ia tautolu ke manatu ko Iesu Keriso ne kotofa he Atua ko e Ulu he fakapotopotoaga. Nakai lata ia tautolu ke fakaatukehe hagaao ke he tau mena ne taute he tau tagata nakai mitaki katoatoa. Ha ha ia Iesu e fofoga kua “tuga ne puho he afi.” Ne maama oti e ia e tau mena ne tutupu i loto he fakapotopotoaga, mua atu ke he iloaaga ha tautolu. (Fakakite. 1:13-16) Ma e fakatai, liga manatu a tautolu kua ha ha i ai e nakai fakafili tonu i loto he fakapotopotoaga. Ka e liga nakai maama mitaki e tautolu e mena ne tupu po ke kakano ne tupu ai. Ne fakahako e Iesu e tau lekua he fakapotopotoaga ke he puhala hako mo e ke he magaaho hako. Ti nakai lata ia tautolu ke fakaatā e mena ne taute he taha Kerisiano ke fakatupetupe a tautolu ke mokulu ki fafo he poitufi.

18. Maeke fēfē a tautolu ke fakatumau ke mahani fakamooli he mogo matematekelea lahi po ke favaleaga?

¹⁸ Ua foki e mena fakatupetupe ko e matematekelea lahi po ke favaleaga mo e tau kūkū he falu he fakapotopotoaga. He tala ha Iesu hagaao ke he tagata ne gana e tau tega akau, ne fakakite e ia to tupetupe e falu ha ko e ha lautolu a lauia he “matematekelea lahi po ke favaleaga” ha kua eke mo taha he tau tagata he Atua. Ko e ha tautolu a magafaoa, tau katofia, po ke fakatufono ka fakatupu ki a tautolu e matematekelea lahi po ke favale ki a tautolu ha ko e kupu mooli. Ko e tagata ka hagahaga kelea pauaki ke tupetupe kaeke ke “nakai fai vaka a ia,” kakano kua lolelole e tua haana. (Mata. 13:21) Kaeke ke fifili a tautolu ke nonofo fakatata ki a Iehova, to lagomatai he fekau he Kautu a tautolu ke malolō e tau vaka. Ti ka lauia a koe ke he tau magaaho uka, manamanatu fakahokulo ke he tau mena “ke nava ki ai.” (Totou Filipi 4:6-9.) To foaki e Iehova ki a tautolu e malolō ke fakatumau ke mahani fakamooli he tau mogo kamatamata ke nakai tauveli a tautolu mai he poitufi.

19. Kalo kehe fēfē a tautolu neke tupetupe ka fakaita he taha tagata a tautolu?

¹⁹ Falu ne oti e fekafekau ki a Iehova ha ko e tau kūkū he falu tagata. Po ke liga tupetupe e tagata ha kua taute he falu e tau mena ne nakai fakaatā he loto manamanatu haana a ia ke taute. (1 Kori. 8:12, 13) Ka fai tagata ne fakaita a tautolu, to hogohogo manavalahi kia a tautolu ti toka e kupu mooli? Talahau he Tohi Tapu ki a tautolu ke ua fakafili mo e ke fakamagalo e falu, pete ka manamanatu a tautolu kua hako a tautolu ke ita. (Luka 6:37) Ka logona e koe e ita, hūhū ki a koe: ‘Kua fakafili kia e au e falu fakavē ni ke he puhala taute mena haaku? To toka kia e au e kupu mooli ha ko e nakai mitaki katoatoa he tau matakainaga haaku?’ Ko e fakaalofa ha tautolu ma Iehova ka lagomatai a tautolu ke nakai fakaatā e tau mena ne taute he falu ke taofi a tautolu mai he hoko ke he fakaotiaga he poitufi ma e moui.

POI FAKAMANAVALAHI MO E KALO KEHE HE TUPETUPE

20, 21. Ko e heigoa haau ka taute he poitufi ke he moui tukulagi?

²⁰ Manako nakai a koe ke ‘poi ke hoko ke he fakahikuaga’? (2 Timo. 4:7, 8) Ti fakaako e Tohi Tapu mo e ha tautolu a tau tohi, taute e kumikumiaga, mo e manamanatu fakahokulo ke maeke ia koe ke iloa e kakano ne liga tupetupe a koe. Olelalo ki a Iehova ma e agaaga tapu ke taute a koe ke mauokafua. Manatu ka tupetupe po ke veveli a tautolu, maeke a tautolu ke liu poi mo e hoko ke he fakaotiaga. Liga maeke a tautolu ke fakaako mai he tau hepe ha tautolu ke maeke a tautolu ke tafepoi fakamitaki he poitufi.

²¹ Fakakite he Tohi Tapu kua lata ia tautolu ke tafepoi he poitufi ke hoko ke he fakaotiaga ka manako a tautolu ke he palepale he moui tukulagi. He tafepoi a tautolu, to foaki e Iehova “lahi e mafola” ki a tautolu. (Sala. 119:165) To fakatumau a ia ke lagomatai a tautolu mogonei ti to foaki ki a tautolu e tau monuina tukulagi ka hoko a tautolu ke he fakaotiaga he poitufi.​​—Iako. 1:12.