Poi ke he Poitufi mo e Fakaukaaga
“Kia taute a tautolu ke tafepoi mo e fakauka, ke he poitufi kua fakatoka ki mua ha tautolu.”—HEPERU 12:1, NW.
1. (a) Ko e heigoa ne fakatu ki mua ia tautolu he magaaho ne taute e tautolu e tukuleleaga ke he Atua ko Iehova? (e) Ko e heigoa e poitufi kua lata e Kerisiano ke mau tauteute ki ai?
HE MAGAAHO ne tukulele e tautolu ni a tautolu ki a Iehova he puhala atu ia Iesu Keriso, ne fakatu he Atua ki mua ia tautolu, ke he vagahau fakatai, e poitufi. He fakaotiaga he poitufi, to ha ha i ai e fakamailoga ka foaki age ki a lautolu oti kana ne kautu he hohoko atu ke he fakaotiaga. Ko e heigoa e fakamailoga ia? Ko e moui tukulagi! Ke moua e fakamailoga homo ue atu nei, kua lata e Kerisiano poitufi ke tauteute, nakai ke he poi mafiti ku, ka e ko e poitufi loa. Ti kua lata a ia ke ha ha i ai e fakaukaaga. Kua lata a ia ke fakafahi ua e fakauka ke loa e gahua fakamakamaka he poitufi mo e ke he tau mena fakalavelave kua tupu mai he magaaho poitufi.
2, 3. (a) To lagomatai he heigoa a tautolu ke tafepoi i loto he poitufi Kerisiano ke he fakahikuaga? (e) Ne lagomatai fefe he loto olioli a Iesu ke poi he poitufi fakalataha mo e fakaukaaga?
2 To lagomatai he heigoa a tautolu ke tafepoi ke he poitufi pihia ke hoko atu ke he fakahikuaga? Ha kua pihia, lagomatai he heigoa a Iesu ke fakauka he magaaho ne nofo fakatagata a ia he lalolagi? Ne tahake mai he loto e malolo hana mai he fuafuaaga he olioli. Ke totou a Heperu 12:1-3 (NW): “Ti kua pihia mogoia, ha kua lahi mahaki tuga e tau aolu e tau tagata fakamoli kua takai mai ki a tautolu, kia lata foki a tautolu ke tuku kehe e tau mena mamafa oti mo e agahala kua mukamuka lahi ke fakavihi aki a tautolu, mo e kia taute a tautolu ke tafepoi mo e fakauka, ke he poitufi kua fakatoka ki mua ha tautolu, he onoono fakalahi atu a tautolu ke he Iki Hukui mo e Fakamitaki Katoatoa he tua ha tautolu, ko Iesu. Ma e loto olioli ne fakatoka ki mua ia ia ne fakauka a ia ke he akau fakakikiveka, fakafiufiu fakama, mo e kua nofo hifo he fahi matau he nofoaiki he Atua. Moli lahi, kia manamanatu fakatata lahi atu ke he taha ko ia ne fakauka atu ke he tala kehe he tau tagata agahala kua totoko atu ni ke he ha lautolu ni a tau mena, ke nakai liga ke mategugu a mutolu mo e nakai fahia ha mutolu a tau solu.”
3 Mai he fekafekauaga katoa hana ke he tau tagata, kua maeke a Iesu ke poi tumau ke he poitufi ha ko e loto olioli a Iehova. (Fakatai Nehemia 8:10.) Ne lagomatai he loto olioli hana a ia ke fakauka foki ke he mate nakai lilifu ki luga he akau fakakikiveka, ko e mena ne moua he mole ai e loto olioli kua nakai fakaai ke fakamaama he matike mai he mate mo e haele hake ke he fahi matau he hana Matua, kua ha ha i ai ke kitia e tau gahua he Atua ati hoko ke he fakahikuaga. Mai he hana fakaukaaga he moui fakatagata ke he fahi he Atua, kua kuku mau a ia ke he tonu he moui tukulagi hana. E, tuga he pehe a Luka 21:19: “Ko e ha mutolu a fakauka, kia moua ai ha mutolu a moui.”
4. Ko e heigoa e tau vahega fakafifitaki ne fakatu e Iesu ma e hana faoa tafepoi, mo e ko e heigoa kua lata a tautolu ke toka he tau loto manamanatu?
4 Kua fakatu e Iesu Keriso e fakafifitakiaga mitaki lahi ma e hana tau faoa tafepoi, mo e kua fakamafana mai he fakafifitakiaga hana a tautolu kua maeke foki a tautolu ke mua. (1 Peteru 2:21) Ko e tau mena ne ole mai a Iesu ki a tautolu ke taute, kua maeke ia tautolu ke taute. Tuga he fakauka a ia, kua maeke a tautolu ke pihia foki. Mo e he kuku e tautolu e fifitakiaga mauokafua hana, ti kua lata a tautolu ke toka tumau ha tautolu a tau loto ke he kakano ke loto olioli lahi. (Ioane 15:11, 20, 21) To fakamalolo he loto olioli lahi a tautolu ke fakatumau ke tafepoi ke he poitufi i loto he fekafekauaga a Iehova ato moua e fakamailoga lilifu lahi ko e moui tukulagi.—Kolose 1:10, 11.
5. To maeke fefe a tautolu ke loto olioli lahi mo e fakamalolo mai ke lata mo e poitufi i mua ia tautolu?
5 Ke lagomatai aki a tautolu ke fakatumau ke he poitufi, kua foaki mai e Iehova e malolo kua mua atu mai he tau mena ne fa mahani ki ai. He magaaho ka favale mai ki a tautolu, ne fakamalolo mai he malolo ia mo e lotomatala a tautolu ko e ha kua monuina ai a tautolu ke lauia he tau favaleaga. (2 Korinito 4:7-9) Ko e ha mena he tau mena ne lauia ai ha ko e fakalilifu ke he higoa he Atua mo e he fakatokoluga e pule katoatoa hana, ko e kakano ke loto olioli ha kua nakai maeke taha ke uta kehe mai ia tautolu. (Ioane 16:22) Kua fakamaama mai he mena nei ko e ha he magaaho ne mole mai he fahi e tau aposetolo, mai he poaki he tau Saneheturini Iutaia ha kua taute e fakamoliaga ke he tau mena homo ue atu ne fakakatoatoa he Atua ko Iehova hagaao ki a Iesu, ne loto olioli lahi “ha kua eke ni kua aoga a lautolu ke eke fakakelea ha ko e hana higoa.” (Gahua 5:41, 42) Ne nakai moua mai e loto olioli ha lautolu he tau favaleaga ka e mai he logonaaga hokulo mamakona he iloa kua fakafiafia e lautolu a Iehova mo Iesu.
6, 7. Ko e ha kua maeke e Kerisiano ne poi ke fiafia lahi pete ni kua ha ha ia ia e tau matematekelea, mo e ko e heigoa e mena ka moua mai?
6 Ko e taha mena ne fakatumau foki e malolo i loto he tau momoui ha tautolu ko e amaamanaki kua fakatu he Atua i mua ia tautolu. Tuga ne talahau mai e Paulo: “Kua ha ha ia tautolu e mafola mo e Atua ha ko e Iki ha tautolu, ko Iesu Keriso; Ko ia foki kua moua mai ai e tautolu e takitakiaga ke he fakaalofa noa nai, kua tutu ai a lautolu ke he tua; ha ha ne hula foki a tautolu mo e amaamanaki ke he monuina mai he Atua. Ka e nakai kuenaia foki ia, ka kua hula foki a tautolu ke he tau mena matematekelea, ha kua iloa ni ko e matematekelea kua tupu mai ai e fakauka. Ko e fakauka kua tupu ai e fakamoli, ko e fakamoli kua tupu ai e amaamanaki, Ko e amaamanaki foki kua nakai fakamā ai.”—Roma 5:1-5.
7 Nakai moua mai e loto olioli he tau matematekelea, ka e tupu mai e tau fua he mafola ia lautolu ka mole atu. Hanai e tau fua ko e fakaukaaga, ko e tuaga ne talia, amaamanaki, mo e fakamoliaga he amaamanaki ia. Ko e fakaukaaga ha tautolu ka takitaki atu ke he ha tautolu a taliaaga mai he lagi. He magaaho ka ha ha ia tautolu e taliaaga he Atua, kua maeke a tautolu ke mauokafua e amaamanaki ke he hokomaiaga moli he tau maveheaga ne taute e ia. Kua taofi he amaamanaki nei a tautolu ke he puhala ha tautolu mo e fakamalolo mai ki a tautolu ka ha ha i lalo he tau matematekelea ato fakamoli e amaamanaki.—2 Korinito 4:16-18.
Fiafia a Lautolu ne Fakauka!
8. Ko e ha kua nakai moumou magaaho ki a lautolu e vaha fakatalitali nei?
8 He magaaho taha ne fakatalitali ke he magaaho ne fakatoka mai he lagi ke tufa e tau fakamailoga ke he tau tagata tafepoi, kua mahani a tautolu mo e tau hikihikiaga. Ko e tau mena fakaagaga a ia kua laukauka atu mai i loto ia tautolu, ne tupu mai he kautu e fakafeleveiaaga ke he tau mena uka, mo e moua mai he tau mena ia e fiafia pauaki lahi mahaki he Atua ki a tautolu. Kua fakamoli mai he tau mena ia ko e heigoa a tautolu mo e tuku mai ki a tautolu e magaaho ke fakagahuahua e tau fuafuaaga mitaki taha ne fakakite mai e lautolu i tuai, mua atu a ia ko e Fakafifitakiaga, ko Iesu Keriso. Kua pehe e tutaki ko Iakopo: “Haku a tau matakainaga na e, kia manatu a mutolu ko e mena ke fiafia lahi ai ka moua a mutolu he tau kamatamata kehekehe; He iloa e mutolu ko e kamatamata he tua ha mutolu, kua tupu mai ai e fakauka. Ka kia toka e fakauka ke eke hana gahua katoatoa, kia katoatoa ai mo e fakamaopoopo ai a mutolu, kia nakai toe ha mena kua nakai moua.” (Iakopo 1:2-4) E, kua liga amaamanaki a tautolu ke ha ha i ai e tau mena uka kehekehe, ka e kua aoga e tau mena ia ke fakagahua tumau e tautolu e tau fuafuaaga kua tonu. Ti kua fakakite e tautolu ko e to nonofo a tautolu i loto he poitufi nei ato mua ke moua e fakamailoga, pete ni ko e heigoa e tau fakalavelave kua feleveia mo tautolu.
9, 10. (a) Ko e ha kua fiafia a lautolu ne fakauka ke he tau mena uka, mo e kua lata a tautolu ke fefe e fakafehagai ke he tau mena uka? (e) Ko hai a lautolu ne fiafia mai i tuai, mo e maeke fefe a tautolu ke totou ko e taha ia lautolu?
9 Ti kua nakai ofo ai mogoia, he pehe a Iakopo: “Uhoaki e tagata kua fakauka ke he kamatamata; ha ko e mena ka oti e kamatamata, ti moua ai e ia e foufou he moui, kua talahau mai ai he Iki ke foaki e ia kia lautolu kua fakaalofa kia ia”! (Iakopo 1:12) Kia taute tumau a tautolu ke fehagaaki mo e nakai tukumuli ke he tau mena uka, ko e fakakanavaakau ke he tau fuafuaaga he mahani fakaatua ke fakamalolo aki a tautolu ke fakakaumahala a tautolu.—2 Peteru 1:5-8.
10 Kia manatu ko e puhala kua taute he Atua ki a tautolu nakai ko e mena fou po ke nakai fai mena pihia fakamua. Ne “tuga e tau aolu e tau tagata fakamoli” kua tua moli he tau vaha i tuai ne fetataiaki e tau puhala ne taute ki a lautolu he fakakite fakamoli e lautolu ha lautolu a nakai fehikihikiaki ke he Atua. (Heperu 12:1, NW) Ne fakamau e taliaaga he Atua ki a lautolu i loto he hana Kupu, mo e ti kua pehe ai a tautolu kua fiafia a lautolu oti ha kua tumau a lautolu i lalo he kamatamata. Kua pehe a Iakopo: “Ma tau matakainaga, kia uta mo tau fakafifitakiaga e matematekelea mai he tau mena kelea mo e fakagahuahuaaga he fakamanavalahi he tau perofeta, ne vagahau ke he higoa ha Iehova. Kitiala! Kua fakailoa e tautolu kua fiafia a lautolu ne fakauka. Kua fita he logona e mutolu e fakaukaaga a Iopu mo e kua fita he kitia e mena ne moua mai ne age e Iehova, ko e loto molu lahi a Iehova ke he loto hohofi mo e fakaalofa hofihofi noa lahi.” (Iakopo 5:10, 11, NW) Ne talahau tuai mai ko e he tau vaha fakahiku uka nei, to kitia ai e falu ke he lalolagi kua fekafekau fakamoli ki a Iehova, ke tuga ne taute he tau perofeta ia he tau senetenari i tuai. Nakai kia kua fiafia a tautolu ke eke ko lautolu ke taute pihia?—Tanielu 12:3; Fakakiteaga 7:9.
Futiaki mai he Tau Kupu Fakamalolo a Iehova
11. To maeke fefe he Kupu he Atua ke lagomatai a tautolu ke fakauka, mo e ko e ha kua lata a tautolu ke nakai tuga e tau nonofoaga tuletule he fakatai a Iesu?
11 Ne tuhi atu a Paulo ke taha lagomatai foki ke he fakaukaaga he magaaho ne pehe a ia ko e “puhala mai he fakamanavalahi he fakaukaaga, mo e puhala mai he fakamaloloaga ne futiaki mai he tau kupu Tohiaga Tapu, ke liga to kuku mau e tautolu ha tautolu a amaamanaki.” (Roma 15:4, The Twentieth Century New Testament) Ko e kupu moli, e Kupu he Atua, kua lata ke eke ke vakavaka hokulo i loto ia tautolu ke maeke ke futiaki mai ia tautolu e tauteaga kua tonu he tau magaaho oti kana. Kua nakai fai aoga ki a tautolu ke eke ke tuga e kelekele tuletule ne fakamaama mai he fakatai ha Iesu ke he tagata to lakau: “Pihia foki a lautolu ne gana ke he mena patu, ko lautolu haia ne fanogonogo ke he kupu, ti talia ai agataha mo e fiafia; Ka e nakai fai vaka a lautolu, ti nakai leva ha lautolu a tumau; ka tupu e matematekelea, po ke favale ha ko e kupu, ti tupetupe ai agataha a lautolu.” (Mareko 4:16, 17) Ko e kupu moli mai he Kupu he Atua ne nakai taute ke vakavaka hokulo lahi i loto ia lautolu ia; ha kua pihia, he tau magaaho matematekelea, kua nakai maeke a lautolu ke futiaki mai tuga e punaaga moli he malolo mo e amaamanaki.
12. Ko e heigoa kua lata a tautolu ke nakai fakavaia he magaaho ne talia e tala mitaki?
12 Ko e ha tagata kua talia e tala mitaki he Kautu kua nakai lata ke fakavaia e ia a ia ni ke he tau mena ka muitua mai. Kua uta e ia e puhala he moui ka tutupu mai e matematekelea po ke favale. (2 Timoteo 3:12) Ka kua lata a ia ke pehe “ko e mena ke fiafia lahi ai” ke moua e monuina ka lauia he tau mena uka kehekehe he taofi mau ke he Kupu he Atua mo e vagahau e mena ia ke he falu.—Iakopo 1:2, 3.
13. Fefe mo e ko e ha ne loto olioli ai a Paulo ha ko e tau Kerisiano i Tesalonia?
13 He senetenari fakamua, ne miha e tau tagata Tesalonia ha ko e fakamatala ha Paulo. He magaaho ne fano a Paulo ki Perea, ne muitua e tau tagata totoko ia ki a ia ke uhu foki e falu lekua loga. Ki a lautolu ia ne fakamoli ne nonofo hifo i Tesalonia, ne tohia e aposetolo ne lauia he favale ki ai: “Kua lata kia mautolu, ke fakaaue nakai noa ke he Atua ha ko mutolu, ko e tau matakainaga na e, kua lata he pihia ha kua tupu lahi ni ha mutolu a tua, kua fakalahi foki ha mutolu a feofanaki, ko mutolu oti kana takitokotaha. Ko e haia, ko mautolu nai, kua hula a mautolu kia mutolu ke he tau ekelesia he Atua, ha ko e fakauka mo e tua ha mutolu kua fakauka ai a mutolu ke he tau mena favale oti ne hoko kia mutolu, mo e tau mena matematekelea; Ko e fakamailoga ia he fakafiliaga tonu he Atua, kia talahaua ai a mutolu kua lata mo e kautu he Atua, ko e mena ia kua mamahi ai a mutolu.” (2 Tesalonia 1:3-5) Ka e pete ni, mai he matematekelea ha lautolu ke he tau lima he tau fi, ne tupu e tau Kerisiano Tesalonia ke tuga a Keriso mo e ke numela loga. Kua maeke fefe e mena ia? Ha kua futiaki mai e lautolu e malolo he Kupu fakamalolo a Iehova. Ne omaoma a lautolu ke he tau poaki he Iki mo e tafepoi ke he poitufi mo e fakaukaaga.—2 Tesalonia 2:13-17.
Ma e Fakamouiaga he Falu
14. (a) Ko e heigoa e tau kakano ne mau e loto olioli lahi ha tautolu ke he fekafekauaga pete ni kua ha ha i ai e tau mena uka? (e) Ko e heigoa ne liogi a tautolu ki ai, mo e ko e ha?
14 Ke fakamua aki ha kua lata ke fakamatalahi e Atua, kua fakauka fakamoli a tautolu mo e nakai togitogi ha ko e tau mena uka mo e tau favaleaga. Ka e ha ha i ai e taha kakano nakai fulukovi ko e ha ne fakatokolalo a tautolu ke he tau mena pihia: ke maeke a tautolu ke tukuogo atu e Kautu ke he falu ke fakalahi atu e tau tagata fakailoa he Kautu he Atua ka tupu mai ke taute “ke talahau ai, ke hoko mai ai e fakamouiaga.” (Roma 10:10) Kua lata a lautolu ne gahua he fekafekauaga he Atua ke liogi ke he Takitaki Pule he heleheleaga ke fakamonuina ha lautolu a gahua ke foaki mai e tau tagata fakailoa tokologa mae Kautu. (Mataio 9:38) Ne tohia a Paulo ki a Timoteo: “Ko e tau mena foki ne fanogonogo mai a koe kia au mo e tau talahau tokologa, kia tuku age e koe ke he tau tagata fakamoli, kua maeke ni ke fakaako atu ke he falu. Hanai, kia fakauka a koe ke he tau mena ke mamahi ai, tuga ne tagata tau mitaki a Iesu Keriso.”—2 Timoteo 2:2, 3.
15. Ko e ha kua lata a tautolu ke taute ni e tautolu e tau mahani tuga e tau kautau mo e tau tagata ne fetoko “ke he fetoko”?
15 Ne vevehe kehe mai ni he kautau a ia mai he moui ne nakai lahi e fakalavelave he tagata nakai hu he matakau kautau. Ke tuga ia, kua lata a tautolu ke nakai fakavihi ni e tautolu a tautolu, ke he tau mena ha lautolu kua nakai ha ha i loto he matakau kautau he Iki ka ko lautolu, ke he mena moli, kua ha ha he fahi totoko. Ti kua, ne tohia atu foki a Paulo ki a Timoteo: “Nakai fakai ha tagata tau kua tau mo e fakalavelave e ia a ia ke he tau mena he mouiaga nai, kia fakafiafia e ia a ia ne fifili a ia ke eke mo tagata tau. Kaeke foki ke fetoko e taha ke he fetoko, nakai fakafoufou a ia ka nakai fetoko kua lata mo e fakatufono.” (2 Timoteo 2:4, 5) Ke he fakamakamaka ke moua e kautuaga he poitufi ma e “foufou he moui,” kua lata a lautolu ne tafepoi ke tauteute e mahani fakalatalata mo e kalo mai he tau mena fakamamafa kua nakai aoga mo e tau mena fakafevihiaki. Ke he puhala nei kua maeke a lautolu ke tuku e loto katoatoa ke uta e tala mitaki he fakamouiaga ke he falu.—Iakopo 1:12; fakatatai 1 Korinito 9:24, 25.
16. Ko e heigoa kua nakai maeke ke pipi mau, mo e lagomatai atu ki a hai ka fakauka a tautolu?
16 Ha kua fakaalofa a tautolu ke he Atua mo lautolu ne tuga e tau mamoe kua kumi ke moua a ia, kua fiafia a tautolu ke fakauka ke he tau mena loga ke maeke ke hokotia ke he falu e tala mitaki he fakamouiaga. To liga pipi he tau fi a tautolu he fakamatala e Kupu he Atua. Ka e to nakai maeke e Kupu he Atua ke pipi mau, mo e vagahau ke he fakamouiaga ke he falu kua nakai maeke ke pipi aki e filifili. Ne fakamaama atu e Paulo ki a Timoteo ko e ha kua manako lahi a ia ke fakafeleveia e tau mena uka: “Kia manatu a Iesu Keriso mai he fanau a Tavita, kua fakatu mai ia lautolu kua mamate, kua lata mo e haku a vagahau mitaki; Ha ko ia foki kua mamahi ai au, kua hoko ni ke he liliaga, tuga ne matahavala; ka ko e kupu he Atua kua nakai lili ia. Ko e mena nai kua fakauka ai au ke he tau mena oti ha ko lautolu ne fifili, kia moua foki e lautolu e fakamouiaga ha ia Keriso Iesu mo e monuina tukulagi.” (2 Timoteo 2:8-10) He vaha nei kua nakai ha ha hokoia he tau loto ha mautolu a lautolu ne to tote hifo ne toe kua ha ha he fakatokaaga ma e kautu he lagi ka ko e moto tagata foki he falu mamoe he Leveki Mamoe Mitaki, ko Iesu Keriso, ko e moto tagata kua moua e lalolagi Parataiso i lalo he Kautu a Keriso.—Fakakiteaga 7:9-17.
17. Ko e ha kua nakai lata a tautolu ke tiaki e poitufi, mo e ko e heigoa e taui kaeke kua fakatumau a tautolu ke he poitufi ke hoko ke he fakahikuaga?
17 Kaeke ko e tau tagata fa fakaoti noa a tautolu, to nakai lagomatai ni e tautolu a tautolu po ke ha tagata foki ke he fakamouiaga. He fakauka ke he poitufi Kerisiano, pete ni ko e heigoa e tau fakalavelave ne feleveia, kua fakatumau ni e tautolu a tautolu he fakatokaaga ke he fakamailoga mo e maeke ai ke lagomatai fakahako ke he falu e fakamouiaga, ka e he magaaho taha ko e fakafifitakiaga malolo lahi ke he falu. Ko e heigoa po ke heigoa e amaamanaki ha tautolu, ki luga he lagi po ke he lalolagi, ko e manamanatuaga ha Paulo ke “poi mau atu au ke he fakamailoga ke moua ai e palepale” e mena mitaki lahi ke fifitaki ki ai.—Filipi 3:14, 15.
Tumauokafua e Fakatumau ke he Poitufi
18. Ke moua e fakamailoga kua falanaki ke he heigoa, ka e ke hoko atu ke he fakahikuaga, ko e heigoa kua lata ke kalo mai?
18 Ke hoko atu ke he fakahikuaga he puhala Kerisiano ha tautolu mo e kautu lahi ke he fakamatalahiaga a Iehova mo e mua ke moua e fakamailoga kua toka pauaki e ia ma tautolu ne falanaki atu ke he ha tautolu a mauokafua ke fakatumau atu ke he poitufi loa katoa. Kua nakai maeke a tautolu, he mogoia, ke fakamalolo ke hoko atu ke he fakaotiaga kaeke kua fakamamafa ne tautolu a tautolu mo e tau mena kua nakai fekafekau ke he gahua tututonu. Pihia foki ni ka fofole kehe e tau mena pihia, kua tonuhia agaia e tau mena kua lata ki ai ke ui mai ma e loto toa katoa kua maeke a tautolu ki ai. Ha kua pihia, kua fakatonu mai a Paulo: “Kia lata foki a tautolu ke tuku kehe e tau mena mamafa oti mo e agahala kua mukamuka lahi ke fakavihi aki a tautolu, mo e kia taute a tautolu ke tafepoi mo e fakauka, ke he poitufi kua fakatoka ki mua ha tautolu.” (Heperu 12:1, NW) Ke tuga a Iesu kua lata a tautolu ke nakai pehi lahi e tau mena uka kua eke ke tupu mai ka e manamanatu ko e mena fakatau tote a lautolu ma e fakamailoga olioli lahi.—Fakatatai Roma 8:18.
19. (a) Ko e heigoa e loto mauokafua ne talahau e Paulo he tata atu ke he fakaotiaga he moui hana? (e) He tata a tautolu ke he fakaotiaga he poitufi he fakaukaaga, ko e heigoa e loto mauokafua kua lata ke ha ha ia tautolu hagaao ke he taui ne mavehe mai?
19 He tata atu ke he fakaotiaga he moui hana, kua maeke a Paulo ke pehe: “Kua tau tuai au ke he tau mitaki, kua fakahiku e au e poitufi, kua taofi au ke he tua. Hanai, kua fakatoka tuai māku e foufou he tututonu.” (2 Timoteo 4:7, 8) Ko tautolu i loto he poitufi nei he fakaukaaga ke moua e fakamailoga he moui tukulagi tukumuitea. Kaeke kua oti tuai e fakaukaaga ha tautolu ha kua tuga ko e loa lahi e poitufi mai he mena ne amaamanaki a tautolu ki ai mai he magaaho ne kamata a tautolu, to kaumahala ni a tautolu he mgaaho kua tata ke moua e palepale ne mavehe ki ai. Kia nakai fakahehe. Kua nakai fai huhu ki ai, to ha ha i ai nakai e palepale.
20. Kua lata ke fefe e fifiliaga mauokafua ha tautolu ato hoko atu ke he fakaotiaga he poitufi?
20 Kia nakai mategugu ha tautolu a tau mata he kitekite atu ma e kamataaga he matematekelea lahi mahaki, kua tamai fakamua e fakaotiaga ki a Papelonia Lahi mo e hoko atu foki ke he fakatokatokaaga ne toe ha Satani. (2 Peteru 3:11, 12) Ke he onoonoaga ke he tau fakamailoga oti kana ne takai ia tautolu, kia onoono atu a tautolu ki mua, mo e tua. Kia pipi hake e tautolu he tokupu e malolo he fakaukaaga, mo e kia taute mau e tautolu mo e fakamalolo lahi ke he poitufi kua fakatu he Atua ko Iehova i mua ia tautolu, ato hoko mai e fakaotiaga mo e ti moua ai e fakamailoga olioli lahi, ke he fakamatalahiaga a Iehova ka puhala mai ia Iesu Keriso.
To Tali Fefe a Koe?
◻ Ko e vahega poitufi fefe kua lata e Kerisiano ke nofo mau tauteute?
◻ Ko e ha kua aoga lahi e loto olioli ke he poitufi?
◻ Ko e heigoa e matapatu kakano mena ne fakatumau a tautolu ke he fekafekauaga pete ni kua ha ha i ai e tau mena uka?
◻ Ko e ha kua nakai lata a tautolu ke tiaki e poitufi ne fakatu he Atua i mua ia tautolu?
[Fakatino he lau 29]
Ke tuga e poitufi manavaloa, kua lata e tau Kerisiano ke fakauka
[Fakatino he lau 31]
Ke foli ma e “foufou he moui,” kua lata e tau tagata tafepoi ke tauteute e mahani fakalatalata