TAU HŪHŪ TOHI TAPU KUA TALI

Maeke nakai e tau agahala ha tautolu ke fakamagalo?

Hagaao ke he Tohi Tapu, kua agahala e tau tagata oti kana. Hihiga a tautolu ke agahala ha ko e tagata fakamua ko Atamu. Ti falu mogo ne taute e tautolu e tau mena kelea ti liga tokihala ai he mogo fakamui. Ko e Tama he Atua ko Iesu Keriso ne totogi e tau agahala ha tautolu he mate ma tautolu. Ko e poa lukutoto haana ati maeke ke fakamagalo. Ko e mena fakaalofa mai he Atua.—Totou Roma 3:23, 24.

Falu tagata ne taute e tau agahala kelea lahi mahaki ti manatu na fakamagalo kia he Atua a lautolu. Fiafia ai, ko e Kupu he Atua ne pehē: “Ko e toto foki a Iesu Keriso hana Tama kua fakamea ai a tautolu he tau hala oti kana.” (1 Ioane 1:7) Fakamagalo fakamakai foki e Iehova e tau agahala kelea muitui ka moua e tautolu e aga fakatokihala kua tonu.—Totou Isaia 1:18.

Ko e heigoa ha tautolu kua lata ke taute ke moua e fakamagaloaga?

Ka manako a tautolu ki a Iehova ko e Atua ke fakamagalo a tautolu, kua lata ia tautolu ke fakaako hagaao ki a ia​—ke maama e tau puhala, fakatonuaga, mo e tau poakiaga haana. (Ioane 17:3) Kua fakamagalo fakamokoi e Iehova a lautolu kua tokihala he tau mahani kelea ha lautolu mo e lali ke hiki.—Totou Gahua 3:19.

Ko e moua e taliaaga he Atua kua nakai uka lahi ma tautolu. Maama e Iehova e tau lolelole ha tautolu. Fakaalofa noa mo e totonu a ia. Nakai kia taute he fakaalofa totonu haana a koe ke fakaako fakalahi ke he puhala ke fakafiafia a ia?—Totou Salamo 103:13, 14.