Loto Fakaaue ke he Mahani Fakamooli mo e Fakamagalo ha Iehova

1, 2. (a) Ko e ha kua uho e tau kapitiga ha tautolu kua fakamooli mo e fakamagalo atu? (e) Ko e heigoa e tau hūhū ka tali e tautolu he vala tala nei?

FAKAMAAMA fēfē e koe e kapitiga mooli? Ko e matakainaga fifine ne higoa ko Ashley ne talahau ko e kapitiga mooli ko e tagata kua mautali tumau ke lagomatai a koe mo e fakamagalo a koe ka taute e tau hehē. Igatia a tautolu mo e tokiofa e tau kapitiga pihia. Kua lagomatai e lautolu a tautolu ke logona hifo e haohao mitaki mo e fakaalofa.​​—Fakatai 17:17.

² Ko Iehova ko e ha tautolu a Kapitiga fakamooli mo e fakamagalo. Ko ia ne tuga kua fakamaama he salamo: “Ko koe, ko e Iki [Iehova] na e, kua mitaki ni a koe, ti fakamagalo e tau hala; kua lahi foki hāu a fakaalofa [fakamooli] kia lautolu oti kua tauui kia koe.” (Sala. 86:5) Ko e heigoa e kakano ke mahani fakamooli mo e fakamagalo atu? Fakakite fēfē e Iehova e tau mahani homo ue atu ia? Ti maeke fēfē a tautolu ke muitua e fakafifitakiaga haana? Ka iloa e tautolu e tali ke he tau hūhū ia, to tupu malolō e fakaalofa ha tautolu ma e Kapitiga mitaki lahi mahaki ko Iehova. To maeke foki a tautolu ke tata lahi e kapitiga mo e tau matakainaga ha tautolu.​​—1 Ioa. 4:7, 8.

MAHANI FAKAMOOLI A IEHOVA

3. Ko e heigoa e kakano ke fakamooli?

³ Ko e tagata fakamooli kua tumauokafua ke he tagata ne fakaalofa a ia ki ai. Fakakite e ia e fakaalofa haana he fakatumau ke lagomatai mo e lalago e falu tagata. Taute e ia e mena nei he nakai ni mukamuka ka e pihia foki ke he tau tuaga uka. Kua fakamaama he Tohi Tapu a Iehova ko e Taha ne fakamooli. Nakai fai tagata foki ne mua atu e fakamooli pihia ki a ia.​​—Fakakite. 16:5.

4, 5. (a) Fakakite fēfē e Iehova kua fakamooli a ia? (e) Ko e ha ne logona hifo e tautolu e fakamalolō ka manamanatu a tautolu hagaao ke he mahani fakamooli ha Iehova?

⁴ Fakakite fēfē e Iehova kua fakamooli a ia? Kua lalago tumau e ia e tau fekafekau tua fakamooli haana. Taha he tau fekafekau nei, ko e Patuiki ko Tavita ne fakaheke a Iehova ha ko e mahani fakamooli ki a ia. (Totou 2 Samuela 22:26.) He kamatamata a Tavita, ne takitaki, puipui, mo e fakahao e Iehova a ia. (2 Samu. 22:1) Ne kitia e Tavita he moui ni haana kua fakakite e Iehova e mahani fakamooli he nakai ni ke he tau kupu ka e he lagomatai foki e tau fekafekau haana. Ko e ha kua mahani fakamooli a Iehova ki a Tavita? Ha kua mahani fakamooli a Tavita ki a ia. Kua ofania e Iehova e tau fekafekau haana ha ko e mahani fakamooli ha lautolu, ti fakamooli a ia ki a lautolu kua mahani fakamooli ki a ia.​​—Fakatai 2:6-8.

⁵ Kua fakamalolō e logonaaga ha tautolu ka manamanatu a tautolu ke he puhala fakamooli ha Iehova ke he tau fekafekau haana. Taha e matakainaga taane tua fakamooli ne higoa ko Reed ne talahau kua fiafia a ia ke he mena ne totou e ia ke he puhala ne lagomatai e Iehova a Tavita he tau tuaga uka. Ne fakamaama e ia: “Pete foki he hola a Tavita, he nofo i loto mo fafo he tau ana, ne fakamalolō tumau e Iehova a ia. Mafanatia lahi e mena ia ki a au! Kua fakamanatu he mena ia ki a au pete ne tau tuaga kehekehe, pete ne liga kelea lahi mahaki e tuaga, to fakalataha a Iehova mo au he fakatumau au ke mahani fakamooli ki a ia.” Mooli, to logona hifo pihia foki a koe.​​—Roma 8:38, 39.

6. Ko e heigoa falu puhala kua fakakite e Iehova kua mahani fakamooli a ia? Maeke fēfē e mena nei ke aoga e tau fekafekau haana?

⁶ Ko e heigoa falu puhala foki ne fakakite e Iehova a ia kua mahani fakamooli? Taha puhala ko e muitua tumau a Iehova ke he tau tuaga ni haana. (Isaia 46:4) Ko e tau fifiliaga oti ne taute e ia ne fakavē ke he tau tuaga haana, ti nakai hiki e tau tuaga haana. (Mala. 3:6) Taha puhala ne fakakite e Iehova kua fakamooli a ia ha kua fakahoko tumau e ia e tau maveheaga haana. (Isaia 55:11) Ha kua mahani fakamooli a Iehova, kua aoga oti ai ke he tau fekafekau tua fakamooli haana. Fēfē? Ka taute e tautolu e tau mena oti ke omaoma ke he tau fakatufono a Iehova, maeke a tautolu ke fakamooli ke he tau mena ia ti fakatumau ke he tau maveheaga haana ke fakamonuina a tautolu.​​—Isaia 48:17, 18.

MAHANI FAKAMOOLI TUGA A IEHOVA

7. Ko e heigoa taha puhala kua maeke a koe ke mahani fakamooli tuga a Iehova?

⁷ Maeke fēfē a tautolu ke mahani fakamooli tuga a Iehova? Taha puhala ko e taute e mena mitaki ma lautolu ne haia he tuaga uka. (Fakatai 3:27) Ma e fakatai, iloa nakai e koe e matakainaga ne loto lolelole, liga ha ko e tau lekua malolō tino, totokoaga magafaoa, po ke tau lolelole fakatagata? Maeke a koe ke fakamalolō e tagata ia aki e “tau kupu mitaki, ko e tau kupu fakamafana.” (Saka. 1:13)a Ka taute e koe e mena nei, kua fakakite e koe kua mahani fakamooli mo e ko e kapitiga mooli a koe, ko e taha ‘kua mua he pipiki mai a ia ke he matakainaga.’​​—Fakatai 18:24.

8. Maeke fēfē a tautolu ke mahani fakamooli ke he fakamauaga?

⁸ Fai puhala ka mahani fakamooli a tautolu ki a lautolu ne ofania e tautolu. Ma e fakatai, ka fai taane po ke fai hoana a tautolu kua iloa e tautolu kua lata ke tumau e tua fakamooli ha tautolu ke he taane po ke hoana ha tautolu. (Fakatai 5:15-18) Ti lahi atu e mena ke taute e tautolu he nakai ni kalo kehe he mahani faivao. Kua kalo kehe a tautolu he taute ha mena ke takitaki a tautolu ke he mahani faivao. (Mata. 5:28) Fakakite foki kua mahani fakamooli a tautolu ke he tau matakainaga ha tautolu he nakai talahau ha mena kelea hagaao ki a lautolu po ke talahau e tau pikopiko hagaao ki a lautolu. Ti tiaki foki e tautolu ke fanogonogo ke he tau tala pihia.​​—Fakatai 12:18.

9, 10. (a) Ko hai pauaki kua manako a tautolu ke fakatumau e mahani fakamooli ki ai? (e) To mukamuka tumau nakai ke omaoma ki a Iehova? Talahau e fakataiaga.

⁹ Kua manako pauaki a tautolu ke mahani fakamooli tumau ki a Iehova. Maeke fēfē a tautolu ke taute e mena ia? He fiafia ke he tau mena ne fiafia a Iehova mo e vihiatia e tau mena ne vihiatia e ia. Ti lata ia tautolu ke momoui fakatatau ke he puhala ne fiafia ki a Iehova. (Totou Salamo 97:10.) Ko e lahi e fakaako ha tautolu ke manamanatu tuga a Iehova, mukamuka lahi ke omaoma ki a ia.​​—Sala. 119:104.

¹⁰ Mooli, to nakai mukamuka tumau ke omaoma ki a Iehova. Liga eketaha a tautolu ke mahani fakamooli tumau ki a ia. Ma e fakatai, ko e matakainaga fifine nofo tokotaha ne liga manako ke fai taane, ka e nakaila moua e matakainaga taane ke eke mo taane mitaki ma haana. (1 Kori. 7:39) Ko e tagata he gahua ne liga lali ke moua taha tagata taane ke fakatū kapitiga mo ia. He magaaho taha, ne liga matimati lahi e logonaaga haana. Ka ko e manako haana ke fakamooli ki a Iehova, taute e ia e fifiliaga mauokafua ke nakai fakatū kapitiga po ke mau ke he tagata ne nakai fekafekau ke he Atua. Ko e tau Kerisiano tuga e matakainaga fifine nei ko e tau fakafifitakiaga mitaki lahi mahaki he mahani fakamooli. To fakamonuina e Iehova a lautolu oti kua fakatumau ke fekafekau tua fakamooli ki a ia he tau tuaga uka.​​—Hepe. 11:6.

FAKAMAGALO A IEHOVA

11. Ko e heigoa e kakano ke fakamagalo?

¹¹ Ko e heigoa e kakano ke fakamagalo? Ko e tagata fakamagalo ne fifili ke nakai ita tumau ke he falu ha ko e mena ne taute e lautolu ki a ia. Nakai kakano e mena nei kua talia a ia ke he mena kua taute e lautolu po ke fakatupua kua nakai tupu e mena ia. Ka e, fifili a ia ke nakai ita. Taha he tau aga homo ue atu ha Iehova ko e mahani fakamagalo haana. Pehē e Tohi Tapu ko Iehova kua “fakamagalo” a lautolu kua tokihala mooli.​​—Sala. 86:5.

12. (a) Lahi fēfē e fakamagalo ha Iehova? (e) Ko e heigoa e kakano ha Peteru he pehē a ia ko e tau agahala he tagata ka “holoholo kehe”?

¹² Lahi fēfē e fakamagalo ha Iehova? Pehē e Tohi Tapu kua “fakamagalo fakalahi” a Iehova. Kakano e mena nei kua fakamagalo katoatoa mo e tukulagi a ia. (Isaia 55:7) Iloa fēfē e tautolu kua fakamagalo katoatoa a Iehova? Manamanatu ke he maveheaga ia Gahua 3:19. (Totou.) Ne pehē e aposetolo ko Peteru ka fakatokihala mooli e tagata agahala, to momoko a ia ha ko e puhala kelea haana. Maeke fēfē e tagata ne agahala ke fakamagalo e Iehova? Ne pehē a Peteru ko e tagata agahala kua lata ke “tokihala” mo e “mafokifoki.” Ko e tagata ne tokihala mooli ne fifili to nakai liu a ia ke agahala pihia. (2 Kori. 7:10, 11) Ko e tagata nei kua mafokifoki kehe, kua tiaki e ia e mahani kelea mo e taute e tau mena oti kua maeke ke fakafiafia e Atua. Ti ko e agahala haana ka “holoholo kehe.” Ko e holoholo kehe kakano ke tatafi kehe, po ke utakehe. Ti ko e mogo ka fakamagalo a Iehova, kua tuga tatafi kehe e ia e tau agahala ha tautolu. Kua fakamagalo katoatoa e Iehova.​​—Hepe. 10:22; 1 Ioa. 1:7.

13. Ko e heigoa he tau kupu “nakai tuai manatu e au ha lautolu a tau hala” kua fakaako ki a tautolu hagaao ki a Iehova?

¹³ Iloa fēfē e tautolu kua fakamagalo tukulagi e Iehova e tau agahala ha tautolu? Fakaako e tautolu e puhala fakamagalo ha Iehova mai he mena ne talahau e ia ki a Ieremia he perofetaaga hagaao ke he tau Kerisiano fakauku. (Totou Ieremia 31:34.) Ne pehē a Iehova: “To fakamagalo e au ha lautolu a tau mahani kelea, mo e nakai tuai manatu e au ha lautolu a tau hala.” Ti ka fakamagalo a Iehova, kua nakai manamanatu tumau a ia ke he tau agahala ha tautolu ke maeke a ia ke tukupau po ke fakahala tumau a tautolu. Kua fakamagalo tukulagi e ia e tau agahala ha tautolu.​​—Roma 4:7, 8.

14. Ko e ha kua mafanatia a tautolu ka manamanatu fakahokulo ke he puhala fakamagalo ha Iehova? Talahau e fakataiaga.

¹⁴ Maeke ia tautolu ke mafanatia ka manamanatu fakahokulo ke he puhala ne fakamagalo a Iehova. Kia fakatutala a tautolu ke he fakataiaga he matakainaga fifine ka fakahigoa e tautolu ko Elaine. Loga e tau kua mole, ne tuku a ia ki tua he fakapotopotoaga. Fai tau he mole, ne fakaatā a ia ke liu mai ke he fakapotopotoaga. Pete ia, ne pehē a Elaine kua nakai talitonu mooli kua fakamagalo e Iehova a ia. Ne logona hifo e ia kua nakai fakaalofa lahi a Iehova ki a ia tuga ke he falu. Ka e mafanatia a Elaine he manamanatu fakahokulo ke he puhala ne fakamaama he Tohi Tapu e fakamagaloaga ha Iehova. Ma e fakatai, ne totou e ia ka fakamagalo a Iehova, tuga kua holoholo kehe e Iehova e tau agahala ha tautolu. Nakai lata a tautolu ke logona hifo e tokihala ki ai ke he moui katoa ha tautolu.b Lafi e Elaine: “Mailoga e au kua nakai talitonu na maeke a Iehova ke fakamagalo katoatoa au, ti manatu au to hahamo tokotaha e kavega nei he moui haaku. Iloa e au to fai magaaho ai, ka e kamata au ke logona hifo kua maeke au ke fakatata lahi ki a Iehova, ti logona e au e kavega ne utakehe ia au.” Ko Iehova ko e Atua fakaalofa mo e fakamagalo mooli!​​—Sala. 103:9.

FIFITAKI E FAKAMAGALOAGA HA IEHOVA

15. Maeke fēfē a tautolu ke fifitaki e fakamagalo ha Iehova?

¹⁵ Maeke ia tautolu ke fifitaki a Iehova he fifili ke fakamagalo e falu. (Totou Luka 17:3, 4.) Manatu ka fakamagalo a Iehova, kua nakai manamanatu tumau a ia ke he tau mena ne taute e tautolu. Ka fakamagalo e tautolu e falu, maeke foki a tautolu ke nakai manatu e tau mena ne taute e lautolu ki a tautolu ti nakai talahau e tau hehē ha lautolu he tau mogo i mua.

16. (a) Ko e heigoa e kakano ke fakamagalo e tau hehē he falu? Ko e heigoa ne nakai kakano ai? (e) Ko e heigoa kua lata ia tautolu ke taute ka manako a tautolu ke fakamagalo e Iehova?

¹⁶ He fakamagalo e tau hehē he falu, nakai kakano kua talia e tautolu e mena ne taute e lautolu po ke manako ke taute fakakelea a tautolu. Nakai. Kakano ai kua fifili e tautolu ke nakai ita tumau ki a lautolu. Kua aoga foki ke manatu ka manako a tautolu ke fakamagalo mai e Iehova a tautolu, lata ia tautolu ke fakamagalo e falu. (Mata. 6:14, 15) Manatu e Iehova “ko e kelekele ni a tautolu.” Maama e ia kua nakai mitaki katoatoa a tautolu. (Sala. 103:14) Ka talahau po ke taute he falu taha mena ke fakaita aki a tautolu, lata ke manatu kua nakai mitaki katoatoa a lautolu tuga ni a tautolu, ti kua lata ia tautolu ke fakamagalo fakamooli a lautolu.​​—Efeso 4:32; Kolo. 3:13.

17. Ko e heigoa ka lagomatai a koe ke fakamagalo e tagata ne fakamamahi a koe?

¹⁷ Mooli, kua uka he falu magaaho ke fakamagalo e falu. Ko e falu Kerisiano fakauku foki he vahā ha Paulo kua lata ke lagomatai ke fakamafola e tau lekua he tau vahāloto ha lautolu. (Filipi 4:2) Ka taute he matakainaga e taha mena ke fakamamahi a koe, ko e heigoa ka lagomatai a koe ke fakamagalo e tagata ia? Manamanatu ke he mena ne tupu ki a Iopu. Ko Elifasa, Pilitati, mo Sofara ko e tau kapitiga ha Iopu. Ka e ekefakakelea mo e tukupau e lautolu a ia he taute e tau mena kelea. Ne mamahi lahi e logonaaga ha Iopu. (Iopu 10:1; 19:2) Fakahiku ai, ne tala age a Iehova ke he tau tagata tokotolu nei ko e tau mena ne taute e lautolu kua hepe ti kua lata ke o atu ki a Iopu ke foaki e tau poa ma e tau agahala ha lautolu. (Iopu 42:7-9) Ka e tala age foki a Iehova ki a Iopu ke taute taha mena. Ko e heigoa e mena ia? Tala age a ia ki a Iopu ke liogi ma e tau tagata nei. Ne taute pihia e Iopu, ti fakamonuina e Iehova a ia ha kua fakamagalo atu. (Totou Iopu 42:10, 12, 16, 17.) Ko e heigoa ka fakaako e koe he mena nei? Ka liogi fakamooli a koe ma e tagata ne fakamamahi atu, to lagomatai a koe ke oti e ita ke he tagata ia.

FAKAAKO TUMAU MO E FIFITAKI E TAU MAHANI HA IEHOVA

18, 19. Ko e heigoa ha tautolu kua manako ke fakatumau ke taute?

¹⁸ Kua fiafia a tautolu ke fakaako fakalahi ke he tau mahani ha Iehova. Kua fakaako e tautolu ko ia kua mukamuka ke o atu ki ai, nakai fakamailoga tagata, fakamokoi, totonu, fakamooli, mo e fakamagalo. Mooli, lahi foki e mena ke fakaako hagaao ki a Iehova. To fiafia tukulagi a tautolu he fakaako fakalahi hagaao ki a ia. (Fakama. 3:11) Talitonu a tautolu mo e aposetolo ko Paulo, ne tohi: “Oi, oi! ko e hokulo he tanakiaga he iloilo mo e fioiaaga he Atua!” Maeke a tautolu ke talahau pihia hagaao ke he fakaalofa he Atua mo e tau mahani haana ne ono kua fakatutala ki ai a tautolu he tau vala tala nei.​​—Roma 11:33.

¹⁹ Kia fakatumau a tautolu ke fakaako fakalahi ke he tau mahani ha Iehova, manamanatu fakahokulo ki ai, ti fifitaki ai he tau momoui ha tautolu. (Efeso 5:1) Ti ko e fua, to malolō lahi e fakaalofa ha tautolu ki a Iehova, mo e to tata lahi a tautolu ki a ia. To talitonu fakahaga a tautolu mo e salamo ne lologo: “Ka ko au, ko e mitaki kia au ke fakatata ke he Atua.”​​—Sala. 73:28.