Palepale Mitaki e Falanaki ki a Iehova

KO E matua taane mo e matua fifine haaku ne feleveia he 1919 he fonoaga he Tau Tagata Fakaako Tohi Tapu he Lalolagi Katoa i Cedar Point, Ohio, U.S.A. Ne mau a laua he tau ia ni. Ne fanau au he 1922, mo e fanau e tehina haaku ko Paul, he ua e tau he mole. Ne fanau e hoana haaku ko Grace he 1930. Ko e tau matua haana ko Roy mo Ruth Howell, ne feaki hake ko e Tau Tagata Fakaako Tohi Tapu, ko e tau matua tupuna haana ko e Tau Tagata Fakaako Tohi Tapu foki ti ko e tau kapitiga he Matakainaga Charles Taze Russell.

Ne feleveia au mo Grace he 1947, ti mau a maua ia Iulai 16, 1949. Ato mau a maua, ne tutala atāina a maua hagaao ke he vahā ha maua i mua. Ne taute e maua e fifiliaga ke fakalataha ke he fekafekauaga mau mo e ke nakai fai fanau. Ia Oketopa 1, 1950, ne kamata tokoua a maua ke he fekafekauaga paionia. He 1952, ne uiina a maua ke taute e gahua takaiaga.

GAHUA FAIFANO MO E FAKAMAHANI I KILIATA

Ne logona hifo e maua kua lata lahi ia maua ke fai lagomatai ke taute e kotofaaga foou nei. He fakaako mai he tau matakainaga taane lotomatala au, ne ole lagomatai foki au ke lata mo Grace. Ne tutala au ki a Marvin Holien, ne kua leva e kapitiga mo e magafaoa ne iloa lahi ke he fekafekauaga he leveki takaiaga, ne ole au ki a ia: “Fuata a Grace ti nakaila lotomatala lahi a ia. Maeke nakai ia koe ke talahau taha matakainaga ke fakamahani a ia he gahua tokoua?” “Ē,” he tali e ia. “Ko Edna Winkle ko e paionia lotomatala lahi ka maeke ke lagomatai fakamitaki a ia.” Fakamui ne talahau a Grace hagaao ki a Edna: “Ne fakatotoka e ia au he tau gutuhala, iloa e puhala ke tali fakamitaki e tau totokoaga, ti fakaako au ke fanogonogo ke he tagata he kaina ke maeke au ke iloa e talahauaga kua felauaki mitaki. Kua lata pauaki ni e matakainaga fifine ia mo au!”

Ne gahua au mo Grace ke he ua e takaiaga i Iowa, putoia e tau faahimotu a Minnesota mo South Dakota. Ti kua hiki atu a maua ke he New York Circuit 1, ti putoia e tau faahi a Brooklyn mo Queens. Nakai nimo ia maua e tau logonaaga temotemoai ha maua he kotofaaga ia. Ne putoia he takaiaga ia e Fakapotopotoaga Brooklyn Heights ne feleveia he Fale he Kautu he Peteli ti tokologa e tau matakainaga lotomatala lahi i ai he magafaoa Peteli. He oti e lauga fekafekau fakamua haaku ke he fakapotopotoaga ia, ne hau a Matakainaga Nathan Knorr ki a au ti talahau e tau kupu ne kakano pehē: “Malcolm, kua tala mai e koe ki a mautolu falu fakatonuaga ke gahua ki ai, ti kua latatonu ni. Ua nimo, ka nakai lagomatai e koe a mautolu he tala mai e tau fakatonuaga totonu, kua aoga tote a koe ke he fakatokatokaaga. Kia fakatumau ke he tau gahua mitaki.” He oti e feleveiaaga, ne tala age ai e au ki a Grace. Fakamui, ne o hake a maua ke he poko ha maua he Peteli. Ne tagi a maua he mategūgū ha ko e fakaatukehe.

Fai mahina he mole, ne moua e maua e tohi ne uiina a maua ke o atu he vahega ke 24 aki he Aoga Kiliata, ka moua e tau palepale ia Fepuari 1955. Ne fakailoa ki a maua ato o atu he aoga ko e fakaakoaga ha maua kua liga nakai ke tauteute a maua ke eke mo tau misionare. Ka ko e fakaako ia maua ke lauia mitaki lahi he gahua faifano. Ko e o atu he aoga ko e mena mitaki lahi mahaki ti kua fakaako a maua ke fakatokolalo.

Mogo ne oti e fakaakoaga ha maua, ne kotofa ai ke taute e gahua leveki faahimotu. Ko e kotofaaga ha maua kua putoia e tau faahimotu ha Indiana, Michigan, mo Ohio. Ne ofo lahi a maua he hoko ke he Tesemo 1955, ne moua e maua e tohi mai he Matakainaga Knorr ne pehē: “Atāina ke fakakite e manatu haau, ti fakamooli mai ki a au mogonei. Ka pehē a koe kua makai a koe ke hau ke gahua he Peteli mo e nofo mau hinei . . . po ke ka makai a koe ke fina atu ke he kotofaaga he taha motu kehe ka fai magaaho he gahua he Peteli, ti fakailoa mai ki a au. Ka manako a koe ke he gahua faahimotu mo e takaiaga, manako au ke iloa.” Ne taui e maua e tohi, kua fiafia a maua ke taute ha kotofaaga kua tuku mai ki a maua ke taute. Nakai leva, ne talamai ki a maua ke o atu ke he Peteli!

TAU TAU FIAFIA LAHI HE PETELI

Ko e tau tau fiafia lahi haaku he Peteli ne putoia ai ke taute e tau lauga ke he tau fakapotopotoaga, fonoaga mo e tau toloaga he Tau Faahi Kaufakalataha. Ne lagomatai au ke fakaako e tau matakainaga taane fuata ne hoko ke he magaaho fakamui ti taute e lautolu e tau matagahua lalahi he fakatokatokaaga ha Iehova. Fakahiku ai, ne eke au mo tohikupu ma e Matakainaga Knorr he ofisa ne fakatokatoka e gahua fakamatala he lalolagi katoa.

Ko e magaaho fiafia pauaki ki a au he gahua he Faahi Gahua he Fekafekauaga. Ne gahua au mo T. J. (Bud) Sullivan. Ne leveki e ia e faahi gahua ia ke he loga e tau tau. Ka e lahi foki e mena haaku ne fakaako mai he falu. Ko Fred Rusk foki taha ne kotofa ke fakaako au. Mo e fiafia, ne manatu e au he hūhū ki a ia, “Ma Fred, ko e ha ne loga e tau hikihiki ne taute e koe ke he falu tohi haaku?” Ne kata a ia ti talahau e manatu aamotia lahi nei, “Malcolm, ka talahau e koe taha mena, na maeke ke fakamaama aki falu kupu foki, ka e he mogo ka tohi e koe taha mena, mua atu kaeke ko e tohi mai hinei, kua lata ni ke hokulo mo e hakotika.” Ti totonu a ia he talamai, “Kia fakamalolō. Mitaki e tau gahua haau, to hoko e magaaho ti mitaki lahi ai.”

He tau tau ne nonofo he Peteli, ne taute a Grace he tau gahua kehekehe, putoia e gahua fakameā, leveki ke he tau poko he Peteli. Ne fiafia a ia ke he gahua. Ke hoko mai ke he aho nei, he falu mogo ka feleveia a maua mo e falu matakainaga taane fuata he Peteli mai he magahala ia, ne mamali a lautolu he tala age ki a Grace, “Ne fakaako fakamitaki e koe au ke taute e mohega haaku, tala atu e au ne fiafia e matua fifine haaku ke he gahua ne taute e koe.” Fiafia foki a Grace he gahua he tau faahi gahua Mekasini, Tohitohi, mo e Tapaki Kasete. He taute e tau kotofaaga kehekehe ia ne lagomatai a ia ke loto fakaaue ke he ha gahua ka taute e maua po ke ha matakavi ne fekafekau ai he fakatokatokaaga ha Iehova, ko e mena lilifu mo e fakamonuinaaga. Ke hoko mai ke he aho nei, kua pihia agaia e logonaaga haana.

TAU HIKIAGA NE TAUTE E MAUA

He lotoga he tau atu tau 1970, ne kamata a maua ke mailoga kua lata e tau mamatua ha maua kua fuakau ke onoono fakalahi atu ki ai. Fakahiku ai, ne taute e maua e fifiliaga uka lahi. Nakai manako a maua ke toka e Peteli mo e tau matakainaga ha Iehova ne kua mafanatia lahi a maua ki ai. Ka kua manatu agaia ni au ko e kotofaaga haaku ke leveki e tau mamatua ha maua. Ko e mena ia, ne toka e maua e Peteli, mo e amanaki ka hiki e tuaga to liga liliu mai a maua.

Ke leveki a maua fakatupe, ne kamata au ke gahua ma e kamupanī inisua. Ne manatu tumau e au e talahauaga he taha takitaki gahua ki a au he fakamahani agaia au: “Ne fakavē e pisinisi nei ke he ahiahi he tau magaaho afiafi. Ko e magaaho ia ka maeke a koe ke moua e tau tagata. Nakai fai mena kua mua e aoga ka e ke ha i ai he tau afiafi oti, he taute e tau ahiahi.” Ne tali e au, “Mailoga e au kua tutala a koe mai he lotomatala he gahua ti fakalilifu e au e mena ia. Ka e fai kotofaaga foki au fakaagaaga ne nakaila fakatō ia e au, ti nakai amanaki au ke fakatō noa mogonei. To ahiahi au he falu afiafi, ka e nakai ahiahi he tau afiafi Ua mo e tau afiafi Tuloto, kua lata ni au ke fina atu ke he tau feleveiaaga aoga lahi.” Ne fakamonuina mooli e Iehova au he nakai fakatō noa e tau feleveiaaga ke taute e gahua tupe.

Ko maua he tapa he mohega he matua fifine haaku he mogo ne mate a ia he kaina leveki fuakau ia Iulai 1987. Ne hau e takitaki nosi ki a Grace ti pehē: “Mrs. Allen, fano ki kaina ke moua taha okioki. Iloa he tau tagata oti na hau tumau a koe ke he matua fugavai haau. Kia mafola e loto mo e fiafia ke he gahua kua taute e koe.”

Ia Tesemo 1987, ne fakapuke e maua e tau tohi ole ke liliu ke fekafekau he Peteli, ko e matakavi ne fiafia lahi a maua ki ai. Ka e gahoa e aho he mole, ne iloa ai kua moua he kenesā e gakau a Grace. He mole e iihi mo e kua malolō ai, ne talahau ai kua galo e kenesā haana. He mogoia, ne moua e maua e tohi mai he Peteli ke liu a maua ke matutaki ke he fekafekauaga mo e fakapotopotoaga he matakavi ia. Ne mauokafua a maua ke taute e gahua he Kautu.

Fakamui, ne moua e au e gahua i Texas. Ne fifili a maua ko e matagi mafana i ai to mitaki ma maua, ti pihia mooli. Hinei i Texas, kua kavi ke he 25 e tau he fakalataha mo e tau matakainaga loto fakaalofa ne kua pipiki lahi a maua ki ai.

TAU MENA NE FAKAAKO E MAUA

Ne moua a Grace he kenesā ke he gakau mo e kakia, mo e he foou nei kua kenesā e huhu. Ka e nakai gugū a ia ke he moui haana po ke totoko e tau matapatu fakaakoaga he ulu pule mo e kaufakalataha. Ne fa hūhū ki a ia, “Ko e heigoa e mena galo ati kautū a mua ko e hoa mau mo e kitia a mua he fiafia tokoua?” Ne tala age e ia fā e kakano: “Ko e tau kapitiga uho a maua. Ne tutala tumau a maua he tau aho takitaha. Ne fiafia lahi a maua ke ō tokoua ke ahiahi he tau aho oti. Ti nakai maeke ia maua ke momohe he oti e aho ka e ita agaia ke he taha.” Ne fa fakahogohogomanava ni e maua a maua, ka e fakamagalo ti fakanimo​​—ti gahua mitaki mooli e puhala ia.

He tau kamatamata oti ne feleveia mo maua, ne loga e tau fakaakoaga mitaki ne ako e maua:

1.  Falanaki tumau ki a Iehova mo e talia e tau mena kua fakaatā e ia. Nakai falanaki ke he pulotu haau ni.​​—Fakatai 3:5, 6; Iere. 17:7.

2.  Falanaki ke he Kupu ha Iehova ma e takitakiaga, pete ni ko e heigoa e tuaga. Kua aoga ke omaoma ki a Iehova mo e tau fakatufono haana. Na taha ni e tuaga​​—ko e omaoma a koe po ke nakai.​​—Roma 6:16; Hepe. 4:12.

3.  Taha e mena he moui ne mua atu e aoga​​—ko e moua e higoa mitaki mo Iehova. Tuku fakamua e tau manako haana, nakai ko e kumi he tau koloa he tino.​​—Fakatai 28:20; Fakama. 7:1; Mata. 6:33, 34.

4.  Liogi ke moua e tau fua mitaki mo e malolō ke he fekafekauaga ha Iehova. Hagaaki ke he tau mena kua maeke ia koe ke taute, nakai ke he tau mena ne nakai maeke ia koe ke taute.​​—Mata. 22:37; 2 Timo. 4:2.

5.  Iloa kua nakai fai fakatokatokaaga foki ne moua e fakamonuinaaga mo e taliaaga ha Iehova.​​—Ioane 6:68.

Ne igatia a maua mo Grace mo e molea e 75 e tau he fekafekau ki a Iehova, mo e teitei 65 e tau he fekafekau ki a ia ko e hoa mau. Kua fiafia mooli a maua he fekafekau tokoua ki a Iehova he tau tau oti nei. Kua amanaki mo e liogi a maua ke he tau matakainaga oti ha maua ke moua e moui palepale mitaki he falanaki ki a Iehova.