‘Fakamolemole e Puhala ma e Tau Hui Hāu’ ke Holo ki Mua

KO E magaaho ne toka he tau tagata he Atua a Papelonia he 537 F.V.N., ne mataala a Iehova ke he fenoga ha lautolu ki Ierusalema. Ne tala age e ia ki a lautolu: “Kia tauteute ai e mutolu e puhala e motu, fakamolemole a, kia fakamolemole ā e mutolu e puhala tu, kia okooko ā mutolu e tau maka.” (Isaia 62:10) Manamanatu ke he puhala ne taute ai he falu Iutaia. Liga tā he tau matakau fakamua e puhalatū, fakapukepuke e tau poko luo mo e fakamolemole e tau pokopoko. He taute pihia kua lagomatai ke he tau matakainaga ha lautolu ne mumui atu ki a lautolu he liliu ke he motu ha lautolu.

Liga manamanatu foki a tautolu ke he fakataiaga ia he puhala ne takitaki atu ke he tau foliaga fakaagaaga. Manako a Iehova ke he tau fekafekau oti haana ke ō he puhala ia mo e nakai ha ha i ai ha fakatauhele nakai aoga. Fakamalolō mai he Kupu haana a tautolu: “Kia fakamolemole a e puhala ma e tau hui hāu; kia taute ai foki hāu a tau puhala oti.” (Fakatai 4:26) He fuata a koe po ke nakai, maeke ia koe ke kitia e pulotu he fakatonuaga faka-Atua ia.

TAUTEUTE E PUHALA HE TAU FIFILIAGA MITAKI

Liga logona e koe e tau tagata ne talahau e taha mena pehē hagaao ke he fuata mui: ‘To amanaki a ia ke kautū.’ Ko e tau tagata fuata kua tino malolō, manamanatu mafiti, mo e manako lahi ke kautū. Ne talahau fakahako he Tohi Tapu: “Ko e malolo he tau fuata ko e ha lautolu a fulufuluola haia.” (Fakatai 20:29) Ko e fuata ne fakaaoga haana tau taleni mo e malolō ke fekafekau ki a Iehova kua moua e tau foliaga fakaagaaga mo e fiafia mooli.

Ka e mailoga e koe, ko e tau iloilo he tau fuata ha tautolu kua uho lahi he lalolagi. Ka iloilo e fuata Fakamoli he aoga, ko e tagata fakatonutonu lagomatai gahua, faiaoga, po ke kapitiga aoga kua liga peehi e Fakamoli ke tutuli e fakaakoaga tokoluga lahi ko e lakaaga ke he kautūaga he fakatokaaga nei. Po ke matakainaga fuata ne makaka ke he sipote kua liga kamatamata he tau tagata fakaohooho a ia ke he feua sipote. Kua lauia nakai a koe he tuaga ia, po ke iloa e taha ne fehagai mo e peehiaga pihia? Ko e heigoa ka lagomatai e Kerisiano ke fifili fakailoilo?

Ko e tau fakaakoaga he Tohi Tapu ka lagomatai e taha ke mautauteute ke fano he puhala ne mua atu he moui. “Hanai, kia manatu a a koe ke he hāu a vaha fuata kia ia ne eke [Tufuga Homo Ue Atu] a koe,” he talahau he Fakamatalaaga 12:1. Maeke fēfē a koe po ke taha kapitiga ke ‘manatu a Ia ne eke a koe’?

Manamanatu la ke he mena ne tupu ki a Erica i Aferika Lalo. Fiafia lahi a ia ke pelē soka. He mogo ne 15 e tau ha Eric, kua fifili ki a ia ke pelē he matakau he motu. Kakano ai to nakai leva, ti amanaki a ia ke moua e fakamahaniaga mahuiga i Europa, liga ke takitaki atu ke he feua talahaua. Ka e lagomatai fēfē he fakatonuaga ke ‘manatu a Ia ne eke a koe’? Ti ko e heigoa e fakaakoaga he mena nei ma haau po ke falu kapitiga fuata?

He tau tau ne fano a Eric he aoga, ne kamata a ia ke fakaako e Tohi Tapu mo e Tau Fakamoli a Iehova. Ti kamata a ia ke iloa ko e Tufuga haana ka fakamafola tukulagi e tau lekua he tagata. Kitia e Eric e aoga he fakaaoga e magaaho mo e malolō haana ke taute e finagalo he Atua. He mailoga e mena ia, ne fifili e Eric ke nakai tutuli e feua sipote he tuaga talahaua. Ka e papatiso a ia ti eketaha ke he tau gahua fakaagaaga. Fai magaaho ne eke a ia mo fekafekau lagomatai ti levaleva ne uiina ke he Aoga Tohi Tapu ma e Tau Matakainaga Taane Nofo Tokotaha.

Kaeke tutuli e Eric e feua sipote, liga moua e ia e talahaua mo e monuina. Ka e mailoga e ia e mooli he matapatu fakaakoaga he Tohi Tapu: “Ko e koloa he tagata maukoloa, ko e hana taue uka haia; kua tuga ne kaupa tokoluga foki ke he hana ni a manatu.” (Fakatai 18:11) Ē, ko e haohao mitaki ne liga moua he tagata ha ko e maukoloa ko e mena fakavaia. Ko lautolu ne fakamakamaka ke tutuli e maukoloa “kua hoka e lautolu a lautolu ti ati ni ke he tau mena matematekelea loga.”​—1 Timo. 6:9, 10.

Fiafia ai, tokologa e tau fuata kua moua e olioli mo e haohao mitaki tumau he taute e fekafekauaga mau. Pehē a Eric: “Kua fakalataha au ke he ‘matakau’ lahi he tau fekafekau mau ha Iehova. Ko e matakau ne mua atu a ia ke fakalataha au ki ai, ti fakaaue au ki a Iehova he fakakite ki a au e puhala ke he fiafia mo e kautū mooli he moui.”

Ka e kua a koe? He nakai tutuli e tau foliaga fakalalolagi, ko e ha he nakai fakavē ai “hāu a tau puhala” ma Iehova he gahua paionia?​—Kikite puha “Moua e Tau Puhala Aoga ne Nakai Moua he Univesitī.”

UTAKEHE E TAU PALEKO HE PUHALA HAAU

He aahi atu ke he la ofisa he tau Faahi Kaufakalataha, ne mailoga he hoa e fiafia he tau tagata he Peteli ne fekafekau ki a Iehova i ai. Ne tohi he matakainaga fifine: “Kua hagahaga mitaki lahi a maua mo e ha maua a fakaholoaga.” Fifili e hoa to fakaatā e laua e magaaho mo e malolō ma e tau kotofaaga mua atu he fekafekauaga.

He taha magaaho, ko e tau hikiaga ne manako e hoa nei ke taute ne tuga kua tō molea lahi. Ka e he taha aho, ne liu manamanatu a laua ke he kupu tohi he Tohi Tapu he aho ia. Ko e Ioane 8:31, ne totou e tautolu e tau kupu ha Iesu: “Kaeke ke tumau fakaoti a mutolu ke he haku a kupu, ko e tau tutaki moli haku a mutolu.” Mo e manatu ia, ne fakakakano e laua: “Ha mena ne taute e maua ke fakamukamuka e moui kua uho lahi mahaki.” Ne sela e laua e fale lahi ha laua, atāina mai he falu pehiaaga, ti hiki ke he fakapotopotoaga ne manako lagomatai. Kua paionia a laua mogonei, ka e lagomatai foki ke tā he tau Fale he Kautu mo e gahua foaki noa he tau toloaga faahimotu. Fēfē e logonaaga ha laua? “Ofo a maua ke he fiafia kua moua ha ko e moui fakamukamuka, he taute e mena ne fakamafana he fakatokatokaaga ha Iehova a maua ke taute.”

NOFO MAU HE PUHALA KE HOLO KI MUA FAKAAGAAGA

Ne tohi e Solomona: “Kia kitekite fakahako atu hāu a tau mata ki mua hāu; mo e hagao fakatonu hāu a tau tuamata ki mua hāu.” (Fakatai 4:25) Tuga e tagata fakaholo ne hagaaki ke he puhala i mua, kua lata ia tautolu ke kalo kehe he tau fakatauhele ka taofi a tautolu he fakatoka e tau foliaga fakaagaaga mo e hokotia ki ai.

Ko e heigoa e tau foliaga fakaagaaga kua liga fakatoka e koe mo e hokotia ai? He haia he fekafekauaga mau ko e mena mitaki mooli. Liga taha foki ko e fekafekau he fakapotopotoaga ne tata mai ne manako ke he tau tagata fakamatala iloilo ke lagomatai ke gahua oti e fonua lahi. Po ke he fakapotopotoaga ne liga tokologa e tau tagata fakailoa mitaki, ka e nakai tokologa e motua mo e fekafekau lagomatai. Maeke nakai a koe ke lagomatai ke he taha puhala pihia? He ha he tutala ke he leveki takaiaga ke kitia kua maeke nakai a koe ke lagomatai? Ka manako a koe ke fano mamao, maeke a koe ke ole ma e vala tala hagaao ke he tau fakapotopotoaga ne manako lagomatai.b

Liliu a tautolu ke he tala ne fakamaama ia Isaia 62:10. Falu he tau Iutaia ne liga gahua lahi ke fakamolemole mo e tauteute e puhala ke liliu atu ke he motu ha lautolu ke maeke he tau tagata he Atua ke hoko ke he matakavi ha lautolu. Ka eketaha a koe ke moua e tau foliaga he fekafekauaga tapu, ua fakalolelole. Ha ko e lagomatai he Atua, kua maeke foki a koe ke hokotia ke he tau foliaga ia. Matutaki ke ole ki a Iehova ma e iloilo he lali a koe ke utakehe e tau paleko i mua haau. Nakai leva, to kitia e koe e puhala ka lagomatai e ia a koe ke ‘fakamolemole e puhala ma e tau hui hāu.’​—Fakatai 4:26.