Hane Moua Nakai e Koe e ‘Tau Mena Kai ke he Tau Magaaho Tonu’?

KUA nonofo a tautolu he magaaho ne mua atu e paleko he fakamauaga tuai he tagata. (2 Timo. 3:1-5) Ko e ha tautolu a fakaalofa ki a Iehova mo e ha tautolu a eketaha ke momoui he tau puhala tututonu kua kamatamata he tau aho takitaha. Ne kitia tuai e Iesu e magaaho lekua nei, ti fakamafana e ia haana tau tutaki to moua e lautolu e fakamalolōaga kua lata ke fakauka ke hoko ke he fakaotiaga. (Mata. 24:3, 13; 28:20) Ke fakamalolō a lautolu, ne kotofa e ia e fekafekau fakamoli ke foaki e tau mena kai fakaagaaga ke he tau magaaho tonu.​—Mata. 24:45, 46.

Tali mai he kotofaaga he fekafekau fakamoli he 1919, totou miliona he “tau fekafekau” he tau vagahau oti kua fakapotopoto ke he fakatokatokaaga he Atua ti kua fagai fakaagaaga ai. (Mata. 24:14; Fakakite. 22:17) Ka e nakai tatai e loga he tau tohi kua moua ke he tau vagahau oti, ti nakai maeke he tau tagata oti ke moua e tau tohi ha tautolu he puhala Initanete. Ma e fakatai, tokologa ne nakai moua e tau vitiō mo e tau vala tala ne ha ha i loto he jw.org. Kakano kia e mena nei kua nakai moua he falu e tau mena kai ne lata ke moua e lautolu ke tumau e malolō fakaagaaga? Ke hokotia ke he manatu hako, manamanatu e tau tali ke he fā e matapatu hūhū.

1. Ko e heigoa e matapatu vala he mena kai ne foaki e Iehova?

Magaaho ne kamatamata e Satani a Iesu ke fakafaliu e tau maka ke he areto, ne pehē a Iesu: “Nakai ko e tau mena kai hokoia ke moui ai ha tagata, ka ko e tau kupu oti ne to mai he fofoga he Atua.” (Mata. 4:3, 4) Na fakamau e tau kupu ha Iehova he Tohi Tapu. (2 Pete. 1:20, 21) Ko e mena ia, ko e Tohi Tapu e matapatu vala he ha tautolu a tau mena kai fakaagaaga.​—2 Timo. 3:16, 17.

Kua taute he fakatokatokaaga ha Iehova e New World Translation of the Holy Scriptures ke moua katoa po ke vala ke molea 120 e vagahau, ti loga atu foki e vagahau kua lafi ke he tau tau takitaha. Lafi atu ke he fakaliliuaga ia, totou piliona e lagaki he falu liliuaga he Tohi Tapu kua moua katoa po ke vala ke he tau afe he tau vagahau. Ko e mouaaga ofoofogia ia kua felauaki mo e finagalo ha Iehova “ke fakamomoui e tau tagata oti kana, mo e hokotia a lautolu he maama ke he kupu moli.” (1 Timo. 2:3, 4) Ha kua “nakai fakai foki ha mena taha kua galo ki mua [ha Iehova],” mauokafua a tautolu to futiaki mai e ia a lautolu “ne fia kai mo e fia inu ke he mahani tututonu” ke he fakatokatokaaga haana mo e foaki e tau mena kai fakaagaaga ki a lautolu.​—Hepe. 4:13; Mata. 5:6; Ioane 6:44; 10:14.

2. Ko e heigoa ne taute he tau tohi ha tautolu he foaki e tau mena kai fakaagaaga?

Ma e tagata ke tupu e tua malolō, kua lata a ia ke nakai totou e Tohi Tapu. Latatonu ke maama e ia e mena ne totou ti fakagahua e mena ne fakaako e ia. (Iako. 1:22-25) Ko e eunuka Aitiope he senetenari fakamua ne loto fakaaue ke he mena ia. Ne totou a ia ke he Kupu he Atua he mogo ne hūhū e evagelia ko Filipo ki a ia: “Kua maama nakai kia koe e tau mena kua totou ai e koe?” Tali atu e eunuka: “To maeke fefe e au, ka nakai fakakite mai e taha kia au?” (Gahua 8:26-31) Ne tali e Filipo he lagomatai e eunuka ke moua e iloilo tonu ke he Kupu he Atua. Ne fakalagalaga lahi e eunuka ke he mena kua fakaako e ia ti papatiso ai. (Gahua 8:32-38) Pihia foki, ko e tau tohi faka-Tohi Tapu ha tautolu kua lagomatai a tautolu ke moua e iloilo tonu ke he kupu mooli. Kua hokotia ai ke he tau logonaaga ha tautolu ti kua omoomoi a tautolu ke fakagahua e mena kua fakaako e tautolu.​—Kolo. 1:9, 10.

He puhala he tau tohi, kua foaki ke he tau fekafekau ha Iehova e tau mena fakaagaaga loga ke kai mo e inu. (Isaia 65:13) Tuga anei, Ko e Kolo Toko ne moua ke molea 210 e vagahau, fakamaama e perofetaaga he Tohi Tapu, fakalahi e maamaaga ha tautolu ke he tau kupu mooli hokulo, mo e fakalagalaga a tautolu ke moui fakatatau ke he tau matapatu fakaakoaga he Tohi Tapu. Ko e mekasini Awake!, ne fakailoa kavi ke he 100 e vagahau, kua fakalaulahi ha tautolu a iloilo ke he tau gahua tufuga ha Iehova mo e fakakite ki a tautolu e puhala ke fakagahua e fakatonuaga aoga he Tohi Tapu. (Fakatai 3:21-23; Roma 1:20) Foaki he fekafekau fakamoli e tau tohi ne fakavē ke he Tohi Tapu ke molea 680 e vagahau! Fakatoka nakai e koe e magaaho he tau aho takitaha ke totou e Tohi Tapu? Totou nakai e koe e tau mekasini foou oti mo e tau tohi foou oti ne moua ke he vagahau haau he tau tau takitaha?

Lafi atu ke he tau tohi kua taute, kua tauteute he fakatokatokaaga ha Iehova e tau lauga ne fakavē ke he Tohi Tapu ne kua foaki he tau feleveiaaga, tau toloaga, mo e tau fonoaga ha tautolu. Fiafia nakai a koe ke he tau lauga, tau taute tala, tau fakatātāaga, mo e tau hūhū tala ne taute ke he tau fakapotopotoaga ia? Ne lahi mooli e galue fakaagaaga ne foaki mai e Iehova ki a tautolu!​—Isaia 25:6.

3. Ka nakai moua oti e koe e tau tohi ke he vagahau haau, to hoge fakaagaaga kia a koe?

Ko e tali, nakai. Ti nakai lata ke ofo a tautolu ko e falu fekafekau ha Iehova he falu mogo, kua loga atu e mena kai fakaagaaga ne moua ke he falu. Ko e ha ne pihia ai? Manamanatu ke he tau aposetolo. Ne loga atu e tau fakatonuaga ne moua e lautolu ke he tau tutaki tokologa he senetenari fakamua. (Mare. 4:10; 9:35-37) Pete ia, nakai hoge fakaagaaga e tau tutaki ia; ne moua e lautolu e tau mena kua lata mo lautolu.​—Efeso 4:20-24; 1 Pete. 1:8.

Kua aoga foki ke mailoga ko e laulahi he mena ne talahau mo e taute e Iesu he nofo he lalolagi kua nakai tohi he tau fakamauaga Evagelia. Ne tohi he aposetolo ko Ioane: “Ko e falu a mena loga foki ne eke e Iesu; kaeke ke tohi kia oti kana, kua manatu au nakai maeke he toka ai ke he lalolagi e tau tohi ia ka tohi.” (Ioane 21:25) Pete ne lahi e vala tala he tau tutaki ha Iesu he senetenari fakamua hagaao ke he tagata mitaki katoatoa ko Iesu ke he ha tautolu, kua nakai tonoa a tautolu. Mailoga mooli e Iehova kua lahi e mena ha tautolu kua iloa hagaao ki a Iesu ke eke ai mo tau tutaki ne muitua ke he haana tau tuagahui.​—1 Pete. 2:21.

Manamanatu foki ke he tau tohi ne fakafano he tau aposetolo ke he tau fakapotopotoaga he senetenari fakamua. Fai tohi ne tohia e Paulo ne nakai fakamau he Tohi Tapu. (Kolo. 4:16) Kua tote kia e tau mena kai fakaagaaga ha tautolu ha kua nakai moua e tautolu e tohi ia? Nakai. Iloa e Iehova e mena kua lata mo tautolu ti foaki ki a tautolu lahi e mena ke fakatumau a tautolu ke malolō fakaagaaga.​—Mata. 6:8.

He vahā nei, falu matakau he tau fekafekau ha Iehova kua loga e mena kai fakaagaaga kua moua ke he falu. Fakaaoga nakai a koe he vagahau ne gahoa e tau tohi kua moua? Ka pihia, iloa na leveki e Iehova a koe. Fakaako ke he tau tohi kua ha ha ia koe, ti ka maeke, fano ke he tau feleveiaaga he vagahau kua maama e koe. Ti mafanatia ko Iehova ke fakatumau a koe ke malolō fakaagaaga.​—Sala. 1:2; Hepe. 10:24, 25.

4. Ka nakai fai puhala a koe ke moua e tau tohi he jw.org, to lolelole fakaagaaga kia a koe?

He faahi Kupega Hila ha tautolu, kua taute e mautolu e tau lagaki he tau mekasini mo e falu tohi fakaako Tohi Tapu ha tautolu. Foaki foki he faahi Kupega Hila e tau tohi ke lagomatai e tau hoa, tau fuata mui, mo lautolu ne fai fanau ikiiki. Aoga e tau magafaoa he fakatutala ke he vala tala nei he tau magaaho Tapuakiaga he Magafaoa ha lautolu. Lafi ki ai, ne ha ha he faahi Kupega Hila ha tautolu e tau fakaholoaga pauaki, tuga e tau kautūaga i Kiliata mo e fono lagataha he tau, mo e fakailoa tumau ke he tau matakainaga ha tautolu he lalolagi katoa hagaao ke he tau mena tutupu matematekelea pauaki mo e tau tutupuaga matafakatufono ne lauia ai e tau tagata ha Iehova. (1 Pete. 5:8, 9) Ko e koloa malolō lahi foki e faahi Kupega Hila ke he gahua fakamatala, he taute e tala mitaki ke moua he tau motu ne fakakaupā po ke pā e gahua ha tautolu.

Ka e fakatumau a koe ke malolō fakaagaaga he moua po ke nakai moua e faahi Kupega Hila. Kua gahua malolō e fekafekau fakamoli ke lolomi fakalahi e tau tohi ke fakatumau e fagaiaga fakaagaaga mitaki he tau fekafekau takitaha. Ko e mena ia, kua nakai lata ia koe ke fakamakamaka ke fakatau e matini ke moua e jw.org. Falu ne lomi ne lautolu falu vala tala mai he faahi Kupega Hila ti age ki a lautolu ne nakai fai Initanete, ka e nakai lata he tau fakapotopotoaga ke taute e mena nei.

Loto fakaaue a tautolu ki a Iesu he taofi ke he haana maveheaga ke leveki e tau manako fakaagaaga ha tautolu. He tata mafiti e tau aho fakamui nei ke he fakaotiaga, mauokafua a tautolu to matutaki a Iehova ke foaki e tau mena kai fakaagaaga ke he tau magaaho tonu.