TAU HŪHŪ TOHI TAPU KUA TALI
To moua nakai e tautolu taha ni e fakatufono ke pule ke he lalolagi katoa?
Tamai fakalataha fēfē he fakatufono he lalolagi e tau motu oti kana? Isaia 32:1, 17; 54:13
Manamanatu la ke he puhala ka aoga e fakatufono he lalolagi ke he tau tagata. Vahā nei, tokologa e tagata kua matematekelea ha kua mativa a lautolu, ka e maukoloa lahi e falu. Ka ko e fakatufono fakaalofa he lalolagi katoa to eketaha ke leveki fakamitaki e tau tagata oti kana. Manatu nakai a koe to maeke e tau tagata ke fakatu e fakatufono pihia?—Totou Ieremia 10:23.
Tali mai he kamataaga, ne kaumahala lahi e tau fakatufono ke leveki e tau tagata ha lautolu, mua atu e tau tagata nonofogati. Ne mahani vale falu fakatufono. (Fakamatalaaga 4:1; 8:9) Ka e mavehe he Atua Mua Ue Atu ke fakatu taha e fakatufono ke hukui aki e tau fakatufono oti. To leveki mooli he Pule ia e tau tagata oti.—Totou Isaia 11:4; Tanielu 2:44.
Ko e heigoa ka taute he Kautu he Atua?
Ne kotofa e Iehova ko e Atua e Pule mitaki katoatoa ke he lalolagi—ko e haana Tama, ko Iesu. (Luka 1:31-33) He nofo a ia he lalolagi, ne fiafia a Iesu ke lagomatai e tau tagata. Ko e Patuiki, to tamai fakalataha e ia e tau tagata he tau motu oti mo e utakehe e tau matematekelea oti kana.—Totou Salamo 72:8, 12-14.
To talia nakai he tau tagata oti a Iesu ko e Pule? Nakai. Ka kua fakauka a Iehova. (2 Peteru 3:9) Kua foaki e ia e magaaho ma e tau tagata ke talia a Iesu ko e Pule. Nakai leva, to utakehe e Iesu e tau tagata kelea mai he lalolagi mo e tamai e mafola mo e haohao mitaki ke he lalolagi katoa.—Totou Mika 4:3, 4.