Ka Mate e Fakahele

KAEKE kua mate e taha fakahele haau, liga kehekehe foki e tau logonaaga haau, mai he momoko ke he matimati mo e nakai fahia. Liga logona hifo foki e koe e ita, tokihala, mo e matakutaku. Ti liga manamanatu a koe na aoga agaia nakai ke moui.

Kia mauokafua ko e maanu ne nakai ko e fakamailoga he lolelole. Ko e fakakiteaga a ia kua fakaalofa hofihofi a koe ke he fakahele haau. Ka e maeke nakai ke moua e mafanatia ke he maanu mamahi lahi haau?

PUHALA KUA FAHIA MAI E FALU

Pete kua tuga e nakai fai fakaotiaga e mamahi haau, liga mafanatia a koe he tau manatu nei:

FAKAATĀ E MAGAAHO KE MAANU

Nakai tatai e puhala ne maanu e tau tagata po ke fiha e leva he maanu. Ka e maeke e tagi ke lagomatai a koe ke fakatoka mai e mamahi. Ko Vanessa ne talahau i luga, ne pehē: “Tagi au ha kua lata ni ke fakatoka mai e mamahi.” Ko Sofía ne mate fakaofo e tehina, ne pehē: “Mua e mamahi ke fehagai mo e tau manatu mo e tau logonaaga haaku, ke tuga e fofole he matamotu mo e fakameā ai. Kua mua atu e mamahi, ka e lagomatai e matamotu ke maulu.”

TUTALA HAGAAO KE HE TAU MANATU MO E TAU LOGONAAGA HAAU

Maama ai, he falu magaaho kua manako a koe ke nofo tokotaha. Ka ko e mena mamafa gugune e maanu ke hahamo tokotaha e koe. Ko Jared ne 17 e tau he moui, ne mate e matua taane, ne talahau: “Tutala au ke he falu hagaao ke he tau logonaaga haaku. Liga nakai maama mitaki e lautolu au, ka e mitaki he maeke ke fakakite haaku tau logonaaga.” Ko Janice ne totoku he vala tala fakamua ne talahau taha mena aoga foki: “Mua atu e mafanatia he tutala ke he falu. Logona hifo e au kua maama e lautolu ti nakai matimati lahi au.”

TALIA E LAGOMATAI

Taha e ekekafo ne pehē: “Ko e tagata ne maanu ne fakaatā e tau kapitiga mo e tau magafaoa ke lagomatai he magaaho fakamua [ne tupu e mena fakaofo] ne fa mukamuka ke fehagai mo e tau tuaga kehekehe he maanu.” Tala age ke he tau kapitiga haau e mena kua maeke a lautolu ke lagomatai; liga manako a lautolu ke lagomatai ka e nakai iloa e puhala.​—Tau Fakatai 17:17.

FAKATATA LAHI ATU KE HE ATUA

Pehē a Tina: “Magaaho ne mate fakaofo e taane haaku he kenesā, nakai maeke au ke tutala ki a ia, ti tala age e au ke he Atua e tau mena oti kana! Kamata e au e tau aho takitaha he ole ki a ia ke lagomatai au he aho. Nakai maeke au ke totoku oti e tau puhala loga ne lagomatai he Atua au.” Ko Tarsha ne 22 e tau he moui he magaaho ne mate e matua fifine haana, ne pehē: “Ko e totou Tohi Tapu e punaaga he mafanatia haaku he tau aho takitaha. Moua mai e au taha mena atihake ke manamanatu ki ai.”

MANAMANATU KE HE LIU TU MAI

Matutaki a Tina: “He kamataaga, nakai mafanatia au ke he amaamanakiaga he liu tu mai ha kua manako au ke he taane haaku, mo e manako foki e tau tama taane haaku ke he matua taane ha lautolu he magaaho tonu ia. Ka e fā e tau mogonei he mole, ne kuku mau au ke he amaamanakiaga nei. Ko e moui haaku a ia. Manamanatu au ke he magaaho ka liu ke kitia a ia, ti tamai he mena nei ki a au e mafola mo e fiafia!”

Liga nakai moua mafiti e koe e fakatotoka mai he maanu haau. Pete ia, ko e mena ne tupu ki a Vanessa ka maeke ke lagomatai. Pehē a ia, “Manatu a koe to nakai mafanatia, ka e to kitia e koe e tau aho fiafia.”

Manatu, pete he liga nakai galo e logonaaga ia mai he loto haau, kua aoga agaia ke moui. Ko e lagomatai fakaalofa hofihofi he Atua nukua moua agaia e koe e mafanatia he tau kapitiga mo e fai kakano e moui. Ti nakai leva to fakaliu tu mai he Atua a lautolu ne mamate. Manako a ia ke maeke a koe ke liu kuku e fakahele haau. To maulu tukulagi e mamahi ia he loto haau!