Ka Lauia he Matematekelea Tupu Pauaki

“Ko e logonaaga fakamua ha maua ko e fakaatukehe lahi mahaki. Malona tiaki e tau mena oti ha maua ha kua malolo e kelekele he puke lahi e vai.”—Andrew, Sierra Leone.

“He mole e afā, ne liliu a mautolu ki kaina. Nakai fai mena ne toe. Ofo lahi mahaki a mautolu. Ti fakatokotui e tama fifine haaku mo e tagi.”—David, Virgin Islands.

KAEKE kua hao mai a koe he matematekelea tupu pauaki, liga maama e koe e logonaaga he falu ne hao foki: ofo, fakatikai, fakagogoa, tupetupe, mo e miti kelea. Tokologa ne hao mai kua lolelole e tau loto mo e mategūgū ti tote e manako ke liu ati hake e moui.

Ka galo e tau mena oti haau ha ko e matematekelea tupu pauaki, liga logona hifo e koe kua nakai fahia ke fehagai mo e tuaga. Liga kamata foki ke logona hifo kua nakai aoga ke moui. Ka e fakamaama he Tohi Tapu kua aoga mooli e moui haau mo e fai amaamanakiaga mauokafua ma e vahā mitaki anoiha.

ILOA E KUPU MOOLI HE TOHI TAPU KA FOAKI MAI E AMAAMANAKIAGA

Pehē e Fakamatalaaga 7:8: “Kua mua e mitaki e fakahikuaga he mena ke he hana kamataaga.” He kamata a koe ke ati hake he mole e matematekelea tupu pauaki, tuga kua nakai fai amaamanakiaga e moui. Ka e he fakauka a koe ke liu ati hake e moui, to laukauka e tuaga.

Talahau tuai he Tohi Tapu e magaaho ka “nakai tuai logona foki . . . e leo he tagi, mo e leo he fakatutuku.” (Isaia 65:19) To mooli e mena nei ka eke e lalolagi mo parataiso i lalo hifo he Kautu he Atua. (Salamo 37:11, 29) Ko e tau matematekelea tutupu pauaki to galo tukulagi. Ko e tau mena mamahi ne manatu mo e lauia ai to utakehe tukulagi ha kua mavehe mai e Atua Malolō Ue Atu: “Nakai tuai manatu ke he tau mena fakamua, ti nakai hake ai ke he loto e tau mena ia.”—Isaia 65:17.

Manamanatu la: Kua fakatokatoka he Tufuga “ke foaki atu kia mutolu e fakahikuaga ne ha i ai e amaamanaki”—ko e moui mafola i lalo hifo he pule mitaki katoatoa he Atua. (Ieremia 29:11) He iloa e kupu mooli nei to aoga nakai ke moui? Ko Sally ne totoku he vala tala fakamua ne pehē, “He fakamanatu ki a koe ni e tau mena mitaki oti kana ka taute he Kautu he Atua ma tautolu anoiha, kua maeke ke lagomatai a koe ke tuku kehe e vahā kua mole mo e fahia ke he mogonei.”

Kia fakaako atu foki ke he tau mena ka nakai leva ti taute he Kautu he Atua ma e tau tagata. Ka taute pihia e koe pete e matematekelea ha ko e lekua tupu pauaki, kua aoga ke moui mogonei ka e amaamanaki lahi atu a koe ke he vahā anoiha ka nakai fai matematekelea tupu pauaki. He mogonei, foaki mai he Tohi Tapu e tau takitakiaga aoga ke lagomatai a koe ke fahia he mole e matematekelea tupu pauaki. Hanei falu lagomataiaga.

Tau Kupu Tohi Tapu ka Lagomatai

Moua e okioki kua lata.

“Kua mua he mitaki taha e puke aloalolima mo e nofo fakatekiteki, ke he na puke aloalolima ua mo e mamahi he gahua, mo e kai e matagi.”—Fakamatalaaga 4:6.

Talahau he tau tagata kumikumi, he mole e taha mena tupu fakaofo, “ka nakai mohe mitaki . . . ti maeke ke holo ki mua e kelea mo e uka lahi ke mauokafua.” Ko e mena ia, kua aoga ke lahi e okioki.

Talahau haau a tau logonaaga.

“Ko e fakaatukehe ke he loto he tagata kua tukutukuhifo ai a ia; ka ko e kupu mitaki ke olioli ai.”—Tau Fakatai 12:25.

Tutala ke he tagata he magafaoa po ke kapitiga tata. Lafi ke he fanogonogo, maeke e tau tagata he magafaoa po ke tau kapitiga tata ke talahau e tau kupu fakamafana mo e taute e tau gahua ke lagomatai.a

Onoono ki mua ke he tau magaaho mitaki.

“Ka e fakatalitali a tautolu ke he lagi fou mo e lalolagi fou, tuga ne hana [Atua] talahaua mai, ke nofo ai e tututonu.”—2 Peteru 3:13.

a Ko e tagata ne leva e fakaatukehe po ke tupetupe lahi mahaki kua liga lata ke kumi e tuluiaga fakaekekafo.