Tuku Atu Oti ki a Iehova e Tau Fakaatukehe ha Mutolu
“Kia fakatokolalo ai a mutolu ki lalo he lima malolo he Atua, kia fakamatalahi ai e ia a mutolu ke he vaha ke lata ia. Kia tuku atu kia ia e tau mena oti kua fakaatukehe ai a mutolu, ha ko e mena kua manatu e ia a mutolu.”—1 PETERU 5:6, 7.
1. Maeke fefe he fakaatukehe ke lauia a tautolu, mo e liga fakatai ke he mena fe e mena nei?
MAEKE e fakaatukehe ke lauia lahi mahaki e tau momoui ha tautolu. Kua tuga ai ni e patapataka ne fa logona he falu magaaho ne fakalavelave e leo kofe fulufuluola he letio. Kaeke kua nakai fai fakalavelave ke he leo taogo he letio, kua maeke ai ke moua e olioli ke he leo fakatagi fulufuluola mo e kua maeke ai ke fakatotoka e loto. Ka e pete ni ia, kua maeke he leo hoha patapataka ke moumou foki e ha leo kofe kua mua atu e fulufuluola, kua fakahogohogomanava mo e fakahohoha ai a tautolu. Kua maeke ai pihia he fakaatukehe ke tatai e lauiaaga ke he ha tautolu a loto mafola fakatotoka. Kua maeke ke pehia lahi hifo a tautolu ti nakai maeke ai a tautolu ke taute e tau mena kua aoga lahi. Kua moli, “ko e fakaatukehe ke he loto he tagata kua tukutukuhifo ai a ia.”—Fakatai 12:25.
2. Ko e heigoa ne talahau e Iesu Keriso hagaao ke he “fakaatukehe he tau mena he mouiaga nai”?
2 Ne vagahau a Iesu Keriso hagaao ke he haofia ka fakalavelave he loto fakaatukehe lahi mahaki. He hana perofetaaga ke he tau aho fakamui, ne ole fakamakamaka a ia: “A mutolu neke pehia ha mutolu a tau loto, he fakaniniko, mo e konahia, mo e fakaatukehe he tau mena he mouiaga nai; neke fakaofo mai e aho ia kia mutolu. Ha ko e mena tuga ne matahele, ke hoko mai ai kia lautolu oti kana kua nonofo ke he lalolagi oti. Hanai, kia mataala a mutolu, mo e liogi nakai noa, kia talahaua a mutolu kua aoga ke hao mai ke he tau mena oti ia ka hohoko mai, ke tutu foki ki mua he Tama he tagata.” (Luka 21:34-36) Ke tuga ni ka kai lotokai mo e kai kava lahi kua maeke ke tupu mai ai e manamanatuaga teva, ti kua maeke ai ke pehia lahi hifo he “fakaatukehe he tau mena he mouiaga nai” a tautolu ke galo moki mai he loto e tau mena ne mua, ti kelea ai e tau fua ka moua mai.
Kakano he Fakaatukehe
3. Kua fefe e fakamaamaaga he “fakaatukehe,” mo e heigoa e falu mena ne fakatupu mai ai?
3 Ko e fakamaamaaga he “fakaatukehe” “ko e loto hukia lahi po ke fakaagitau lahi kua hagahaga kelea e manamanatuaga he f[a] manamanatu ko e to hoko mai e malaia po ke kua amaamanaki ki ai.” Ko e “hopoate lahi e manamanatu po ke matakite pauaki ki ai” mo e “kua kelea lahi mo e lofia lahi he matakutaku mo e hopoate ti kua fa mahani ke kitia mai ai he tau fakamailoga he tino (tuga he kavakava lahi, nakai fakatotoka, mo e mafiti lahi e foutu he toto), he mahalohalo ke he tau mena moli mo e mena ne matakutaku ki ai, mo e nakai tua ko e fahia a ia ke taute e taha mena.” (Webster’s Ninth New Collegiate Dictionary) Ti maeke ai e fakaatukehe ke eke mo mena uka kua vihu lahi. Mai he tau mena loga hana ne fa fakatutupu mai ko e gagao, fuakau, matakutaku neke lauia he mahani holifono, neke oti nakai fai gahua, mo e kapaletu ke he tutuaga mitaki he magafaoa hana.
4. (a) Kua mitaki ke manatu e heigoa hagaao ke he tau tagata mo e ha lautolu a tau fakaatukehe? (e) Kaeke kua fakaatukehe a tautolu, ko e heigoa kua maeke ke taute?
4 Kua maaliali, kua kehekehe e tau fatifatiaga he manamanatuaga fakaatukehe, ke tuga ai he kehekehe e tau tutuaga po ke nonofoaga ne kua maeke ke tutupu mai ai e tau mena ia. He tuaga taha nakai tatai e tau mena ka taute he tau tagata oti. Ha ko e mena ia, kua lata na tautolu ke iloa pete ni foki kua nakai tupetupe e tau loto ha tautolu ke he taha mena, ka e liga ko e mena ka fakatupu aki e fakaatukehe lahi mahaki ke he falu he ha tautolu a tau faoa auloa ne tapuaki ki a Iehova. Ko e heigoa mogoia kua maeke ke taute kaeke ka hoko ai e fakaatukehe ke nakai maeke a tautolu ke toka e manamanatuaga ke he tau kupu moli he Kupu he Atua kua felauaki mo e fulufuluola lahi? Ai kua kaeke kua lauia kelea a tautolu he fakaatukehe ti nakai maeke a tautolu ke tokaloto e tau matakupu ke he pule katoatoa a Iehova mo e mahani hakohako Kerisiano? Liga nakai maeke a tautolu ke hiki ha tautolu a tau tutuaga. Ka e, kua lata na tautolu ke kumi e tau tala faka-Tohiaga Tapu kua maeke ke lagomatai a tautolu ke fahia ke kautu mai he tau fakaatukehe noa ne tutupu mai ha ko e tau mena vihi talatala he moui.
Maeke ke Moua e Lagomatai
5. To fefe e tau mahani ha tautolu ke felauaki mo e Salamo 55:22?
5 Ka lata e tau Kerisiano ke fai lagomatai fakaagaga mo e kua fakapehia he tau fakaatukehe, kua maeke a lautolu ke moua mai e fakamafanaaga he Kupu he Atua. Kua foaki mai e tau takitakiaga moli mo e foaki mai ki a tautolu e tau fakamafanaaga loga kua nakai tu kikioka a tautolu ha ko e tau fekafekau mahani fakamoli a Iehova. Ke tuga a nai, ne lologo e salamo ko Tavita: “Kia tuku atu kia Iehova e tau mena ne fakaatukehe ai a koe; ko ia ni ke fakamalolo a koe; nakai tuku e ia tukulagi e tau tagata tututonu ke fagahuatia.” (Salamo 55:22) To fefe e tau mahani ha tautolu ke felauaki mo e tau kupu nai? He tuku atu katoatoa ha tautolu a tau fakaatukehe, tau tupetupe, tau matakutaku, mo e tau fakalolelole ke he Matua loto fakaalofa ha tautolu i luga he lagi. To lagomatai he mena nei a tautolu ke logonatia e haohao mitaki mo e fakatotoka ai e loto.
6. Hagaao ke he Filipi 4:6, 7, ko e heigoa ka taute he liogi ma tautolu?
6 Kua mua atu e aoga he liogi tumau mo e loto katoa kaeke ke tuku atu ha tautolu a tau mena pehia, fakalataha mo e tau fakaatukehe oti, ki a Iehova. To fakamafola he mena nei e loto ha tautolu, ha ko e mena tohia he aposetolo ko Paulo: “Aua neke fakaatukehe a mutolu ke he taha mena taha; ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue. Ko e monuina foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu kia Keriso Iesu.” (Filipi 4:6, 7) Ko e “monuina foki mai he Atua” ko e fakatotoka kua mua atu e kehe ne olioli ai e tau fekafekau tukulele a Iehova mo e pihia foki ni he tau tutuaga kua mua atu e uka. Ko e fua ne moua mai he fakafetuiaga tata lahi ha tautolu mo e Atua. He liogi a tautolu ma e agaga tapu mo e toka ai ke omoi a tautolu, kua nakai uta kehe oti kana e tau mena vihi he tau momoui ha tautolu, ka e ha ha ia tautolu e olioli ko e fua he agaga ko e mafola. (Luka 11:13; Kalatia 5:22, 23) Kua nakai lofia a tautolu ke he fakaatukehe, ha ko e mena iloa e tautolu ko e taute e Iehova e tau tagata mahani fakamoli oti kana hana ke ‘nonofo mo e nakai haofia’ mo e nakai toka ha mena ke moumou katoa a tautolu.—Salamo 4:8.
7. Ko e heigoa e matagahua kua maeke e tau motua Kerisiano ke taute ke lagomatai a tautolu ke fahia ke kautu mai he fakaatukehe?
7 Ka e kua, kaeke ke hololoa ne fakaatukehe ha tautolu, pete ni kua manamanatu fakalahi a tautolu ke he tau kupu Tohiaga Tapu mo e liogi tumau? (Roma 12:12) Ko e tau motua kotofa he fakapotopotoaga ko e tau foaki maiaga mena foki a Iehova ke lagomatai a tautolu fakaagaga. Kua maeke ia lautolu ke fakamafana mo e lagomatai a tautolu he fakaaoga e Kupu he Atua mo e liogi fakalataha mo tautolu mo e ma tautolu. (Iakopo 5:13-16) Ne ole fakamakamaka e aposetolo ko Peteru ke he tau faoa feua motua mo ia ke leveki mamoe e fuifui he Atua mo e fakamakai, kua manako lahi, mo e kua mua atu e puhala ne taute aki. (1 Peteru 5:1-4) Kua ha ha he tau loto he tau tagata tane nei e tau mena kua mahomo atu e mitaki ne kua lata mo tautolu mo e fia lagomatai lahi. Kua moli, ke moua katoatoa e tau mena aoga he tau lagomatai he tau motua mo e tu mitaki fakaagaga i loto he fakapotopotoaga, kua lata a tautolu oti ke fakagahua e fakatonuaga ha Peteru: “A mutolu ko e tau fuata, kia omaoma a mutolu ke he tau patu; kia omaoma a mutolu oti ko e taha kia taha, kia fakatapulu a mutolu ke he loto holoilalo; nukua, totoko he Atua ke he tau tagata fakatokoluga, ka e foaki mai e fakaalofa noa kia lautolu kua holoilalo.”—1 Peteru 5:5.
8, 9. Ko e heigoa e fakamafanaaga kua maeke ke moua mai ia 1 Peteru 5:6-11?
8 Ne lafi mai a Peteru: “Ko e mena ia kia fakatokolalo ai a mutolu ki lalo he lima malolo he Atua, kia fakamatalahi ai e ia a mutolu ke he vaha ke lata ai. Kia tuku atu kia ia e tau mena oti kua fakaatukehe ai a mutolu, ha ko e mena kua manatu e ia a mutolu. Kia nonofo fakalatalata a mutolu, kia mataala a mutolu ha ko ia kua eke a mutolu mo tau fi hana, ko e tiapolo ia, kua faifano a ia tuga ne leona tagi, kua kumi kia falu ke faiola ai e ia; Kia totoko atu a mutolu kia ia, mo e mauokafua a mutolu ke he tua, he iloa e mutolu ha ne fakakatoatoa e tau mena mamahi ia ni ke he tau matakainaga ha mutolu ha he lalolagi. Ko e Atua foki hana e fakaalofa noa oti kana, ko ia kua ui kia tautolu ha ia Keriso Iesu ke hohoko atu ke he hana monuina tukulagi, ka oti he mamahi a mutolu ke he tau aho gahoa, kia fakakatoatoa ni e ia a mutolu, kia fakatumau, kia fakamalolo, ti fakave a mutolu. Kia ha ia ia e fakahekeaga mo e malolo tukulagi tukumuitea. Amene.”—1 Peteru 5:6-11.
9 Kua fakamafanatia lahi ha, he iloa kua maeke a tautolu ke ‘tuku atu ke he Atua e tau mena oti kua fakaatukehe ai a tautolu, ha ko e mena kua manatu e ia a tautolu’! Mo e kaeke ko e fua he tau laliaga he Tiapolo e falu he tau mena fakaatukehe ha tautolu, he lali ke moumou e fakafetuiaga ha tautolu mo Iehova, he fakahoko mai e favaleaga mo e falu matematekelea ki a tautolu, nakai kia homo ue atu he iloa ko lautolu ne taofimau e mahani hakohako to mitaki ne tau mena oti? E, ka mole e matematekelea fakaku ha tautolu, to fakaoti he Atua totonu noa ha tautolu a fakamahaniaga mo e to taute a tautolu ke mauokafua mo e malolo.
10. Ko e heigoa e tau fua ne tolu ne fakahaha ki ai ia 1 Peteru 5:6, 7 kua maeke ke lagomatai ke tuku hifo e fakaatukehe?
10 Ia 1 Peteru 5:6, 7 ne fakahaha mai ai ke he tau fua ne tolu ne kua maeke ke lagomatai a tautolu ke fahia mai he fakaatukehe. Ko e taha ko e mahani fakatokolalo, po ke “loto holoilalo.” Ne fakaoti ai e 1 Pe 5 kupu 6 mo e fakailoaaga “ke he vaha ke lata ai,” kua talahau ai kua lata ke fakauka. Kua fakakite mai he 1 Pe 5 kupu 7 kua maeke a tautolu ke mauokafua e tau loto ke tuku atu e tau fakaatukehe oti ha tautolu ke he Atua ‘ha ko e mena kua manatu e ia a tautolu,’ mo e kua fakamalolo mai ai e tau kupu nei ke falanaki katoatoa ki a Iehova. Kia o mai a a tautolu ke kitia ko e maeke fefe e mahani fakatokolalo, fakauka, mo e falanakiaga katoatoa ke he Atua ke lagomatai aki ke tuku hifo e fakaatukehe.
Maeke Fefe e Mahani Fakatokolalo ke Lagomatai
11. To lagomatai fefe he mahani fakatokolalo a tautolu ke fahia ke kautu mai he fakaatukehe?
11 Kaeke kua mahani fakatokolalo a tautolu, to talahau fakatonu ne tautolu ko e kehe muatua e mua ue atu he tau manatu he Atua mai he ha tautolu. (Isaia 55:8, 9) Lagomatai he mahani fakatokolalo a tautolu ke mailoga ha tautolu a tau manamanatuaga temotemoai ka fakatatai ke he kaputiaaga ha Iehova a onoonoaga. Kua kitia e ia e tau mena ne nakai kitia e tautolu, tuga ne fakakite mai he mena ne tupu ke he tagata tane tututonu ko Iopu. (Iopu 1:7-12; 2:1-6) He fakatokolalo a tautolu ni “ki lalo he lima malolo he Atua,” kua mailoga tuai e tautolu ha tautolu a tuaga tokolalo ka fakatatai mo e Pule Katoatoa kua Tokoluga. Ti eke ai foki e mena nei ke lagomatai a tautolu ke fahia ke kautu mai he tau tutuaga ne fakaata e ia. Kua liga manako lahi e tau loto ha tautolu ke moua vave e lagomatai, kakano he lagotatai katoatoa e tau mahani a Iehova, iloa tonu e ia e magaaho kua lata mo e ke taute fefe e tau mena ma tautolu. Ke tuga e fanau ikiiki mogoia, kia eke ai a tautolu ke kuku mo e loto fakatokolalo e lima malolo a Iehova, mo e mauokafua e tau loto ko e to lagomatai e ia a tautolu ke fahia ke kautu mai he ha tautolu a tau fakaatukehe.—Isaia 41:8-13.
12. To lauia fefe e fakaatukehe ke he haohao mitaki fakakoloa tino kaeke kua fakatokolalo a tautolu ke fakagahua e tau kupu ia Heperu 13:5?
12 Fakalataha ke he mahani fakatokolalo e fakamakai lahi ke fakagahua e fakatonuaga mai he Kupu he Atua, ko e mena fa mahani ke fakatote hifo e fakaatukehe. Ke fakatai ki ai, kaeke ko e fua mai ai he putoia lahi ke tuli koloa e fakaatukehe ha tautolu, kua mitaki ke manamanatu a tautolu ke he fakatonuaga a Paulo: “Kia noa ha mutolu a mahani mo e velevelekoloa; kia fakamamate a mutolu ke he tau mena ha ia mutolu; ha ko e mena talahau mai [e Atua], Nakai tuai toka ni e au a koe, nakai tuai tiaki ni e au a koe.” (Heperu 13:5) He fakatokolalo ke fakagahua e tau fakatonuaga ia, tokologa ne tokanoa mai ni e lautolu a lautolu he tau fakaatukehe lahi mahaki ke he haohao mitaki fakakoloa tino. Pete ni kua liga nakai une atu e mitaki he tutuaga he fahi tupe ha lautolu, nakai ko e mena mua a ia ke he tau manamanatuaga ha lautolu ko e mena ka moumou aki fakaagaga a lautolu.
Ko e Matagahua he Fakauka
13, 14. (a) Ke he fakatekiteki ke fakauka, ko e heigoa e fakafifitakiaga ne foaki mai he tagata tane ko Iopu? (e) He fakatalitali fakauka ki a Iehova ka taute e heigoa ma tautolu?
13 Ko e fakailoaaga “ke he vaha ke lata ai” ia 1 Peteru 5:6 kua talahau mai kua lata ai ke fakatekiteki ke fakauka. He falu magaaho ne toho loa ne tau mena vihi, mo e maeke he mena ia ke fakalahi hake e fakaatukehe. Kua mua atu mogoia ke toka e tau mena ia ke he tau lima a Iehova. Ne tohi e tutaki ko Iakopo: “Kua talahau e tautolu kua monuina a lautolu kua fakauka; kua fanogonogo a mutolu ke he fakauka a Iopu, kua iloa foki e mutolu e fakahikuaga ha he Iki, kua fakaalofa fakalahi mai e Iki mo e hofihofi noa.” (Iakopo 5:11) Kua tomo e tau koloa a Iopu, galo moki e fanau hogofulu he mamate, matematekelea ke he gagao teteki lahi, mo e ekefakakelea noa he kau fakamafana fakavai. Fa mahani tuai ni ke ha ha taha vala fakaatukehe he tau tutuaga pihia.
14 Ke he ha mena ni, kua mua atu e fakafifitakiaga a Iopu ke he mahani fakatekiteki ke fakauka. Kaeke kua hane hoko ki a tautolu e kamatamata kelea lahi ke he tua, liga lata na tautolu ke fakatalitali ma e lagomatai, tuga ne taute e ia. Ka e gahua e Atua ke he tau mena hana, he eke ai fakamui ke lagomatai mai a Iopu he hana matematekelea mo e lahi mahaki e palepale ne age ki a ia. (Iopu 42:10-17) He fakatalitali fakatekiteki ki a Iehova kua fakatupu mai ai ha tautolu a mahani fakauka mo e fakakite mai ai e hokulo he loto fakamoli ha tautolu ki a ia.—Iakopo 1:2-4.
Falanaki ki a Iehova
15. Kua lata he ha a tautolu ke falanaki katoatoa ki a Iehova?
15 Ne ole fakamakamaka a Peteru ke he faoa talitonu ke ‘tuku atu ke he Atua e tau mena oti kua fakaatukehe ai a lautolu ha ko e mena kua manatu e ia a lautolu.’ (1 Peteru 5:7) Ti kua maeke mo e lata ai a tautolu ke falanaki katoatoa ki a Iehova. Kua pehe mai ia Fakatai 3:5, 6: “Kia tua a koe kia Iehova mo e hāu a loto katoa; ka e aua neke falanaki a koe ke he hāu a pulotu. Kia manatu e koe a ia ke he hāu a tau puhala oti, ti fakahakohako ai e ia hāu a tau puhala.” Kakano ha ko e tau mena tutupu he tau momoui ha lautolu fakamua, kua uka ai falu ne pukeina mo e fakaatukehe ke tua ke he falu tagata. Ka e kua ha ha ia tautolu e tau kakano oti ke falanaki ke he Tufuga ha tautolu, ko e Punaaga ni mo e Fakatumauaga he moui. Pete ni foki kaeke kua nakai tua a tautolu ke he ha tautolu ni a tau mena ka taute he taha mena pauaki, kua maeke tumau na tautolu ke falanaki ki a Iehova ke laveaki mai a tautolu he tau matematekelea ha tautolu.—Salamo 34:18, 19; 36:9; 56:3, 4.
16. Ko e heigoa ne talahau e Iesu Keriso hagaao ke he fakaatukehe ke he tau koloa tino?
16 Ka falanaki ke he Atua kua fakalataha ki ai foki e mahani omaoma ke he hana a Tama, ko Iesu Keriso, ne fakaako mai e tau mena ne ako e ia mai he hana Matua. (Ioane 7:16) Ne ole fakamakamaka a Iesu ke he hana tau tutaki ke ‘tanaki e tau koloa ke he lagi’ he fekafekau ki a Iehova. Ka e kua e tau mena kua lata tonu mo e tino tuga e mena kai, mena tui, mo e fakamaluaga? “Aua neke fakaatukehe,” he fakatonu mai e Iesu. Ne tuhi mai e ia ko e fagai he Atua e tau manu lele. Ne fakatui fakafulufuluola e ia e tau fiti lakau. Nakai kia kua mua atu e tau tagata fekafekau he Atua mai he tau mena nei? Kua moli ko e mua a lautolu. He pihia, ne ole fakamakamaka a Iesu: “Ka kia kumikumi fakamua a mutolu ke he kautu he Atua mo e hana tututonu, ati lafi atu ai e tau mena oti ia kia mutolu.” Ne fakaholo atu a Iesu: “Hanai, aua neke fakaatukehe a mutolu ke he aho a pogipogi; ha ko e mena fakaatukehe e aho a pogipogi ke he hana tau mena.” (Mataio 6:20, 25-34) E, kua lata tonu a tautolu ke fai mena kai, mena inu, mena tui, mo e fakamaluaga, ka e kaeke kua falanaki a tautolu ki a Iehova, to nakai fakaatukehe noa ni a tautolu ke he tau mena nei.
17. Liga to fakatai fefe e tautolu kua lata lahi ke kumi mua e Kautu?
17 Ke kumi fakamua e Kautu, kua lata na tautolu ke falanaki ke he Atua mo e taofimau e tau mena kua mua ha tautolu ke he fakatokaaga kua lata. Ko e tagata uku ne nakai fai tula matagi kua liga uku hifo ki lalo he fuga vai ke kumi e fua ositosi ne toka ai e penina i loto. Ko e hana tuliaga tupe anai ma e hana magafaoa. Ko e mena kua mua atu moli foki! Ka ko e heigoa ne mua atu e aoga lahi? Matagi! Kua lata na ia ke liu hake tumau ke he fuga he vai ke fakapuke e tau mama hana. Kua mua ni e matagi. Ti kua pihia ai, kaeke kua lata na tautolu ke putoia he taha mena he fakatokaaga nei he lalolagi ke maeke ai ke moua e tau mena kua lata lahi mo e moui. Pete ni ia, kua lata ke mua mai e tau mena fakaagaga, kakano ha ko e tau momoui he magafaoa ha tautolu kua falanaki ke he tau mena ia. Ke kalo mai he fakaatukehe noa ke he tau koloa tino ne kua lata lahi, kua lata na tautolu ke falanaki katoatoa ke he Atua. Ko e taha mena foki, “kia fakamakai nakai noa ke he gahua he Iki” ka lagomatai aki ke tuku hifo e fakaatukehe “ha ko e fiafia kia Iehova” ka eke moli mo ha tautolu a taue malolo.—1 Korinito 15:58; Nehemia 8:10.
Tuku Atu Tumau Hau a Fakaatukehe ki a Iehova
18. Ko e heigoa e fakamoliaga kua kitia ka tuku atu oti ha tautolu a tau fakaatukehe ki a Iehova to maeke moli ke lagomatai a tautolu?
18 Ke mau tumau e onoonoaga tonu ke he tau mena fakaagaga, kua lata ia tautolu ke tuku atu tumau oti ha tautolu a tau fakaatukehe ki a Iehova. Kia manatu tumau ko e fakaalofa moli a ia ke he hana tau fekafekau. Ke fakatai ki ai: Kakano he nakai mahani fakamoli e tane hana ki a ia, ne tupu lahi e fakaatukehe he taha fifine Kerisiano ti kua uka lahi a ia ke mohe. (Fakatatai Salamo 119:28.) Ka ha he potu, mogoia, kua tuku atu oti e ia hana tau fakaatukehe ki a Iehova. Kua liligi atu e ia hana loto ke he Atua, he tala age ki a ia e mamahi ne kua fakamatematekelea a ia mo e hana fanau fifine ikiiki tokoua. He mole e tagi atu ke lagomatai mai a ia he liogi fakalahi, kua fa mahani tumau a ia ke mohe, ha kua falanaki lahi a ia ko e to leveki e Iehova a ia mo e hana fanau. He magaaho nai ko e fifine he vevehe mau faka-Tohiaga Tapu nei kua fiafia lahi e mau ke he taha motua.
19, 20. (a) Ko e heigoa a falu puhala ka maeke ia tautolu ke fahia ke kautu mai he fakaatukehe? (e) Ko e heigoa kua lata tumau a tautolu ke taute oti ke he tau fakaatukehe ha tautolu?
19 Ha ko e tau tagata a Iehova, kua ha ha ia tautolu e tau puhala kehekehe ke fahia ke kautu mai he fakaatukehe. Kua mua atu e lagomatai lahi ka fakagahua e Kupu he Atua. Kua ha ha ia tautolu e tau mena kai lolo fakaagaga uho ne foaki he Atua he puhala mai he “fekafekau fakamoli mo e lotomatala,” fakalataha mo e tau tala kua lagomatai lahi mo e fakahauhau ne lomi fakailoa he Kolo Toko mo e Awake! (Mataio 24:45-47) Kua ha ha ia tautolu e lagomataiaga he agaga tapu he Atua. Kua aoga lahi mahaki ki a tautolu ka liogi fakalahi tumau. Kua mautali mo e fakamakai e tau motua Kerisiano ne kotofa ke foaki e tau lagomatai mo e fakamafanaaga fakaagaga.
20 Kua aoga lahi foki ha tautolu ni a mahani fakatokolalo mo e mahani fakauka ke fakamitaki aki e fakaatukehe ka liga hake mai ia tautolu. Kua mua atu e aoga lahi he falanaki ki a Iehova, ha kua ati hake e tua ha tautolu he moua e tautolu hana lagomatai mo e takitakiaga. He mogoia, ko e tua ke he Atua kua maeke ke taofimau a tautolu ke nakai tupetupe noa. (Ioane 14:1) Ko e tua kua omoi a tautolu ke kumi fakamua e Kautu mo e lavelave tumau ke he gahua olioli lahi he Iki, ko e mena ka lagomatai aki a tautolu ke fahia ke kautu mai he fakaatukehe. Kua taute he tau gahua pihia a tautolu ke logona e haohao mitaki he vahaloto ia lautolu ne lologo e fakahekeaga he Atua ati hoko ai ki tukumalagi tukumuitea. (Salamo 104:33) Kia taute ai a tautolu mogoia ke tuku atu tumau ha tautolu a tau fakaatukehe oti ki a Iehova.
To Tali Fefe e Koe?
◻ Ko e heigoa e fakamaamaaga he fakaatukehe?
◻ Ko e heigoa falu puhala kua maeke ia tautolu ke fahia ke kautu mai he fakaatukehe?
◻ Maeke fefe he mahani fakatokolalo mo e fakauka ke lagomatai ke tuku hifo e fakaatukehe?
◻ Ke fahia ke kautu mai he fakaatukehe, kua aoga lahi he ha ke falanaki katoatoa ki a Iehova?
◻ Kua lata he ha a tautolu ke tuku atu tumau ha tautolu a tau fakaatukehe oti ki a Iehova?
[Fakatino he lau 20]
Iloa nakai e koe ko e ha ne pehe ai a Iesu, “Aua neke fakaatukehe”?