Tuku Atu ki a Iehova e Tau Mena Oti kua Fakaatukehe Ai a Koe

1, 2. (a) Ko e ha kua lauia a tautolu he fakaatukehe? (Kikite fakatino he kamataaga.) (e) Ko e heigoa ka fakatutala a tautolu ki ai he vala tala nei?

KE HE vahā nei, ko Satani “kua faifano a ia tuga ne leona tagi, kua kumi kia falu ke faiola ai e ia.” (1 Peteru 5:8; Fakakiteaga 12:17) Ko e fua, kua loga e pehiaaga he moui, ti lauia foki e tau fekafekau he Atua he fakaatukehe. Ko e tau fekafekau he Atua i tuai ne lauia foki he tau mogo tupetupe. Ma e fakatai, pehē e Tohi Tapu ne maanu e Patuiki ko Tavita he falu mogo. (Salamo 13:2) Ko e aposetolo ko Paulo ne “kapaletu ha ko e tau ekalesia oti.” (2 Korinito 11:28) Ka ko e heigoa ha tautolu ka taute he mogo ka pehia a tautolu he fakaatukehe?

² Ko e ha tautolu a Matua fakahele he lagi ne lagomatai haana tau fekafekau mai i tuai, ti manako a ia ke taute pihia foki ma tautolu he vahā nei. Tomatoma e Tohi Tapu ki a tautolu: “Kia tuku atu kia ia e tau mena oti kua fakaatukehe ai a mutolu, ha ko e mena kua manatu e ia a mutolu.” (1 Peteru 5:7) Maeke fēfē a koe ke taute e mena ia? To fakatutala a tautolu ke he fā e puhala. Maeke a koe ke (1) liogi, (2) totou mo e manamanatu fakahokulo ke he Kupu he Atua, (3) fakaatā e agaaga tapu ha Iehova ke lagomatai a koe, mo e (4) tutala ke he taha tagata ne falanaki a koe ki ai ke he tau logonaaga haau. He kumikumi a tautolu ke he fā e puhala nei, lali ke moua e tau mena ne lata a koe ke fakatolomaki ki mua.

“KIA TUKU ATU KIA IEHOVA E TAU MENA NE FAKAATUKEHE AI A KOE”

3. Maeke fēfē a koe ke “tuku atu kia Iehova e tau mena ne fakaatukehe ai a koe”?

³ Ko e puhala fakamua ka tuku atu e tau fakaatukehe ha tautolu ki a Iehova ko e liogi mai he tau loto. Ka fakaatukehe a koe, ko e manako he haau a Matua fakahele he lagi ki a ko e ke talahau e tau logonaaga he fatuakiloto haau ki a Ia. Ne olelalo e salamo ko Tavita ki a Iehova: “Ko e Atua na e, kia fakateliga mai a koe ke he haku a liogi.” He salamo taha ia ne pehē foki a Tavita: “Kia tuku atu kia Iehova e tau mena ne fakaatukehe ai a koe; ko ia ni ke fakamalolo a koe.” (Salamo 55:1, 22) Ka taute e koe e tau mena oti ke fakamafola e lekua, to lagomatai he liogi mai he loto ki a Iehova ke nakai tupetupe. Ka e gahuahua fēfē e liogi? Lagomatai fēfē ki a tautolu ke kalo kehe he tau logonaaga ne pehia he fakaatukehe?​—Salamo 94:18, 19.

4. Ka fakaatukehe a tautolu, ko e ha kua aoga lahi e liogi?

⁴ Totou Filipi 4:6, 7. Tali fēfē a Iehova ke he tau liogi mai he tau loto mo e liogi fakatumau ha tautolu? Lagomatai e ia a tautolu ke logona hifo e totokaaga mo e ke kalo kehe he tau manatu mo e tau logonaaga kelea. He nakai fakaatukehe mo e matakutaku, to lagomatai he Atua a tautolu ke mafola lahi mahaki e loto. Tokologa he tau matakainaga ha tautolu ne logona hifo e totokaaga nei. Maeke foki a koe ke logona pihia. “Ko e monuina [po ke mafola] mai he Atua” ka lagomatai a koe ke fahia he ha paleko! Falanaki katoatoa a koe ke he maveheaga ha Iehova: “Aua neke kitekite fano [po ke fakaatukehe] a koe, ha ko au ko e hau a Atua; kua fakamalolo e au a koe; ko e moli, kua lagomatai au kia koe.”​—Isaia 41:10.

MAFOLA HE LOTO MAI HE KUPU HE ATUA

5. Lagomatai fēfē he Kupu he Atua a koe ke mafola e loto?

⁵ Ko e puhala ke uaaki ke moua e mafola he loto ko e totou mo e manamanatu fakahokulo ke he tau kupu he Tohi Tapu. Ko e ha kua aoga e mena nei? Ko e Tohi Tapu ko e Kupu he Atua. Putoia ai e fakatonuaga pulotu mo e aoga mai he Tufuga ha tautolu. Pete ni ka fakaatukehe a koe, maeke a koe ke manamanatu fakalahi ke he tau manatu he Atua mo e manamanatu fakahokulo ke he fakatonuaga haana ke fakamalolō a koe. Lagomatai he mena nei a koe ke fahia, fakatote ai, po ke kalo mai he fakaatukehe. Matutaki pauaki e Iehova e totou he haana Kupu ke he “fakamalolo, mo e fakamanavalahi” ka e nakai ko e ‘matakutaku ti fakaatukehe.’​—Iosua 1:7-9.

6. Maeke fēfē he tau kupu ha Iesu ke aoga ki a koe?

⁶ I loto he Kupu he Atua, kua totou e tautolu ke he puhala ne vagahau a Iesu ke he tau tagata. Fiafia a lautolu ke fanogonogo ki a ia ha ko e tau kupu haana kua mafanatia mo e atihake, mua atu ki a lautolu ne lolelole po ke fakaatukehe. (Totou Mataio 11:28-30.) Ne manamanatu lahi a Iesu ke he tau logonaaga he falu. (Mareko 6:30-32) Tuga ni he mavehe e Iesu ke lagomatai e tau aposetolo ne ō fenoga mo ia, to lagomatai e ia a tautolu he vahā nei. Nakai lata a tautolu ke haia mo Iesu ke aoga mai he mena nei. Ha ko e ha tautolu a Patuiki he lagi, ne matutaki a Iesu ke fakakite e fakaalofa ki a tautolu. Ti ka fakaatukehe, maeke a koe ke logona hifo to ha ha ai a ia ke lagomatai a koe he magaaho tonu. Foaki mai e Iesu ki a tautolu e amaamanakiaga mo e fakamalolōaga kua lagomatai ki a tautolu ke fahia ke he fakaatukehe.​—Heperu 2:17, 18; 4:16.

TAU MAHANI NE MOUA MAI HE AGAAGA HE ATUA

7. Aoga fēfē a tautolu mai he agaaga tapu he Atua?

⁷ Mavehe a Iesu to foaki mai he ha tautolu a Matua e agaaga tapu ka ole ai a tautolu. (Luka 11:10-13) Maeke fēfē he puhala nei ke toluaki ke lagomatai ti fakatote e fakaatukehe ha tautolu? Ko e agaaga tapu, po ke malolō gahuahua he Atua kua lagomatai a tautolu ke feaki e tau mahani mitaki he ha tautolu a Atua malolō lahi. (Kolose 3:10) He Tohi Tapu, ko e tau mahani nei kua fakahigoa “ko e fua he Agaga.” (Totou Kalatia 5:22, 23.) Ka feaki e tautolu e tau mahani mitaki nei, to holo ki mua e tau fakafetuiaga ha tautolu mo e falu, mo e to kalo kehe he tau tuaga fakaatukehe. Kia kitekite a tautolu ke he fua he agaaga ka lagomatai a tautolu he tau tuaga pauaki.

8-12. Maeke fēfē he fua he agaaga tapu he Atua ke lagomatai a koe?

⁸ “Ko e fakaalofa, ko e fiafia, ko e mafola.” Ka fakalilifu e koe e falu, to tote e fakaatukehe haau. Fēfē? Ka fakakite e koe e fakaalofa fakamatakainaga, fakaalofa hofihofi, mo e lilifu ke he falu, maeke a koe ke kalo kehe he tau tuaga kua fakatupu a koe ke moua e tau logonaaga kelea tuga e ita, fakahogohogo manava, mo e tupetupe. To fakamukamuka lahi e mena nei ke fakatumau e mafola mo e falu.​—Roma 12:10.

⁹ “Ko e fakauka, ko e totonu, ko e mahani mitaki.” Pehē e Tohi Tapu: “Kia eke a mutolu mo tau tagata totonu ko e taha ke he taha, kia hofihofi ha mutolu a fakaalofa, mo e fefakamagaloaki a mutolu.” (Efeso 4:32) Ka muitua e tautolu e fakatonuaga ia, to moua e tautolu e tau fakafetuiaga mafola mo e falu, ti to fakamamao a tautolu mo e tau tuaga ka fakatupu e fakaatukehe. To mukamuka lahi foki ke fakafehagai mo e tau tuaga kua tutupu ha ko e nakai mitaki katoatoa ha tautolu.

¹⁰ “Ko e tua.” He vahā nei, fa tupetupe a tautolu ke he tupe mo e tau koloa tino. (Tau Fakatai 18:11) Maeke fēfē a tautolu ke kalo kehe he vahega fakaatukehe nei? Kua lata a tautolu ke muitua e fakatonuaga he aposetolo ko Paulo ke “fakamamate a mutolu ke he tau mena ha ia mutolu.” Ko e tua malolō ki a Iehova ka lagomatai a tautolu ke falanaki to foaki fakaalofa e ia e tau mena kua lata mo tautolu. Mavehe a ia: “Nakai tuai toka ni e au a koe, nakai tuai tiaki ni e au a koe.” Kakano haia ne talahau a tautolu tuga a Paulo: “Ko e Iki [Iehova], ko e haku a lagomatai haia, nakai matakutaku au ke he tau mena ke eke he tau tagata kia au.”​—Heperu 13:5, 6.

¹¹ “Ko e mahani molu, mo e manako fakalatalata.” Manamanatu ke he puhala aoga mo e lagomatai ki a koe ke fakakite e mahani molū mo e manako fakalatalata. Ko e tau mahani nei kua puipui a koe he talahau po ke taute e tau mena ka fakatupu ki a koe e fakaatukehe, mo e to aoga ki a koe he kalo kehe he “fakafiu oti mo e vale, mo e ita, mo e miha, mo e kupu kelea.”​—Efeso 4:31.

¹² Kua lata a koe ke mahani fakatokolalo ke falanaki ke he “lima malolo he Atua” mo e ke “tuku atu kia ia e tau mena oti kua fakaatukehe ai.” (1 Peteru 5:6, 7) Ka mahani fakatokolalo a koe, to lalago mo e leveki e Iehova a koe. He mailoga e koe e mena kua maeke ke taute mo e mena kua nakai maeke a koe ke taute, to nakai falanaki a koe ki a koe ni. To fakatote e fakaatukehe haau ha kua falanaki a koe ke he Atua.​—Mika 6:8.

“AUA NEKE FAKAATUKEHE”

13. Ko e heigoa e kakano ha Iesu he pehē a ia: “Aua neke fakaatukehe”?

¹³ Ia Mataio 6:34 (totou), moua e tautolu e fakatonuaga pulotu ha Iesu: “Aua neke fakaatukehe.” Liga nakai maeke a tautolu ke fakagahua e fakatonuaga nei. Ka ko e heigoa e kakano ha Iesu? Fitā he iloa e tautolu na fakaatukehe a Tavita mo Paulo he falu magaaho. Nakai kakano a Iesu ko e tagata ne fekafekau ke he Atua to nakai fakaatukehe. Ka e lagomatai e Iesu e tau tutaki haana ke maama kua nakai aoga, po ke molea e fakaatukehe ke fakamafola e tau lekua. To ha ha i ai e tau paleko he tau aho takitaha, ti kua nakai lata e tau Kerisiano ke lafi foki ke he fakaatukehe he manamanatu ke he tau lekua he mogo kua mole po ke mogo i mua. Maeke fēfē e fakatonuaga ha Iesu ke lagomatai a koe ke fakatote e fakaatukehe lahi mahaki?

14. Tuga a Tavita, maeke fēfē a koe ke fakatote e fakaatukehe?

¹⁴ Falu magaaho ne fakaatukehe e tau tagata ha ko e tau hehē ne taute e lautolu he tau mogo kua mole. Liga tokihala lahi a lautolu ke he mena ne taute e lautolu, pete ni kua leva he taute e lautolu e mena ia. Na tupetupe lahi e Patuiki ko Tavita he falu mogo ha ko e hehē haana. Pehē a ia: “Kua fakatutū au ha ko e oi he haku a loto.” (Salamo 38:3, 4, 8, 18) He tuaga ia, ne taute e Tavita e mena kua pulotu lahi. Falanaki a ia ke he fakaalofa noa mo e fakamagaloaga ha Iehova. Ti fiafia mogoia a Tavita he iloa na fakamagalo he Atua a ia.​—Totou Salamo 32:1-3, 5.

15. (a) Ko e heigoa foki kua fakaako e tautolu mai ia Tavita? (e) Ko e heigoa ka taute e koe ke fakatote e fakaatukehe? (Kikite puha “Falu Puhala Aoga ke Fakatote e Fakaatukehe.”)

¹⁵ Falu mogo, liga fakaatukehe a koe ke he tau mena ne tutupu mogonei. Ma e fakatai, he tohi e Tavita e Salamo 55, ne matakutaku a ia neke kelipopo. (Salamo 55:2-5) Ka e nakai fakaatā agaia e ia e fakaatukehe ke moumou e mauokafua haana ki a Iehova. Ne olelalo a Tavita ki a Iehova ke lagomatai a ia ke he tau lekua haana ka e iloa e ia kua aoga foki ke taute taha mena hagaao ke he tuaga haana. (2 Samuela 15:30-34) Maeke a koe ke fakaako mai he mena ne tupu ki a Tavita. He nakai fakaatā e fakaatukehe ke fakapehia a koe, taute e mena kua maeke ia koe ke fakamafola e lekua ti falanaki to leveki e Iehova a koe.

16. Maeke fēfē e kakano he higoa he Atua ke fakamalolō e tua haau?

¹⁶ Falu mogo ne liga fakaatukehe e Kerisiano ha ko e tau lekua ka tutupu he tau mogo i mua. Ka e nakai lata a koe ke tupetupe ke he tau mena ne nakaila tutupu ia. Ko e ha? Ha ko e laulahi he tau magaaho to nakai kelea e mena ka tupu tuga he manatu e tautolu ki ai. Manatu foki, kua nakai fai tuaga ne tiaki noa he Atua. Ko e higoa haana kua kakano ai “To Fakamooli Ai a Ia ke he Mena Ia.” (Esoto 3:14) Ti kua nakai lata a tautolu ke tupetupe ke he mogo i mua, ha ko e higoa he Atua kua fakakite to fakamooli katoatoa e finagalo haana ma e tau tagata. Talitonu a koe to fakamonuina he Atua a lautolu kua mahani fakamooli ti lagomatai a lautolu ke fakatote e fakaatukehe ke he magaaho kua mole, magaaho nei, mo e magaaho i mua.

TUTALA MO E TAGATA KUA FALANAKI A KOE KI AI

17, 18. Maeke fēfē e fakatutalaaga mitaki ke lagomatai a koe ka fakaatukehe?

¹⁷ Ko e puhala ke fāaki ka moua e koe e lagomatai he mogo ka fakaatukehe, ko e tutala fakamooli mo e atāina ke he taha ne falanaki a koe ki ai. Ko e haau a hoa mau, kapitiga tata, po ke motua he fakapotopotoaga ka maeke ke lagomatai a koe ke maama mitaki e tuaga haau. Pehē e Tohi Tapu ki a tautolu: “Ko e fakaatukehe ke he loto he tagata kua tukutukuhifo ai a ia; ka ko e kupu mitaki ke olioli ai.” (Tau Fakatai 12:25) Talahau foki he Tohi Tapu: “Kua ulu e tau mena ne manamanatu ki ai kaeke kua nakai fai pulega; ka e fakamau ai ni ke he tau pule tokologa.”​—Tau Fakatai 15:22.

¹⁸ Ko e tau feleveiaaga he fakapotopotoaga ha tautolu foki ka lagomatai a tautolu ke fakatote e tau fakaatukehe. He tau feleveiaaga he tau faahi tapu takitaha, kua fakalataha a koe mo e tau matakainaga haau ne manamanatu mo e manako ke fakamafana a koe. (Heperu 10:24, 25) Ko e “fefakamafanaaki” to fakamalolō mo e fakamukamuka a koe ke fahia mai he ha fakaatukehe.​—Roma 1:12.

KO E FAKAFETUIAGA HAAU MO IEHOVA KO E MALOLŌ MUA UE ATU

19. Ko e ha kua mauokafua a koe to fakamalolō he fakafetuiaga haau mo e Atua a koe?

¹⁹ Ko e motua i Kanatā ne iloa e aoga lahi ke tuku atu e fakaatukehe haana ki a Iehova. Lavelave lahi a ia he gahua ko e faiaoga mo e ko e tagata fakatonutonu he tau fanau aoga, ne matematekelea foki e malolō tino haana ti fakatupu e fakaatukehe. Ko e heigoa ne lagomatai a ia ke malolō? Ne eketaha a ia ke fakamalolō haana a fakafetuiaga mo Iehova. Lagomatai lahi foki e tau kapitiga mooli haana ki a ia he tau mogo uka, ti vagahau fakamooli mo e atāina a ia ke he hoana hagaao ke he tau logonaaga haana. Lafi ki ai, ne lagomatai he tau motua mo e leveki takaiaga a ia ke manamanatu ke he tuaga haana mai he onoonoaga ha Iehova. Lagomatai foki he ekekafo e matakainaga nei ke maama e matematekelea ke he malolō tino haana, ti maeke a ia ke hiki e fakaholoaga mo e moua e magaaho ke okioki mo e faofao. Fakahiku ai, ne iloa e ia ke tautaofi e tau tuaga mo e tau logonaaga haana. Ka ha ha i ai e tau mena ne nakai maeke a ia ke tautaofi, ne falanaki a ia ki a Iehova ke lagomatai.

20. (a) Tuku atu fēfē e fakaatukehe ha tautolu ke he Atua? (e) Ko e heigoa ha tautolu ka fakatutala ki ai he vala tala ka mui mai?

²⁰ He vala tala nei, fakaako e tautolu e puhala kua aoga ke tuku atu e fakaatukehe ha tautolu ke he Atua he liogi ki a Iehova mo e totou haana Kupu mo e manamanatu fakahokulo ki ai. Iloa foki e tautolu e aoga ke fakaatā e agaaga tapu ha Iehova ke lagomatai a tautolu, ke tutala ke he taha kua falanaki a tautolu ki ai, mo e ke o atu ke he tau feleveiaaga Kerisiano. He vala tala ka mui mai, to fakaako a tautolu ke he puhala kua lagomatai e Iehova a tautolu he foaki mai e taui he amaamanakiaga.​—Heperu 11:6.