Aua Neke Mahala ha ko e Fakaatukehe

“AUA neke fakaatukehe a mutolu ke he aho a pogipogi; ha ko e mena fakaatukehe e aho a pogipogi ke he hana tau mena. Lata ke he aho hana kelea ni.” (Mataio 6:34) Kua aoga moli e fakatonuaga ia ne foaki e Iesu Keriso ma tautolu oti kua nonofo he kaufakalatahaaga mafiti mo e tupetupe he vaha nei.

Moli lahi kia, kua maeke ia tautolu ke nakai fakaatukehe ke he tau mena vihi, tau fifiliaga, tau kotofaaga, mo e tau matagahua ha tautolu? Totou miliona e tau tagata ne tupetupe, maanu, mo e pehia e tau logonaaga. Ko e kakano haia ko e gahua miliona tala e tau tulaki fakatotoka mo e fakamohe.

Fakakaupa Mai i Fe

Kua lata ia tautolu ke pulega mo e tauteute ma e tau kotofaaga, tau gahua, tau fifiliaga, mo e tau mena vihi ha tautolu​—kua mafiti kia a lautolu po ke nakai. Kua fakamalolo he Tohi Tapu a tautolu ke “nofo . . . ki lalo ke totou e tau tupe” ato taute ai ha matafekau lahi. (Luka 14:28-30) Kua putoia ke he mena nei e fokifokiaga he tau fifiliaga kua ha ha i ai, kumikumi e tau lauiaaga ka fua mai, mo e totou e totogi ke lata mo e magaaho, malolo, mo e tupe.

Ha kua lata he tagata ke manamanatu fakamitaki ke he mena ka ligaliga ke tupu, kua nakai maeke po ke aoga he lali ke manamanatu e tau fua ka moua he tau mena oti. Ma e fakatai, ha ko e matakaki e haohao mitaki he magafaoa, kua liga manamanatu a koe ke he mena ke taute neke vela e kaina hau. Kua liga fakatau e koe ti tuku e tau puipui ahua mo e tau mena tamate afi ikiiki. Kua liga pulega mo e fakaako e koe e tau hala kehekehe he fale ke fehola mai ki fafo. Ka ko e magaaho fe ka oti e pulega aoga mo e lotomatala, ti kamata ai e pule katoa he fakaatukehe? Ko e tau fakaatukehe pihia kua kamata ka taufetului a koe ke he loga he tau tutuaga manatu fakataitai, loga ai ke he tau manamanatu teao. Ko e tau manatu fakatupetupe to liga kautu ki a koe, kua fakaohooho a koe he nakai liga kitia e koe po ke kua nakai lahi e mena kua taute e koe ke puipui aki e magafaoa hau. Ko e fakaatukehe lahi nei he tagata kua pehia lahi mahaki e manamanatuaga hau ti mohe alafia ai a koe.

Tu a Mose ki Mua a Farao

Ne age e Iehova ko e Atua e kotofaaga uka ke he perofeta hana ko Mose. Fakamua, ne tu a Mose ki mua he tau Isaraela mo e tala age ki a lautolu kua kotofa tuai e Iehova a ia ke takitaki a lautolu mai i Aikupito. Holo atu a Mose ke tu ki mua a Farao mo e ole ki a ia ke fakatoka e tau Isaraela ke o. Fakaoti ai, ne takitaki e Mose e toloaga ne totou miliona he o atu he tutakale ke he motu ne nonofo ai e tau tagata vale. (Esoto 3:1-10) Ko e tau mena oti nei kua lahi e fakamatakutaku, ka e fakaata nakai e Mose e matagahua nei ke fakapuke hana manamanatuaga aki e fakaatukehe nakai aoga?

Maaliali, ne kapeletu a Mose ke he loga he tau mena. Ne ole a ia ki a Iehova: “Kitiala, ka fano au ke he fanau Isaraela mo e pehe age au kia lautolu, Kua fakafano mai au kia mutolu he Atua he tau matua ha mutolu; ti pehe mai ai a lautolu kia au, Ko hai kia hau a higoa? To tala age ha ha e au kia lautolu?” Ne age e Iehova e tali ki a ia. (Esoto 3:13, 14) Ne kapeletu foki a Mose ke he mena ka liga ke tupu ka nakai mahalo a Farao ke talia a ia. Liu foki a Iehova tali e perofeta. Ko e mena vihi fakahiku​—ne talahau e Mose ko ia “ko e tagata nakai iloa ke fakamatala.” Fakamaulu fefe e mena nei? Ne kotofa e Iehova a Arona mo gutu vagahau a Mose.​—Esoto 4:1-5, 10-16.

Mautauteute ai e tau tali ke he tau huhu hana mo e tua ke he Atua, ne taute ni pihia e Mose tuga he poaki e Iehova. He nakai fakamamahi a ia aki e tau manatu matakutaku neke liga tupu ka fakafelau a ia mo Farao, ne “eke pihia ai” e Mose. (Esoto 7:6) Ane mai ni fakaata e ia e fakaatukehe hana ke kautu ki a ia, to fakalolelole he tau mena nei e tua mo e malolo kua lata ke taute hana matagahua.

Ko e puhala lagotatai ha Mose he fakagahua e kotofaaga hana ko e fakafifitakiaga ke he mena ne ui he aposetolo ko Paulo ko e “mahani fakalatalata.” (2 Timoteo 1:7; Tito 2:2-6) Ane mai nakai fakagahuahua e Mose e mahani fakalatalata, kua mukamuka lahi a ia ke kaumahala ha ko e lahi he hana kotofaaga to liga nakai talia ai e ia.

Tautaofi Hau a Tau Manatu

Fefe e tali atu hau ka fakafelau a koe mo e moui hau he tau aho takitaha mo e tau mena uka he tua hau po ke tau kamatamata? Kua fa aga kia koe ke matakutaku noa he manamanatu ke he tau kamatamata mo e tau totoko kua tafilu mai mua? Po ke onoono a koe ki ai ke he puhala lagotatai? Tuga he talahau he falu, ‘Ua fano he hala laupapa ato hoko a koe ki ai.’ Kua nakai fai kakano mogoia ke fano he hala laupapa manamanatu noa! Ti ko e fakakikiveka he ha ke he mena nakai tupu? Kua talahau he Tohi Tapu: “Ko e fakaatukehe ke he loto he tagata kua tukutukuhifo ai a ia.” (Tau Fakatai 12:25) Ko e fakahikuaga fa mahani a ia ke fakatuai he taute fifiliaga, he nakai fakahoko ai ato mule lahi.

Mua atu e hagahaga kelea he matematekelea fakaagaga ka fakatupu he fakaatukehe teao ia. Ne fakakite e Iesu Keriso e fakaaue pihia ma e “kupu he kautu” ka apitia katoatoa ha ko e fakavai he tau koloa mo e “fakaatukehe ke he tau mena he lalolagi nai.” (Mataio 13:19, 22) Tuga ni e vao mahukihuki kua fakaauhia e tau tega akau mai he hokotia ke he motua mo e fai fua, ti ko e tau fakaatukehe ne nakai tautaofi kua fakaauhia tautolu mai he holo fakaagaga ki mua mo e fua mitaki he fakaheke e Atua. Ko e pehia he fakaatukehe lahi mahaki nai he tagata, ne kua taofi ai e falu mai he tukulele a lautolu ki a Iehova. Kua tupetupe a lautolu, ‘Ka e kua ka nakai fakamoli au ke he tukuleleaga haku?’

Ne talahau he aposetolo ko Paulo ki a tautolu ko e tau fakaagaga ha tautolu, kua fakamakai a tautolu ke ta mai e “tau manatu oti ke omaoma kia Keriso.” (2 Korinito 10:5) Ko e fi ne mua ha tautolu, ko Satani ko e Tiapolo, to fiafia lahi ke fakamataulu e tau tupetupe ha tautolu ke fakalolelole a tautolu ke lolelole fakatino, logonaaga, mo e fakaagaga. Ko ia e iki he fakaaoga e tau fakauaua ke hele aki a lautolu ne nakai mataala. Ko e mena haia ne hataki foki e Paulo e tau Kerisiano ke nakai ‘fakaatā e ha mena ma e tiapolo.’ (Efeso 4:27) Ha ko e “atua he lalolagi nai,” ne kautu a Satani he ‘fakapouli e tau manatu ha lautolu kua nakai tua.’ (2 Korinito 4:4) Kia nakai fakaata e tautolu a ia ke pule ke he tau manamanatuaga ha tautolu!

Moua e Lagomatai

Ka fehagai mo e tau mena vihi maeke he tama ke fano ke he matua tane fakahele hana ti moua ai e takitakiaga mo e fakamafanaaga. Tatai ai, o atu a tautolu ke he Matua ha tautolu he lagi, ko Iehova, mo e tau mena vihi ha tautolu. Ko e moli, kua uiina e Iehova a tautolu ke tuku atu ki a ia e tau mena ne pehia mo e fakaatukehe a tautolu. (Salamo 55:22) Tuga e tama nakai liu tupetupe ke he tau mena vihi hana ha kua fita e moua e ia e tau fakamaloloaga mai he hana matua tane, kua lata ia tautolu ke nakai ni tuku atu e tau kavega ha tautolu ki a Iehova ka e toka foki a lautolu ki a ia.​—Iakopo 1:6.

Tuku atu fefe e tautolu e tau fakaatukehe ha tautolu ki a Iehova? Tali he Filipi 4:6, 7: “Aua neke fakaatukehe a mutolu ke he taha mena taha; ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue. Ko e monuina foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu kia Keriso Iesu.” E, he tali ke he tau liogi mo e tau ole tumau ha tautolu, maeke ia Iehova ke foaki mai e mafola ke he loto he puipui e tau manamanatuaga ha tautolu mai he tau fakaatukehe nakai lata.​—Ieremia 17:7, 8; Mataio 6:25-34.

Ke gahua lagotatai mo e tau liogi ha tautolu kua nakai lata ia tautolu ke vevehe kehe, fakatino po ke manamanatuaga. (Tau Fakatai 18:1) Ka e, kia lata ia tautolu ke manamanatu ke he tau matapatu fakaakoaga he Tohi Tapu mo e tau takitakiaga kua lauia e tau mena vihi ha tautolu, he fehola kehe mai he falanaki ni ke he pulotu ha tautolu. (Tau Fakatai 3:5, 6) Ko lautolu kua ikiiki mo e momotua kia fuluhi atu ke he Tohi Tapu mo e tau tohi Kolo Toko ma e tau vala tala loga he taute fifiliaga mo e fehagai mo e tau mena vihi. Lafi ki ai, he fakapotopotoaga Kerisiano, kua fakamonuina a tautolu aki e tau motua pulotu mo e lotomatala mo e falu Kerisiano momotua kua makai tumau ke tutala ki a tautolu. (Tau Fakatai 11:14; 15:22) Ko lautolu kua nakai lauia ai he tau logonaaga pihia mo e kua ha ha ai e manamanatuaga he Atua ke he mena ia ka maeke ke lagomatai a tautolu ke onoono ke he tau mena vihi ha tautolu mai he taha fahi. Ha kua nakai taute fifiliaga a lautolu ma tautolu, kua eke a lautolu mo punaaga lahi he fakamaloloaga mo e ati hake.

‘Kia Amaamanaki ke he Atua’

Nakai fakatikai taha kua lahi atu e tupetupe he fehagai mo e tau mena vihi moli ha tautolu he tau aho takitaha ka e nakai lafi ki ai ha kapeletu teao. Kaeke ko e fakaatukehe ke he mena ka tupu kua taute a tautolu ke matakutaku po ke nakai totoka, ti kia hahaga atu a tautolu ki a Iehova he liogi mo e tau ole. Hahaga atu ke he hana Kupu mo e fakatokatokaaga ma e takitakiaga, pulotu, mo e mahani fakalatalata. To moua e tautolu ko e heigoa ni e tuaga ka mafuta mai, kua fai lagomatai kua lata ke fakahako aki.

He pehia mo e tupetupe e loto, ne lologo e salamo: “Haku agaga na e, ko heigoa e mena kua mānu ai a koe? ko e ha foki kua fakaatukehe ai a koe ki loto ia au? kia amaamanaki a koe ke he Atua; ha ko e mena to liu foki fakaheke au kia ia, ko e haku a fakamonuinaaga ia mo e haku Atua.” (Salamo 42:11) Kia eke e tau mena ia mo logonaaga ha tautolu.

E, pulega ke he mena kua fai amanaki ki ai, ti toka e amaamanaki fakaofo ki a Iehova. “Kia tuku atu kia ia e tau mena oti kua fakaatukehe ai a mutolu.”​—1 Peteru 5:7.

[Fakatino he lau 31]

Tatai nakai a koe ki a Tavita, kua tuku atu e tau kavega mo e tau fakaatukehe hau ki a Iehova?