FAKAAKOAGA 02

Foaki he Tohi Tapu e Amaamanakiaga

Fufuta ne Lomi

Ko e tau tagata he lalolagi katoa ne fehagai mo e tau lekua kua tupu mai e tau logonaaga momoko, fakaatukehe, mo e matematekelea ki a lautolu. Kua fehagai nakai a koe mo e tuaga ne taute a koe ke logona hifo pihia? Liga matematekelea a koe ha ko e gagao po ke mate e fakahele haau. Liga hūhū hifo a koe, ‘To holo ki mua nakai e moui?’ Foaki he Tohi Tapu e tali mafanatia ke he hūhū ia.

1. Ko e heigoa e amaamanakiaga ne foaki he Tohi Tapu?

Fakamaama he Tohi Tapu e kakano ne puke e lalolagi he tau lekua ka e talahau foki he tala mitaki to nakai leva ti utakehe e tau lekua oti nei. Maeke e tau maveheaga he Tohi Tapu ke “foaki atu kia mutolu e fakahikuaga [po ke vahā i mua] ne ha i ai e amaamanaki.” (Totou Ieremia 29:11, 12.) Lagomatai he tau maveheaga ia a tautolu ke fahia ke he tau lekua mogonei, ke moua e aga mitaki, mo e moua e fiafia tukulagi.

2. Fakamaama fēfē he Tohi Tapu e vahā i mua?

Fakamaama he Tohi Tapu ko e vahā i mua to “nakai tuai fai mate, po ke fakatutuku, po ke tagi, ti nakai tuai fai matematekelea.” (Totou Fakakiteaga 21:4.) Ko e tau lekua ne taute e moui ke tuga kua nakai fai amaamanakiaga mogonei to utakehe katoatoa ai, tuga e nofogati, nakai fakafili tonu, gagao, mo e mate. Mavehe he Tohi Tapu to maeke e tau tagata ke fiafia e moui tukulagi he Parataiso he lalolagi.

3. Fakamalolō fēfē e falanaki haau to mooli e amaamanakiaga he Tohi Tapu?

Tokologa e tagata ne amaamanaki ke tutupu e tau mena mitaki, ka e nakai iloa tonu e lautolu to fakamooli e tau amaamanakiaga ia. Kua kehe e tau maveheaga he Tohi Tapu. Maeke a tautolu ke fakamalolō e falanaki ke he mena ne talahau ai he fakamakutu ke “kumikumi ke he tau Tohi.” (Gahua 17:11) He fakaako e koe e Tohi Tapu, to maeke a koe ke fifili ke talitonu ke he mena ne talahau ai hagaao ke he vahā i mua.

KUMIKUMI FAKAHOKULO

Kumikumi ke he falu tuaga ne mavehe he Tohi Tapu ma e vahā i mua. Kitia e puhala kua lagomatai he amaamanakiaga he Tohi Tapu e tau tagata mogonei.

Fakatino: Tau fakatino kehekehe ne fakatatai e tau tuaga ne lauia e tau tagata mogonei mo e tau maveheaga he Tohi Tapu ma e vahā i mua. Liu kitia e tau fakatino i lalo.

4. Foaki he Tohi Tapu e amaamanakiaga he moui tukulagi ke he tau tuaga mitaki katoatoa

Onoono ke he tau maveheaga nā he Tohi Tapu. Ha fe e tau maveheaga kua mua atu ki a koe? Ko e ha?

Totou e tau kupu Tohi Tapu ne tū he faahi he tau maveheaga ia, ti tutala ke he tau hūhū nei:

Logona hifo kia a koe kua moua e amaamanakiaga mai he tau kupu tohi nei? Foaki foki kia e amaamanakiaga ke he magafaoa mo e tau kapitiga haau?

Manamanatu kua moui a koe he lalolagi

KUA NAKAI FAI TAGATA . . .	KO E TAU TAGATA OTI . . .
ka matematekelea, lolelole he fuakau, po ke mate.—Isaia 25:8.	to kitia e tau fakahele ne mamate kua liu fakatū mai ke he moui he lalolagi.—Ioane 5:28, 29.
ka gagao po ke fai matafatia.—Isaia 33:24; 35:5, 6.	to moua e tino malolō mo e hakahakau he fuata.—Iopu 33:25.
ka lauia he nakai fakafili tonu.—Isaia 32:16, 17.	to loga e mena ke kai, mitaki e kaina, mo e fiafia e gahua.—Salamo 72:16; Isaia 65:21, 22.
ka mamahi ha ko e fua he felakutaki.—Salamo 46:9.	to nonofo mafola.—Salamo 37:11.
ka pehia he tau manatu tupetupe.—Isaia 65:17.	to nonofo tukulagi he tau tuaga mitaki katoatoa.—Salamo 37:29.

Tama taane ne gagao kua malolō ti kuku e matua fifine haana.

Tagata taane fuakau ne fuata ti toho e huilapa kua puke he tau lakau kai.

5. Maeke e amaamanakiaga he Tohi Tapu ke fai aoga

Tokologa e tagata ne loto lolelole po ke ita ha ko e tau lekua ne kitia e lautolu. Falu ne lali fakalahi ke hiki e tau tuaga ke he mitaki. Kitia e puhala kua lagomatai he maveheaga he Tohi Tapu e tau tagata mogonei he iloa to holo ki mua e tau tuaga. Tā e VITIŌ, ti tutala ke he tau hūhū nā.

VITIŌ: Loto Au ke Totoko e Nakai Fakafili Tonu (4:07)

Fakatino: Tau vala mai he vitiō ‘Loto Au ke Totoko e Nakai Fakafili Tonu.’ 1. Ko Rafika ne gahua he ulu vavae mo e tau tagata he lanu haana he mogo ne tote a ia. 2. Fiafia a Rafika ke kitia e tau tagata he tau lanu kehekehe ne gahua auloa he fano fakamua a ia ke he fonoaga he Tau Fakamoli a Iehova.

He vitiō, ko e heigoa e nakai fakafili tonu ne fakamamahi a Rafika?
Pete he nakai galo e nakai fakafili tonu ne kitia e ia, lagomatai fēfē he Tohi Tapu a ia?

Ko e amaamanakiaga he Tohi Tapu ma e vahā i mua ka lagomatai a tautolu ke totoko e loto lolelole mo e fahia ke he tau lekua. Totou Tau Fakatai 17:22 mo e Roma 12:12, ti tutala ke he tau hūhū nei:

Ka talitonu a koe ke he mena ne talahau he Tohi Tapu hagaao ke he vahā i mua, to fai aoga nakai ke he moui haau mogonei? Ko e ha?

PEHĒ FALU TAGATA: “Nakai mooli e tau maveheaga he Tohi Tapu ma e vahā i mua.”

Ko e ha kua aoga ke kumikumi ni e koe ke moua e tali mooli?

MANATU KATOA

Foaki mai he Tohi Tapu e amaamanakiaga mo e lagomatai a tautolu ke fahia ke he tau paleko he mavehe mai e vahā i mua kua puke he fiafia.

Liu Fakamanatu

Ko e ha e tau tagata ne lata ke fai amaamanakiaga?
Ko e heigoa ne talahau he Tohi Tapu hagaao ke he vahā i mua?
Maeke fēfē he moua e amaamanakiaga ma e vahā i mua ke lagomatai a koe mogonei?

Aho ne oti e fakaako:

Mena ke Taute

Fakamahani ke he tau maveheaga he Tohi Tapu he totou e tau kupu tohi he fakaakoaga nei.

Falu:

Your other goal

KUMI FOKI

Fakaako fakalahi hagaao ke he malolō he amaamanakiaga.

“Amaamanakiaga—Moua e Koe I Fe?” (Ala!, Aperila 22, 2004)

Moua e puhala kua lagomatai he amaamanakiaga ma e vahā i mua a lautolu kua hololoa po ke leva e gagao.

“Maeke Nakai he Tohi Tapu ke Lagomatai a Koe ka Hololoa e Gagao?” (Vala tala he kupega hila)

Ka kitekite a koe ke he vitiō he lologo nei, manamanatu ko koe mo e magafaoa haau hane fiafia e moui he Parataiso he vahā i mua ne mavehe he Tohi Tapu.

Manatu ke he Magaaho (3:37)

Totou ke he puhala ne hiki e moui he tagata totoko he fakaako e ia e amaamanakiaga he Tohi Tapu ma e vahā i mua.

“Nakai Liu Au ke Logona Hifo kua Lata Au ke Hiki e Lalolagi” (Ko e Kolo Toko, Iulai 1, 2013)