Ka Gagao Lahi a Koe

“Magaaho ne iloa e au kua kenesā e māmā mo e vala he gakau lahi haaku, ne manatu au to mate mooli au. Ka e hoko au ki kaina he oti e kitia he ekekafo, ne manatu au, ‘Ē, nakai amanaki au ke pihia ka e to kumi puhala au ke fehagai mo e mena nei.’”—Linda, ne 71 e tau he moui.

“Matematekelea au he gagao mamahi lahi ne lauia e tau hokohoko he faahi hema he fofoga haaku. Fa mamahi lahi au ti moua he gagao fakaatukehe. Lagaloga ne logona hifo e au e matimati ti manamanatu foki ke uta ne au haaku moui.”—Elise, ne 49 e tau he moui.

Tagata gagao ne nofo he nofoa fakataveli ne haia mo e tau fakahele

KAEKE kua moua a koe po ke taha fakahele he gagao lahi ti liga ke mate, iloa e koe e fakaatukehe he mena nei. Lafi ke he gagao, ne fehagai foki a koe mo e tau logonaaga fakaagitau. Liga lahi e matakutaku mo e tupetupe ha ko e o atu ke he tau ekekafo, uka ke moua po ke totogi he tuluiaga, po ke lauiaaga he tau vai tului fakaekekafo. Maeke ke lahi e tupetupe ka moua he gagao kelea lahi.

Fuluhi a tautolu ki fe ma e lagomatai? Tokologa ne mafanatia lahi mahaki he falanaki ke he Atua he liogi mo e totou e tau kupu atihake he Tohi Tapu. Taha lagomatai foki ko e fakaalofa mo e lalago he magafaoa mo e tau kapitiga.

PUHALA KUA FAHIA MAI E FALU

“Tua ke he Atua ka fehagai a koe mo e gagao,” he tomatoma e Robert ne 58 e tau he moui, “mo e to maeke a ia ke lagomatai a koe. Liogi ki a Iehova. Tala age ki a ia e tau logonaaga haau. Ole ki a ia ma e agaaga tapu. Ole ki a ia ke moua e loto malolō ke mauokafua e magafaoa ti fakaatā a koe ke fakatotoka he fakauka ke he gagao haau.

“Aoga lahi ka lagomatai he magafaoa haau a koe ke mafanatia, ka haia a lautolu mo koe. Fa tokotaha po ke tokoua ne hea telefoni mai he tau aho oti mo e hūhū, ‘Fēfē a koe?’ Atihake au he tau kapitiga mai he tau matakavi kehekehe. Ne fakamalagaki hake mooli e lautolu au, ti lagomatai au ke fakauka.”

Kaeke ko e kapitiga a koe ne ahiahi atu ke he tagata gagao, mailoga e talahauaga ha Linda: “Ko e tagata gagao kua manako ke tokotoko mitaki e moui ti liga nakai manako ke tutala tumau ke he gagao. Ko e mena ia, tutala ke he tau mena ne fa mahani a koe ke tutala ki ai.”

Ha ko e loto malolō mai he Atua mo e mafanatia he tau kupu Tohi Tapu, pihia foki mo e lalagoaga he magafaoa mo e tau kapitiga fakaalofa, maeke a tautolu ke tumau e mauokafua kua aoga ke moui, pete hane fakauka a tautolu ke he gagao kelea lahi.

Tau Kupu Tohi Tapu ka Lagomatai

Falanaki ke he Atua.

“Ne kumikumi au kia Iehova, ti tali mai ai a ia kia au, mo e laveaki e ia au mai he tau mena oti ne matakutaku ai au. . . . Ne ui atu e tagata mamahi nai, ti fanogonogo mai ai a Iehova.”—Salamo 34:4, 6.

Pehē a Linda ne totoku i luga: “Nakai liogi au, ‘Kia fakamaulu e gagao haaku.’ Liogi tumau au, ‘Lagomatai au ke loto malolō, mo e lagomatai au ke fakauka ke he gagao haaku.’”

Moua e malolō mai he Kupu he Atua.

“To nakai pehe mai foki taha kua nofo ai, Kua gagao au.”—Isaia 33:24.

Manamanatu fakahokulo ke he tau maveheaga he Atua ma e anoiha ke moua e koe e amaamanakiaga mo e fakauka.

Kumi e lagomatai mai he magafaoa mo e tau kapitiga.

“Kua fakaalofa e kapitiga ke he tau aho oti kana; kua fanau foki e matakainaga ke lata ai mo e aho matematekelea.”—Tau Fakatai 17:17.

“Ua vevehe kehe e koe a koe,” he tomatoma e Elise ne totoku i luga. “Fakaatā e tau kapitiga haau ke lagomatai a koe. To fai magaaho ka matimati a koe ti manamanatu foki kua nakai fanogonogo mai e Atua, ka e ua vevehe kehe e koe a koe.”