Mataala Nakai a Tautolu​—Ke Kalo Kehe he Tau Mena Fakatauhele?

¹ Ne foaki e Iesu e hatakiaga: “Kia mataala a mutolu, . . . ke hao mai” he tau malaia ka hohoko mai. (Luka 21:36) Ne nonofo a tautolu he tau magaaho hagahagakelea lahi tali mai he fakamauaga he tau tagata. Kia tatali e malaia ki a lautolu ne lolelole he fia mohe fakaagaga. Ko e mena hagahagakelea lahi anei ma tautolu takitokotaha.

² Tau Fakatauhele ne Fa Mahani: Ko e falu kua lavelave lahi mo e tau fakafiafiaaga ne nakai hagahaga mitaki po ke ne tuaha lahi, ti lafi atu kua pipiki mau ke he TV po ke Internet. Kua moli, nakai pehe anei he kumi fakamua e tautolu e Kautu ti lata ia tautolu ke kalo kehe mai he tau faga fakafiafiaaga oti. Ka ko e fakatauhele lahi a ia kaeke kua mua atu e mena ia ke he tau momoui ha tautolu, he hehele fakalahi ke he tau magaaho ha tautolu, tau malolo ha tautolu, po ke fakalatahaaga ha tautolu he gahua fakamatala.

³ Taha fakatauhele foki ne fa mahani ke lagaa aki e fia mohe fakaagaga ko e manako lahi ke he tau mena fakatino ne nakai lata. Kakano he mena nei kua lahi e magaaho he tagata ka gahua he gahuaaga ti tauomoi ai e tau tutuliaga fakaagaga. Ha kua mahala he tukumata ke he tau mena he Kautu, ne maeke ia tautolu ke lolelole he leveki e tau manako fakaagaga he magafaoa ha tautolu ti kaumahala ke fakakatoatoa e fekafekauaga ha tautolu.​—1 Timo. 5:8; 2 Timo. 4:5.

⁴ Lafi atu kua fakagofua he falu e ‘tau loto ha lautolu ke pehia hifo mo e fakaatukehe he tau mena he mouiaga nai’ ti kua momohe fakaagaga a lautolu. (Luka 21:34) He falu a magaaho, ne fakaatukehe ha kua nakai malolo e tino po ke tau mena ne fakatupetupe he magafaoa. Ka e aua fakagofua ha mena fakatagata pihia ke fakalolelole ha tautolu a mataala ke he fakaotiaga mafiti he fakatokaaga nei.​—Mare. 13:33.

⁵ Tau Lagomataiaga ke Fakamataala aki a Tautolu: Ko e heigoa falu a lagomataiaga ia? Mua atu e liogi. Kia liogi nakai noa a tautolu. (1 Tesa. 5:17) He fakatata atu ke he fakapotopotoaga Kerisiano to ‘fakalagalaga ai ia tautolu e fakaalofa mo e tau gahua mitaki.’ (Hepe. 10:24) Kia kamatamata tumau, ti kumikumi hifo ki a tautolu ni ke lagomatai ai a tautolu ke mataala ti kautu ke he tau lolelole ha tautolu. (2 Kori. 13:5) Ka fakamahani ke he tau puhala fakaako fakatagata to fakatumau a tautolu ke ‘fakamahani ke he tau kupu he tua.’ (1 Timo. 4:6) Kaeke kua makutu a tautolu, to mauokafua e tau loto ha tautolu ke kalo kehe mai he tau fakatauhele, ‘kia mataala, mo e kia tumau ke he tua.’​—1 Kori. 16:13.