Puha Huhu

◼ Ko e ha kua lata a tautolu ke mailoga pauaki e tau tapulu mo e tauteuteaga ha tautolu kaeke kua ahiahi atu ke he tau fale he Sosaiete i Niu Silani, mo e tau la ofisa ne ha ha i ai he lalolagi?

Kua amanaki tumau ke he tau Kerisiano ke gali e tau tauteute. Kua lata e tau tapulu mo e tauteuteaga ha tautolu he tau magaaho oti ke fakaata e puhala mea mo e lilifu kua lata mo tau fekafekau a Iehova ko e Atua. Kua moli pauaki e mena nei ka ahiahi atu ke he tau fale he Sosaiete i Auckland mo e he tau la he lalolagi.

He tau 1998, to fakatokatoka e tau fonoaga magamotu mo e he lalolagi. Tau afe he tau matakainaga ha tautolu mai he tau motu kehekehe ka ahiahi e tau fale matapatuaga he Sosaiete i New York pihia ni ke he tau la he falu motu kehe. Nakai ni ka ahiahi atu ke he tau fale nei ka e he ha magaaho noa foki, kua lata a tautolu ke ‘fakakite e tautolu a tautolu ke he tau mena oti ko e tau fekafekau he Atua,’ fakalataha foki ke he tau tapulu mo e tauteuteaga kua gali ha tautolu.​—2 Kori. 6:3, 4.

He tutalaaga ke he aoga he tau tapulu gali mo e tauteuteaga, kua totoku mai he tohi Organized to Accomplish Our Ministry he manako ke fakamea e tau tino, tau tapulu kua gali, mo e tauteuteaga mitaki kaeke kua o atu a tautolu ke he fekafekauaga he fonua mo e o atu ke he tau feleveiaaga Kerisiano. Ati, talahau ai he lau 131, paratafa 2: “Ko e mena pihia ni ke fakalata kaeke ka ahiahi atu ke he kaina Peteli i Brooklyn po ke taha la ofisa he Sosaiete. Manatu, ko e kakano he higoa Peteli ko e ‘Fale he Atua,’ ti kua lata he tau tapulu, tauteuteaga mo e mahani ha tautolu ke tuga ni he tau magaaho fa o ai ke he tau feleveiaaga ke tapuaki he Fale he Kautu.” Ko e tuaga tokoluga foki nei kua lata he kitekite mai he tau tagata fakailoa he tau matakavi tata pihia foki ia lautolu ne o mai he tau maaga mamao ke kitia mo e fefakalatahaaki mo e tau matakainaga he magafaoa Peteli mo e ahiahi e tau faahi he la.

Kua lata e tau tauteuteaga ha tautolu ke paotia fakamalolo e kitekiteaga he falu ke he tapuakiaga moli ha lautolu ki a Iehova. Pete ia, kua mailoga ai e falu matakainaga tane mo e fifine ne ahiahi e tau fale he Sosaiete, kua fakateaga ha lautolu a tau tapulu. Kua nakai gali e tau tapulu pihia ke ahiahi e ha kaina Peteli. Ko e mena haia, tuga ni ke he tau tuaga oti he moui Kerisiano ha tautolu, kua manako a tautolu ke taute tumau e tau tuaga tokoluga ne fakamailoga e tau tagata he Atua mai he lalolagi he taute e tautolu e tau mena oti kana ke fakaheke ai ke he Atua. (Roma 12:2; 1 Kori. 10:31) Kua lata foki ke vagahau ki a lautolu ne fakaako Tohi Tapu mo tautolu mo e falu foki ka ahiahi atu fou ke he Peteli ke fakamanatu ki a lautolu e aoga ke kitekite e tau tapulu mo e tauteuteaga kua gali.

Ti ka ahiahi atu ke he tau fale he Sosaiete, huhu hifo ki a koe ni: ‘Na gali nakai e tapulu mo e tauteute haku?’ (Fakatatai Mika 6:8.) ‘Fakaatagia mitaki nakai ke he Atua ne tapuaki a au ki ai? To hekeheke takina po ke hukia nakai e falu ha ko e tauteute haku? Kua fakatoka nakai e au e fifitakiaga tonu ke he falu kua ahiahi mai laia?’ Kia fakatumau a tautolu, mai he ha tautolu a tau tapulu mo e tauteuteaga, ke ‘fakalilifu ai e tau kupu he Atua, ha tautolu a fakamoui ke he tau mena oti.’​—Tito 2:10.

MAILOGA FAKAMOLEMOLE: He tau kua mole, ne molea ke he 100 motu ne aahi mai ai a lautolu ke he tau fale he Sosaiete ke he Tau Fahi Kaufakalataha. Ke maeke kia lautolu ne aahi atu ke moua e fakailoaaga he tau nonofoaga ne kua tukutukuhifo e totogi, kua loga e tau hea mamao he telefoni, ti kua lalahi e tau totogi. Ke fakatote hifo e totogi nei kua ha i ai ke he la i Niu Silani ke he mogonei e tohi fou ne fakailoa ai e nonofoaga ne kua tukuhifo e totogi. Ha ko e mena ia, ko e tau huhu oti hagaao ke he nonofoaga he tau fale he Sosaiete ke he Tau Fahi Kaufakalataha kua lata ainei ke fakafano ke he la i Niu Silani.