Puha Hūhū
◼ Ko e heigoa e vahega mena tui kua lata ka ahiahi ke he tau fale he fekafekauaga ha Iehova?
Ke he lalolagi katoa, ko e tau Fale he Kautu, tau Fale Toloaga, tau kaina Peteli, mo e tau fale he la kua maaliali ko e tau fale kua tukulele ke he fekafekauaga ha Iehova. Kua gali, meā, maopoopo, ti kitia ai e lilifu. Kua kehekehe mo e tau mena kua fa kitia ke he fakatokaaga ha Satani. Ko lautolu ne ahiahi e tau matakavi ne fakaaoga ma e fekafekauaga ha Iehova kua lata foki ke kitia ko e tau tagata ha Iehova, ko lautolu hane taute e finagalo haana.
Ko e tau Kerisiano, to “fakakite e [t]autolu a [t]autolu ke he tau mena oti ko e tau fekafekau he Atua,” putoia ha tautolu a tapulu mo e tauteuteaga kua lilifu. (2 Kori. 6:3, 4) Kua lata foki ia tautolu ke fakatumau e tauteuteaga mitaki. Ke he tau magaaho oti kua lata e mena tui mo e tauteuteaga ha tautolu ke fakaata e gali mo e lilifu ne kua lata he tau fekafekau ha Iehova ko e Atua. Kua lata mooli e mena nei kaeke ke ahiahi ke he tau fale he matapatu i New York ti pihia mo e tau la he lalolagi katoa.
He fakatutala ke he aoga he gali e tau mena tui mo e tauteuteaga, kua talahau he Organized to Do Jehovah’s Will ke he lata ke meā fakatino, gali e tapulu, mo e mitaki e tauteuteaga ka fakalataha ke he fekafekauaga he fonua mo e fakalataha ke he tau feleveiaaga Kerisiano. He lau 138 mogoia, paratafa 3, ne pehē: “Manatu ko e kakano he higoa Peteli ko e ‘Fale he Atua.’ Ko e mena ia, kua lata e tau mena tui, tauteuteaga, mo e mahani ha tautolu ke tatai mo e tau mena kua amanaki mai ia tautolu ka o atu ke he tau feleveiaaga ma e tapuakiaga he Fale he Kautu.” Kua lata e tuaga tokoluga nei ke muitua he tau tagata fakailoa he Kautu ne nonofo he matakavi ia mo lautolu ne o mai mamao ke ahiahi ke he Peteli. Ke he puhala nei, kua fakakite he tagata ahiahi e loto fakaaue mo e fakalilifu.—Sala. 29:2.
Kua lata e tau mena tui ha tautolu ke tuga a lautolu ne ‘talahaua kua mahani Atua.’ (1 Timo. 2:10) Ko e tau mena tui mo e tauteuteaga kua gali kua lauia mitaki ai ke he puhala ne onoono falu ke he tapuakiaga mooli ha Iehova. Pete ia, kua mailoga kua toko gahoa e tau matakainaga ka ahiahi ke he tau fale ma e fekafekauaga ha Iehova, kua fakateaga lahi, fulufagu, po ke to lahi e fakatātā e tau tauteuteaga ha lautolu. Ko e tau tauteuteaga pihia kua nakai lata ma e Kerisiano he ha magaaho. Ke he mena nei, pihia mo e tau faahi oti he moui Kerisiano, kua manako a tautolu ke fakatumau e tau tuaga tokoluga ne fakakehe e tau tagata he Atua mai he lalolagi, he taute e tau mena oti ke fakaheke ke he Atua.—Roma 12:2; 1 Kori. 10:31.
Ti ka ahiahi ke he tau matapatu mo e la i New York State po ke ke he falu la foki, he ahiahi ne fakatoka tuai po ke he o evaeva ke he tau matakavi kitekite, hūhū ki a koe ni: ‘Kua fakaata nakai he tapulu mo e tauteuteaga haaku e gali, meā, mo e lilifu he fale ka ahiahi au ki ai? Kua fakaata mitaki nakai ke he Atua kua tapuaki au ki ai? To tauhele po ke lekua kia e falu he foliga haaku?’ He tapulu mo e tauteuteaga ha tautolu, kia fakatumau a tautolu ke ‘fakalilifu e tau kupu he Atua, ha tautolu a Fakamoui ke he tau mena oti’!—Tito 2:10.