Puhala Fe Ka Lagomatai e Tautolu a Lautolu ne O Mai ke he Fakamanatuaga?
1. Ko e heigoa e fakamatalaaga malolō lahi ka foaki ia Mati 22, 2008.
1 Ia Mati 22, 2008, to totou miliona e tagata he lalolagi katoa ka moua e fakamatalaaga malolō lahi. Ko lautolu ka o mai ke he Fakamanatuaga to logona hagaao ke he fakaalofa lahi ha Iehova he foaki e lukutoto ma e tau tagata. (Ioane 3:16) To ako e lautolu hagaao ke he Kautu mo e puhala ka fakaaoga ai e Iehova ke fakamooli aki e finagalo haana ma e lalolagi katoa. (Mata. 6:9, 10) To kitia ni e lautolu e fakaalofa mo e kaufakalataha he tau tagata he Atua mo e logona e fakamokoi mafanatia.—Sala. 133:1.
2. Puhala fe ka lagomatai e tautolu e tau tagata fakaako Tohi Tapu ka o mai ke he Fakamanatuaga?
2 Tau Tagata Fakaako Tohi Tapu: Ko e falu ka o mai ko lautolu kua kamata laia ke fakaako Tohi Tapu mo tautolu. Uta a lautolu ke fakafeleveia ke he tau matakainaga. Fakamaama e tau feleveiaaga fakafaahi tapu, ti uta a lautolu ke kitekite fakakū ke he Fale he Kautu. Ka taute e lauga, to fakamalolō he tagata lauga a lautolu ia ke fakatumau ke holo ki mua fakaagaaga. Maeke ia koe ke fakaaoga e tau talahauaga he tagata lauga mo fakavēaga ke fakamalolō ke he tau tagata fakaako haau.
3. Ko e heigoa ka taute ke fakamalolō e tau tagata fakailoa ne kua lolelole fakaagaaga kua o mai?
3 Lautolu ne Lolelole Fakaagaaga: Ko e falu ka o mai ko e tau tagata fakailoa kua lolelole fakaagaaga. Lali ke fakafeleveia mafanatia ki a lautolu. Kalo mai he hūhū e tau hūhū fakatagata po ke talahau e tau mena ke fakafuafuakelea. He nakai leva e mole e Fakamanatuaga, kua lata e tau motua ke aahi a lautolu ne lolelole fakaagaaga ne kua o mai, nava ke he tau laliaga ha lautolu ke o mai, ti uiina mafanatia ke o mai he feleveiaaga he fakapotopotoaga ka hau.
4. Maeke fēfē ia tautolu ke lagomatai e tau tagata ahiahi?
4 Tau Tagata Ahiahi: Ko e falu ia lautolu ia ne o mai liga ko e tau tagata ne iloa e tautolu po ke tau tagata he magafaoa ne uiina e koe. Liga moua he falu e uiina he matagahua pauaki. Ka kitia e koe e tau tagata ne nakai iloa e koe, kia fakafeleveia atu mo e ui fakaalofa atu ki a lautolu. Liga kua nakaila o a lautolu ke he ha feleveiaaga ha tautolu he magaaho fakamua. He tutala ha mua liga maeke ia koe ke kumi puhala ke liu matutaki mo lautolu. He ahiahi fakatagata po ke hea fakakū he telefoni he gahoa e aho he mole e Fakamanatuaga, liga lali a koe ke feaki fakalahi atu e fiafia mo e foaki e fakaakoaga Tohi Tapu.
5. Ko e heigoa ha tautolu ka liga talahau ke kamata e fakaakoaga Tohi Tapu?
5 Kua maeke ke fakaaoga e tau vala tala he lauga Fakamanatuaga ke fakamatapatu aki e hafagiaga ke he tohi Fakaako he Tohi Tapu ka liu aahi atu. Ma e fakatai, ko e tagata lauga he Fakamanatuaga to totou ke he Isaia 65:21-23. He liu aahi atu, liga totoku e koe e lauga mo e pehē: “To fakakite atu e au falu fakamonuinaaga ne moua mai ha ko e poa lukutoto.” Ti tutala mogoia ke he lau 4-5 he tohi Fakaako he Tohi Tapu. Po ke pehē a koe, “Kua tokologa ne manamanatu ke he magaaho ka lauia a tautolu he fakamooliaga he perofetaaga ha Isaia.” Ti tutala mogoia ke he paratafa 1-3 he veveheaga 9. Taha puhala foki ko e talahau e tau kupu mai he tagata lauga he Fakamanatuaga, talahau hagaao ke he tohi Fakaako he Tohi Tapu, ti fakatātā e fakaakoaga.
6. Ko e heigoa e tau magaaho mitaki ka moua e tautolu he omaoma a tautolu ke he poakiaga ha Iesu ke fakamanatu e mate haana?
6 Kia mataala a tautolu takitokotaha ke he tau magaaho mitaki ke lagomatai e tau tagata fakaako Tohi Tapu, lautolu ne lolelole fakaagaaga, mo lautolu ka o mai. (Luka 22:19) To fakamonuina mooli e Iehova e ha gahua lahi ha tautolu he fekafekauaga ke he Kautu.